Etiketë: Anastas Kostandini

Anastas Kostandini feston sot 70-vjetorin, COD: Në shtator, ekspozitë me veprën e plotë të Tasos

Posted on by Kult Plus

Mjeshtri i pikturës dhe mozaikut, Anastas Kostandini, feston sot 70-vjetorin e lindjes. I njohur nga miqtë dhe artdashësit si Taso, Anastas Kostandini ka lindur në Pogradec, në vitin 1954.

Në vitin 1978 u diplomua në Akademinë e Arteve të Bukura në Tiranë, i specializuar për art monumental. Është një nga bashkë autorët e mozaikut “Shqipëria”, mozaiku i restauruar në fasadën e Muzeut Historik Kombëtar.

Në vitin 1991 i jepet titulli “Piktor i merituar”. Përveçse me pikturë, merret edhe me mozaikë dhe piktura murale, ku disa syresh janë ndër më të rëndësishmet në Shqipëri. Gjithashtu merret edhe me ilustrime poezish dhe prozash. Ai është pjesëmarrës dhe organizator i shumë kolonive të piktorëve.

Taso ka realizuar një numër të madh pjesëmarrjesh në ekspozita të përbashkëta por edhe vetjake, disa prej të cilave janë hapur në SHBA, Francë, Holandë, Gjermani, Greqi etj.

Në këtë 70-vjetor të lindjes së piktorit, mozaistit, grafistit, ilustratorit të mirënjohur shqiptar, Anastas Konstandini, Qendra për Hapje dhe Dialog, duke i uruar edhe shumë vite të tjera me krijimtari plot ngjyra nga qyteti i Pogradecit, solli mesazhin se në fillim të shtatorit COD-i rikthen në Tiranë pas afro një dekade veprën e tij. Vepër që kësaj here vjen e plotë në të gjitha hapësirat e COD-it me shumë surpriza./atsh/KultPlus.com

Taso me ekspozitë vetjake në Wismar të Gjermanisë

Posted on by Kult Plus

Piktori i mirënjohur shqiptar Anastas Kostandini, ka çelur një ekspozitë vetjake, në Wismar të Gjermanisë, të titulluar “Një piktor nga Pogradeci, viziton Wismar-in”. Ekspozita ka gjetur jehonë edhe në mediet gjermane, mes të cilëve Wismar TV, në kronikën e të cilit thuhej se, ekspozita e veçantë do të zbukurojë muret e Muzeut Historik Schabbell, deri më 15 tetor.

Në tekstin shoqërues të ekspozitës kuratorja ka shkruar: “Ekspozita në Wismar tregon një prerje tërthore të punës së tij me piktura vaji dhe grafika. Shikuesi fiton njohuri për peizazhin shqiptar, jetën dhe punën e njerëzve në fshat dhe në impiantet industriale. Por gjithashtu nuk mungojnë natyrat e qeta, peizazhet e qytetit si edhe autoportrete të artistit. Gjithashtu një pamje e portit të Wismar-it, të cilën artisti e fotografoi gjatë një vizite në 2014-ën.”

Anastas Kostandini i njohur me emrin e artit Taso, lindi më 29 korrik 1954 në Pogradec, ku jeton e punon sot e kësaj dite. Ai u diplomua në Akademinë e Arteve të Bukura në Tiranë, për art monumental në 1978 dhe njihet si njëri prej autorëve të mozaikut në fasadën e Muzeut Historik Kombëtar./ atsh / KultPlus.com

Pogradeci dhe Parisi në pikturat e Anastas Kostandinit

Posted on by Kult Plus

Deri në datën 31 prill, artdashësit mund të vizitojnë në Pogradec, ekspozitën e Anastas Kostandinit (Taso), të titulluar “Qytetit, si pikturë, muzikë, arkitekturë”.

Artisti sjell në këtë ekspozitë 25 punime kushtuar qytetit të tij Pogradecit si edhe 16 punime që i përkasin Parisit.

Kjo ekspozitë ka ardhur në një formë tepër të veçantë, pasi është gërshetuar me muzikën, ku ka interpretuar Kuarteti “I.L.A 74” me një larmi muzike klasike.

“Kryetema e pikturës time, në mënyrë të padiskutueshme, është qyteti. Dua ta krahasoj qytetin tim me metropolet. Është një lloj ekstravagance, por mendoj se arti e ka këtë luks”, shprehet piktori, i cili duket se figurativisht ka zbuluar një rrugicë që lidh Pogradecin e vogël me Parisin e madh.

“Në këtë ekspozitë, Pogradecin dhe liqenin e pamë me sytë e piktorit Anastas Kostandini, nëpërmjet peisazheve të tij plot ngjyra, ku ndihej dashuria e madhe për të”, shprehet prefekti i Qarkut Korçë, Nertil Jole, i pranishëm në çeljen e ekspozitës.

“Qyteti i Tasos” gjendet në Galerinë e Arteve, Pogradec ku hyrja është e lirë për të gjithë./ atsh / KultPlus.com