Rama: Kanabisin do e legalizojmë, ndoshta edhe për përdorim personal

Kryeministri shqiptar, Edi Rama ka thënë se legalizimi i kanabisit mjekësor do të bëhet, pasi kështu kanë dashur shqiptarët që janë pyetur në këshillimin kombëtar.

Në përgjigje të pyetjes së gazetares së Abc News, Erneta Shevroja, Rama nuk kurseu ironinë me opozitën, për të cilën tha se nuk ekziston.

Rama u pyet se kush do të mbaje përgjegjësi nëse vendi kanabizohet me legalizimin e kanabisit, siç kanë qenë edhe akuzat e fundit të opozitës, dhe tha se do të pyesin sërish nëse do të bëhet edhe legalizimi për përdorim personal

“Ka opozitë akoma këtu? Sa mirë do ishte të kishte opoiztë por, nuk ka. Opozita e vetme e kualifikueshme si e tillë e jona jemi ne vetë. Sikur opozita e tërë, që quhet opozitë, të kishte gjysmën e energjisë dhe çerekun e vullnetit mund të merrte një licencë kualifikimi si opozitë. Shikoje se ça thonë. Ajo që unë po them, që për legalizimin e kanabisit mjekësor ne jemi konsultuar me shqiptarët në këshillimin kombëtar. Legalizimi i kanabisit do bëhet. Do pyesim dhe a doni të legalizohet përdorimi personal i kanabisit apo duhet të vazhdojë të jetë krim që dënohet. Do t’i pyesim, nëse do thonë po do e bëjmë sepse kemi një dilemë për këtë gjë. Po t’ju hap mendjen dhe zemrën jam i dyjëzuar në këtë pikë. Prandaj është këshillimi kombëtar. Amnistinë fiskale e njëjta gjë, shqiptarët kanë thënë masivisht po. Nuk kemi pse hyjmë në këto spirale helmi, çdo gjë që bën njeriu ka të mirat dhe të metat, s’mund të rrimë pa bërë asgjë që mos të marrim baltë dhe akuza. Siç thioshte edhe Loro Boriçi: “Shiu ka punën e vet, ne kemi punën tonë”, tha Rama.

Kryeministri u pyet gjithashtu nëse BE është më e shëndetshme pas një jave, me sinjale që tregojnë hapjen e negociatave për Shqipërinë dhe Maqedoninë e Veriut, pyetje e cila sipas tij ishte joserioze.

“Pyetja tjetër m’u duk humor nga ana juaj, s’mu duk serioze. Mbas një jave ti që bën pyetjen je më e vetëdijshme që kryeministri yt e mbron siç duhet interesin e vendit tënd në BE”, tha Rama. / KultPlus.com

Restaurimi i Kalasë së Gjirokastrës, Rama: Thesar i trashëgimisë sonë kulturore

Kalaja e Gjirokastrës do të ofrojë më tepër hapësirë për turistët vendas dhe të huaj.

Kryeministri Edi Rama ka publikuar në rrjetet sociale pamje nga kjo kala ku shprehet se po punohet për restaurimin dhe konservimin arkitekturor.

“Mirëmëngjes, dhe me këto pamje nga Kalaja magjepsëse e Gjirokastrës, ku punohet për restaurimin dhe konservimin arkitekturor të këtij objekti me peshë të veçantë në thesarin e trashëgimisë sonë historike e kulturore, ju uroj një javë të mbarë”, shprehet Rama.

Në kuadër të projektit të restaurimit në kështjellën e gurtë synohet rritja e sipërfaqes së vizitueshme si dhe konservimin dhe evidentimin e hapësirave të saj.

Një tjetër element  i rëndësishëm është edhe gërmimi arkeologjik që synon evidentimin e një historie më të detajuar të kalasë dhe qytetit.

Ndërhyrjet për përforcimin e strukturave të kalasë dhe riparimin e çarjeve që ishin krijuar do të sigurojnë një qëndrueshmëri të sigurt të kështjellës dhe do të shmangin rrëshqitjet e gurëve.

Kalaja e Gjirokastrës është një ndër më të vjetrat dhe të mëdhatë në Ballkan dhe shtrihet në një hapësirë prej 335 metra.

Zbulimet arkeologjike në zonën e kështjellës, tregojnë se ky vend është jetuar që nga shekulli i IV-V./atsh/ KultPlus.com

Rama: Ne shqiptarët mendojmë se jemi më të vjetrit, grekët mendojnë se majmunët erdhën pas tyre

Kryeministri Edi Rama të shtunën ka marrë pjesë bashkë me kancelarin e Austrisë, Karl Nehammer, në Forumin Europian Wachau me temën “Ruajtja e së ardhmes së Europës dhe zgjerimi i BE’së”.

Në fjalimin e mbajtur, përvec kritikave që i adresoi ndaj BE’së që nuk po lëviz në raport me shtetet e Ballkanit, Rama bëri batuta edhe për ballkanasit. Ajo që mori vëmendjen ishte beteja për të “vërtetat historike” rreth lashtësisë së popujve ballkanikë. Rama, në këtë aspekt, përmendi garën ndërmjet shqiptarëve dhe grekëve se kush është më i moçmi në Gadishull.

“Në Ballkan ne të gjithë kemi në mendje se jemi më të vjetrit. Ne shqiptarët mendojmë se jemi më të vjetrit, ata që erdhën pas majmuneve në evolucionin e Darvinit. Po t’i pyesësh serbët nuk të lënë hapësirë, e lëre me grekët që mendojnë se vetë majmunët erdhën pas grekëve. Le te shkojmë te turqit, ata mund të nisin një zënkë të madhe nëse është kafe turke apo kage greke. Nje kafe mjaftë e fortë që me mirë mos ta provoni. Keshtu edhe maqedono veriorët dhe bullgarët e njëjta gjë” ka thënë Rama.

