Më 29 gusht, bota e muzikës kujton lindjen e Michael Jackson (1958–2009), artistit që theu kufijtë e kohës dhe krijoi një epokë të re në skenën botërore. I quajtur shpesh “Mbret i Pop-it”, ai solli një stil unik që bashkoi ritmin, zërin dhe lëvizjet ikonike të vallëzimit, duke lënë gjurmë të pashlyeshme në historinë e artit.

Karriera e tij përfshiu suksese të jashtëzakonshme si albumet “Thriller”, “Bad”, “Dangerous” dhe “HIStory”, të cilat jo vetëm thyen rekorde, por frymëzuan miliona njerëz në mbarë botën. Përmes muzikës së tij, ai trajtoi tema universale, dashurinë, paqen, barazinë dhe shpresën për një botë më të mirë, përcjellë KultPlus.

Sot, në përvjetorin e lindjes, Michael Jackson kujtohet jo vetëm si këngëtar, kompozitor e valltar i jashtëzakonshëm, por si një ikonë që e ktheu artin në përjetësi. Muzika e tij vazhdon të tingëllojë si një urë mes brezave, duke na kujtuar se arti i madh nuk vdes kurrë./KultPlus.com