Shoqata e Profesorëve të Frëngjishtes të Kosovës (SHPFK) përmes një komunikate ka shprehur shqetësimin e saj të thellë lidhur me braktisjen e mësimdhënies së frëngjishtes nga shkolla Elena Gjika në Prishtinë, përkundër dëshirës së stafit mësimdhënës dhe të drejtorit të institucionit, përcjellë KultPlus.
“Frëngjishtja është mësuar në këtë shkollë nga viti 2001. Çdo vit, rreth 80 nxënës tregonin interesimin e tyre të madh për mësimin e frëngjishtes dhe merrnin pjesë në mënyrë aktive në aktivitetet e ndryshme lidhur me frankofonin. Shkolla ka të gjitha mjetet e nevojshme për të siguruar një mësim cilësor falë mbështetjes materiale të konsiderueshme të Ambasadës së Francës në Kosovë. Ky vendim vështirë mund të kuptohet, duke marrë parasysh angazhimin e Kosovës për frankofonin, ndër të tjera përmes statutit të saj si anëtare vëzhguese të OIF (Organizatës Ndërkombëtare të Frankofonisë). Kjo zgjidhje e imponuar pa konsultim paraprak dënon fillimisht nxënësit që kanë një lidhje të veçantë me gjuhën e Molierit.”, thuhet në komunikatë, ku poashtu theksohet se ky vendim është një sinjal katastrofik që i dërgohet shkollave të tjera të cilat janë thellësisht të implikuar në promovimin e gjuhës frënge ose që dëshirojnë të investojnë në këtë drejtim.
SHPFK-ja kërkon urgjentisht të takohet me organet vendimmarrëse dhe sidomos nga Komuna e Prishtinës, që këta të anulojnë këtë vendim të dëmshëm në çdo aspekt./ KultPlus.com