Tutje Kryeministri Rama i cili gjatë javës që shkoi ishte i ashpër me BE’në gjatë fjalimit në Austri e pranoi se jo vetëm BE ka faj që nuk i zgjat dorën rajonit të Ballkanit Perëndimor.

 “Keshtu që keni durim me ne miqtë e dashur dhe mos harroni dhe pavarësisht problemeve tona që më duhet t’i theksoj, sepse kjo nuk nënkupton se jemi viktimë e ndonjë padrejtësie nuk është kaq e thjeshtë është më e komplikuar se kaq. Jemi të gjithë viktima të historisë sonë e herë viktima të vetës, por jemi njerëz të mirë, jemi njerëz besnikë dhe jemi të çmendur, kështu që më mirë të na keni me ju. Keshtu që kur na keni me ju mund ta keni më të mirën tonë të qenit besnikë të qenitë të mirë, çmendurinë tonë mund tonë kur të merreni me të tjerët” ka theksuar Rama./ KultPlus.com

Rama: Ajo që po ndodh me Kosovën është çmenduri, nën pushtim lëviznin pa viza, sot në liri nuk munden

Me tone të ashpra, gjatë konferencës për shtyp pas samitit në Bruksel, kryeministri Edi Rama u shpreh se ajo që po ndodh me çështjen e liberalizimit të vizave për Kosovën është një çmenduri dhe një turp.

“Një tjetër peng marrje është ajo e Kosovës. Është popullata e vetme në Evropë që nuk mund të lëvizë lirish. Imagjinojeni,. Ara ishin në diktaturën jugosllave dhe mund të lëviznin lirisht. Dhe që kur u liruan, çlirimtarët e tyre nuk i lejojnë të lëvizin lirisht. Kjo është e turpshme.  Unë u thashë dhe ndihem i keqardhur që u ndjeva si të nevojshme, që Serbia është në realitet krejtësisht tjetër. Flasim për një vend ku popullariteti i Putinit është 80% dhe opinioni nuk është i prirur të vrapojë drejt Brukselit por jashtë çdo pritshmërie, edhe times, se sinqerisht nuk e prisja. 3 herë janë harmonizuar me Bashkimin Evropian dhe perëndimin kundër Rusisë, duke votuar edhe për përjashtimin e Rusisë nga këshillit i të drejtave të njeriut. Unë nuk e kuptoj çuarjen e gjërave në kufi në raport me kërkesat për sanksionet. Serbia nuk është në pozicion për të realizuar kaq shumë, kaq shpejt dhe çuarja deri në kufi jep efektin e kundërt! Dhe koston do ta ketë agjenda evropiane e Serbisë dhe popullate e rajonit”, tha Rama./express / KultPlus.com

Kryeministri Rama bën publike pamjet e projektit të Portit të Ri të Durrësit (VIDEO)

Kryeministri i Shqipërisë, Edi Rama ka bërë publike sot pamjet e projektit të Portit të Ri të Durrësit. Ky projekt u paraqit ditën e djeshme në mbledhjen e 8-të të përbashkët të dy qeverive, përcjell KultPlus.

Rama e cilëson një projekt ambicioz që do të transformojë rrënjësisht jo vetëm infrastrukturën tregtare mes Shqipërisë dhe Kosovës, po edhe gravitetin ekonomik rajonal.

“MIRËMËNGJES dhe me projektin ambicioz të Portit të ri të Durrësit, paraqitur në mbledhjen e përbashkët të dy qeverive, si projekt i integruar me projektin e hekurudhës Durrës-Prishtinë dhe portin e thatë në Prishtinë, që do të transformojë rrënjësisht jo vetëm infrastrukturën tregtare mes Shqipërisë dhe Kosovës, po edhe gravitetin ekonomik rajonal, duke e kthyer Durrësin në një nga portat strategjike të ekonomisë së Mesdheut, ju uroj një ditë të bukur”, ka shkruar Rama. / KultPlus.com

Albin Kurti refuzon sërish ftesën e Ramës për “Ballkanin e Hapur”: Nuk kam asgjë të re për të thënë

Kosova herë pas here e ka treguar qëndrimin e saj për ” Ballkanin e Hapur”. Madje edhe sot, kryeministri Albin Kurti i tha kryeministrit shqiptar se nuk ka asnjë të re në qëndrimin e Kosovës për “Ballkanin e Hapur”.

“Duhet të theksojmë që arritën marrëveshje protokolle dhe memorandume 19 sot. Kjo është për tu përshëndetur, Marrëdhëniet tona janë të shkëlqyet dhe vëllazërore. Vëllezërit nuk kanë ndërmjetësues mes njeri tjetrit. Prandaj është kjo mbledhje për të forcuar dy shtetet tona në interes të qytetarëve

Për çështjen e ngritur ajo është e një dimensioni tjetër, jo bilaterale, pra jo mes Kosovës dhe Shqipërisë dhe për atë nuk kam asnjë të re për t’ju thënë”, tha Kurti.

Ndërsa Rama u shpreh: Është e vërtetë që Ballkani i Hapur nuk na bashkon, por është po kaq e vërtetë që Ballkani i Hapur nuk na ndan./ Gazeta Express / KultPlus.com

“Sunny Hill’ dhe drama e ndërtuar mbi gjysmë të vërtetë

Gjylieta Mushkolaj

Është vërtetë dëshpruese që Festivali Sunny Hill nuk po mbahet në Prishtinë siç besonim të gjithë, edhepse një gjë e tillë ishte bërë e ditur një vit më parë, përveç të tjerash edhe në emisionin shumë të shikuar Krasta show! Ky lajm i vitit të kaluar u rilind këto ditë me njoftimin zyrtar nga Sunny Hill kompania ose fondacioni, Sunny Hill Foundation, ose “the Sunny Hill” sh.p.k., biznesi komercial, ose organizata e bamirësisë! Për shumë kend, krejt njejtë, por, siç thuhet, djalli është në detaje, e fshehja e detajeve e ndërton gjysëm të vërtetën. Lajmi mbi ikjen e festivalit, ose aratisjen e festivalit u bë, siç e do zakonisht gjysëm e vërteta, dramë. Drama, megjithatë, nuk filloi me këtë gjysmë të vërtetë, “ikje të befasishme.” Ikja e festivalit është vetëm “gjysëm e vërteta” e parë, por jo edhe më e gënjështra më qyqare, siç do të thishte Mark Twain.

