Poezi nga Drita Çomo.
Lëkunden pishat nën retë që ikin
Ikin e ikin retë nëpër shi…
Unë pres te shoh pas reve pak qiell
Ashtu siç pres pasditeve, të më telefonosh ti
Po ti s’dukesh gjëkund. Ku paske humbur,
Ka kaq ditë që pres. Dhe bie shi…
Si mund të jetoj, pa pak qiell të kaltër
Si mund të jetoj, pa zërin tënd, pa ty
Ti do të vish, unë e di, do vish patjetër
Po unë dua të vish tani , nëpër shi
Pastaj retë do të ikin dhe do dalë dielli
Po unë dua diellin të ma sjellësh ti
1978./ KultPlus.com