ISHMT memorandum bashkëpunimi me Ministrinë e Kulturës për zbatimin e të drejtës së autorit

Inspektorati Shtetëror i Mbikëqyrjes së Tregut si dhe Ministria e Kulturës nënshkruan një memorandum bashkëpunimi me qëllim mbikëqyrjen e zbatimit të të drejtës së autorit në Shqipëri.

Memorandumi i bashkëpunimit u nënshkrua nga Kryeinspektori i ISHMT-së, Gazmend Osmani si dhe sekretarja e përgjithshme e Ministrisë së Kulturës, Zerina Bruci.

Përmes këtij memorandum palët konfirmojnë vullnetin dhe angazhimin maksimal për të identifikuar, siguruar dhe zbatuar të gjitha mjetet e nevojshme ligjore dhe ekzekutive për zbatimin dhe përmirësimin e kuadrit ligjor dhe institucional të veprimtarisë të operatorëve ekonomik.

Njëkohësisht konfirmojnë vullnetin e mirë dhe vendosmërinë për të promovuar mirëfunksionimin e institucioneve përmes bashkëpunimit dhe bashkërendimit në mënyrë konstruktive dhe thelbësore për realizimin e qëllimit të këtij memorandumi.
Po ashtu, palët angazhohen për të përmbushur detyrimet që burojnë në legjislacionin kombëtar për të drejtën e autorit.

Kryeinspektori Gazmend Osmani deklaroi se ISHMT e konsideron objektiv prioritar rritjen e eficiensës së mbikëqyrjes së veprimtarisë tregtare të operatorëve ekonomikë, bazuar në respektimin dhe garantimin e të drejtave të pronësisë intelektuale.

“Përmes këtij memorandum, ne angazhohemi të bashkëpunojmë dhe shkëmbejmë informacion për mbrojtjen dhe respektimin e të drejtave të autorit dhe të drejtave të tjera të lidhura me to”, tha Osmani.

E drejta e autorit dhe te drejtat të lidhura me to, janë thelbësore për krijimtarinë njerëzore, duke u dhënë në këtë mënyrë nxitje krijuesve në formën e njohjes dhe shpërblimeve të drejta ekonomike.

Sipas këtij sistemi të drejtash krijuesit janë të siguruar që veprat e tyre mund të shpërndahen pa frikën e kopjimit të paautorizuar dhe piraterisë. Kjo është për të ndihmuar rritjen e aksesit dhe për të shijuar kënaqësinë e kulturës, njohurive dhe argëtimeve në të gjithë botën. / atsh / KultPlus.com

E drejta e autorit përfshihet në Kodin Penal të Shqipërisë

Shkelja e të drejtave të autorit po shihet me përparësi nga qeveria shqiptare, e cila përmes paketës së ndryshimeve në Kodin Penal, parashikon burgim deri në 3 vjet.

Ministrja e Kulturës, Elva Margariti, gjatë një bashkëbisedimi sot në Tiranë, me grupet e interesit mbi ndryshimet e Kodit Penal, që përfshijnë një nen mbi ashpërsimin e sanksioneve për shkeljen e të drejtave të autorit, u shpreh se Ministria e Kulturës e ka parë gjithnjë me përparësi këtë çështje dhe tani vjen me kornizë të re ligjore, që i përgjigjet kërkesave dhe nevojës së këtij sektori.

Margariti tha se, “përfshira e të drejtës së autorit në Kodin Penal, vjen si rrjedhojë e reflektimit të domosdoshëm. Kodi aktual ka disa parashikime të pamjaftueshme për mbrojtjen e pronësisë intelektuale, apo riprodhimin e paautorizuar të veprës së tjetrit”.

“E drejta e autorit nuk mund të jetë e pambrojtur dhe ata që abuzojnë me këtë pasuri duhet të ndëshkohen. Ndryshimet parashikojnë gjithashtu ngritjen e mekanizmave për ta bërë atë funksional në çdo drejtim”, – tha ajo.

Neni i shtuar në Kodin Penal parashikon që “shpërndarja, komunikimi në publik, shitja, ofrimi për shitje, furnizimi, eksportimi ose importimi për qëllime të tërthorta apo të drejtpërdrejta përfitimi, i veprës së mbrojtur nga e drejta e autorit pa pëlqimin e autorit ose e mbajtësit të së drejtës përbën kundërvajtje penale dhe dënohet me gjobë ose me burgim deri në dy vjet”.

Me ndryshimet e reja, kur kjo vepër kryhet në bashkëpunim ose më shumë se një herë, dënohet me gjobë ose me burgim deri në tre vjet.

Përfaqësues nga grupet e interesit të pranishëm në këtë takim u shprehën në mbështetje të ndryshimeve ligjore që forcojnë masat për mbrojtjen e të drejtës së autorit dhe u bënë pjesë e bashkëbisedimit me propozime konkrete, për mekanizmat funksionalë të ligjit/ATSH./KultPlus.com