Një ‘gjysmë e vërtetë” tjetër, është edhe ARËSYEJA e ikjes së Festivalit. Është, vonesa, zhagitja prej një muaji (?!) për dhënien në shfrytëzim prej 99 vjetësh të 17 hektarëve tokë të Komunës për Festivalin “Sunny Hill!” Lajmi merr përmasa edhe më dramatike e mjegulla sa vjen e rritet! Vonesa dhënien në shfrytëzim prej 99 vjetësh të 17 hektarëve tokë “e largoi Dua Lipën nga Prishtina!” Festivali është ngjarje, e ngjarja nuk aplikon për tokë. Aplikon individi, ose biznesi, ose ndonje organizatë tjetër. Aplikon organizatori i Festivalit! Nuk është dëgjuar ndonjë herë, në ndonjë vend që organizatori i ndonjë festivali në botë të aplikojë për dhënien e tokës në shfrytëzim në kohëzgjatje prej 99 vjetësh, por kjo është një çështje krejt tjetër. Çështja është te organizatori, Fondacioni ose Sh.P.K.-ja!

Për publikun e gjerë, organizator i festivalit është “Sunny Hill Foundation!” Kështu thotë faqja e përditësuar e Wikipedia-s! Kështu është prezantuar shumë herë Festivali edhe nga vet Dua Lipa, atëherë kur me entuziazëm e njoftonte botën për këtë ngjarje që pa ekzagjerim është bërë krenaria e Prishtinës! Dua Lipa e kishte prezantuar “Sunny Hill Foundation,” si “organizatë bamirëse e themeluar në Prishtinë-Kosovë, nën patronazhin e këngëtares/kantautores shqiptare britanike Dua Lipa.”

Megjithatë, sipërfaqen prej 17 hektarësh për të organizuar këtë Festival, nuk e ka kërkuar nga Komuna e Prishtinës “Sunny Hill Foundation!” 17 hektarë tokë i ka kërkuar një entitet krejt tjetër, The Sunny Hill SH.P.K., një biznes i regjistruar si Shoqëri me përgjegjësi të kufizuar, ku emri i Dua Lipës nuk figuron fare!!!

Kontrata për dhënjen në shfrytëzim të sipërfaqes prej 17 hektarësh është votuar nga Kuvendi komunal, bazuar në perceptim, për të mos thënë huti, se toka po i ndahet entitetit “Sunny Hill Foundation,” Festivalit të Dua Lipës! Në të vërtetë, Kontrata, askund nuk e përmendë entitetin “Sunny Hill Foundation”! Kontrata e votuar nga Kuvendi Komunal për ti dhënë në shfrytëzim prej 99 vjetësh 17 hektarë tokë biznesit The Sunny Hill SH.P.K, me një pronar të vetëm, Dukagjin Lipën! Kontrata nuk e përmendë askund Dua Lipën!

Këto gjysëm të vërteta, për të mos thënë, si Mark Twain, rrena kaq qyqare, e kanë ndërtuar këtë dramë kaq të madhe, kaq tronditëse, kanë shkaktuar aq dëshprim, siç rëndom bën secila propagandë! E në këtë rast, nuk mund ta akuzosh askend për rrenë, se shumë lehtë mund ti ikësh përgjegjësisë për manipulim me të vërtetën nga mosdija.

Sidoqoftë, festivalet më të rëndësishme të muzikës, mund të organizohet qoftë nga fondacionet e bëmirësisë, apo nga korporatat dhe individët me qëllim përfitimi vetanak. Që të dyja janë të ligjshme. New Orleans Jazz and Heritage Festival, ku kanë performuar yjet si Stevie Wonder, e që sjellë fitim prej 400 milion dollarësh është Fondacion bëmirës; Coachella, festivali ndër më të mëdhenjtë në botë, ku ka performuar Lady Gaga është gjithashtu bëmirës; Summerfest, ku ka performuar Paul McCartney e Bob Dillan është organizatë e bëmirësisë, e lista është e gjatë, shumë e gjatë e festivaleve të bëmirësisë…Në festival të tilla, të organizuara nga Fondacione bëmirëse, merr pjesë edhe vet Dua Lipa. Në fund të këtij muaji, për shembull ajo do të këndoj në Festivalin Roskilde, që e organizon një Fondacion qind për qind bëmirës.

Edhe festivalet pronë e korporatave e individëve, janë në rregull. Festivali Glastonbury, si festivali më i rëndësishm britanik, është i tillë. Emrat më të mëdhenj të muzikës, performojnë në atë festival, madje për pagesë shumë më të vogël se zakonisht. Festivali është ngjarje madhështore e kulturës dhe sjell fitime të mëdha, por edhe e ka një veçori, se zhvillohet në Worthy farm, që është pronë private e organizatorit e jo e falur nga komuna. Edhepse biznes, që paguan taksa dhe zhvillohet në pronë të vet, Festivali Glastonbury, gati gjithë fitimin e jep për kauza të mëdha, e mbështet financiarisht organizatën Oxfam, që në tridhjetë vjetët e fundit bën punë të rëndësishme humanitare edhe te ne dhe lëvizjen GreanPeace, që vepron globalisht për parandalimin e ndryshimeve klimatike.

