Rreth 1,8 milionë euro investime në trashëgimi kulturore, Prizreni po bëhet gati për UNESCO

Prizreni është në fokus të programit për mbrojtjen dhe zhvillimin e trashëgimisë kulturore si mjet për promovim të vlerave të përbashkëta dhe prosperitetit ekonomik.

Mbi 1,2 milionë euro është vlera e buxhetit që është duke u investuar në mbrojtjen e trashëgimisë kulturore, kurse rreth 490 mijë euro të tjera përfshihen në buxhetin e projekteve që do të nisin të zbatohen gjatë këtij viti.

Aktalisht janë duke u zhvilluar ndërhyrje emergjente në gjashtë asete, ndërsa në kuadër të projektit të Revitalizimit të rrugës Marin Barleti po realizohen punime restauruese në dy shtëpi. Gjithashtu po restaurohen gjashtë shtëpi tradicionale në Qendrën Historike të Prizrenit, përfshi kompleksin e banimit të familjes Dorambari, shtëpinë e familjes Bardhi, shtëpinë e familjes Sokoli, shtëpinë e familjes Kabashi, si dhe është në përfundim restaurimi i kinemasë së vjetër të qytetit.

Sot kanë nisur ndërhyrjet restauruese edhe në Hamamin e Gazi Mehmed Pashës, projekt ky i cili ka qenë në pritje për shumë vite.

Muzetë po i funksionalizojmë. Në kuadër të programit të muzeve, rregullimi i enterierit dhe ekspozitës në Muzeun Arkeologjik ka përfunduar, ndërsa në proces të hartimit është koncepti i ekspozitës për Lidhjen Shqiptare të Prizrenit. Projektet muzeale në kuadër të buxhetit të Ministrisë së Kulturës përfshijnë edhe Muzeun e Nënë Terezës dhe Muzeun e Filigranit.

Një tjetër projekt shumë i rëndësishëm është ai i Qendrës Kulturore Hebraike. Punimet pritet të fillojnë muajve në vijim, ndërsa po punojmë edhe në zbatimin e planeve të meaxhimit të Kalasë së Prizrenit dhe të Qendrës Historike të Prizrenit.

Së fundmi ka filluar hartimi i projektit të interpretimit dhe prezantimit të lokalitetit arkeologjik në sheshin e Lidhjes së Prizrenit dhe këtë vit ky plan do të zbatohet duke e shëndrruar këtë lokalitet në një prej pikave referuese për vizitorët e qytetit. / KultPlus.com

Fillon hartimi i projektit për prezantimin, interpretimin dhe promovimin e Lokalitetit Arkeologjik në qendër të Prizrenit

Ky projekt i Ministrisë së Kulturës realizohet në bashkëpunim me UN-Habitat Kosovë, në bazë të marrëveshjes së nënshkruar gjatë vitit 2021 dhe synon integrimin e trashëgimisë kulturore në kuadër të planifikimit hapësinor, për zhvillim gjithëpërfshirës të qëndrueshëm dhe të gjelbër.

Në procesin e hartimit të projektit do të përfshihen banorët, komuniteti i biznesit dhe komuniteti profesionist, në mënyrë që prezantimi final i Lokalitetit Arkeologjik të jetë reflektim i një zgjidhjeje të përbashkët.

Përmes prezantimit, interpretimit dhe promovimit të Lokalitetit Arkeologjik si një lokalitet me rëndësi historike, shkencore, kulturore dhe edukative, synojmë që të ngritet vetëdija për rëndësinë e këtij lokaliteti si dhe të promovojmë vlerat kulturore përmes zhvillimit të turizmit kulturor.

Procesi i hartimit të projektit është duke u zhvilluar nga një grup punues i përbërë nga Instituti Arkeologjik i Kosovës, Qendra Rajonale për Trashëgimi Kulturore në Prizren, Departamenti për Trashëgimi Kulturore i Ministrisë së Kulturës, Rinisë dhe Sportit dhe Komuna e Prizrenit.

Në kuadër të inicimit të këtij projekti, grupi punues ka arritur të analizojë dhe diskutojë punën dhe propozimet paraprake, hulumtojë kornizën ligjore dhe dokumentet përkatëse të nivelit qendror dhe lokal, hulumtoj kornizën dhe parimet ndërkombëtare, analizojë gjendjen ekzistuese të hapësirës, përparësitë, mangësitë, rreziqet dhe mundësitë, si dhe të përcaktojë zonën që do të konservohet dhe ekspozohet si pjesë e dizajnit të këtij lokaliteti.

Projekti financohet nga Ministria e Kulturës dhe mbështetet nga UN Habitat Kosovë, përmes Programit për Zhvillim Gjithëpërfshirës, të financuar nga Qeveria e Suedisë. / KultPlus.com

Ceremoni në Ditën Botërore të Vallëzimit, Kajtazi: BKK tash e 50 vite ka dhënë kontributin e vet në pasurimin e kësaj tradite

Për nder të Ditës Botërore të Vallëzimit, mbrëmë Teatri Kombëtar i Kosovës mirëpriti një ceremoni festive e cila mblodhi rreth vetes një numër të madh të artdashësve dhe një numër të madh të balerinave të vogla të cilat për këtë ditë po shpërndanin fotografi tejet të bukura të artit të baletit që vinin të shtypura në formën e kartolinave për të pranishmit, shkruan KultPlus.

29 prilli festohet si Ditë Ndërkombëtare e Vallëzimit pasi që në këtë datë në vitin 1727 lindi veprimtari i baletit bashkëkohor, Zhan-Zhorzh Nover.

Që nga viti 1982, çdo vit nëpër botë mbahen shfaqje në të cilat loja dhe vallëzimi janë gjuhë universale me mision t’i afrojë dhe miqësojë njerëzit. E kjo më së miri u dëshmua edhe mbrëmë me pjesëmarrjen e miqve artdashës të cilët shkrepnin fotografi nga çasti në çast, për të festuar këtë ditë të veçantë që iu dedikua atyre dhe jo vetëm.

Në këtë ceremoni i pranishëm ishte edhe drejtori i Baletit Kombëtar të Kosovës, Sinan Kajtazi i cili përkujtoi ata që më nuk janë në mesin tonë fizikisht, për kontributin e tyre dhe pasurimin e vlerave të vallëzimit në vendin tonë.

“Vallëzimi është gjuha më universale e komunikimit në mes të njerëzve dhe si i tillë e zë një vend të rëndësishëm në traditën shpirtërore dhe intelektuale tek i gjithë populli. Baleti Kombëtar i Kosovës tash e 50 vite ka dhënë kontributin e vet në pasurimin e kësaj tradite ku përmes punës së palodhshme të balerinëve tanë, bashkëpunimeve me artistë nga e gjithë bota, shfaqjeve artistike të dhëna në vend e në qendra të ndryshme të Evropës, pashmangshëm është bërë pjesë e nevojës sonë kolektive por edhe pjesë e vlerave universale botërore të vallëzimit dhe kjo dëshmohet më së miri përmes faktit që BKK që nga viti 2014 është anëtarësuar në Këshillin Ndërkombëtar të Vallëzimit, organizatë kjo me seli në UNESCO”, thotë Kajtazi.

