Dizajneri amerikan i modës Willy Chavarria ka kërkuar falje pas kritikave për bashkëpunimin e tij me Adidas Originals në krijimin e një modeli këpucësh të quajtur Oaxaca Slip-On. Ky model ishte frymëzuar nga sandalet tradicionale prej lëkure të njohura si huaraches, të punuara nga artizanët autoktonë në Meksikë.

Kontroversia shpërtheu kur u bë e ditur se këpucët ishin prodhuar në Kinë, pa konsultim ose njohje zyrtare ndaj komuniteteve që kishin origjinuar dizajnin. Presidentja e Meksikës, Claudia Sheinbaum, reagoi duke theksuar se “shumë kompani të mëdha shpesh marrin produkte, ide dhe dizajne nga komunitetet indigjene” dhe njoftoi se po shqyrtohen hapa ligjorë për mbrojtjen e tyre.

Zëvendësministrja e Kulturës së Meksikës, Marina Nunez, tha se Adidas ka kontaktuar zyrtarët e Oaxacës për të diskutuar “kompensimin për njerëzit të cilëve iu plagjiatua dizajni”. Në një deklaratë për BBC, kompania tha se “vlerëson trashëgiminë kulturore të komuniteteve indigjene të Meksikës” dhe kërkoi falje publike, duke premtuar bashkëpunim me komunitetin e Yalálag-ut për të nderuar trashëgiminë e tyre.

Chavarria, ish-nënkryetar i lartë i dizajnit në Calvin Klein dhe themelues i markës së tij, u shpreh se “qëllimi gjithmonë ka qenë të nderohej fryma kulturore dhe artistike e Oaxacës”, por pranoi se mungesa e një bashkëpunimi të drejtpërdrejtë me komunitetin përbënte “një dështim në respektimin e tyre”. Ai shtoi: “Dashuria fitohet me veprime, jo vetëm me fjalë.”

Pamjet promocionale të modelit Oaxaca Slip-On janë hequr nga rrjetet sociale të Adidas dhe Chavarria-s, ndërsa diskutimet për zgjidhjen e situatës me komunitetet indigjene vazhdojnë./BBC/KultPlus.com

Gjiganti gjerman i veshmbathjeve sportive, Adidas, ka njoftuar se do t’i mbyllë fabrikat e teknologjisë së lartë në Gjermani dhe Shtetet e Bashkuara, duke thënë se hapja e tyre në Azi do të jetë më ekonomike.

Këto fabrika ishin hapur si pjesë e planeve për kërkesat për dërgesa më të shpejta të modeleve të reja në tregjet e mëdha, për të dalë kundër rritjes së pagave në Azi dhe për t’iu shmangur shpenzimeve më të mëdha të transportit.

Kompania gjermane nuk dha hollësi për arsye e mbylljes së fabrikave, të cilat si duket kanë qenë të shtrenjta dhe të vështira për të shtrirë teknologjinë robotike të prodhimit të produkteve të ndryshme.

Adidas-i e kishte filluar prodhimin e këpucëve sportive nga robotët në fabrikën “Sppedfactory” në Ansbach të Bavarisë në vitin 2016 dhe më pas e kishte hapur një fabrikë të ngjashme edhe në Atlanta të Shteteve të Bashkuara në vitin 2017.

E themeluar në vitin 1949 nga këpucëtari gjerman, Adi Dassler, kompania e njohur tashmë e ka përqendruar shumicën e prodhimit në Azi, ku i ka punësuar rreth një milion njerëz, kryesisht në Kinë dhe Vietnam, shkruan “Reuters”, transmeton Gazeta Express. / KultPlus.com