Përkundër kësaj, kushdoqoftë organizator i Festivalit Sunny Hill dhe sidoqë të vendosë Komuna për dhënjen në shfrytëzim prej 99 vjetësh të sipërfaqes prej 17 hektarësh tokë, procesi nuk guxon të mbetet në mjegull. Vendimet nuk guxojnë të mbështeten në gjysmë të vërteta. Transparenca duhet të jetë e plotë dhe përfundimisht, nëse një kontratë e tillë bëhet, duhet ta dijmë se kujt ia dhuron Komuna e Prishtinës në shfrytëzim prej 99 vjetësh sipërfaqen prej 17 hektarësh tokë — “Sunny Hill Foundation,” si “organizatë bamirëse e themeluar në Prishtinë-Kosovë, nën patronazhin e këngëtares/kantautores shqiptare britanike Dua Lipa, ” ose, biznesit privat the Sunny Hill SH.P.K, me një pronar të vetëm, Dukagjin Lipën! Dhe, një kontratë të këtillë, shumë të mundëshme pas këtij dëshprimi të madh, prej 17 hektarësh tokë për shfrytëzim 99 vjet, Komuna e Prishtinës, të plotë, duhet ta bëj publike në shqip e në anglisht, për ne dhe për të gjithë ndërkombatarët dashamirë, që bashkë me ne, janë zhgënjyer e mërzitur që kët vit mbetëm pa Festival.

Për këtë verë, në Prishtinë do të mjaftohemi me MANIFESTA!/ KultPlus.com

Abazoviqi në konferencë me Zelenskyn dhe Ramën: Ne në Ballkan e dimë çka është lufta

Kryeministri i Malit të Zi, Dritan Abazoviq, në Kiev pas takimit me presidentin Volodymyr Zelensky, se vendet e Ballkanit Perëndimor do të vazhdojnë të ndihmojnë Ukrainën. Tha se e dinë se çfarë po kalon Ukraina, për shkak se e kanë përjetuar luftën disa dekada më parë.

“Do të keni mbështetjen e plotë për rindërtimin e vendit tuaj. Ne nuk kemi shumë kapacitete, jemi të vogla por megjithatë do të japim kontributin tonë ashtu siç tani po japim kontributin duke ndihmuar me disa pajisje e një lloj mbështetje financiare që ndoshta nuk është mjaft, por është përgjegjësia jonë”, tha Abazoviq.

Avazoviq tha se ata kanë mirëpritur refugjatët ukrainas.

“Nga ana jonë do të keni mbështetjen tonë”, shtoi ai.

“Dua të përmend se çdo ukrainas që është tashmë në Malin e Zi, dhe janë 10 mijë tashmë, 1.8 për qind e popullsisë tonë, sepse ne jemi një komunitet i vogël, janë mëse të mirëpritur”, tha Abazoviq.

Abazoviq tha se populli i Ballkanit Perëndimor e di se çfarë po përjetojnë ukrainasit pasi kanë përjetuar luftën.

“Ne do të bëjmë më të mirën për tu mbështetur dhe të jeni të sigurt se ne e ndajmë këtë përvojë prej rreth tre dekadave më parë në Ballkanin Perëndimor dhe e dimë saktësisht se çka është agresioni, shkatërrimi i luftës dhe krimet e luftës”, tha ai. / KultPlus.com

Edi Rama: Nuk e keni njohur ende Kosovën, ajo e mbështet Ukrainën

Kryeministri i Shqipërisë, Edi Rama po qëndron në kryeqytetin ukrainas Kiev i shoqëruar nga kryeministri i Malit të Zi, Dritan Abazoviq. Të dy patën takim me presidentin e Ukrainës, Volodymyr Zelensky.

Në një konferencë të përbashkët për media, Rama përmendi edhe Kosovën.

Ai tha se përveç 5 vendeve të Ballkanit Perëndimor që janë rreshtuar krah Ukrainës, është edhe një vend, Kosova të cilën nuk e ka njohur Ukraina.

Kryeministri shqiptar tha se Kosova po bën të njëjtën gjë që kanë bërë shtete tjera me sanksione kundër Rusisë, anipse Ukraina nuk e ka njohur.

Ka edhe një gjë që ende nuk munda ta flas me presidentin, por dua t’ja them më vonë. Ballkani Perdimor ka 5 vende në Kombet e Bashkuara, të gjitha ato janë rreshtuar krah Ukrainës, pavarësisht historisë së ndryshme, pavarësisht konteksteve të ndryshme, pavarësisht marrëdhënieve me Rusinë. Por, ka edhe një vend të 6 që Ukraina ende nuk e ka njohur, Kosova e cila pavarësisht kësaj, po bën saktësisht të njëjtën gjë që po bëjnë të gjithë me sanksione dhe me mbështetje të plotë.

Kjo do të thotë se jemi në një linj të mirë përkufizuar, pastaj çfarë jemi dhe çfarë përfaqësojmë, besoj fortë që është gjëja e duhur për t’u bërë”, tha Rama. / KultPlus.com

Rama në Kiev, publikon foto me zemër të thyer (FOTO)

Kryeministri i Shqipërisë, Edi Rama bashkë me kryeministrin e Malit të Zi, Dritan Abazoviq po qëndrojnë këto ditë në Kiev ku po shohin nga afër dëmet e shkaktuara nga lufta me Rusinë, përcjellë KultPlus.

Kryeministri Rama ka shpërndarë në profilin e tij në facebook disa fotografi nga ajo çka ka parë gjatë kësaj vizite teksa i ka shoqëruar me një emoji me zemër të thyer për Ukrainën.

