Më 1 gusht 1981, në një moment që do të shënonte një kthesë historike për industrinë e muzikës dhe televizionit, filloi transmetimi i MTV – Music Television. Me frazën ikonike “Ladies and gentlemen, rock and roll”, televizioni nisi transmetimin e parë, duke hapur një epokë të re ku muzika nuk dëgjohej më vetëm në radio apo disqe, por edhe shikohej në ekran.

Klipi i parë i transmetuar ishte “Video Killed the Radio Star” nga The Buggles një zgjedhje simbolike që parashikonte ndikimin e MTV në shndërrimin e yjeve muzikorë në ikona vizuale. Për herë të parë, pamja, stili dhe prezantimi vizual i artistëve u bënë po aq të rëndësishëm sa edhe muzika e tyre.

MTV solli në qendër të vëmendjes artistë të rinj si Madonna, Michael Jackson dhe Prince, të cilët e përdorën këtë medium për të ndërtuar identitetet e tyre artistike. Klipet e tyre revolucionarë u bënë pjesë e kulturës pop dhe ndikuan në modë, stil dhe rrëfim vizual në muzikë.

MTV nuk ishte thjesht një kanal – ishte një fenomen kulturor që ndryshoi mënyrën se si bota përjetonte muzikën. Ai hapi rrugën për një brez të ri artistësh dhe për një mënyrë të re konsumimi të artit muzikor, ku imazhi dhe tingulli bashkoheshin në një përvojë të pandarë.

44 vite më vonë, ndikimi i MTV vazhdon të ndihet në industrinë moderne të muzikës, duke mbetur simboli i një revolucioni kreativ që ndryshoi gjithçka./KultPlus.com