“Lutje e pazakontë” nga Lulzim Tafa botohet në Budapest

Shtëpia Botuese AB ART, që është njëra ndër shtëpitë botuese më të njohura në Hungari, ka botuar librin me poezi të poetit kosovar Lulzim Tafa me titull “Szokatlan ima” (“Lutje e pazakontë”), përcjellë KultPlus.

Redaktori i këtij libri, shkrimtari i shquar hungarez, Atila Balazs, në parathënien e librit thotë se Tafa është një poet i njohur nga Kosova, poezia e të cilit lexohet kudo në botë.

“Me librin “Lutje e pazakontë” lexuesit në Hungari i prezantojmë po ashtu një poet të pazakontë, i cili tanimë është një emër i njohur i poezisë jo vetëm në Evropë por edhe më gjerë. Tafa është njëri ndër përfaqësuesit kryesorë të poezisë posmoderne sot, një poet i veçantë dhe që shkruan bukur. Sapo lexon vetëm disa vargje, has në një botë të panjohur dhe e gjen veten në një univers jashtëzakonisht të bukur. Pas leximit ju do të jeni më të pasur dhe me një përvojë të paharrueshme.”, ka shkruar Balazs.

Libri përmban rreth 70 poezi dhe ndahet në katër cikle.

Lulzim Tafa është njëri ndër poetët tanë më të njohur dhe më të përkthyer, poezitë e tij janë përkthyer në shumë gjuhë të botës dhe ka fituar shumë çmime prestigjioze ndërkombëtare në fushën e letërsisë. / KultPlus.com

Veshjet tradicionale shqiptare do të prezentohen në Budapest të Hungarisë (FOTO)

Në kuadër të promovimit kulturor të Shqipërisë, Ambasada shqiptare në Hungari ka zhvilluar disa takime me stilisten Edlira Sulaj, në te cilat është diskutuar për planifikimin e tre aktiviteteve në të ardhmen, shkruan KultPlus.
Me presidenten e shoqatës hungareze Lidhja Kombëtare e Modës, Gabriella Walek, është diskutuar mbi një prezantim në prill të këtij viti nga ana e stilistes Sulaj të veshjeve tradicionale shqiptare dhe teknikave të përdorura për realizimin e tyre.

Ndërsa në prill të vitit tjetër stilistk Sulaj planifikon të marrë pjesë në sfilatën e Javës Globale të Modës së Qendrueshme, e cila zhvillohet çdo vit në Budapest. Ky takim u pasua nga një vizitë në Muzeun Etnografik në Budapest, ku grupi i shqiptarëve u njoh me veshjet e rajoneve të ndryshme të Hungarisë. Më tej, ky grup është takuar me Zoltan Korsos, Drejtor i Përgjithshëm i Muzeut të Historisë së Natyrës, ku më 23 qershor planifikohet ta hapin një ekspozitë me veshje popullore shqiptare. /KultPlus.com