Rama dhe Abazoviq janë nisur dje drejt Kievit, me ftesë të presidentit ukrainas, Volodymyr Zelensky./ KultPlus.com

Edi Rama për zhvendosjen e ‘Sunny Hill Festival’ në Tiranë: S’ka si Tirana jo

Kryeministri i Shqipërisë, Edi Rama, e ka quajtur lajm të mirë shkuarjen e festivalit Sunny Hill në Tiranë.

“Sunny Hill Festival” sot ka konfirmuar që për edicionin e sivjetmë do të zhvendoset në Tiranë.

Më poshtë KultPlus ua sjell postimin e tij të plotë:

😍LAJM I MIRË

Festivali “Sunny Hill” vjen në Tiranë, ku në javën e parë të gushtit Dua Lipa dhe të ftuarit e saj do të ndriçojnë netët e kryeqytetit me shkëlqimin e tyre⭐️⭐️⭐️⭐️⭐️

S’ka si Tirona jo❤️ / KultPlus.com

Rama sulmon Leonardo DiCaprio: U bë i gjallë për të sharë qeverinë

Gjatë nënshkrimit të marrëveshjes me organizatën globale mjedisore “Patagonia”për ta shpallur Vjosën Park Kombëtar, Rama sulmoi aktorin hollivudian Leonardo Di Caprio, ndërsa deklaroi se ai u bë i gjallë vetëm për të goditur qeverinë, ndërkohë që nuk reagon tani që sipas tij qeveria merr një vendim në përputhje me kauzën që ylli i kinemasë e mbronte.

Ai shtoi me ironi se ndoshta duke e sharë pak, mund t’i vejë ndonjë fjalë në vesh dhe ta bëj të reagojë.

“Leonardo Di Caprion u bë i gjallë për të goditur qeverinë, por nuk u bë i gjallë për ta mbrojtur qeverinë. Tani që qeveria po bën atë që atij i kishin thënë që nuk kishim ndërmend ta bënim, por që ndërkohë po e bëjmë. E ka shok të mirë Ministrja e Turizmit, prandaj nuk po i bie më shumë. Mbase këto goditje do t’i shkojnë në vesh, pasi mund ta kishim lajmëruar dhe nuk do t’i vente në vesh fare. Mbase duke e sharë pak do t’ia kapi veshi”, tha Rama./ KultPlus.com

Kryeministri Rama: 23 vjet më parë u hap një epokë e re për shqiptarët e Kosovës

Kryeministri i Shqipërisë, Edi Rama, ka shkruar për 23-vjetorin e çlirimit të Kosovës nga pushtimi serb.

Rama ka shpërndarë dy fotografi të NATO-s dhe ka shkruar se me hyrjen e trupave të këtij misioni është hapur një epokë e re për shqiptarët e Kosovës.

“Si sot 23 vjet më parë, me hyrjen forcave të NATO-s u hap një epokë e re për shqiptarët e Kosovës”, ka shkruar ai. / KultPlus.com

Kafshët që do mund të shihni në kopshtin zoologjik të Tiranës

Kopshti zoologjik i Tiranës hapi dyert këtë të shtunë për vizitorët.

Kryeministri Edi Rama postoi në rrjetet sociale foto të kafshëve që fëmijët dhe të rriturit mund të shohin në Tirana Zoo Park, si tigri, luani, drerët, dhelpra, kuajt apo lloje të ndryshme shpendësh.

“Tirana Zoo Park, që hap dyert sot, i rilindur si një nga hapësirat më moderne në rajon, për të njohur nga afër botën e kafshëve, por edhe si një hapësirë e re rekreative për të vegjël e të rritur”, shkruan kryeministri.

Fëmijët u njohën me mjediset e transformuara, kafshët e kopshtit, dhe klasat informative, ku mund të mësojnë gjëra të reja për natyrën. Në hapjen e Kopshtit Zoologjik, Kryeministri Edi Rama dhe kryetari i Bashkisë së Tiranës, Erion Veliaj thanë se ky park i është kthyer qytetarëve, jo vetëm si një hapësirë argëtimi, por edhe si një mjedis edukativ.

Kreu i Bashkisë nënvizoi se falë investimeve për transformimin e Parkut të Liqenit dhe të Kopshtit Zoologjik, edhe pronës së komunitetit përreth i është rritur vlera. Veliaj shtoi se komunitetit i janë shtuar edhe 80-90 vende të reja parkimi me parkingun nëntokësor të kopshtit. Nga ana tjetër, Veliaj falenderoi kryeministrin Rama për mbështetjen në realizimin projekteve.

Kryeministri Rama u shpreh se Kopshti Zoologjik është rilindur tërësisht, në një hapësirë të pakrahasueshme me çfarë ishte më parë. Ai tha se kjo është arritur falë një pune të madhe të një zinxhiri njerëzish që, pas shumë pengesash, ia dolën të transformonin sot Zoo Park Tirana.

Kopshti Zoologjik i Tiranës iu nënshtrua transformimit të plotë të tij. Nga një hapësirë e harruar, Bashkia e Tiranës e rikonceptoi atë, duke iu përshtatur kërkesave të ndryshme të vizitorëve që e frekuentojnë dhe kafshëve që jetojnë aty. Kopshti ofron hapësira për shërbime dhe mjedise të nevojshme për vizitorët, ambiente rekreative ku mbizotërojnë hapësirat e gjelbra, si dhe këndet e lojërave për fëmijë, por nuk mungojnë as mjediset edukative për studentët dhe nxënësit që studiojnë veçanërisht botën e kafshëve. / KultPlus.com

Rama: Tradita dhe kultura shqiptare po shpaloset hijshëm nga artistët e vegjël

Fëmijë nga qytete të ndryshme të vendit po marrin pjesë në Festivalin Mbarëkombëtar të Teatrit për fëmijë “1 mbi 1 dritaret”, që po zhvillohet në qytetin e Beratit nga 1-10 qershor.

