Etiketë: Kisha e Shen Merise

Përfundon restaurimi i plotë i kishës së Shën Mërisë, në Barmash të Kolonjës

Posted on by Kult Plus

Kisha e Shën Mërisë, në fshatin Barmash të Kolonjës, është rikonstruktuar plotësisht. Lajmi u dha nga bashkia Kolonjë e cila ndau në rrjetet sociale edhe imazhet e objektit të kultit, Monument Kulture i Kategorisë I.

“Falë insistimit të bashkisë Kolonjë, investimit nga ana e Ministrisë së Kulturës dhe përkushtimit të drejtorisë së Monumenteve të Kulturës Korçë sot kisha e Shën Mërisë në Barmash është totalisht e rikonstruktuar”, shkruhet në faqen online të bashkisë Kolonjë.

Kisha e Shën Mërisë është monument i kategorisë së parë, me vlera të mëdha, e cila i përket shekullit të XVI.

Prej muajit shtator të vitit të kaluar, kisha e Shën Mërisë në fshatin Barmash iu nënshtrua punimeve restauruese. Duke iu përmbajtur projektit të miratuar, punimet nxorrën në pah kishën, gjurmët e narteksit dhe elementët përbërës të tij, duke ruajtur vlerat e kësaj pasurie kulturore.

Këto ndërhyrje restauruese u kryen me investime të buxhetit të shtetit, nën mbikëqyrjen e Institutit Kombëtar të Trashëgimisë Kulturore dhe DRTK Korçë./atsh/KultPlus.com

Kisha e Shën Mërisë në Bënjë, monument kulture me vlera të veçanta kulturore e historike

Posted on by Kult Plus

Kisha e Shën Mërisë në Bënjë, Përmet, monument kulture i kategorisë së I-rë, është një objekt me vlera të veçanta, ndërtuar mes viteve 1789 dhe 1891.

Sipas Drejtorisë së Kulturës Kombëtare, Gjirokastër, kisha filloi së ndërtuari në 1789 dhe ndërtimet e zbukurimet mbaruan përfundimisht në 1891. Ajo u mbyll në 1967 dhe u rihap në 1991.

Restaurimi i fundit daton 2017. Hyrja për në kishë bëhet nga ana e perëndimit nëpërmjet një harkade e përbërë nga dy kollona guri.

Narteksi përbëhet prej dy katesh. Hipja për në katin e dytë bëhet nëpërmjet shkallëve të drunjta në krahun e majtë.

Hyrja për në naos bëhet nëpërmjet një dere në qendër të narteksit duke zbritur tre këmbë shkalle. Gjithashtu ka dhe një hyrje të dytë prej një dere në jug e cila lidhet me hajatin e hapur.

Naosi përbëhet nga katër kolona që lidhen midis tyre nga harqe me qemer dhe në qendër ngrihet kupola cilindrike e përbërë me katër dritare të ngushta. Nga të dyja faqet anësore veri –jug përbëhet nga nefe cilindrike me drejtim lindje- perëndim.

Naosi ndriçohet nga katër dritare të mëdha në faqet veriore dhe jugore ambienti i altarit ndahet nga naosi nëpërmjet ikonostasit të punuar me gdhendje në dru arre, me pas ndodhet apsida në formë gjysmë rrethore.

Këmbanorja është me dy hapësira mbuluar me harqe dhe me kolonë në mes, e cila ndodhet sipër në faqen ballore të hyrjes për në kishë.Në vitin 1967 u mbyll nga regjimi komunist dhe u rihap në korrik 1991.

Në datë 21 Nëntor, kjo kishë pret pelegrinët e luginës, që festojnë ditën e ‘Shën Mërisë së Bënjës’. /atsh/ KultPlus.com