Vjollca Duraku
Festivali më i madh i muzikës klasike në vend, Chopin Piano Fest, mbrëmë ka mbajtur koncertin e tretë të edicionit të 15-të, me artistët e shquar austriakë Benjamin Schmid- Violinë dhe Markus Schirmer- Piano duke përçuar emocione jashtëzakonisht të thella te publiku, shkruan KultPlus.
Melodi të jashtëzakonshme, harmoni e paparë dhe ndjeshmëri të rralla njerëzore u përjetuan të mërkurën mbrëma përmes veprave të kompozitorit të shquar Franz Schubert, i cili përmes gjenialitetit të tij ka arritur të krijoj mes tij dhe publikut një lloj intimiteti personal të cilin nuk ka mundur ta shkëpusë as koha e kaluar prej gati 200 vitesh.
Ndërkaq, hakun e veprave në skenën tonë modeste ia dhanë artistët që kanë realizuar aktivitete koncertore në mbarë botën. Vepra e parë që u interpretua ishte: “Sonata no.3in g minor” që nisi me tinguj fare të lehtë të pianos, për t’i dhënë një tonalitet më të rëndë më pas violina. Një harmoni mes profesionistëve muzikorë mund të vërehej edhe nga një dëgjues amator i muzikës profesionale. Tinguj fisnikë të violinës së mjeshtrit Schmid rrënqethnin trupin për t’i zhveshur ndjenjat në një melankoli të thellë.
Violinisti Benjamin Schmid aktualisht është një nga violinistët më të rëndësishëm të kohës sonë, i cili ka deri tani ka mbajtur rreth 3000 performanca live. Cilësohet si një nga violinistët më të rëndësishëm në librin Violinistët e mëdhenj të shekullit të 20-të. Për kontributin e tij në skenë është nderuar me Çmimin Mozart, Çmimin Beethoven dhe Çmimin e Audiencës.
Vepra e dytë interpretuese ishte: “D.408- Hungarian Melody in B minor D.817” që u dha nga pianisti Schirmer. Vepra karakterizohej nga tinguj kryesisht të qetë që përmes notave muzikore shpaloste një histori të ndjeshme.
“Jam shumë i lumtur që jam sonte këtu para juve për të interpretuar pjesë të kompozitorit Schubert. Ky emër është njëri ndër emrat më të veçantë për ne. Kemi vendosur që të luajmë dy pjesë të vogla që të tregojmë shumëllojshmërinë dhe shumëdimensionalitetine kompozimeve të tij. Pjesa e parë është shumë e veçantë edhe pse për fat të keq nuk është shumë e ndëgjuar në skenë, por është njëra ndër pjesët më të pëlqyera të mijat” ka thënë pianisti Schirmer.
Pianisti Markus Schirmer është po ashtu një personalitet i vlerësuar i muzikës klasike. “Një piper në piano… muzikë që vjen direkt nga zemra, truri dhe majat e gishtërinjve” është një nga komentet që e identifikon saktë punën dhe artin e tij. Ai është profesor në Universitetin e Muzikësnë Graz të Austrisë dhe drejtor artistik i festivalit ndërkombëtar të muzikës ARSONORE.
Vepra e tretë e interpretuar ishte: “Rondo for Violin and Piano in B minor, D.895 op 70” dha një harmoni tingujsh të oborreve mbretërore. “Pjesën të cilën do ta luajmë tani nga komppozitori Franch Schubert është një kompozim që është realizuar dy vite para vdekjes së tij në vitin 1828, inspiruar nga një traditë e mrekullueshme. Shpresoj që ta shijoni” ka thënë violinisti Schmid.
Veprat tjera që u interpretuan ishin: “Grazer Galopp in C major, D. 925” dhe “Violin Sonata in A major, D.574 “Grand Duo”” që po ashtu dhuruan një kolazh tingujsh fantastik me të cilët kohë pas kohe përmes një frymëmarrjeje të thellë ushqehej artistikisht edhe vetë violinisti. Për artin e dhuruar ata u kthyen disa herë në skenë, duke u ‘detyruar’ të luanin edhe dy herë pas përfundimit të koncertit.
Pas koncertit, në një prononcim për KultPlus, violinistja e njohur shqiptare Sihana Badivuku e ka cilësuar violinistin Schmid si një muzicient shumëdimensional, përderisa koncertin në përgjithësi e ka përkufizuar si një përjetim të rrallë.
“Këtë violinist e përcjellë që nga një moshë më e re. Ai ka shumë çmime botërore me karrierën e tij të bujshme nëpër botë. Më vjen mirë ka ardhur edhe në Prishtinë përmes Chopin Piano Fest. Kam pasur rastin ta dëgjoj edhe më herët në Shkup me Filharmoninë e Maqedonisë, ku edhe atje ka qenë një përjetim shumë i rrallë. Është një ndër violinistët më multidimensional, për faktin se përpos klasicizmit dhe romantizmit që ai i zotëron si talent dhe dituri, ai është edhe një hulumtues i madh i shumë zhanreve në muzikë. Sonte të dy bashkë si ansambël treguan vërtetë një unitet dhe një përjetim të rrallë kamertal të kryeveprave të Schubert-it, dhe diçka shumë individuale nga ana e secilit artist. Është me të vërtetë një ansambël i rrallë që funksionon shumë bukur”, ka thënë violinistja e njohur Sihana Badivuku.
Ndërkaq, drejtoresha artistike e “Chopin…” Lejla Pula ka thënë se ndjehet e lumtur që në skenën vendore kanë arritur të sjellin një kategori të lartë muzicientëve të muzikës klasike.
“Jam shumë e lumtur që po shënojmë sivjet përsëri një bashkëpunim me artistët austriakë, të cilët kanë qenë prezentë në skenën e Chopin Piano Fest nga fillimi i edicionit të parë, në vitin 2010. Ka disa vite që kam tentuar t’i sjell në skenën tonë këta artistë, sepse është fjala vërtetë për një kategori shumë të lartë muzicientësh. Jam shumë e lumtur që e kanë pranuar ftesën. Sonte me të vërtetë kanë shfaqur një art jashtëzakonisht të lartë, një virtuozitet dhe një muzikalitet të mahnitshëm me muzikën e Franz Schubert. Jam shumë e lumtur që kjo duo na dhuroi art të jashtëzakonshëm. Ishte privilegj për ne që t’i kemi sonte në skenën e Chopin Piano Fest”, ka thënë drejtoresha Lejla Pula.
Koncerti i radhës i Chopin Piano Fest do të mbahet pianistin Istvan Lajko më 16 maj, në ora 20:00 në Amfiteatrin e Bibliotekës Universitare./ KultPlus.com
