Sipas gazetës “The Mail on Sunday”, personazhi i aktorit Daniel Craig, spiuni më i famshëm në botë, James Bond, do të jetë baba i një vajzë pesë vjeçare, Mathilde, në filmin e ardhshëm “No Time To Die”. Agjenti 007 këtë fëmijë do ta ketë me Dr. Madeleine Swann, e cila në film portretizohet nga aktorja e njohur franceze, Lea Seydoux.

Rrëfimi i filmit të shumëpritur është zbuluar online javën e kaluar, kur orari ditorë i cili u tregon aktorëve ku duhet të shkojnë për të xhiruar, doli në shitje në eBay, transmeton Koha.

Ky orar e përshkroi një skenë ta caktuar të filmit në Itali, që u realizua vitin e kaluar dhe agjentja Nomi vjen përkrah doktoreshës Swann dhe vajzës së saj, Mathilde, e cila në film portretizohet nga aktorja, Lisa-Dorah Sonne.

Një burim i afërt ka raportuar se agjenti Bond vjen si baba në këtë projekt, pasi protagonisti Daniel Craig, i cili e portretizon këtë rol për herë të fundit në karrierën e tij, ka dashur ta befasojë publikun me këtë vazhdim të filmit.

Gjithashtu është bërë e ditur se fakti që producentët dhe regjisori i filmit kanë vendosur ta shndërrojnë agjentin karizmatik në baba të një 5-vjeçareje në këtë film, i ka hapur dyert për krijimin e momenteve të reja dhe të fuqishme për këtë personazh edhe në të ardhmen.

Ngjarja e filmit “No Time To Die” zë vend pesë vjet pas ngjarjeve të zhvilluara në vazhdimin e fundit, Spectre”, dhe e sjellë agjentin 007 duke e shijuar pensionimin në Jamaica, së bashku me doktoreshën Swann, para se të detyrohet ta shpëtojë botën dhe një herë të fundit nga një pandemi biologjike.

Lansimi i filmit nëpër kinema është shtyrë për muajin nëntor për shkak të pandemisë së koronavirusit, dhe pritet ta tërheq një numër të madh të shikuesve, pikërisht për faktin se Daniel Craig do të përshëndetet me këtë personazh ikonik. / KultPlus.com

Një shpërthim në setin e filmit të ri “James Bond”, në studiot “Pinewood”, ka lënduar një pjesëtar të ekuipazhit dhe ka dëmtuar skenën

Shpërthimi i dëmtoi ambientet jashtë studios së famshme të “007”-s, në Buckinghamshire ku po filmohet seria. Askush nga ata që punonin brenda në studio nuk është lënduar, por një pjesëtar i stafit jashtë ka pësuar lëndime të lehta.

E përditshmja “The Sun” shkruante se një shpërthim i trefishtë kishte ndodhur, pasi një skenë shkoi keq.

E gjithë kjo vjen pasi ylli i “James Bond”, Daniel Craig u lëndua muajin e kaluar ndërsa po xhironin në Xhamajka, çka e nënshtroi aktorin 51-vjeçar ndaj një operacioni të lehtë në kyç, që kërkonte dy javë rehabilitim. Filmi i 25-të i serisë “Bond” do të jetë i pesti i Craig në rolin e “007”-s.

Fituesi i çmimit “Oscar”, Rami Malek do të luajë në rolin negativ në filmin e shumëpritur, që do të përcjellë zyrtarisht Craig pas 13 vitesh si “James Bond”. Po ashtu kthehen Ralph Fiennes, Ben Whishaw, Rory Kinnear, Naomie Harris dhe Jeffrey Wright.

Prodhimi i filmit është shtyrë në mënyrë të përsëritur, për shkak të mospajtimeve me “skript”-in, çka ka bërë që të zëvendësohej regjisori Danny Boyle me Cary Fukunagan, në shtator. Filmi pritet të dalë në kinema në SHBA, Britani dhe Francë më 8 prill të vitit 2020.

Filmbërësit e James Bond thanë se drejtori i filmit të ardhshëm për agjentin sekret britanik do të jetë amerikani Cary Joji Fukunaga.

Është njoftuar se xhirimi i filmit të 25-të rreth Bond do të fillojë më 4 mars të vitit të ardhshëm dhe do të shfaqet në kinema më 14 shkurt 2020.

