Muzeu “Onufri” aplikon për herë të parë audio guidën në katër gjuhë

Nën moton “Fuqizojmë muzetë nëpërmjet teknologjisë digjitale”, një sipërmarrje madhore u promovua në vitin 2019 në muzeun e ikonografisë “Onufri”, audio guida një teknologji inovative e aplikuar për herë të parë në vend.

Qendra Kombëtare e Muzeumeve Berat shprehet se tashmë kushdo që viziton muzeun e ikonografisë “Onufri” e ka mundësinë e një “udhëtimi” individual, dhe shansin të zbulojë muzeun dhe kryeveprat e tij nëpërmjet informacionit më të zgjeruar të 40 rubrikave për rreth 90 minuta, në gjuhët shqip, anglisht, italisht dhe gjermanisht.

“Por gjithashtu, vizitori mund të fokusohet e të rikthehet në rubrikat e dëshiruara, nëpërmjet udhërrëfyesit në gjuhën e përzgjedhur pa prezencën e një guide didaktike. Padyshim që ky produkt dita ditës po i përmbush pritshmëritë tona, në raport me rritjen dhe ofertën e një shërbimi inovativ, bashkëkohor, dinjitoz e padyshim një hap i ri për kulturën e shërbimit të muzeve shqiptarë.  Kjo reflektohet në kërkesën gjithmonë në rritje të marrjes së këtij shërbimi, i cili në muajt e fundit është preferuar nga më shumë se 600 vizitorëve të huaj, vendas, studentë, etj”, thuhet nga QKMB.

Muzeu i ikonografisë “Onufri” është organizuar në ambientet e kishës “Fjetja e Shën Marisë”, në kalanë e Beratit, prej 27 shkurtit të vitit 1986. Muzeu mban emrin “Onufri”, kushtuar kryemjeshtrit të pikturës ikonografike shqiptare në shekullin e XVI.

Katedralja sipas mbishkrimeve që mbart rezulton të jetë rindërtuar në vitin 1797 mbi themelet e një kishe më të vjetër të periudhës bizantine. Ajo përfaqëson një nga arkitekturat më tipike pas-bizantine në qytetin e Berat. Koleksioni i muzeut përbëhet nga 200 objekte të përzgjedhura nga fondet e kishave dhe manastireve të rrethit të Beratit. Ai përbëhet kryesisht nga ikona dhe një grup objektesh liturgjike. Veprat e këtij muzeu datojnë nga më të vjetrat të shekullit XIV deri në fillim të shekullit XX. / KultPlus.com

Audioguidë personale në katër gjuhë për turistët në muzeun Ikonografik Onufri

Sezoni turistik këtë vit, ka ardhur me risi në muzeun Ikonografik Onufri, Berat për turistët vendas dhe të huaj.

Turistët përveç shërbimit që jepet nga guida profesionale e stafit të muzeut, ata kanë mundësi që në udhëtimin drejt thesareve të pajisen me audioguidë personale të realizuar në katër gjuhë shqip, anglisht, italisht dhe gjermanisht.

Muzetë e Beratit dhe gjatë këtyre ditëve vijojnë të tërheqin një numër të lartë turistësh ku të huajt e kanë një ndër destinacionet e preferuara.

Këto muze i ofrojnë vizitorëve një itinerar mjaft interesant turistik, një rrugëtim njohës mes historisë dhe objekteve me vlera për trashëgiminë tonë që gjenden në to.