“Njeriu në burg i numëron të gjitha” shënon një nismë të re të aktiviteteve kulturore në Muzeun “Burgu i Idealit”

Posted on 3 Prill, 20253 Prill, 2025 by Kult Plus

Afrim Demiri

Mbrëmë në “Burgun e idealit”, në Prishtinë, u mbajt manifestimi i emëruar “Njeriu në burg i numëron të gjitha“ që shënoi një nismë të re të aktiviteteve kulturore në Muzeun “Burgu i Idealit” në Prishtinë. Gjatë mbrëmjes pati lexime skenike performancë, videoinstalacion dhe rrëfime nga disa ish-të burgosur politikë.

Ky ishte fillimi i nismës së re të aktiviteteve kulturore në përpjekje për ta funksionalizuar Muzeun “Burgu i Idealit” . Shpalosja e një pjese të shkrimeve dhe materialeve tjera të trashëguara nga ish-të burgosurit politikë gjatë periudhës jugosllave në Kosovë e më gjerë është synimi i arkivimit, ruajtjes dhe i ekspozimit të tyre.

Pastaj, motivi i numërimit si teknikë narrative – paraqitet në forma të ndryshme mbi përvojat e vështira dhe robërinë e të burgosurve të ndërgjegjës. Qysh në rrëfimet e mbrëmshme të veprimtarëve Selatin Novosellës, Shefik Sadriut, Shukrije Gashit, Kadri Kryeziut dhe të Martin Çunit, rrëfimet emocionale shpreheshin herë si mënyrë e rezistencës, solidaritetit dhe vuajtjes, e herë si formë e simbolikës, mbijetesës dhe forcës për të mos harruar. Këto rrëfime nënvizonin aspektet kyçe të këtij kapitulli historik, nëpër të cilin ka kaluar rrugëtimi i shtetformimit.

Kjo hapje e mbrëmshme synonte që këto përjetime në hapësirën reale, në lokalet e burgut, të bëheshin sa më të prekshme për vizitorët, si dhe të tërheqin vëmendjen sa më të madhe për muzeun. Organizata “Molla e Kuqe”, në kuadër të projektit për rifunksionalizimin e hapësirës së muzeut, të mbështetur nga Ministria e Kulturës, Rinisë dhe Sportit për vitet 2025 dhe 2026, ka planifikuar një seri aktivitetesh nga fusha të kulturës dhe artit, që trajtojnë temat e kujtesës, narrativave mbi të kaluarën dhe transformimeve që e kanë karakterizuar këtë periudhë.

Gjatë mbrëmjes pati lexime skenike performancë, videoinstalacion dhe rrëfime nga disa ish-të burgosur politikë.Data e këtij manifestimi, 2 prilli, përkoi edhe me përvjetorin e Demonstratave të vitit 1981. Një ngjarje kjo e kthesës në historinë e rezistencës shqiptare në ish-Jugosllavi.

Nga data 3 prill, “Burgu i Idealit” do të jetë i hapur për vizitorë gjatë orarit zyrtar: E Martë – Shtunë nga 10:00 – 14:00.KultPlus.com

“Burgu i Idealit”, ekspozita që sjell krijimtari artistike të burgut

Posted on 27 Gusht, 202228 Gusht, 2022 by Kult Plus

MKRS ka bërë thirrje që në këtë vikend të vizitohet Muzeu i Burgut të Prishtinës, më saktësisht ekspozitën “Burgun e Idealit”.

Shihni ekspozitën që rrëfen historinë, shtypjen e idesë për liri, rrëfimet dhe rezistencën e të burgosurve politik të vendit, që tani po tregohen dhe ndjehen në një mënyrë të veçantë, brenda njërit prej objekteve ku ndodhën keqtrajtimet.

Ekspozita “Burgu i Idealit” sjell tekste historike, fotografi, ilustrime, video materiale e intervista me rrëfime, krijimtari artistike të burgut si piktura e vjersha nga ish të burgosurit, emrat e mbi 9000 të ish të burgosurve politik shqiptar në këtë dhe burgje të tjera të Kosovës.

Ekspozitën mund ta vizitoni pa pagesë nga e marta deri të dielën, nga ora 10:00-19:00. / KultPlus.com

Me ekspozitën e përkohshme “Burgu i Idealit”, u hap Muzeu i Burgut të Prishtinës

Posted on 12 Korrik, 202213 Korrik, 2022 by Kult Plus

U hap Muzeu i Burgut të Prishtinës, përcjell KultPlus.

Me ekspozitën e përkohshme “Burgu i Idealit”, sot u hap Muzeu i Burgut të Prishtinës. Historia, shtypja e idesë për liri, rrëfimet dhe rezistenca e të burgosurve politik tani do të tregohen dhe ndjehen në një mënyrë të veçantë, brenda njërit prej objekteve ku ndodhën keqtrajtimet.

Ekspozita sjell tekste historike, fotografi, ilustrime, video materiale e intervista me rrëfime, krijimtari artistike të burgut si piktura e vjersha nga ish të burgosurit, emrat e mbi 9000 të ish të burgosurve politik shqiptar në këtë dhe burgje të tjera të Kosovës.

Në këtë ngjarje morën pjesë ministri i Kulturës, Hajrulla Çeku, ministrja e Drejtësisë, Albulena Haxhiu, nënkryetarja e Kuvendit të Kosovës, Saranda Bogujevci, kryetari i Shoqatës së të Burgosurve Politik, Hydajet Hyseni, ish të burgosur politikë dhe veprimtarë të çështjes kombëtare e pjesëmarrës të shumtë.

Ministri Çeku në fjalën e tij ndër të tjera tha se ky është hapi i parë drejt shndërrimit të kësaj ndërtese në qendër dokumentimi dhe ekspozimi të krimeve të regjimit të Jugosllavisë dhe atij të Serbisë kundër shqiptarëve.

Ndërsa Hydajet Hyseni ka theksuar se duke e kthyer burgun në një muze të ri, Prishtina do ta ketë një objekt monumental shkollor edukativ, frymëzues por edhe memorial përkujtues.

Me vendim të MKRS-së, Muzeu i Burgut të Prishtinës nga sot është edhe aset i mbrojtur i trashëgimisë kulturore.

Burgu i Idealit është i hapur për vizitorë në orarin 10:00-19:00, çdo ditë përveç të hënave. / KultPlus.com

Me ekspozitën e përkohshme “Burgu i Idealit”, nesër do të bëhet hapja e Muzeut të Burgut të Prishtinës

Posted on 11 Korrik, 202211 Korrik, 2022 by Kult Plus

Ndërtesa e ish-Burgut të Prishtinës e cila mban brenda vetes histori të shumta të përndjekjes, maltretimit dhe shtypjes së idesë për liri, është shndërruar në muze i cili paraqet narrativën dhe rezistencën popullore të të burgosurve politik në të gjitha burgjet e Kosovës.

Hapja e Muzeut të Burgut të Prishtinës me ekspozitën e përkohshme ”Burgu i Idealit” do të mbahet me 12 korrik, duke filluar nga ora 17:00.

Nga data 12 korrik, Muzeu do të jetë i hapur për vizitorët në këtë orar:

E martë – e diel
10:00 – 19:00.

Shfaqja “Ora e Vdekjes” me regji të Ilir Bokshit mbajti për herë të parë një aktivitet në këtë burg, tanimë muze. / KultPlus.com