Sipas tij, duke shfrytëzuar këtë ditë dhe moment të veçantë, ai falënderoi të gjithë ata që janë dhe nuk janë në mesin e tyre fizikisht, për kontributin e tyre për pasurimin e vlerave të vallëzimit në vendin tonë.

“Mirënjohja ndaj tyre përveçse na nderon, shërben si model për gjeneratat e reja të kërcimtarëve të cilët kanë talentin dhe dëshirën për të nisur rrugën e vështirë por edhe të bukur të kërcimit. Në fakt, mirënjohja, falënderimi dhe motivimi i atyre që merren me gjininë e bukur të vallëzimit, në këtë rast, Baletit, është edhe qëllimi i shërbimit të Ditës Botërore të Vallëzimit që prej vitit 1982”, përfundon Kajtazi.

Ndërsa, këshilltari i ministrit të Kulturës, Librun Jupolli, tha se tashmë është bërë ndarja e lokacionit për ndërtimin e Teatrit të Operës dhe Baletit ku komuniteti i muzikës dhe në veçanti ai i Baletit, do të kenë ndërtesën e tyre të dinjitetshme e të shumëpritur.

“Dita Ndërkombëtare e Vallëzimit është festë botërore e cila është nisur nga komuniteti i vallëzimit të institutit ndërkombëtar të teatrit, partneri kryesor i arteve skenike të UNESCO-s, dhe si i tillë festohet tashmë për çdo vjet. Të dhënat më të hershme historike që tregojnë për origjinën e vallëzimit janë pikturat e shpellave në Indi që datojnë rreth vitit 8000 p.e.s. e po ashtu evidencë të tillë të vallëzimit gjejmë edhe në pikturat egjiptiane të cilat paraqesin vallëzimin rreth 3300 vite p.e.s. Baleti dhe gjegjësisht vallëzimi është gjuha e trupit tonë dhe shprehja më direkte që e kemi si qenie. Gjuha e trupit të një populli dhe kapaciteti shprehës trupor i një vendi, njihet më së miri nga valltarët e vet. Akterët tanë të profilit të vallëzimit dhe kontributi i tyre profesional janë shprehja më e lartë e fisnikërimit të shpirtit përmes lëvizjes”, thotë Jupolli.

Sipas tij, sot Kosova dhe mbarë kultura e profilit të vallëzimit njeh një histori me lëvizje që nga shekulli i njëzet me Baletin e parë kosovar ‘Sokoli e Mirusha’ nga kompozitori Akil Mark-Koci pastaj me zhvillime të tjera përgjatë shekullit njëzet ku kompozitorët vazhdojnë me kompozime të tjera të baleteve të reja.

“Në shekullin njëzet e një, po ashtu njohim edhe kompozime të baletit modern dhe produksione të tjera të ngjashme. Vallëzimi sot në Kosovë njeh edhe zhvillime të shumta në edukim dhe pedagogji të cilat padyshim që do të sjellin frytet e veta për gjeneratat e reja dhe të lartësojmë më lart, artin e lëvizjes në vendin tonë. Këtë herë, Dita Ndërkombëtare e Vallëzimit koincidoi me një lajm shumë të mirë, pra me ndarjen e lokacionit për ndërtimin e Teatrit të Operës dhe Baletit ku komuniteti i muzikës dhe në veçanti ai i Baletit, do të kenë ndërtesën e tyre të dinjitetshme të shumëpritur e shumë merituar. Shumë shpejt vazhdojmë me konkursin arkitektonik ndërsa faza pasuese do të kryhet me efikasitet e cilësi deri në inaugurimin e ndërtesës”, përfundon Jupolli.

Ai tutje foli rreth veçantisë së 50 vjetorit të Baletit Kombëtar të Kosovës dhe si rast ky i veçantë, është konsideruar të jetë i rëndësishëm për t’i kujtuar sakrificat për këtë profil të cilat janë bërë që nga shekulli njëzet me gjeneratën e të ndjerit, Abdurrahman Nokshiqi e gjerë tek vitet pasuese e drejtuesit e tjerë duke përfshirë edhe punën e të ndjerit, Ahmet Brahimaj si dhe punën e palodhshme të trupës artistike.

Pas këtyre fjalimeve, të pranishmit tutje vazhduan brenda sallës së Teatrit Kombëtar të Kosovës për të shikuar dhe rishikuar edhe një herë talentin e BKK-së që lehtazi shfaqej nëpërmjet shfaqjes ‘Romeo dhe Zhulieta’, shfaqje kjo e cila pati ardhur premierë më 25 mars. / KultPlus.com

Performanca “K’tu jemi!” vjen më 29 prill në Ditën Botërore të Vallëzimit

Performanca e vallëzimit e titulluar “‘K’tu jemi!” së shpejti vjen si protestë e koreografëve kundër shkeljes së dinjitetit profesional, përcjell KultPlus.

“K’tu jemi!”, do të organizohet më 29 prill pikërisht në Ditën Botërore të Vallëzimit, duke filluar nga ora 10:00.

Performanca-protestë do të mbahet në sheshin Zahir Pajaziti, para Ministrisë së Kulturës, Rinisë dhe Sportit.

KultPlus më poshtë ua sjell postimin e plotë të koreografit Robert Nuha:

Kjo performancë-protestë organizohet nga koreografë e kërcimtarë profesionistë që jetojnë e veprojnë në Republikën e Kosovës, me qëllimin e vetëm që zëri i tyre të dëgjohet qartë dhe të mos injorohet si deri më tash nga institucioni i MKRS-së.

Me këtë rast ne kërkojmë vlerësimin e shkollimit tonë në Koreografi, angazhimin dhe konsulencën me ekspertizën e kësaj pjese të rëndësishme të shoqërisë!

Fyerjet publike, të cilat tentojnë të zh’bëjnë shkollimin tonë, janë të papranueshme. Është ky edukim universitar që bën të mundur kontributin tonë në shkollimin e brezave të ardhshëm në Kosovë.

Baleti, Kërcimi dhe Koreografia egzistojnë në Kosovë qe pas lufte. Detyrë e Ministrisë dhe e ministrit është mbështetja dhe përkrahja e jo të fyhet e degradohet për ditë pa marrë përgjegjësi askush! / KultPlus.com

Shtyhet afati i aplikimit në thirrjen publike për mbështetje financiare në fushën e kulturës dhe trashëgimisë kulturore

Ministria e Kulturës, Rinisë dhe Sportit ka bërë të ditur se do të ofrojë mbështetje për organizatat e profilizuara në fushën e artit apo të trashëgimisë kulturore, përcjell KultPlus.

Por afati për aplikim në thirrjen publike për mbështetje financiare në fushën e kulturës dhe trashëgimisë kulturore është shtyrë deri më datën 29.04.2022.

