Gili Hoxhaj
Blerta Sejdija është studentja nga Kosova e cila është rritur dhe studion në Republikën Çeke. Vetëm 18 vjeçare, ajo ka krijuar një projekt të sukseshëm, të cilin e ka titulluar ‘Beat Sexism’.
Suksesi i projektit ‘Beat Sexism’ përveç se u ka ndihmuar shumë vajzave e grave të cilat janë përballur me pabarazinë, ka shënuar edhe një sukses tjetër që lidhet me zgjerimin e platformës edhe në vende të tjera të botës. Klubet ‘Beat Sexism’ tashmë ekzistojnë në 19 shtete të botës, në Evropë, Azi, Amerikë e Australi.
Blerta Sejdija tregon për KultPlus se vizionin për ta krijuar një projekt në dobi të shoqërisë e kishte pasur qysh herët, por që nuk kishte pasur guxim e as ide të qartë.
Projekti i saj “Beat Sexism”, tashmë numëron dy vite që nga hapat e parë të implementimit dhe është një platformë për t‘i treguar ngjarjet rreth pabarazisë që gratë dhe vajzat i përjetojnë çdo ditë.
“Seksizmi ka qenë gjithmonë një çështje e rëndësishme për gratë”, shprehet Blerta Sejdija për KultPlus.
Ajo thotë se edhe pse vajzat dhe gratë kanë bërë hapa të mëdhenj që nga shekulli 20, ato ende nuk kanë fituar barazi të plotë gjinore. Ajo thotë se mungesa e pabarazisë është e dukshme edhe sot tek shqiptarët, andaj problemet e tyre janë ato që i trajton Sejdija në projektin e saj, e cila shprehet se disavantazhet me të cilat përballen gratë dhe vajzat janë një burim kryesor i pabarazisë.
“E quajta ‘Beat Sexism’. Pse këte emër? Në përkthim dmth – “Lufto kundër seksizmit“. Besoj që vetëm nga emri i projektit njerëzit do ta kuptojnë qëllimin e tij. Një ditë të janarit fillova të punoj në këtë projekt duke shkruar se çfarë dua të arrij me të, dhe si do të marr përkrahje nga tjerët. U befasova se sa shpejtë morra reagime pozitive. Ky reagim pozitiv më motivoi mua të mos ndalem kurrë. Shumë shpesh gratë dhe vajzat janë të diskriminuara në arsim, përfaqësim politik, në familje, treg pune etj”, tregoi Blerta Sejdija për KultPlus.
Projekti i iniciuar nga Blerta Sejdija, dëshiron që ti afrojë gratë dhe vajzat më afër ligjit, pra ti njoftojë ato me të drejtat e tyre ligjore.
“Nëpërmjet këshillave tona ligjore dhe konfidenciale, ne mundohemi t’ju ndihmojmë vajzave dhe grave përmes ligjit. Vendosa me këtë projekt të jap këshilla falas ligjore vajzave dhe grave që kanë nevojë për të. Këshilltarët tanë ligjorë janë të kualifikuar në fushën e ligjit. Ata sigurojnë një hapësirë të sigurt për gratë që të flasin për situatën e tyre dhe të marrin këshilla profesionale eksperte për t’u mundësuar atyre që të marrin vendime të rëndësishme për të ardhmen e tyre”, tregoi Sejdija.
“Edhe pse unë nuk jetoj në Kosovë, kam pasion për vendin tim dhe historinë e tij”, thotë Blerta.
Blerta Sejdija e cila jeton në Republikën Çeke është studente e Marrëdhënieve Ndërkombëtare dhe Diplomacisë. Ajo tregoi për KultPlus se synimi i saj është që ta promovojë Kosovën dhe shqiptaret në përgjithësi sa më shumë me anë të projekteve të ndryshme. / KultPlus.com
