Pashë dashnin tande, nanë



Poezi nga Sabile Keçmezi-Basha

Pashë dashnin tande, nanë
Si munde me shkua
Pa me dashtë
Pa më përkëdhel
Pa me njohur

Pashë dashnin tande, nanë
Si munde me shkua
E unë gjithë andej të kërkova
Te çdo grua
Gjerë në fund të botë
dhe të vetvetes

Pashë dashnin tande, nanë
Si munde me shkua
Pa më thënë lamtumir
Pa më shtrëngua fort
Pa puthjet e mija
Jo… kurrë
Nënat e engjëjt
Nuk vdesin vallë

Pashë dashnin tande, nanë
Si nuk më fshive lotin
Si nuk më mbajte ende në gji
Si s’ma ndale zjarrminë
Kur e pata

Pashë dashnin tande, nanë
Si mund u mortove nuse
Pa më tregua
Se sa më doje

E unë
Ende të dua
Ende të kërkojë

Pashë dashnin tande, nanë.

Sabile Keçmezi – Basha, laureate e Çmimit për Vepër Jetësore “Azem Shkreli”

Për nder të 12-vjetorit të Pavarësisë së Republikës së Kosovës, Ministria e Kulturës, Rinisë dhe Sportit sot mbajti ceremoninë e ndarjes së çmimeve për letërsi për vepër jetësore dhe çmimet tjera vjetore për vitin 2019, shkruan KultPlus.

Ceremonia u mbajt në kabinetin e ministres Vlora Dumoshi.

Juria profesionale e cila ka bërë vlerësimin ka vendosur që çmimet t’u ndahen si vijon:

1.      Çmimi Kombëtar Letrar për vepër jetësore “Azem Shkreli” ju nda Sabile Keçmezi – Basha;

2.      Çmimi për veprën më të mirë në prozë “Anton Pashku” shkoi për Rrahman Paçarizin për veprën “Shtatë udhë” dhe Albina Idrizin për veprën “Përsëri mars”;

3.      Çmimi për veprën më të mirë në poezi “Ali Podrimja” ju nda Xhevdet Bajraj për vëllimin “Kur qajnë hardhitë” dhe Nexhat Rexha për vëllimin “Duke kërkuar hijen tënde”;

4.      Çmimi për veprën më të mirë në kritikë letrare dhe eseistikë “Ibrahim Rugova” shkoi për Berat Daka (Armagedoni) për studimin “Dramat e Qosjes”;

5.      Çmimi për veprën më të mirë të përkthyer në gjuhën shqipe dhe anasjelltas “Pjetër Bogdani” shkoi për Isa Memishi për përkthimin e romanit“Guaska” të Mustafa Halifas; dhe

6.      Çmimi për veprën më të mirë për fëmijë e të rinj “Vehbi Kikaj” ju nda Januz Fetahaj për veprën “Libri i përrallave të gjyshit”.

Gjatë kësaj ceremonia, ministrja Vlora Dumoshi u zotua që do të punojë më shumë që letërsinë tonë ta çojnë përpara.

“Do të punojmë më shumë dhe do qëndrojmë prapa si Ministri e Kulturës që letërsinë tonë ta çojmë përpara sepse nuk ka më të bukur sesa letërsia jonë”, tha Dumoshi/ KultPlus.com