Keira Knightley thotë që secila grua që e njeh ka qenë e ngacmuar seksualisht

Aktorja e njohur britanike, Keira Knightley, ka folur së fundmi për atë se si ngacmimi seksual është shndërruar në një problem të madh për secilën grua, dhe ka treguar që nuk njeh asnjë person në jetën e saj që nuk ka qenë pre e këtij fenomeni të keq, përfshirë këtu edhe veten.

Ylli 36-vjeçar i kinematografisë ka bërë të ditur se, nga prekja fizike e deri tek zhveshja e pahijshme, secila grua është ngacmuar apo sulmuar në një mënyrë apo tjetër.

Në një intervistë për revistën “Harper’s Bazaar”, e cila del në shitje të mërkurën më 9 qershor, aktorja hollywoodiane tha se kjo situatë për të ishte shumë e rëndë dhe depresive.

E pyetur nëse është ngacmuar ndonjëherë, Knightley deklaroi: “Po! Dua të them, secila grua është ngacmuar ndonjëherë. Në kuptimin e plotë të fjalës, unë nuk njoh një grua të vetme e cila nuk ka përjetuar ngacmim në një formë apo tjetër, duke filluar nga prekja fizike, zhveshja e pahijshme apo sharja me fjalë kërcënuese si ‘do të ta pres fytin, apo do të të qëllojë grushte fytyrës. Vetëm kur gratë filluan t’i përmendin të gjitha masat e sigurisë që i ndërmarrin sa herë kthehen në shtëpi në orët e vona të natës, e kuptova që edhe unë i bëjë të gjitha këto gjëra për t’u siguruar që të kthehen shëndoshë e mirë në shtëpi. Më e keqja është se unë i bëjë këto gjëra pa i menduar fare, pra janë shndërruar në sjellje rutinore të jetës”.

Knightley në të kaluarën ka folur për faktin se nuk ndihet rehat të xhirojë skena intime në filma, dhe atë se si gratë pritet të jenë flirtuese ose amënore.

“Nëse ndonjëherë do të vendosja ta realizoja një film i cili e përshkruan rrugëtimin e të qenit nënë dhe fokusohet në pranimin e trupit tënd si grua, atëherë më vjen keq por këtë film do të pranoja ta realizoja vetëm me një regjisore. Nuk kam asnjë kufi në rolet që i pranoj, por tregohem e kufizuar kur punoj me burra”.

Kurse në intervistën e fundit, aktorja që është nënë e dy fëmijëve dhe e cila besohet se është tërhequr nga drama historike, “The Essex Serpent”, për t’u kujdesur për fëmijët e saj në kohën pandemisë, po ashtu tregoi se është kujdesur që ta mbajë familjen në disponim të mirë gjatë karantinës.

“Ne e kemi një trampolinë në kopsht dhe kështu vendosëm që sa herë të përdorim atë, të vishemi me fustane. Unë vendosja buzëkuq dhe e vishja secilin fustan të markës ‘Chanel’ që e posedoj, kurse vajza ime Edie vendoste fjongo ‘Chanel’ në flokë dhe krahë zanash. Dua të them, çfarë kuptimi ka të posedosh veshje kaq të bukura të cilat vetëm qëndrojnë të palosura në gardërobe, derisa jashtë ndihesh sikur ka ndodhur apokalipsi dhe gjithçka lidhet me frikën. Më dukej e rëndësishme që të gjithë të ndiheshim të lumtur, për të mirën e fëmijëve”.

Keira Knightley i ka dy fëmijë, Edie dhe Delilah, me bashkëshortin James Righton, i cili është muzikant dhe ish-anëtarë i bendit “Klaxons”. / KultPlus.com

Keira Knightley: Është privilegj të jesh nënë, por është shumë vështirë të rritësh fëmijë

 

Keira Knightley është bërë nënë para tre vitesh, ndërsa tash ka folur haptas lidhur me vështirësitë e të qenit prind, duke rrëfyer se nuk është aspak lehtë të rritësh fëmijë.

Aktorja e famshme britanike luan rolin kryesor në filmin “Colette”, i bazuar në jetën e shkrimtares franceze, Sidonie-Gabrielle Colette dhe me këtë rast ka komentuar për mënyrën aktuale të jetesës në shoqëri.

“Jetojmë në një botë ku dominojnë meshkujt dhe më duket se kam përgjegjësi të ndihmoj në krijimin e një bote, ku femrat dhe meshkujt do të jenë të barabartë”, ka thënë 33-vjeçarja.L

Më tej, ajo ka folur edhe për përvojën e të qenit nënë duke thënë se është privilegj, mirëpo nuk është lehtë të kujdesesh për fëmijët.

“Mendoj se femrat nuk respektohen sa duhet për maratonën mendore dhe fizike nëpër të cilën kalojnë kur bëhen nëna”.

“Vij nga një vend ku nënat janë të privilegjuara. Kam mbështetjen e sistemit, ndërtoj karrierë dhe mund ta përballoj (edhe financiarisht) rritjen dhe kujdesin ndaj fëmijës, mirëpo prapëseprapë e kam të vështirë”.

“Është në rregull ta thuash dhe ta pranosh se nënat për çdo ditë luftojnë me mungesën e gjumit, ndryshimet hormonale dhe problemet të tjera të llojllojshme”, ka thënë Knightley. /KultPlus.com