Ministria e Kulturës, Rinisë dhe Sportit (MKRS) në fushën e artit dhe trashëgimisë kulturore për vitin 2022 renditë ndër prioritetet programore fuqizimin e rolit të skenës së pavarur kulturore në zhvillimin dhe zbatimin e politikave publike, rritjen e cilësisë së krijimtarisë artistike, identifikimin dhe mbështetjen e talentëve të rinj, aktivizimin e të rinjve në vendimmarrje dhe aktivitete të fushës së artit dhe trashëgimisë kulturore, rrjetëzimin dhe promovimin e produktit vendor kulturor si produkt konkurrues në tregun ndërkombëtar të industrisë kreative.

Në funksion të prioritetit programor, thirrja për projekt-propozimet kulturore për vitin 2022 që mbulon fushën e artit dhe trashëgimisë kulturore synon mbështetjen e projekt-propozimeve të OJQve dhe Individëve që zhvillohen në Republikën e Kosovës apo në shtetet e tjera, të cilët përmbushin objektivat e përgjithshme si në vijim:

Promovimi i artit dhe trashëgimisë kulturore përmes pasurimit, diversifikimit dhe rritjes së
cilësisë së jetës kulturore;

Nxitja e vullnetarizmit dhe pjesëmarrjes aktive të të rinjve në jetën kulturore brenda dhe
jashtë Republikës së Kosovës, me theks tek fëmijët dhe personat me aftësi të kufizuara;

Fuqizimi i koordinimit dhe partneritetit ndërmjet institucioneve të kulturës dhe trashëgimisë
kulturore dhe shoqërisë civile përmes fuqizimit të skenës së pavarur kulturore dhe nxitjes së
akterëve të rinj që veprojnë në fushën e kulturës;

Promovimi i artit dhe trashëgimisë kulturore përmes zhvillimit të diplomacisë publike.

Projekt-propozimet e zhvilluara në përputhje me objektivat e përgjithshme dhe specifike duhet të
synojnë gjithëpërfshirjen duke siguruar përfshirjen aktive të grupeve të ndryshme të komunitetit në
aktivitetet përkatëse të projekt-propozimit, në veçanti të rinjtë, të moshuarit, vajzat dhe gratë,
personat me aftësi të kufizuara, komunitetin LGBTIQ, komunitetet pakicë, etj.

Të drejtë aplikimi me projekt-propozime në thirrjen publike për vitin 2022 kanë OJQ-të dhe Individët
që dëshmojnë se programi i tyre i punës është i profilizuar në fushën e artit dhe trashëgimisë
kulturore. OJQ-të dhe Individët mund të aplikojnë në njërën nga kategoritë në vijim:

  1. Mbështetje për zhvillimin organizativ dhe programor të OJQ-ve të artit dhe
    trashëgimisë kulturore;
  2. Ngjarjet tradicionale të artit dhe trashëgimisë kulturore;
  3. Projektet dhe ngjarjet në fushën e artit dhe trashëgimisë kulturore;
  4. Projektet e krijuesve (artistëve) të rinj;
  5. Fondi i mobilitetit për promovim ndërkombëtar të artit dhe trashëgimisë kulturore
    të Kosovës.

OJQ-të dhe individët mund të aplikojnë me më së shumti 1 projekt-propozim në një nga katër
kategoritë e para (kategoria 1, 2, 3 dhe 4) të kësaj thirrje publike. Në këtë pikë mund të përbëjë
përjashtim aplikimi në kategorinë 5, për aktivitete të cilat nuk janë pjesë e integruar e projektpropozimeve të prezantuara për kategoritë 1, 2, 3 dhe 4. / KultPlus.com

https://www.mkrs-ks.org/repository/docs/Thirrja_publike_Kulture_dhe_Trashegimi.pdf?fbclid=IwAR3V6G5ShA3-HEmz3pfIBVgCQ47hjdwgZ5Qzean-SUSf4XTL9k3fDNxlWJs

Parku Arkeologjik “Ulpiana”, përfitues i projektit të financuar nga fondi i BE-së dhe MKRS-së

Në kuadër të aktiviteteve për shënimin e Ditës Ndërkombëtare të Monumenteve dhe Lokaliteteve, zëvendësministrja Daulina Osmani së bashku me Shefin e Zyrës së BE-së në Kosovë, Tomas Szunyog, Ambasadorë, përfaqësues të OSBE dhe përfaqësues të UNDP, vizituan Parkun Arkeologjik “Ulpiana”.

Ky Park Arkeologjik është përfitues i projektit “Misioni Arkeologjik Evropian në Kosovë: nga Ulpiana në Iustiniana Secunda” i financuar nga fondi i BE-së ndërsa bashkë financohet nga Ministria e Kulturës, Rinisë dhe Sportit. Në kuadër të tij do të zbatohen kompletimi i incizimit gjeofizik dhe dokumentimi i të gjitha gjetjeve dhe strukturave mbi tokë, gërmimet arkeologjike në dy sektorë, të cilat pritet të zgjerojnë parkun arkeologjik, themelimin e qendrës së hulumtimit dhe furnizimin me pajisje moderne si dhe trajnimet për arkeologji në bashkëpunim me Universitetin e Prishtinës “Hasan Prishtina”.

Gjatë kësaj vizite në teren u fol për rëndësinë që ka për të ardhmen angazhimi dhe puna në mbrojtje të trashëgimisë kulturore. / KultPlus.com

MKRS: Ndërhyrjet e shumta synojnë kthimin e shkëlqimit të dikurshëm kulturor të Mitrovicës

Ministria e Kulturës, Rinisë dhe Sportit, përmes një video të publikuar në llogarinë zyrtare në “Facebook”, ka paraqitur edhe ndërhyrjet restauruese dhe emergjente në asetet e trashëgimisë kulturore në Mitrovicë, shkruan KultPlus.

MKRS thotë se këto ndërhyrje janë bërë që t’i kthejnë shkëlqimin e dikurshëm të Mitrovicës.

“Rajoni i Mitrovices është ndër zonat më të pasura kulturore të Kosovës, por njëkohësisht edhe më të neglizhuara ndër vite”, thuhet në njoftim.

Ndërhyrje restaturuese e emergjente po zhvillohen në Shtëpinë e Islam Shipollit, Xhaminë e Mazhiqit, Bazilikën e Shën Pjetrit në Mitrovicë dhe Shtëpinë e Gani Sejdiut në Runik të Skënderajt.

Së shpejti pritet të nisin punimet edhe në Hamamin e qytetit në Mitrovicë, ndërsa në gjysmën e dytë të vitit do të vazhdohet me projekte të tjera. /KultPlus.com

Ekspozita e Muzeut të Fëmijërisë së Luftës vjen të shtunën për herë të parë në GKK

Ekspotiza e WCM është në Prishtinë për herë të parë, përcjell KultPlus.

Përmes tregimeve personale, objekteve dhe provave videot që janë pjesë e koleksionit të Muzeut të Fëmijërisë së Luftës, ekspozita do të hedhë dritë mbi përvojat e rritjes në BE-së Kosovë, Kroaci, Serbi, Ukrainë, Siri, Afganistan dhe Palestinë.

