Dyshja e njohur, këngëtarja me famë botërore Dua Lipa dhe aktori britanik Callum Turner, kanë nisur një kapitull të ri në jetën e tyre profesionale. Çifti ka themeluar këtë javë kompaninë e re të produksionit filmik me emrin TwentyTwo Films Limited, të cilën e zotërojnë në pjesë të barabarta.

Sipas dokumenteve zyrtare, kompania do të fokusohet në “produksionin e filmave artistikë dhe programeve televizive”. Ky hap shihet si një lëvizje e ngjashme me atë të aktores Margot Robbie dhe bashkëshortit të saj, producentit Tom Ackerley, të cilët me kompaninë LuckyChap kanë realizuar filma të suksesshëm si I, Tonya, Saltburn dhe Barbie, ku edhe Dua pati një rol të shkurtër.

Një burim afër çiftit ka bërë të ditur se “Dua dhe Callum janë shumë ambiciozë dhe kanë plot ide për projekte që duan t’i realizojnë së bashku. Për Duan, kjo është edhe një mundësi për të pasur më shumë kontroll kreativ nëse vendos të marrë pjesë në produksione të tjera filmike”.

Ndërkohë që Dua Lipa vijon turneun e saj botëror, Callum Turner është i angazhuar me disa projekte të reja. Ai do të shfaqet në komedinë romantike One Night Only dhe thrillerin Rosebush Pruning, të cilët pritet të publikohen vitin e ardhshëm. Po ashtu, aktori ka nisur xhirimet për serialin e ri të Apple TV, Neuromancer./KultPlus.com