Kryeministri Edi Rama ndau sot pamje nga ky festival, që është shfaqja më e madhe teatrale me qëllim promovimin e qyteteve shqiptare.

“Tradita dhe kultura shqiptare po shpaloset hijshëm nga artistët e vegjël, në turin 10-ditor të festivalit teatror “Një Mbi Një Dritaret”, me koncerte dhe aktivitete argëtuese që kanë nisur prej 1 qershorit e do të vijojnë për disa ditë me radhë në qytetet kryesore të vendit”, u shpreh Rama.

Artdashësit e vegjël beratas po shijojnë performancat e magjishme të artistëve nga qytete të ndryshme të vendit në kalanë e qytetit.

Anëtarë të jurisë së këtij festivali janë aktorët e njohur Ndriçim Xhepa, Zamira Kita, Anila Bisha etj.

Ky është viti i dytë që zhvillohet ky festival, i cili bën të mundur edukimin e fëmijëve nëpërmjet teatrit, duke shkëmbyer kështu kulturën dhe traditat e qyteteve të ndryshme dhe trevave shqipfolëse jashtë kufijve, nën moton “Berati – Qyteti i Fëmijëve”./ KultPlus.com

Rama merr çmimin prestigjioz në New York, qytetarja afgane: Është heroi ynë

Kryeministri i Shqipërisë Edi Rama ka marrë çmimin prestigjioz “Joan Ganz Cooney Global Leadership Award” gjatë qëndrimit të tij në New York. Në një darkë zyrtare, presidentja e Sesame Workshop, Sherrie Westin, e vlerësoi Ramën për mikpritjen e qytetarëve afganë.

Kreu i qeverisë shqiptare tha se është një nder i madh marrja e këtij, çmimi megjithatë shtoi se “nuk arrin ende të bëjë paqe me faktin që ajo çka duhej të ishte rregulli është përjashtim”.

“Më duhet t’ju them duke qenë se jemi këtu pas dyerve të mbyllura dhe nuk na dëgjon kurrkush se ajo çfarë ndjeva përballë kaq shumë hezitimi dhe kaq shumë refuzimesh që vinin nga vende mjaft më të pasura për t’iu hapur dyert afganëve ka vetëm një emër: Turp”, u shpreh Rama.

Rama shpjegoi para të ftuarve se pse Shqipëria e mori këtë vendim. Ai tha se vendimi për mikpritjen e afganëve u bë për nder të traditës së vendit tonë, të historisë sonë si refugjatë dhe për fëmijët tanë.

Shembulli më konkret i mikpritjes ishte artisja afgane Mansoura, e cila në fjalimin e saj, falënderoi kryeministrin Rama.

“Faleminderit zoti Rama që na mirëpritët në Shqipëri me krahëhapur. Nuk do mundemi kurrë ta falenderojmë mjaftueshëm për atë që ka bërë për ne. Për shkak të tij, ne kemi një të ardhme që fëmijët tanë kanë tani dhe askush nuk e meriton më shumë se ai. Dhe mund të them me vendosmëri se ai është heroi ynë”, u shpreh Rama.

Rama shoqërohej në këtë takim nga bashkëshortja Linda Rama dhe djali i vogël, Zaho./tvklan/ KultPlus.com

Shqipëria merr për 30 ditë presidencën e Këshillit të Sigurimit të OKB-së, Rama: Ditë historike

Ditën e sotme Shqipëria merr për 30 ditë presidencën e Këshillit të Sigurimit të OKB.

Kjo është hera e parë që Shqipëria mban presidencën e KS-OKB-së gjatë mandatit të saj në Këshill, ndërsa kryeministri Edi Rama ka shpërndarë një videomesazh ku thotë se fokusi kryesor në këtë afat kohor është mbrojtja e demokracisë dhe të drejtave të njeriut, të cilat sipas tij po sprovohen rëndë në anë të ndryshme të botës.

Mbishkrimi:
MIRËMËNGJES
dhe në këtë ditë historike për Shqipërinë në fushën e marrëdhënieve ndërkombëtare, kur për herë të parë në histori vendi ynë merr drejtimin e Këshillit të Sigurimit të OKB, ju uroj t’ia kaloni sa më mirë

U bë shumë gjatë që shohim abuzime masive me të drejtat nga Darfuri në Mianmar. Lufta në Ukrainë ka tronditur rendin botëror. Demokracia dhe të drejtat e njeriut po sprovohen rëndë në anë të ndryshme të botës. Bota është e trazuar dhe ne vazhdojmë të jemi dëshmitarë të mizorive. Ngjarja e parë e Shqipërisë në presidencën e saj të KS, i kushtohet llogaridhënies dhe drejtësisë”-thotë kryeministri në videomesazh. / KultPlus.com

Rama: Teatri i ri kombëtar do të bëhet njëjtë siç u bë stadiumi i finales së sotme europiane

Kryeministri Edi Rama ka publikuar në rrjetet sociale një video me pamje nga stadiumi “Air Albania”, si ishte dhe si u transformua.

Rama shkruan se aty ku deri pak vitesh kishte mbetur një kalbësirë urbane, u bë stadiumi i finales së sotme evropiane, një krenari kombëtare në Europë.

Kreu i Ekzekutivit thekson se sikurse ky stadium do të bëhet së shpejti edhe Teatri i Ri Kombëtar.

“MIRËMËNGJES, dhe me shpresën se ka akoma nga ju që e kujtojnë kur ju thosha se do të bëjmë një nga stadiumet më të bukur të Europës, aty ku deri para pak vitesh kishte mbetur një kalbësirë urbane në zemër të kryeqytetit, duke ju siguruar se siç u bë stadiumi i finales së sotme europiane një krenari kombëtare në Europë, do të bëhet së shpejti edhe Teatri i Ri Kombëtar, ju uroj të gjithëve ta kaloni bukur këtë ditë të shënuar sportive për të tërë Europën këtu në Tiranë”, shprehet Rama. /KultPlus.com

“Hajdeni hajdeni”, Rama poston foton nga eksodi i shqiptarëve një ditë para ndeshjes Roma-Feyenoord

Një ditë para finales së madhe të Conference League, kryeministri Edi Rama e ka nisur ditën duke postuar një foto nga eksodi i shqiptarëve i 32 viteve më parë, ku mijëra shqiptarë u nisën me anije drejt Italisë.

