Etiketë: Festivali i Kitares

Në një mbrëmje magjike nën tingujt e kitarës, qyteti bregdetar i Himarës u mbush me muzikë, energji dhe emocion, duke i dhënë një mbyllje madhështore edicionit të nëntë të ‘Albania Guitar Festival’.

Agron Peni dhe trioja e tij dhuruan një performancë të jashtëzakonshme, me disa nga kompozimet më të njohura, duke sjellë në skenë virtuozitetin dhe shpirtin ballkanik të kitarës.

Trupa e baletit profesionist ndezi atmosferën me ritmet pasionante të rumbas dhe flamencos, duke krijuar një sinergji të jashtëzakonshme mes muzikës dhe vallëzimit.

Mbrëmja u përmbyll me plot energji nga këngëtari brazilian Eclesio Ramos de Souza, i cili interpretoi hitet më të njohura të muzikës latine dhe i dha skenës një atmosferë plot gëzim dhe pozitivitet.

Ritmet tropikale, bashkë me interaksionin e ngrohtë me publikun, e bënë këtë natë të bukur për të pranishmit.

Ky edicion solli në Shqipëri 16 artistë ndërkombëtarë dhe njëjtë si tetë edicionet e shkuara nën drejtimin e drejtuesit artistik Denis Bizhga, synon promovimin e muzikës së mirë dhe kulturës shqiptare.

Ky koncert u realizua nën kujdesin e veçantë të kryetarit të Bashkisë Himarë, Vangjel Tavo, dhe shënoi jo vetëm përfundimin e festivalit, por edhe një promovim të jashtëzakonshëm të kulturës, traditës dhe potencialit turistik të Himarës./atsh/KultPlus.com

Festivali i Kitarës ka arritur në edicionin e 7-të të tij dhe entuziazmi për këtë event tërheqës muzikor është në rritje. Edicioni i sivjetshëm vazhdon traditën e përkushtimit ndaj muzikës, si dhe mbështetjen ndaj talenteve të reja. Ky festival është i njohur për promovimin e muzikës së kitarës në të gjitha  formatet dhe stilet e saj. Nga flamenco deri tek klasike, jazz-i dhe rock-u, audienca do të ketë mundësinë të shijojë një varg performancash të talentuara nga muzikantët më të mirë të kitarës.

Drejtori Artistik i Festivalit, Dr. Denis Bizhga u shpreh se festivalet muzikore janë institucione artistike që promovojnë ngjarje artistike dhe ndikojnë drejtpërdrejt në zhvillimin e kulturës dhe një turizmi muzikor.

Pjesëmarrës në këtë edicion të festivalit do të jenë personalitete të njohura të botës së kitarës. Njëri prej tyre është Marko Battaglia, një virtuoz i kitarës nga Italia.

Battaglia do të performojë në 3 qershor në sallën “Tonin Harapi” në Tiranë.

Në 6 qershor në Krujë, duo nga Danimarka Gantriis-Zimmermann do të ofrojë një udhëtim magjepsës nëpër një hartë muzikore të botës, ku muzika popullore dhe këngët e vendeve të ndryshme riinterpretohen ose aranzhohen në atë mënyrë që të lindë muzika e re, frymëzuar nga traditat.

Nga Viena, duo Pavlova – Böhm sjell në 16 qershor në Elbasan dhe 17 qershor në sallën “Tonin Harapi” në Tiranë “Danub Impressions”.

“Danub Impressions” sjell një përvojë të rrallë muzikore, e cila shkon përtej vetëm për të dëgjuar tingujt, por edhe për të shijuar historinë, kulturën dhe lidhjet e muzikës me mjedisin ku është krijuar.

Për të mbushur festivalin me magjinë e tij,  kitaristi i famshëm Jose Maria Gallardo del Rey do të performojë në 1 korrik në sallën “Tonin Harapi” në Tiranë.