Pas hapjes më 16 prill, duke filluar nga ora 20:00 në Galerinë Kombëtare të Kosovës, ekspozita do të jetë e hapur për vizitorët deri më 30 prill.

Ekspozita realizohet në partneritet me Ministrinë e Kulturës, Rinisë dhe Sportit të Kosovës, Galerinë Kombëtare të Kosovës, ForuminZFD Kosovë dhe BE-në në Kosovë. / KultPlus.com

Ministri Çeku takohet me kryetarin e Federatës Ndërkombëtare të Gjimnastikës, diskutohet për zhvillimet në sport

Sot në Ministrinë e Kulturës, Rinisë dhe Sportit, ministri Hajrulla Çeku ka pritur kryetarin e Federatës Ndërkombëtare të Gjimnastikës, Morinari Watanabe, i shoqëruar nga Kryetari i Federatës së Gjimnastikës së Kosovës, Besim Halilaj, sekretari i përgjithshëm, Amir Tahiraga dhe nënkryetarja Sherife Qerimi, përcjell KultPlus.

Në takim me ministrin Hajrulla Çeku dhe zëvendësministren Daulina Osmani, diskutuan për zhvillimet në sport, veçanërisht në fushën e gjimnastikës.

Ministri Çeku e njoftoi për punët dhe planet që ka MKRS-ja për zhvillimin e mëtejmë të këtij sporti ndërsa u diskutua për projekte dhe bashkëpunim konkret mes MKRS dhe Federatës Ndërkombëtare të Gjimnastikës. / KultPlus.com

MKRS ofron mbështetje për organizatat e profilizuara në fushën e artit apo të trashëgimisë kulturore

Ministria e Kulturës, Rinisë dhe Sportit ka bërë të ditur se do të ofrojë mbështetje për organizatat e profilizuara në fushën e artit apo të trashëgimisë kulturore, përcjell KultPlus.

Mbështetja këtë vit do të jetë e ndarë në 5 kategori të mbështetjes.

Objektivat e thirrjes janë këto:

Fuqizimi i skenës së pavarur kulturore përmes zhvillimit të organizatave të dëshmuara të profilizuara në fushën e artit dhe trashëgimisë kulturore.

Rritja e cilësisë së krijimtarisë artistike.

Fuqizimi i partneritetit në mes të institucioneve publike dhe komunitetit kulturor në zhvillimin dhe zbatimin e politikave adekuate publike për fushën e artit dhe trashëgimisë kulturore.

Zhvillimi i diplomacisë publike përmes rritjes së cilësisë së aktiviteteve artistike dhe të trashëgimisë kulturore të cilët prezantohen në sferën ndërkombëtare, dhe përmes përfshirjes në rrjetet ndërkombëtare të organizatave të kulturës.

Shkëmbimi i njohurive dhe ngritja e vetëdijes rreth rolit të artit dhe trashëgimisë kulturore tek qytetarët, me theks të veçantë tek fëmijët.

Nxitja e vullnetarizmit dhe pjesëmarrjes aktive të të rinjve dhe personave me aftësi të kufizuar në fushën e artit dhe trashëgimisë kulturore.

Përmirësimi i kushteve të përshtatshme të operimit të akterëve kyç të skenës së pavarur kulturore, përfshirë këtu hapësirën operuese për ushtrim të veprimtarisë së tyre, kapacitetin e nevojshëm njerëzor menaxhues dhe profesional.

Të drejtë aplikimi kanë OJQ-të e regjistruara në Republikën e Kosovës të profilizuara në fushën e artit dhe trashëgimisë kulturore, me përvojë të dëshmuar në sektorin e kulturës, që plotësojnë kriteret përkatëse të përgjithshme dhe të veçanta.

Kush mund të aplikojë:

OJQ-të e regjistruara në Republikën e Kosovës të profilizuara në fushën e artit dhe trashëgimisë kulturore, me përvojë të dëshmuar në sektorin e kulturës, që plotësojnë kriteret përkatëse të përgjithshme dhe të veçanta.

Shkalla e mbështetjes:

Shuma maksimale e mbështetjes për një përfitues 100,000.00 Euro

Shuma minimale e mbështetjes për një përfitues 50,000.00 Euro

Linku për informacione dhe aplikim: https://mkrs-ks.org/…/Thirrja_publike_Kulture_dhe… / KultPlus.com

MKRS shpall thirrjen publike për mbështetje të OJQ-ve dhe Individëve në fushën e Artit dhe Trashëgimisë Kulturore

Ministria e Kulturës, Rinisë dhe Sportit shpall thirrjen publike për mbështetje të OJQ-ve dhe Individëve në fushën e Artit dhe Trashëgimisë Kulturore, duke sjellur risi në formatin e thirrjes dhe formën e aplikimit.Për herë të parë aplikimi për grante në Art dhe Trashëgimi Kulturore do të bëhet online, përmes platformës eKosova, duke siguruar efikasitet dhe transparencë të shtuar në menaxhimin e të mirave publike.

Për të ofruar mbështetje adekuate për skenën e pavarur kulturore, cikli i parë i thirrjes për vitin 2022 synon 5 kategori të mbështetjes:

Mbështetje për zhvillimin organizativ dhe programor të OJQ-ve të artit dhe trashëgimisë kulturore;

Ngjarjet tradicionale të artit dhe trashëgimisë kulturore;

Projektet dhe ngjarjet në fushën e artit dhe trashëgimisë kulturore;

Projektet e krijuesve të rinj;

Fondi i mobilitetit për promovim ndërkombëtar të artit dhe trashëgimisë kulturore të Kosovës.

Përmes thirrjes publike për grante në Art dhe Trashëgimi Kulturore, Ministria e Kulturës, Rinisë dhe Sportit ka për qëllim:

Promovimin e artit dhe trashëgimisë kulturore përmes pasurimit, diversifikimit dhe rritjes së cilësisë së jetës kulturore;

Nxitjen e vullnetarizmit dhe pjesëmarrjes aktive të të rinjve në jetën kulturore brenda dhe jashtë Republikës së Kosovës, me theks tek fëmijët dhe personat me aftësi të kufizuara;

Fuqizimin e koordinimit dhe partneritetit ndërmjet institucioneve të kulturës dhe trashëgimisë kulturore dhe shoqërisë civile përmes fuqizimit të skenës së pavarur kulturore dhe nxitjes së akterëve të rinj që veprojnë në fushën e kulturës;

Promovimin e artit dhe trashëgimisë kulturore përmes zhvillimit të diplomacisë publike.

Thirrja do të jetë e hapur nga data 01.04.2022 deri më datën 22 prill 2022, në ora 23:59.Ministria e Kulturës, Rinisë dhe Sportit mbetet e përkushtuar në avancimin e shërbimeve për komunitetin artistik brenda dhe jashtë kufinjve të Republikës së Kosovës.