Në foton e ripostuar nga Twitteri i skuadrës së Romës e cila shkruan “Andiamo a Tirana (Le të shkojmë në Tiranë)”, Rama shkruan “Hajdeni, hajdeni”, pasi qindra tifozë priten të mbërrijnë nesër.

Ashtu si në 1990 në Bari u shpall gjendja e emergjencës, edhe Tirana ditën e nesërme do të “pushtohet” nga tifozët. Kryeqyteti nesër do të jetë në “dispozicion” të tyre pasi nuk do të lejohet qarkullimi i automjeteve dhe është shpallur ditë pushimi.

Roma dhe Feyenoord do të përballen të mërkurën në orën 21:00 në “Air Albania”, duke e kthyer këtë ndeshje në një moment historik për historinë e futbollit shqiptar, pasi për herë të parë në vendin tonë luhet një finale europiane.

Vijon puna për restaurimin e mozaikut masiv në Muzeun Historik Kombëtar

Në Muzeun Historik Kombëtar po vijon puna për restaurimin e  mozaikut masiv.

Kryeministri Edi Rama dhe ministrja e Kulturës, Elva Margariti së bashku me Presidentin e Këshillit Evropian, Charles Michel, inspektuan sot punën për restaurimin e mozaikut masiv në këtë muze.

“Në Muzeun Historik Kombëtar me Presidentin e Këshillit Evropian, Charles Michel, ku po vijon puna për restaurimin e mozaikut masiv, duke e zëvendësuar çdo detaj të rëndësishëm të një ndër veprave më të mëdha të trashëgimisë sonë kulturore”, tha Rama.

Kryeministri Rama dhe Presidenti i Këshillit Evropian Charles Michel ecën përgjatë sheshit “Skënderbej”, për të cilin Kryeministri Rama tregoi se është transformuar në një infrastrukturë moderne për qytetarët.

“E kemi transformuar sheshin “Skënderbej”. Gjithë gjelbërimi që është vendosur këtu përreth, është projektuar në mënyrë të veçantë. Rrethimi me bimësi të gjelbër nuk ekzistonte më parë. Sheshi ka një pjerrtësi që ne e ribëmë sepse ishte ndryshe më parë. Është riorientuar trafiku dhe lëvizja e mjeteve, ka ndryshuar komplet koncepti”, u shpreh Kryeministri.

Ministrja Margariti tha se, në këtë shesh ka lloje të ndryshëm gurësh që janë marrë nga gjithë Shqipëria dhe lloj të ndryshme të bimësisë, është një simbol komuniteti. Ky shesh është plot me njerëz me koncerte.

“Muzeu Historik Kombëtar është një nga muzeumet më të vizituara, përpara pandemisë kishim më shumë se 100 mijë vizitorë në vit. Synojmë të kemi shumë më tepër me zbatimin e këtij projekti. Ka qenë një nga objektet më të dëmtuara nga tërmeti dhe me financimet e BE-së kemi nisur me restaurimin e mozaikut. Mozaiku është një nga veprat kryesore, pra po restaurohet në pjesët më të dëmtuara sepse ishte e rrezikshme pas tërmetit për njerëzit dhe vizitorët”, u shpreh Margariti.

“Ky ka qenë objekti i parë që kemi nisur me programin #EU4Culture. Është mbështetja më bujare që kemi patur me trashëgiminë kulturore pas tërmetit, më shumë se 40 milionë euro për rreth 40 objekte zonash që do rindërtohen. Po punojmë po kështu dhe për zbatimin e restaurimit tërësor të të gjithë muzeut sepse qysh prej vitit 81 asgjë nuk ka ndryshuar përveç disa riparimeve të vogla. Gjithashtu dhe Ministria e Kulturës është përpjekur për këtë. Këtu po punohet me copëzat e mozaikut, ka qenë punë sfiduese. Kemi gjithë stafin e UNOPS të huaj dhe shqiptar. UNOPS është agjencia ekzekutive e #EU4Culture. Ka më shumë së 120 ngjyra të ndryshme që janë identifikuar gjithsecila copëz mbas copëze dhe historia më e veçantë këtu është që kemi identifikuar dhe fabrikën ku janë marrë në ’81 e cila është në Venecia, jemi në kontakt me të njëjtën fabrikë të cilët po e riprodhojnë dhe kanë qenë të shkëlqyer pasi kanë gjetur të gjitha pjesëzat e katalogut dhe disa nga ngjyrat po përpiqen ti ribëjnë në të njëjtën mënyrë. Kështu që është sërish një tjetër bashkëpunim midis Shqipërisë dhe Evropës, në këtë rast me Italinë”, tha Margariti.

Mozaiku i fasadës së Muzeut Historik Kombëtar, sipas shënimeve, është një mozaik gjigant me dimensione 10 me 40 metra, i cili zotëron sheshin “Skënderbe”. Vepra e shtrirë në 400 metra katrorë u finalizua më 1981. Në të janë 13 figura të paraqitura në disa grupime. Majtas është grupi i luftëtarëve dhe shigjetarëve ilirë dhe shqiptarëve të luftës antiosmane. Pastaj, përfaqësohet Rilindja Kombëtare me dy figura dhe partizani fitimtar. Dy figurat simbol, punëtori dhe fshatarja, janë në qendër të sipërfaqes, kurse djathtas pesë figura simbolizojnë Luftën Nacionalçlirimtare.

