Prifti katolik: Nëse në Europë nuk më pranojnë bashkë me fqinjin tim i cili shkon në xhami, refuzoj ofertën e vazhdoj jetën

Lidhur me debatet për Integrimin e Shqipërisë në Bashkimin Europian ka reaguar edhe prifti katolik, i Arkidioqezës Metropolitane në Tiranë, Dom Gjergj Meta.

Në një postim në Facebook ai shprehet se ‘nëse është e vërtetë që Europa nuk na pranon, sepse në Shqipëri ka myslimanë, atëherë unë nuk dua të shkoj në Europë’.

Ky mesazh i tij tashmë po qarkullon mjaft shumë nëpër rrjete sociale, duke u quajtur edhe si thënia e vitit.

Ky është mesazhi i plotë:

Nëse është e vërtetë që Europa nuk na pranon, sepse në Shqipëri ka myslimanë, atëherë unë nuk dua të shkoj në Europë, sepse preferoj të kaloj jetën me miqtë e mi të zemrës me të cilët jam rritur, kam ndarë të mirën e të keqen, më janë gjendur e u jam gjendur, por të cilët shpallin një kredo të ndryshme nga e imja, se sa të jetoj me një holandez, a gjerman, a francez me të cilin shpall të njëjtën kredo.

Nëse në Europë nuk më pranojnë bashkë me fqinjin tim i cili shkon në xhami, refuzoj ofertën e vazhdoj jetën!

Dom Gjergj Meta./ KultPlus.com