APLIKIMI

Shpallja e Thirrjes në web faqen e MKRS-së: https://mkrs-ks.org/…/Thirrja_publike_Kulture_dhe…

Për të aplikuar përmes platformës online, duhet të ndiqen këta hapa:Në platformën eKosova kliko: ekosova.rks-gov.net/, pastaj:- Menyja Kryesore, zgjedh: Shërbime- Nënkategoria: Grante dhe Subvencione, duke zgjedhur për cilin lloj të grantit do të aplikoni, zgjidhni si me poshtë:

– Aplikimi për grante dhe subvencione të MKRS për Individë- Aplikimi për grante dhe subvencione të MKRS për OJQ.

Në vazhdim të kësaj faqeje sipas kategorisë për grante (OJQ, Individë) gjeni “Formulari i Aplikimit”- Për të shkarkuar udhëzuesin për aplikim online për projekt-propozimet kulturore për 2022 për OJQ kliko këtu: https://mkrs-ks.org/repository/docs/Manual-ojq.pdf

– Për të shkarkuar udhëzuesin për aplikim online për projekt-propozimet kulturore për 2022 për Individë kliko këtu: https://mkrs-ks.org/repository/docs/Manual-individe.pdf

Për të shkarkuar udhëzimet për aplikuesit sa i përket procesit të pranimit, hapjes dhe shqyrtimit të aplikacioneve, vlerësimit të aplikacioneve, kontraktimit, dhënies së fondeve, kohës dhe mënyrës së parashtrimit të ankesave, trajtimit të dokumenteve dhe kalendarit tregues të zbatimit të thirrjes, kliko këtu: – OJQ: https://gzk.rks-gov.net/ActDetail.aspx?ActID=14831

– Individë: https://www.mkrs-ks.org/…/Rregullore_per_subvencionimin… / KultPlus.com

Rritet mbështetja për federatat sportive

Sot në Ministrinë e Kulturës, Rinisë dhe Sportit janë nënshkruar memorandumet me Komitetin Olimpik të Kosovës, Komitetin Paralimpik të Kosovës dhe me 36 federata sportive.

Shuma e përgjithshme e mbështetjes për Komitetin Olimpik, federatat e sportit dhe Komitetin Paralimpik vetëm përmes memorandumeve vjetore është mbi 3.7 milionë Euro.

Komiteti Olimpik i Kosovës është përkrahur me shumën prej 680 mijë euro, Komiteti Paralimpik me shumën prej 100 mijë euro.

Ndërsa shuma e memorandumeve për federata është përcaktuar në bazë të koeficientit të KOK-ut nga kategorizimi i federatave dhe vlerësimit të kategorisë nga MKRS-ja. Koeficienti i pikës për federatat e kategorisë A është rritur në 2200 Euro, ndërsa për kategorinë B do të jetë 1500 Euro.

Federatat e kategorisë C janë vlerësuar me koeficient të pikës prej 1200 Euro, ndërsa për kategorinë D është rritur në 1000 Euro.

Të gjitha kategoritë kanë pasur rritje të shumës në krahasim me vitet paraprake. Përveç mbështetjes së federatave do të ketë edhe mbështetje të sportistëve, trajnerëve dhe shpresave olimpike në bazë të kategorizimit të KOK-ut. /KultPlus.com

Sporti i Kosovës do të bëhet me strategji zhvillimore brenda vitit 2022

Ministri i Sportit, Hajrulla Çeku ka takuar sot anëtarët e Grupit Punues për hartimin e strategjisë shtetërore të sportit.

Në këtë takim ai u bëri të qartë mbështetjen e tij dhe të Qeverisë së Kosovës në krijimin e këtij dokumenti strategjik për sportin, që do jetë udhërrëfyes shumë i vlefshëm për rritjen e cilësisë së garës sportive në vend, suksesin ndërkombëtar, masivizimin e sportit për mirëqenie e shëndet dhe shfrytëzimin e potencialit ekonomik të sportit.

Udhëheqës i Grupit Punues është Sekretari i Përgjithshëm i Ministrisë së Sportit Bislim Bislimi. Ndërsa përveq anëtarëve nga stafi i brendshëm i Ministrisë, pjesë e Grupit Punues janë edhe Arben Fetahu, kryetar i FBK-së dhe Besim Aliti, Sekretar i Përgjithshëm i KOK-ut.

Grupit Punues për hartimin e Strategjisë Shtetërore për Zhvillimin e Sportit së shpejti pritet t’i bashkohen edhe konsulentë vendorë dhe ndërkombëtarë. /KultPlus.com

Nënshkruhet memorandum bashkëpunimi mes MKRS-së dhe OJQ-së “Zëri i Romëve, Ashkalinjëve dhe Egjiptianëve”

Sot është nënshkruar memorandum bashkëpunimi mes Ministrisë së Kulturës, Rinisë dhe Sportit dhe OJQ -së “Zëri i Romëve, Ashkalinjëve dhe Egjiptianëve” për programin për punë praktike me mundësi punësimi për të rinjtë e komuniteteve egjiptian, rom dhe ashkali.

Përmes këtij programit synohet që të rinjtë e komuniteteve të kenë mundësi të fitojnë dhe fuqizojnë shkathtësitë e tyre, në ndihmë nga profesionistët që punojnë brenda institucioneve.

Kanidatët do të përzgjedhen përmes një procesi të hapur në një konkurrencë të barabartë dhe do të angazhohen për punë praktike në institucionet vartëse të MKRS-së siç janë: Biblioteka, Teatrot, Muzetë, Qendrat Rajonale për Trashëgimi Kulturore etj.

Memorandumi u nënshkrua nga zëvendësuesi i Sekretarit të Përgjithshëm të MKRS, Bislim Bislimi dhe Amanda Toska, zyrtare për punësim në Organizatën “Zëri i Romëve, Ashkalinjëve dhe Egjiptianëve”. / KultPlus.com

Kori i Filharmonisë së Kosovës realizon koncertin e dytë premierë për vitin 2022

Kori i Filharmonisë së Kosovës ka realizuar koncertin e dytë premierë për vitin 2022.

Kësaj radhe drejtimi i korit i është besuar mjeshtres greke Mary Konstantinidou, një nga personalitetet më me ndikim në fushën e muzikës klasike në Greqi. Vepra e Giuseppe Verdit, “Pater Noster” ka hapur koncertin e së shtunës mbrëma.

Ndërsa në programin jo pak sfidues në kishën katolike ‘Shën Ndou”, Kori ka interpretuar edhe vepra nga Henryk Górecki, Dvořák, Puccini, Rossini e kompozitori kosovar Hajrullah Syla.

Koncerti është përmbyllur me “Libera me – Requiem” nga Gabriel Faure, ku në rolin e solistit u paraqit Shaban Behramaj – bariton. Kori do i rikthehet skenës së kryeqytetit më 18 maj me një koncert tjetër premierë në drejtimin e dirigjentit Edon Ramadani./ KultPlus.com

Çeku në takim me komunitetin artistik në Prizren në serinë e diskutimeve të hapura për kulturë

Po vazhdojnë diskutimet mbi reformën ligjore dhe institucionale në kulturë, mes Ministrit Çeku dhe komunitetit artistik.

Takimi i radhës u mbajt në Kino Lumbardhi në Prizren.