Muzeu Historik u përurua më 28 tetor të vitit 1981 dhe është institucioni muzeor më i madh në Shqipëri. Zë një sipërfaqe të përgjithshme prej 27 mijë metrash dhe ka një sipërfaqe ekspozimi prej 18 mijë metrash katrorë. Ndërtesa e Muzeut dallohet për një vëllim kompakt mbi një plan kuadratik të kompozuar në mënyrë qendrore simetrike kundrejt një oborri atrium. Në mjediset e tij janë të ekspozuara 6200 objekte muzeore, të cilat i përkasin një periudhe relativisht të gjatë kohore, duke filluar nga mijëvjeçari IV para erës sonë dhe deri në gjysmën e dytë të shekullit XX./atsh/ KultPlus.com

Shqipëria drejt ndryshimit të madh, do të ndalohet përdorimi i qeseve plastike

Kryeministri i Shqipërisë, Edi Rama ka bërë thirrje që qytetarët të bëhen pjesë e ndryshimit të madh mjedisor e kulturor, që nis prej 1 qershorit, e që ka të bëjë me ndalimin e qeseve plastike njëpërdorimshe.

Në një postim në Facebook, Rama ka shpërndarë një video për ndërgjegjësimin e qytetarëve për të mbrojtur mjedisin.

Qeset plastike njëpërdorimshe do të ndalohen në Shqipëri prej 1 qershorit 2022.

Çdo vit, në Shqipëri përdoren rreth 3.2 miliardë qese plastike apo njëzet e gjashtë mijë tonë në vit përafërsisht. Në anën tjetër, amerikanët përdorin 100 miliardë qese plastike në vit, të cilat kërkojnë 12 milionë fuçi naftë për t’u prodhuar.

Mbetjet e qeseve plastike përfundojnë në ushqimin që njerëzit hanë dhe ajrin që thithet çdo ditë.

Për një kohë të gjatë është menduar që qeset plastike të mos përdoren fare dhe të zëvendësohen me mbajtëse të cilat mund të reciklohen, në mënyrë që përveç njerëzve edhe toka të “frymojë” lirshëm.

Qeveria e Shqipërisë ka vendosur që nga data 1 qershor 2022, prodhimi, importi dhe përdorimi i qeseve plastike njëpërdorimshe të ndalohet me ligj.

Në Kuvend është miratuar projektligji që parashikon edhe gjoba deri në 1,5 milionë lekë për importuesit, prodhuesit dhe tregtuesit e qeseve plastike. /KultPlus.com

Kryeministri Rama: Rilind Kalaja e Prezës, prej monumenteve më të dëmtuara nga tërmeti

Kalaja e Prezës është restauruar tashmë plotësisht, pas dëmtimit nga tërmeti i 26 nëntorit 2019.

Kryeministri Edi Rama ndau pamje nga Kalaja e restauruar, teksa u shpreh se, ka përfunduar puna për rilindjen e një prej monumenteve më të dëmtuara nga tërmeti i vitit 2019.

Rama tha se, restaurimi u mundësua falë Fondit të Ambasadorit të SHBA për trashëgiminë dhe angazhimit të një skuadre të shkëlqyer ekspertësh e punëtorësh shqiptarë

“Ja edhe puna e përfunduar mirë e bukur për rilindjen e një prej monumenteve më të dëmtuara nga tërmeti i vitit 2019, Kalaja e Prezës, që u mundësua falë Fondit të Ambasadorit të SHBA për trashëgiminë dhe angazhimit të një skuadre të shkëlqyer ekspertësh e punëtorësh shqiptarë”, theksoi kryeminisri.

Kalaja e Prezës ndodhet 22 km nga Tirana. Restaurimi i kalasë së Prezës, zbatuar nga CHwB Albania, nuk ishte i lehtë për shkak të shkallës së dëmtimit, por edhe teknikave të ndërtimit të saj. Ekspertët kanë bërë një punë e madhe, jo thjesht për të ringritur kullën apo për të restauruar muret, por për të “shëruar” të gjitha patologjitë e hasura gjatë ekspertizës së monumentit, për ta përforcuar, për ta bërë atë më rezistente ndaj lëkundjeve sizmike, por pa cenuar vetë monumentin.

Kalaja e Prezës është një kala tipike mesjetare. Lulëzimin më të madh e ka pasur në shekullin XV, por të dhëna të ndryshme i kanë shtyrë të mendojnë specialistët, se duhet të jetë ndërtuar që andej nga shekulli XIII – XIV. Kalaja ka shërbyer si pikë e fortifikuar për të mbrojtur Krujën nga rreziqet që mund t’i vinin nga deti./atsh/ KultPlus.com

Kryeministri Rama: Rijetësimi i Kullës Veneciane, një tjetër ndalesë tërheqëse në qytetin bregdetar

Kulla Veneciane në Durrës po i nënshtrohet restaurimit dhe rijetësimit.

Kryeministri Edi Rama ka publikuar një fotogaleri nga punimet që po kryhen në këtë Kullë, e cila do t’i ofrojë turistëve një tjetër ndalesë tërheqëse në Durrës.

“Ja dhe Kulla Veneciane në Durrës që po i nënshtrohet një restaurimi të thellë, përpara një rijetësimi të bukur, për të ofruar për vizitorët e turistët në rritje një tjetër ndalesë tërheqëse në qytetin bregdetar”, shprehet Rama.

Punimet po realizohen falë financimit të Bashkimit Evropian, nëpërmjet programit #EU4Culture.

Projekti synon rijetësimin e Kullës, duke e kthyer në një qendër interpretimi të trashëgimisë kulturore nëpërmjet aplikacioneve, performancave digjitale etj., duke ofruar për vizitorët, një mënyrë te re të të njohurit të historisë së qytetit të Durrësit. / KultPlus.com