Fukunaga do të zëvendësojë britanikun Deny Boyle, largimi i të cilit zhvendosi shfaqjen e planifikuar, transmeton KosovaPress.

Deri tani, producenti amerikan ka punuar në serinë televizive “True Detective” dhe në filmin e luftës “Beasts of No Nation”, ku Idris Elba interpretoi rolin udhëheqës, ndërkohë që referohej si emri më i mundshëm për rolin e agjentit 007./KultPlus.com

Aston Martin planifikon të rivendosë prodhimin e modelit origjinal DB5 që u përvetësua në filma rreth agjentit sekret britanik 007 më shumë se gjysmë shekulli më parë.

Aston Martin DB5 debutoi në ekran në vitin 1964 në “Goldfinger” me Sean Conery, dhe ri-performoi rolin e makinës zyrtare James Bond një vit më vonë në film Thunderball.

Prodhimi i versionit të ardhshëm të DB5 do të jetë i kufizuar në vetëm 25 kopje dhe çmimi i kësaj makine në Britani do të jetë 2,75 milionë funta, duke përjashtuar taksat.

Dorëzimi i parë i automjeteve për blerësit dhe kolektorët e pasur është planifikuar për vitin 2020, por pronarët e ardhshëm të këtij Aston Martini nuk do të jenë në gjendje të vozitin atë në rrugët e qyteteve të tyre, pasi makina nuk do të regjistrohet për ngasje në rrugë publike./KultPlus.com

Zërat e ditëve të fundit se Idris Elba do të interpretonte rolin e James Bond në kapitullin e ri të sagës rezultuan tërësisht të pavërteta.

Përgënjeshtrimi vjen nga vet regjisori Antoine Fuqua, i cili, sipas “Daily Star”, ka pasur edhe një debat të fortë me producenten Barbara Broccoli, mbi mundësinë për t’ia dhënë rolin e 007 një aktori me ngjye, pas Daniel Craig.

Edhe menaxherët e Idris Elba mohuan të kenë pasur ndonjëherë dijeni apo bisedime mbi këtë çështje dhe se gjithë ketë çështje spekulative e kanë mësuar përmes tabloidëve.
Idris Elba në fakt përflitej prej kohësh për të marrë rolin e James Bond, së bashku me Tom Hiddleston, Henry Cavill dhe Tom Hardy.

Nga kapitulli i ri i sagës mungon titulli dhe kasti përbërës, por fakti i vetëm i sigurt është data e publikimit; 8 nëntor 2019./KultPlus.com

007 i ardhshëm, mund të jetë Idris Elba. Është vetë aktori që ka postuar në “Twitter” një mesazh të koduar, që gjithsesi, lë të mendosh se ai mund të jetë James Bondi i ri.

Ditë pas raporteve se një prodhues i serisë i ka propozuar atij të bëhet 007 i ri, Irdis Elba shkruan në “Twitter”: Emri im është Elba, Idris Elba…Fansat e konsiderojnë këtë si një sinjal se ai mund të jetë James Bondi i ri pasi Daniel Craig të largohet, vitin e ardhshëm.

Ka pasur në fakt zëra që e lidhnin Idris Elbën me rolin e Bondit që në 2014, zëra këto që ai as nuk i ka konfirmuar dhe as nuk i ka mohuar. Aktori 45-vjecar është bërë i njohur për rolet e tij në “Star Trek, Luther dhe Thë Wire dhe në të shkuarën ai ka thënë se është shumë i moshuar për të marrë rolin e të famshmit 007.

Por, ai asnjëherë nuk i ka shpëtuar spekulimeve dhe ka thënë se i duket sikur një thesar kombëtar është i lidhur me Bondin. Më herët këtë javë, kishte raporte se bosja e filmave Bond, Barbara Broccoli, ka thënë se ka ardhur koha që një aktor me ngjyrë të veshë kostumin e 007.

Seria e famshme ka nisur në vitet 1960 me Sean Connery në rol. Filmi i ri Bond do të dalë në kinema në tetor 2019, drejtuar nga Danny Boyle dhe pritet të jetë i fundit për Daniel Craig, pas përmbushjes së kontratës së tij 5-vjeçare.

Craig ishte aktori i gjashtë që e merrte rolin pas Sean Connery, George Lazenby, Roger Moore, Timoti Dalton dhe Pierce Brosnan./ KultPlus.com