Përgjatë dy orësh u diskutua për mënyrën e funksionimit sa më të mirë të artit dhe kulturës në vend. U fol për ndryshimin e ligjit dhe udhëzimeve, ndërtimin e një partneriteti strategjik mes ministrisë dhe skenës së pavarur kulturore, statusin e teatrove amatore dhe mbështetjen e tyre të qëndrueshme financiare. Gjithashtu për promovimin e artit tek gjeneratat e reja, integrimin e dramave të gjuhëve tjera, turke, rome, boshnjake etj, në kuadër të teatrit të qytetit, promovimin më të madh të aktiviteteve kulturore dhe lidhjen e tyre me programet edukative në shkolla.

Po ashtu u fol për çështjen e politikave kulturore për botimin e librave, krijimin e orkestrës simfonike të qytetit, pagat e artistëve dhe instrumentistëve, funksionalizimi i baletit, teatrit të kukullave në Prizren, forcimi i komisioneve vlerësuese për projektet që aplikohet për subvencionim, rritja e monitorimit për mbarëvajtjen e projekteve që subvencionohen duke ashpërsuar monitorimin.

Tema tjera ishin krijimi i artit për publikun, duke rritur dhe zhvilluar audiencën, rritja e fondit për diversitet kulturor, kalendari vjetor i artit për Prizrenin, hapësirat alternative kulturore, ri funksionalizimi i hapësirave publike për ta kthyer artin tek publiku etj.

Diskutimi i radhës do të mbahet në Ferizaj. / KultPlus.com

MKRS-ja shpall konkurs publik për dizajnimin e Logos së institucionit ‘Opera e Kosovës’

Ministria e Kulturës, Rinisë dhe Sportit shpall konkurs publik për dizajnimin e Logos së institucionit Opera e Kosovës, përcjell KultPlus.

Data e fundit për aplikim është: 31.03.2022.

Më poshtë gjeni detajet tjera për aplikim:

Ministria e Kulturës, Rinisë dhe Sportit, shpall konkurs publik për dizajnimin e Logos së
institucionit Opera e Kosovës, themeluar me vendimin Nr.08-V-053, të datës 02.08.2021 nga
Kuvendi i Kosovës.

Vlerësimi i propozimeve do të bëhet nga një komision profesional i themeluar nga Ministria e
Kulturës, Rinisë dhe Sportit.

Kriteret e dizajnimit të logos:

➢ Të jetë origjinale, unike dhe të mos jetë imitim i ndonjë logoje ekzistuese.
➢ Të ketë pasqyrim artistik të veprimtarisë së Operës së Kosovës;
➢ Të shpreh funksionin dhe mandatin e Operës së Kosovës;
➢ Të jetë e veçantë, kreative, kualitative, profesionale dhe prezantuese;
➢ Të jetë dinjitoze për identitetin e Institucionit më të lartë kulturor në vend;
➢ Të jetë lehtësisht e kuptueshme;
➢ Të përçoj mesazh të qartë;
➢ Të jetë e dallueshme, t’i rezistojë kohës dhe të jetë e lehtë për tu mbajtur në mend;
➢ Të jetë e përshtatshme për vendosje në dokumente fizike dhe në paraqitje elektronike,
e lehtë për shtyp, në sfonde të bardha dhe të errëta;
➢ Të jetë lehtë e përdorshme në madhësi të ndryshme;
➢ Të ketë shpjegim të secilit detaj të propozuar në logo

Mënyra e aplikimit:

Logoja duhet të dorëzohet në pliko të mbyllura me shifër dhe pa emër të autorit në CD, (në të
kundërtën do të skualifikohet), bashkë me një version vektor të logos dhe po ashtu e shtypur
në kopje fizike.

Dosja e aplikimit duhet të përmbajë një manual të shpjegimeve të përmbajtjes dhe përdorimit.

Aplikacioni duhet të ketë mbishkrimin “Për dizajnin ideor të logos së Operës së Kosovës”

Dokumentet e kompletuara duhet të dërgohen personalisht ose me postë, në adresën e
mëposhtme:

Ministria e Kulturës, Rinisë dhe Sportit

Sheshi Nëna Terezë; Zyra e Prokurimit, Nr. 20; 10000, Prishtinë, Republika e Kosovës

Kush mund të konkurojë:

Të drejtë konkurimi kanë të gjithë artistët nga Kosova, rajoni dhe bota.

Konkursi është i natyrës garuese dhe ideja më e mirë e përzgjedhur do të shpërblehet me 5,000
€.

Të drejtat e autorit për propozimet e përzgjedhura barten nga propozuesi tek Ministria e
Kulturës, Rinisë dhe Sportit. / KultPlus.com

Adem Gashi: As në skaje të imagjinatës nuk më përftonte ideja se një ditë do të isha laureat i çmimit “Azem Shkreli”

Shkruan: Adem Gashi

Fjala ime me rastin e pranimit të Çmimit kombëtar letrar “Azem Shkreli”

I respektuari, Z. Ministër Çeku,

Të çmuar anëtarë të Jurisë,

Të nderuar të pranishëm,

E dashur Grua,

Jam hamendur shumë nëse duhej të flisja sot, prirë nga bindja se kur njeriu vlerësohet me çmimin më të lartë të karrierës letrare, pikërisht për mjeshtërinë e fjalëve, ç’u dashka të thotë tjetër?

E megjithatë, Z. Ministër, ja që paska diçka që ju me fjalorin e administratës e quani protokoll dhe ne shkrimtarët, me fjalësin poetik i themi ritual dhe unë e respektoj.

Kam tri gjëra që nuk dua t’i mbaj ujem.

E para: Pikërisht në këtë ministri, në legjislaturën e parë pas lufte, kam qenë këshilltar i parë politik. Atëbotë kam hedhur dy projekt-ide që erdhën dhe u bënë program: Çmimin nacional për karrierë letrare dhe subvencionimin e dorëshkrimeve të autorëve. Programe që gjëllijnë edhe sot, veçse të zgjeruara e të begatuar në formë e përmbajte. Sigurisht që atëherë as në skaje të imagjinatës nuk më përftonte ideja se një ditë do të isha edhe unë laureat.

E dyta: I përkas gjeneratës së demonstratave të gjashtëdhjetetetës. Formimi im letrar i detyrohet shkollës letrare të Normales së Prishtinës që ishte bija gjenetike e Normales famëmadhe të Elbasanit, me drejtorin e parë Luigj Gurakuqin. Aty gjeta grupin letrar “Migjeni” që drejtohej nga Rushit Ramabaja. Një vit më vonë e mori kryesimin, tashti i ndjeri, Arif Demolli. Pastaj, për tri vjet, e drejtova unë (sigurisht duket të kem qenë më karrierist se dy të parët)! Po përse i zura ngoje këta emra dhe këto fakte? Që t’jua kujtoj se kjo shkollë letrare, si asnjë tjetër, dha tre laureatë të çmimit “Azem Shkreli”.

