Festivali Ndërkombëtar i Filmit në Prishtinë – PriFest ka prezantuar filmat që do të garojnë në kategorinë e metrazhit të mesëm, një program i rrallë dhe unik që sjell përpara publikut katër produksione evropiane me tema të guximshme dhe aktuale.

Filmat e kësaj kategorie zgjasin nga 25 deri në 60 minuta dhe PriFest është i vetmi festival në rajon që e kultivon këtë format, duke i dhënë hapësirë kineastëve të rinj e të afirmuar të eksperimentojnë jashtë kornizave tradicionale të metrazhit të shkurtër apo të gjatë.

Në garë do të jenë:

“Two People Exchanging Saliva” nga Natalie Musteata dhe Alexandre Singh (Francë) – premierë rajonale. Filmi sjell një realitet të distopik ku puthjet janë të ndaluara dhe dënohen me vdekje, ndërsa historia rrëfen lidhjen e ndaluar mes dy grave në një shoqëri të mbërthyer nga frika dhe ndëshkimi.

“Nikah” nga Mukaddas Mijit dhe Bastien Ehouzan (Francë) – premierë. Ky film e çon publikun në vitin 2017 në rajonin e ujgurëve, ku një grua 27-vjeçare përballet me presionet për martesë, ndërsa përmes komunikimeve virtuale me një mike në Paris përballet me një zgjidhje të papritur.

“Princi” nga Alex Sardà (Spanjë) – premierë. Një djalë i rritur në një familje borgjeze, dhe njëkohësisht valltar në një trupë bashkëkohore, sheh jetën e tij të përmbyset pas arrestimit të babait për korrupsion. Ai detyrohet të zgjedhë mes fshehjes së së vërtetës dhe përballjes me realitetin.

“Ishulli i Harresës” nga Jamie Vella (Malta) – premierë botërore. Filmi e çon shikuesin në një botë poetike ku Odiseu dhe Kalipso jetojnë në një ishull të qetë, por zbulimi i një të vërtete të mundshme mbi identitetin e Odiseut e vendos atë përballë një dileme të madhe.

PriFest do të zhvillohet nga 9 deri më 14 shtator, në Kino Armata, Prishtinë, duke sjellë një përzgjedhje të pasur filmash që eksplorojnë tema si ndalimet shoqërore, presioni familjar, privilegjet klasore dhe identiteti personal./KultPlus.com