Mbrëmja e sotme solli një atmosferë fantastike në Pallatin e Kongreseve, pasi zëri i Elsa Lilës kumboi në koncertin e saj të parë recital në Tiranë.
Me koncertin të titulluar “Finalmente Elsa” këngëtarja është rikthyer në qytetin e saj, nga ku nisi shumë vite më parë.
Me sharmin e saj Elsa Lila ka preferuar të qëndrojë në veshjen klasike në ngjyrat bardh e zi.
Në nisje të koncertit recital artistja e njohur ka falënderuar bashkëpunëtorët që kanë bërë të mundur realizimin e këtij projekti, por në veçanti Bashkinë e Tiranës dhe kryebashkiakun Erion Veliaj për kontributin e jashtëzakonshëm.
Ajo shoqërohet nga një bandë muzikore italiane në performancat përfshirë këngët “Pyes lotin”, “Vetëm një fjalë” e deri te “Evita”, kënga dedikuar vajzës, me të cilën mori pjesë vitin e shkuar në Festivalin e Këngës.
Dy ditë më parë me emocionet për këtë event të rëndësishëm në karrierën e saj, në një konferencë për mediat Elsa Lila u shpreh se organizimi vjen si një ndjenjë detyrimi ndaj artdashësve që e kanë mbështetur në këto 27 vite në muzikë./Topchanel/KultPlus.com
Në nisje të koncertit recital “Finalmente Elsa”, artistja e njohur Elsa Lila ka falënderuar bashkëpunëtorët, që kanë bërë të mundur realizimin e këtij projekti.
Ajo falënderoi veçanërisht bashkinë e Tiranës dhe kryebashkiakun Erion Veliaj për kontributin e jashtëzakonshëm në këtë projekt.
Elsa Lila vlerësoi më tej edhe kontributin e kryebashkiakut Veliaj në jetën artistike në kryeqytet.
“Falënderoj bashkinë e Tiranës dhe kryetarin e bashkisë, Erion Veliaj për kontributin e jashtëzakonshëm në këtë projekt dhe për kontributin që ata i japin të gjithë jetës artistike në Tiranë. Faleminderit nga zemra”, u shpreh Elsa Lila.
Pas deklaratës së artistes, e gjithë salla ka shpërthyer në duartrokitje. “Finalmente Elsa”, është koncerti i parë recital, që Elsa Lila, realizon në Tiranë, pikërisht aty ku nisi jeta e saj e suksesshme artistike, në skenën e Pallatit të Kongreseve./atsh/KultPlus.com
Më në fund Elsa Lila! Këngëtarja vjen me një koncert recital për hërë të parë për publikun shqiptar.
Në Pallatin e Kongreseve, po bëhen përgatitjet e fundit për koncertin e 1 nëntorit, ku Elsa Lila, e shoqëruar nga një bandë muzikore italiane do të performojë për të gjithë ata që janë rritur me këngët e saj, nga “Pyes lotin”, “Vetëm një fjalë” e deri te “Evita”, kënga dedikuar vajzës, me të cilën mori pjesë vitin e shkuar në Festivalin e Këngës.
Me emocionet për këtë event të rëndësishëm në karrierën e saj, në një konferencë për mediat këtë të hënë, Elsa Lila u shpreh se ky koncert vjen si një ndjenjë detyrimi ndaj artdashësve që e kanë mbështetur në këto 27 vite në muzikë.
“Kur unë fillova në muzikë, shumë prej tyre ishin fëmijë si unë dhe tani jemi rritur. Nuk kam bërë më parë një koncert recital dhe këtë e ndjej si detyrim ndaj publikut që më ka dhuruar dashuri”.
Pse “Finalmente Elsa”?
“Finalmente, (më në fund), sepse pas gjithë këtyre viteve, vjen pjesëmarrja ime me një koncert të tillë. E kam lënë në italisht, që të shërbejë si një urë mes dy vendeve, pasi unë prej 26 vitesh jetoj atje dhe kam dy nënshtetësi. Kam parë disa komente, njerëz që thonë se nuk u pëlqen kjo (titulli i lënë në italisht), por unë besoj se në vitin 2023, kohët kanë evoluar kaq shumë, sa të ndalojmë në këto vogëlsira. Për mua ka rëndësi ideja”, shpjegoi këngëtarja.
Koncerti, një ndërthurje mes muzikës pop, barok dhe tradicionale
Të gjitha këngët e Elsës, të cilat i kemi dëgjuar dhe kënduar prej vitesh, do të jenë pjesë e koncertit. Para gazetarëve, artistja shpjegoi se në bashkëpunim me bandën italiane, do të interpretojë në skenë zhanret muzikore, në të cilat ka provuar veten gjatë krijimtarisë së saj artistike.
“Do të ketë pop mbi të gjitha, por edhe disa pjesë tradicionale shqiptare, pasi unë i kam kënduar si p.sh. ‘Margjelo’, që do të vijë në një tjetër version apo ‘Moj e bukura more’. Do të ketë edhe pjesë baroke”, tha këngëtarja.
Disa “sekrete” nga “Finalmente Elsa”
Pjesë e bandës muzikore do të jenë kompozitori Enrico Melozzi, që disa herë ka drejtuar orkestrën e Festivalit të Sanremos, kitaristi Nicola Costa, basisti Roberto Gallinelli, Lele Melotti, Alberto Barsi, Donato Sensini, Guido Della Gatta e Clauidio.
I ftuar special do të jetë këngëtari Pirro Çako. Kënga e Lilës në bashkëpunim me Çakon “Diferenca je ti” është ende një hit dashurie. “Do të jem unë, muzika dhe miqësia”, tha këngëtarja, duke treguar se s’do të ketë të ftuar të tjerë dhe për këtë e ka një shpjegim:
“Muzika për mua është mjeti më i fortë i shprehjes. Duke qenë pasion, nuk mund të bëhet në mënyrë organike me njerëz që s’të duan!”
Për Elsa Lilën, muzika është vetë jeta, ndaj edhe pse është shkëputur disa herë nga tregu muzikor, thekson se do të merret me muzikë “derisa të vdesë”. Ndërkohë, organizatorët zbulojnë se ky koncert recital nuk do të jetë ‘show’, por do të ketë “muzikë të mirë dhe disa rrëfime përmes këngës nga artistja”, që publiku mund t’i shijojë këtë të mërkurë në mbrëmje, në Pallatin e Kongreseve./topchanel/KultPlus.com
