Hidhet baltë mbi objektin e Rektoratit: Kjo është fytyra e vërtetë e Universitetit

Aktivistët e Organizatës për Rritjen e Cilësisë në Arsim (ORCA) dhe të organizatës “Admovere” sot kanë pasur një aksion para Rektoratit të UP-së ku me këtë rast edhe kanë hedhur baltë mbi objektin e Rektoratit të UP-së. Kjo reagim vjen me arsyetimin se Këshilli i Etikës nuk po e zbaton kodin e Etikës dhe e arsyeton plagjiaturën.

Shkëlzen Gashi nga Admovere ka thënë se Këshilli i Etikës i ka hedhur poshtë dy raste të plagjiaturës të profesorëve universitar të cilat kjo organizatë i ka adresuar në Rektorat. Sipas tij, pas këtij veprimi të Këshillit të Etikës, ekzistenca e këtij Këshilli është krejt e panevojshme.

Ndërkaq, drejtori i ORCA-s, Rron Gjinovci ka thënë se deri në shkarkimin e Këshillit të Etikës nuk do të ndalen me aksione.

“Nuk do ta lejojmë që Këshilli i Etikës apo kushdo tjetër të bëjë shaka me ne përmes përgjigjeve absurde se nuk paskan kompetencë apo të bëjë shaka me cilësinë në universitet, prandaj sot, veç e fillojmë vargun e aksioneve, takimeve me organizata studentore, organizata të shoqërisë civile, medie e hisedarë të tjerë relevant, në mënyrë që ditët dhe javët në vazhdim të organizohemi për çkapjen e Universitetit nga mosdija nën kërkesat për: Shkarkimin e menjëhershëm të Këshillit të Etikës; Formimin e një komisioni për verifikimin e plagjiaturave; Formimin e një komisioni për verifikimin e të gjithë titujve akademikë”, është thënë mes tjerash.

Më 21 shtator 2018, ADMOVERE publikoi raportin «STAFI AKADEMIK I UP-SË – studimet, angazhimet tjera, plagjiaturat, vlerësimet dhe përpjesa staf-studentë». Një prej qëllimeve të këtij raporti ishte edhe radhitja e të gjitha rasteve të plagjiaturave të pjesëtarëve të stafit akademik të UP-së, për të cilat është raportuar në media përgjatë viteve, që nga vetë themelimi i UP-së (raporti mund të shkarkohet në: http://admovere.org/stafi-akademik-i-up-se/).

Gati një muaj pas publikimit të këtij raporti, më 15 tetor 2018, në emisionin «Puls» të KTV-së, të organizuar pikërisht për këtë temë, Rektori i UP-së, prof. dr. Marjan Dema, kërkoi nga drejtori ekzekutiv i ADMOVERE-s dhe njëri prej autorëve të raportit, Shkëlzen Gashi, që të gjitha dëshmitë për pretendimet për plagjiatura të pjesëtarëve të stafit akademik të UP-së, t’i dërgojë në instancat përkatëse të UP-së, duke u zotuar publikisht se do të nisë menjëherë procedurë në Këshillin e Etikës të UP-së (emisioni mund të shikohet në: https://www.youtube.com/watch?v=YtL-9v5t8To).

Dy javë pas këtij debati televiziv, më 31 tetor 2018, ADMOVERE deponoi në Këshillin e Etikës dokumentacionin me dëshmitë e plagjiaturave për dy pjesëtarë të stafit akademik të UP-së, prof. dr. Mejdi Bektashi dhe prof. dr. Arsim Morina, si dy prej 16 rasteve më flagrante të plagjiaturës të publikuara në raportin e sipërpërmendur. Tek pas një viti, më 12 nëntor 2019, Këshilli i Etikës së UP-së mori vendim që të hedhë poshtë të dy denoncimet, ndonëse një vendim të tillë do të duhej ta merrte më së largu pas 70 ditëve, e jo pas 377 ditëve. Kjo zvarritje bëhet edhe më e çuditshme kur kihet parasysh se denoncimet e ADMOVERE-s janë hedhë poshtë për arsye procedurale dhe mungesë të kompetencës.

Për rastin Mejdi Bektashi, Këshilli i Etikës pohon se kjo çështje është mbyllur dhe për këtë i referohet një vendimi të ish Rektorit të UP-së, prof. dr. Enver Hasani, të datës 10 maj 2007, i cili thotë se libri i Bektashit nuk është plagjiat. Këshilli i Etikës duhet ta ketë parasysh se ky vendim i ish Rektorit të UP-së prof. dr. Enver Hasani thotë se libri i Bektashit nuk është plagjiat në kuptim të vendimit të Senatit të Universitetit të Prishtinës nr. 112, datë 12 janar 2007 mbi mbrojtjen e pronësisë intelektuale. E ky vendim i Senatit përcakton se vetëm librat e vjedhur mbi 70% nga i njëjti burim, konsiderohen plagjiaturë.

