Mahniti jurinë e ‘The Voice’ në Gjermani, 16-vjeçarja publikon këngën e parë në shqip (VIDEO)

Rrezarta Bojaxhiu ishte një prej konkurrenteve që mahniti jurinë e “The Voice Kids” në Gjermani në mars të këtij viti me këngën “Nessun Dorma” të Luciano Pavarotti-t. Me zërin unik dhe timbrin e veçantë, këngëtarja shqiptare bëri që të ndizen të gjithë dritat e jurisë.

Rrugëtimi deri në gjysmëfinale e shoqëroi Rrezarta Bojaxhiun me një sukses të jashtëzakonshëm, pas të cilit vjen edhe videoklipi i parë i 16-vjeçares.

E lindur në Islandë, por me origjinë nga Kosova, Rrezarta Bojaxhiu ka mbërritur në Shqipëri vetëm për të realizuar këngën e saj të parë me videoklip.

“Ma s’shumti n’botë”, është publikuar dje në YouTube dhe pritet të jetë një debutim i suksesshëm i Rrezartës në tregun muzikor. Muzika e këngës së regjistuar nga “Mixey Music” është kompozuar nga Armend Rexhepagiq, me tekst nga Aida Baraku dhe producentë Yll Limani e Fatjon Miftari. / Kultplus.com

Rrezarta Bojaxhiu mahnit jurinë e ‘The Voice Kids’ në Gjermani (VIDEO)

Rrezarta Bojaxhiu është pjesë e garës “The Voice Kids” në Gjermani, ajo ka performuar me këngën “Who wants to live forever”, nga Queen. Rrezarta njihet gjithashtu për performancën e saj në “X-Factor” në Islandë dhe këngën në gjuhën shqipe të titulluar “Nëna”, transmeton KultPlus.

Është mbajtur episodi 7 i sezonit të ri “The Voice Kids” Gjermania, i ndjekur nga miliona shikues gjermanë (Gjermani, Austri, Zvicër, Belgjikë dhe BE). Në “Betejën e gjigantëve” u kualifikua Rrezarta Bojaxhiu, e cila në Gjermani njihet si Reza. Ajo është me origjinë shqiptare nga Kosova, nga Pllava, Opoja e Dragashit.

Trajnerët e televizionit kombëtar gjerman “Sat 1” ishin në kërkim të talenteve të rinj, më të mirë të Gjermanisë për këtë vit. Kandidatët këngëtarë ishin trajnuar nga artistë të njohur të muzikës gjermane. Këtë vit pjesë e edicionit janë trajnerët e mirënjohur: Lena Meyer-Landrut, Sasha, Max Giesinger dhe dy anëtarët e grupit “Meine Freunde”.

Trajnerja Lena Meyer-Landrut dje në betejë i dërgoi tre talentet e saj më të fortë, që ishin: Vladi, Reza (Rrezarta Bojaxhiu) dhe Luca. Talentet u sfiduan duke performuar me këngën “Who wants to live forever” të Queen.
Reza (Rrezarta Bojaxhiu), Vladi dhe Luca ishin të tre kandidatët më të fortë për finalen e “The Voice Kids” 2020. Trajnerja Lena nuk e humbi rastin që kandidatët e saj të garojnë kundër njëri-tjetrit në “Battle der Giganten”
Po ashtu përzgjedhja e këngës së trajnerës Lena ishte mbretërore. Duke synuar që Reza (Rrezarta Bojaxhiu), Vladi dhe Luca të shkonin në betejë me këngën “Who wants to live forever” të Queen.

Luca, i cili në shfaqjen e tij performoi me këngën e Freddie Mercury-t, natyrshëm luajti në kartat e përzgjedhjes së këngës nga trajnerja Lena. Por, rivalët e tij, Reza (Rrezarta Bojaxhiu) dhe Vladi, gjithashtu dukeshin se do të rrëmbenin titullin e “Queen”.

Kjo ishte vërtet madhështore! Vështirë se dikush e vërejti se në skenë ishin tre fëmijë. Të rriturit nuk mund ta kishin kënduar më mirë. Për të tre talentet publiku u ngrit në këmbë dhe bëri një ovacion të madh.

Trajnerja Lena pa dyshim se e kishte shumë të vështirë të përzgjidhte fitues njërin talent. Në fund, ajo vendosi për Reza (Rrezarta Bojaxhiun), e cila në shfaqjen e saj entuziazmoi me një “Opera-Arie” dhe demonstroi shkathtësitë. Ajo u kualifikua në garën e mëtutjeshme kombëtare të Gjermanisë. Tashmë është në prag të karrierës së saj si yll muzike “Pop Star”, duke ndjekur sigurt hapat yjeve shqiptare me renome botërore sikurse Rita Ora, Dua Lipa, Bebe Rexha, etj. / albinfo/ KultPlus.com