E treta: Ka vite që më ka bezdisur formulimi “Juri profesionale”. Ç’është kjo juria profesionale? Lexoja sesi çdo manifestim a konkurs letrar shkolle, mëhalle a qyteti bënte “juri profesionale”. Kur shihja përbërjen më dilet një arsimtar BAT-i, një tjetër i lëndës së Amvisërisë a ku di unë. Ata edhe mund të ishin shumë të mirë për lëndët e tyre, po nuk gjeje një pikëtakim me letërsinë.

Ju, Z. Ministër më bëtë të bëj një vetëqortim. Dëshmuat se kur do dhe di njeriu edhe mund të bëjë një juri me përgjegjësi, dije dhe kulturë profesionale. Dhe prova u dha. Pothuajse të gjitha vendimet u morën më vota unanime dhe, për herë të parë, nuk pati “ndarje” çmimesh, por “dhënie” çmimesh. Një çmim letrar mund të ndahet vetëm në një rrethanë, kur ka në konkurrencë një libër me bashkautorësi.

Tashti dikush mund të më pyes: do të thosha kështu për këtë juri edhe po të mos ma jepte çmimin? Ju them me sinqeritet, një vendim i tillë nuk do të më pëlqente hiç, po bindjen për kalibrin e saj nuk do ta kontestoja në asnjë rrethanë.

Tashti dua t’ju kujtoj diçka historiku letrar. Kur shkrimtarit gjerman Heinrich Bell i dhanë kumtin për çmimin Nobel ai bëri një pyetje habitore: Vetë mua, jo edhe Gynter Grasit? Vite më vonë kur Grasi e mori këtë çmim, po me habitore pyeti: Vetëm unë, jo edhe Krista Volf?

Nga ç’kam marrë vesh në listën për çmim karriere ishin edhe dy miq të mi të letrave: Zejnullah Rrahmani dhe Anton Nikë Berisha. Është bindja ime personale, të dy, po ashtu, meritorë për këtë çmim.

U mërzitët?

Po e mbyll këtë fjalë me një refleks komik: Doni më për Belulin?

Ju faleminderit!

28.02.2022 / KultPlus.com

Fillojnë ndërhyrjet emergjente në kullën e Pjetër Prenkpalaj në fshatin Zym të Hasit

Kanë filluar ndërhyrjet emergjente në kullën e Pjetër Prenkpalaj në fshatin Zym të Hasit, përcjell KultPlus.

Ky projekt po realizohet në zbatim të programit “Masat Preventive – Intervenimet Emergjente” të Ministrisë së Kulturës, Rinisë dhe Sportit për ndërhyrje në asetet e trashëgimisë kulturore në rrezik.

Kulla e gurit e familjes Pjetër Prenkpalaj e ndërtuar në shekullin XIX nga aspekti arkitektonik, i përket shtëpi-kullave me çardak të punuar prej druri. E vendosur mbi kodër ka pozitë dominuese mbi fshatin Zym, duke u shndërruar në pjesën përbërëse të peizazhit të fshatit. Kjo kullë prej guri veçohet për nga teknika e ndërtimit të muratimit të thatë (pa llaç) të mureve mbajtëse, teknika tradicionale e muratimit me thupra të mureve ndarëse në etazhe, punimet të drugdhendjes të jastëkëve (kapiteleve) të shtyllave të çardakut, rafteve, dyerve, dritareve, parmakëve prej druri të dritareve, etj./ KultPlus.com

MKRS: Rexho Mulliqi është ndër të parët krijues të këngës korale, si autor i simfonisë së parë shqiptare në Kosovë

Sot është mbajtur ceremonia përkujtimore për nder të kompozitorit Rexho Mulliqi, me ç’rast Ministria e Kulturës, Rinisë dhe Sportit e ka cilësuar kompozitorin si njërin ndër krijuesit e traditës muzikore profesioniste në Kosovë, përcjell KultPlus.

“Mulliqi mbetet kompozitori më i madh që ka dhënë Kosova dhe njëri ndër krijuesit më të mëdhenj të muzikës artistike në botën shqiptare”, ka shkruar MKRS-ja.

Më poshtë KultPlus ua sjell postimin e tyre të plotë:

Në kujtim të jetës dhe veprimtarisë së kompozitorit të mirënjohur shqiptar, Rexho Mulliqi, në 40 vjetorin e tij të vdekjes, është organizuar sot ceremoni përkujtimore nga Ministria e Kulturës në bashkëpunim me Filharmoninë e Kosovës dhe Universitetin e Prishtinës “Hasan Prishtina”.

Në Fakultetin e Arteve të Universitetit të Prishtinës, ku u mbajt ceremonia morën pjesë personalitete të shumta politike, akademike e artistike, drejtues të institucioneve qendrore të kulturës dhe trashëgimisë si dhe përfaqësues të organizatave të shoqërisë civile.

Për jetën dhe krijimtarinë e kompozitorit Mulliqi folën drejtori i Filharmonisë së Kosovës, Baki Jashari, kompozitor – dirigjent dhe muzikologia Rreze Kryeziu-Breznica. Po ashtu u realizuan dy pika artistike nga krijimtaria e kompozitorit Mulliqi, “Baresha” të cilën e interpretoi në violinë Arsim Gashi, dhe “Nji lule” nga sopranoja Urta Haziraj, të cilat u shoqëruan në piano nga prof. Valton Beqiri.

Rexho Mulliqi është njëri ndër krijuesit e traditës muzikore profesioniste në Kosovë. Ai është ndër të parët krijues të këngës korale, si autor i simfonisë së parë shqiptare në Kosovë, i së dytës në muzikën e gjithëmbarshme shqiptare, përfshirë edhe Shqipërinë.

Mulliqi mbetet kompozitori më i madh që ka dhënë Kosova dhe njëri ndër krijuesit më të mëdhenj të muzikës artistike në botën shqiptare. / KultPlus.com

Çeku me telegram ngushëllimi për Bahri Drançollin: Skena e artit në Kosovë humbi një person që dha shumë për shoqërinë

Dje ka vdekur profesori Bahri Drançolli, njëri ndër themeluesit e Artit Modern dhe Artit Grafik, si dhe njohës i shkëlqyeshëm i arteve figurative, shkruan KultPlus.

Ndërsa, sot përmes një postimi në llogarinë zyrtare të Ministrisë së Kulturës, Rinisë dhe Artit, Ministri Hajrulla Çeku dërgoi një telegram ngushëllimi për gjithë familjen e Bahri Drançollit.

Telegram ngushëllimi

E nderuar familje Drançolli,

Me pikëllim të thellë mora lajmin për ndarjen nga jeta të më të dashurit tuaj, profesor Bahri Drançolli.

Në emrin tim dhe të Ministrisë së Kulturës shpreh ngushëllimet më të sinqerta për humbjen tuaj.

Skena e artit në Kosovë humbi një person që dha shumë për shoqërinë, njërin ndër themeluesit e artit modern dhe artit grafik, si dhe njohësin e shkëlqyeshëm të arteve figurative.

Krijimtaria dhe vlerat artistike që ka lënë si pasuri e trashëgimi, do të mbeten të paharruara siç do të mbetet edhe kujtimi ynë për të.

