Në 11 janar 1953, në Durrës, themelohej teatri profesionist me emrin e aktorit të madh me famë botërore “Aleksandër Moisiu”.

Ishin 14 aktorë, një pjesë e mirë tepër të angazhuar në lëvizjen amatore, të cilët themeluan këtë teatër duke nisur historinë e një tradite të mirëfilltë teatrore në shtëpine e parë të teatrit durrsak, ish-kinemanë “14 nëntori”.

Veprimtaria kryesore e teatrit “Aleksandër Moisiu” lidhet kryesisht me godinën aktuale të saj, e cila u përurua më 4 shkurt të vitit 1965.

Ky rrugëtim 71-vjeçar numëron mjaft tituj, çmime e arritje në rang kombëtar e më tej nga aktorët, regjisorët si dhe artistët e profileve të tjerë të këtij teatri.

Në një postim në faqen e tij online, Teatri “Aleksandër Moisiu” shkruan se numeron mbi 235 premiera dhe ka tashme një trupë të konsoliduar aktorësh. “Shfaqjet po ridimensionojnë profile të rinj aktorësh me ambicie, përkushtim e shumë dëshirë, duke na dhënë besim për t’a vijuar më tej traditën, në vitet që do të vijnë”, shkruhet nga Teatri “Aleksandër Moisiu”. /ATSH /KultPlus.com