Anëtarja e grupit “BLACKPINK”, Lisa debutoi si solo këngëtare me albumin “Lalisa” (VIDEO)

Lisa njëra nga katër anëtaret e grupit me famë botërore nga Korea Jugore, “BLACKPINK”, e ka publikuar albumin e parë solo me titull “Lalisa”, shkruan KultPlus.

Krahas këtij incizimi, ylli i muzikës K-pop gjithashtu i ka lansuar dy këngët, “Lalisa” që numëron gjithsej 56 milionë shikime, 14 orë pas publikimit dhe kënga “Money”, që të dyja në gjuhën koreane dhe angleze.

Lisa e cila e gëzon një bazë të madhe adhuruesish edhe si solo këngëtare, dhe i numëron më shumë se 58 milionë ndjekës në rrjetin social Instagram, e shfrytëzoi këtë rrjet social për t’i falënderuar të gjithë ata që kanë qenë pjesë e këtij projekti shumë për zemër.

“A jeni duke e dëgjuar dhe shijuar albumin tim? Unë jam shumë e lumtur që po e shijojmë së bashku më në fund albumin tim të parë. Faleminderit shumë që keni pritur kaq gjatë dhe faleminderit shumë që gjithmonë keni qenë afër meje. Sot është një ditë e vecantë për mua dhe është ndjenjë e mirë ta ndaj me juve këtë ditë”, ka shkruar Lisa në mesazhin e saj.

Lisa nuk është anëtarja e vetme e grupit “BLACKPINK” që po zhvillon karrierë si solo këngëtare. Anëtarja tjetër, Jennie e kishte publikuar videoprojektin e parë si solo këngëtare në vitin 2018. Kënga titullohet “Solo”. Ndërsa, Rosé ka debutuar si solo këngëtare me albumin “R”.

Anëtarja e fundit e grupit, Jisoo gjithashtu pritet që së shpejti të publikojë projektin e saj si solo këngëtare.

Grupi me famë botërore është shfaqur në shumë shfaqje amerikane, dhe Lisa do të përformojë këngën e re për herë të parë drejtpërdrejt në ‘The Tonight Show Starring Jimmy Fallon’. / KultPlus.com