Ndarja nga jeta e një prej artistëve pionierë të artit akademik në vend ka lënë një boshllëk të pazëvendësueshëm në fushën e artit figurativ në Kosovë dhe më gjerë.

Ngushëllime familjes, miqve dhe dashamirëve të profesorit Bahri Drançolli.

Hajrulla Çeku

Ministër i Kulturës, Rinisë dhe Sportit“, ka shkruar ai.

Bahri Drançolli do të mbetet përherë i njohur për artdashësit gjermanë dhe botërorë me ekspozitat e tij personale veçanërisht në: Marsyas Gallery (Germany), Hesler Gallery, Munich (Germany), Studio M Gallery Bamberg (Germany) Gallery Kunstwerkstatt, Darmstadt (Germany), Kunstverein Rosenheim, Munich, Keislich Gallery Munich, Van Laar Gallery Munich, Stuckvilla, Munich, (Germany), etj. / KultPlus.com

Në mbrojtje të trashëgimisë kulturore të rajonit të Mitrovicës do të bëhen edhe disa ndërhyrje restauruese

Ka nisur restaurimin e shtëpisë së Xhafer Devës, një monument i rëndësisë së veçantë. Pas përfundimit të punëve restauruese, monumenti do të jetësohet me funksione institucionale dhe komunitare.

Në mbrojtje të trashëgimisë kulturore të rajonit të Mitrovicës do të bëhen edhe disa ndërhyrje restauruese. Gjatë vitit 2022 do të ndërhyhet në Hamamin e Qytetit, xhaminë e djegur “Mulla Ilaz Broja” në Brojë të Skënderajt, xhaminë e Mazhiqit, përfshi projektet për revitializim të qytetit të vjetër të Trepçës dhe ekspozitën e përhershme në Kompleksin e kullave të Isë Boletinit.

Në kuadër të masave emergjente gjatë këtij muaji do të nisin ndërhyrjet me karakter shpëtimi në Xhaminë e Mazhiqit, Kishën Katolike Sase në Stantërg dhe Shtëpinë e Islam Shipollit, ndërsa grupi i dytë i ndërhyrjeve emergjente do të definohet javëve në vijim.

Muzeu i Qytetit dhe Muzeu i Kristaleve janë institucione të rëndësisë së veçantë për kulturën dhe trashëgiminë kulturore jo vetëm të Mitrovicës. Nga diskutimet me zyrtarët e muzeve u njoftua për sfidat aktuale dhe potencialin e madh zhvillimor të këtyre institucioneve. Ministria gjatë vitit 2022 do të zbatojë programin e investimeve në një numër të konsiderueshëm të muzeve në gjithë vendin.

Teatri i qytetit të Mitrovicës vazhdon të funksionojë në kushte të vështira. Ministria e Kulturës ka mbështetur dy shfaqjet e këtij teatri në fund të vitit të kaluar, si pjesë e Programit të Ringjalljes. Megjithatë, sfidat edhe më tej janë të mëdha, veçanërisht ato infrastrukturore. Gjatë këtij viti janë planifikuar disa ndërhyrje renovuese në ndërtesat e institucioneve të kulturës, ndërsa teatrot e qyteteve do të trajtohen me prioritet.

Gjatë qëndrimit në Mitrovicë, MKRS-ja vizitoi edhe Qendrën Rajonale të Trashëgimisë Kulturore, Bibliotekën Komunale dhe Arkivin Ndër-komunal. Gjithashtu, si vazhdimësi e diskutimeve me komunitetin artistik për procesin e reformës kulturore, u mbajt takim me organizatat e skenës së pavarur kulturore të Mitrovicës. Së shpejti do të organizohet një diskutim të gjerë me komunitetin e kulturës dhe trashëgimisë kulturore në Mitrovicë, për të vazhduar me komunat e tjera të Kosovës, në përpjekje për të dëgjuar secilin dhe hartuar bashkërisht dokumentet e reformës në kulturë, nga koncept dokumenti deri te ligji unik dhe strategjia kombëtare për zhvillimin e kulturës.

Vizita në Mitrovicë u përmbyll me vizitën në Kullën e familjes Kadriu, e cila gjendet në lagjen Kroi i Vitakut. Brenda kullës qëndron e hapur për vizitorë galeria me ekspozitën e përhershme të pikturave të artistit të ndjerë Kadri Kadriu, të vrarë nga forcat serbe në mars të vitit 1999. Në hapësirën tjetër të galerisë, vazhdon të qëndrojë e hapur ekspozita e Hajriz Kadriut, e financuar nga Ministria e Kulturës, me motive nga arkeologjia dhe etnografia shqiptare. Hajrizi është nipi i piktorit të ndjerë Kadri Kadriu, djali i Ali Kadriut, i cili ka pritur dhe shoqëroi MKRS-në gjatë kësaj vizite, duke i paralajmëruar për ekspozitën e tij të skulpturës. / KultPlus.com

MKRS hap ftesë publike për përkrahje financiare për blerjen e librave për vitin 2022

Ministria e Kulturës, Rinisë dhe Sportit ka hapur ftesë publike për përkrahje financiare për blerjen e librave për vitin 2022, përcjell KultPlus.

Projektet me dokumentacionin e kërkuar duhet të dorëzohen me zarf të mbyllur në dy kopje, deri me datën, 28.02.2022 nē orën 16:00.

Për detajet tjera dhe për aplikim bashkangjitur klikoni KËTU./ KultPlus.com

Agron Shujaku prezanton një pjesë të projektit që ka synim realizimin e veprave të kompozitorëve kosovar për piano 4 duar (VIDEO)

Piansiti Agron Shujaku së fundmi ka prezantuar një pjesë të projektit që ka për synim realizimin e veprave të kompozitorëve kosovar për piano 4 duar, përcjell KultPlus.

Bëhet fjalë për veprën për piano 4 duar “Pranvera në Prishtinë” e kompozuar në origjinal nga Musa Piperku, që është transformuar në një vepër të bukur pianistike nga kompozitori Kreshnik Aliçkaj.

Piansiti Shujaku tutje bëri të ditur se realizimi i projektit të CD me vepra të kompozitorëve kosovar është subvencionuar nga Ministria e Kulturës, Rinisë dhe Sportit si dhe Komuna e Prishtinës.

Më poshtë KultPlus ju sjell postimin e tij të plotë:

Te nderuar miq,

Po ju prezentoj një pjesë të projektit që ka synim realizimit të veprave të kompozitorëve Kosovar për piano 4 duar.

Është vepra për piano 4 duar “Pranvera në Prishtinë” e kompozuar në origjinal nga Musa Piperku, që është transformuar në një vepër të bukur pianistike nga kompozitori Kreshnik Aliçkaj.

Realizimi i projektit të CD me vepra të kompozitorëve kosovar është subvencionuar nga Ministria e Kulturës, Rinisë dhe Sportit si dhe Komuna e Prishtinës.

Faleminderoj poashtu Teatrin Profesionist “Istref Begolli” për kontributin e tyre si partner i projektit.
Një falemnderim i veçantë për Memli Kelmendi për kontributin e tij në si inxhinier zëri në realizimin e projektit. / KultPlus.com