Këshilli i Etikës nuk do të duhej t’u referohej këtyre dy vendimeve të Senatit të UP-së të vitit 2007, por dokumenteve vijuese që mbizotërojnë ndaj këtyre vendimeve, e mbi të cilat edhe funksionon ky këshill:

– «Kodit të Etikës të Stafit Akademik të Universitetit të Prishtinës», të miratuar më 19 korrik 2013, neni 10 i të cilit e konsideron të papranueshme shkeljen e standardeve të ndershmërisë intelektuale, që do të thotë keqpërdorimin e qëllimshëm të shkrimeve, hulumtimeve dhe gjetjeve të të tjerëve (https://www.uni-pr.edu/inc/doc/KodiEtik1.pdf); dhe

– «Rregullores për Masat dhe Procedurat Disiplinore ndaj Personelit Akademik të Universitetit të Prishtinës», të miratuar më 11 prill 2017, në nenin gjashtë të së cilës thuhet se shkelje të rënda konsiderohen, veç të tjerash, edhe shkelja e rëndë e të drejtës së autorit dhe e etikës në publikimet shkencore, e për shkeljet e rënda, parashihet mes tjerash revokimi i gradës shkencore dhe ndërprerja e marrëdhënies së punës (https://www.uni-pr.edu/…/AD34598C-9D62-4DC8-9D68-6DAF237722…).

Ndërkaq, për rastin Arsim Morina, vendimi i Këshillit të Etikës pohon se nuk është në mandatin dhe as në mundësinë e këtij këshillit që të zhvillojë hetime ose të ndërmarrë nisma komplekse për verifikime të pretendimeve që mund të ngriten për cenime të të drejtave autoriale në tekstet universitare ngushtë të specializuara. Këtë detyrë, sipas Këshillit të Etikës, do të mund ta ushtronte më së miri një komision i pavarur dhe profesional, e për këtë duhet të vendosë Senati i UP-së.

ADMOVERE është thellësisht e tronditur dhe e zhgënjyer me këto dy vendime të Këshillit të Etikës të UP-së, sepse tashmë është krejt e qartë se Këshilli i Etikës është organ që nuk e zbaton Kodin e Etikës, dhe, për më keq, e arsyeton plagjiaturën. Rrjedhimisht, pas këtyre dy vendimeve, ekzistenca e mëtejmë e Këshillit të Etikës është krejt e panevojshme. / KultPlus.com

Shkëlzen Gashi publikon librin “Kosova-Lufta dhe Paqja” me 34 intervista

Publicisti Shkëlzen Gashi së fundmi ka publikuar librin “Kosova-Lufta dhe Paqja”, në të cilin ka përmbledhur 34 intervista të realizuara 15 vite më parë, shkruan KultPlus.

Gashi ka treguar se ky libër përfshin një mori intervistash, të cilat i ka realizuar gjatë kohës sa ishte student në Departamentin e Shkencave Politike në UP. Një pjesë e intervistave flasin për Marrëveshjen e Rambujesë , me pjesëmarrës e kundërshtarë të kësaj marrëveshjeje: Albin Kurti, Fatmir Humolli, Arsim Bajrami, Adem Demaçi, Ramë Buja, Edita Tahiri, Jakup Krasniqi, Enver Hasani, Bujar Bukoshi, Mehmet Hajrizi, Blerim Reka, Fadil Hysaj dhe Hydajet Hyseni. Këto intervista, Gashi  i ka realizuar gjatë verës së vitit 2004.

Po, ashtu ky libër përfshin edhe intervistat që Gashi ka realizuar gjatë vitit 2005 për tema të ndryshme, ku të intervistuarit ishin Azem Vllasi, Bajram Rexhepi, Melihate Tërmkolli, Adem Demaçi, Sylejman Selimi, Nexhmedin Spahiu, Rexhep Selimi dhe Mahmut Bakalli.  Pjesë tjetër e librit përfshin intervistat që Shkëlzen Gashi i ka realizuar në vitin 2006,kryesisht me politikanët e Kosovës, për negociatat për statusin politik të Kosovës me Serbinë, çështjen e decentralizimit dhe të statusit të ‘zonave të mbrojtura’ për kishat dhe manastiret ortodokse të Kosovës. Për shtjellimin e këtyre problemeve ai ka intervistuar: Lutfi Hazirin, Shkëlzen Maliqin, Jakup Krasniqin, Enver Hasanin, Kaqusha Jasharin, Ylber Hysën, Smajl Latifin, Enver Hoxhajn, Muhamedin Kullashin, Adem Demaçin, Veton Surroin dhe Shinasi Ramën.

“Këto intervista, të realizuara para rreth 15 vjetëve, vlerësova se ia vlen të përmblidhen të gjitha në një vëllim me titull “Kosova – Lufta dhe Paqja”, i bindur se mund t’u hyjnë në punë studentëve e studiuesve të shkencave sociale, gazetarëve e analistëve, e edhe politikanëve negociatorë”, ka shkruar në njoftimin e tij Gashi.

Libri përmban 34 intervista, ka 502 faqe, kushton 5 €, dhe gjendet në të gjitha libraritë e Prishtinës: Dukagjini, Artini, Buzuku, Soma…/ KultPlus.com

Gashi: Qosja qe 10 vjet nuk ka shkuar në mbledhjet e Akademisë, por merr pagë

Shkëlzen Gashi në Rubikon të KTV-së ku bashkë me Kushtrim Koliqin lansuan raportin “Kriza në Akademi” – Vlerësim i shoqërisë civile për akademinë e shkencave dhe të arteve, foli edhe për akademikun Rexhep Qosja.

Ai përmendi rregulloren, sipas se cilës, nëse nuk marrin pjesë në mbledhjet e Akademisë deri në gjashtë muaj, atëherë anëtari duhet të përjashtohet mirëpo diçka e tillë nuk ka ndodhur me Rexhep Qosjen, i cili, sipas tij, ndonëse vazhdimisht e kritikon këtë institucion, ai ka kohë që nuk ka qenë në këto mbledhje.

“Sipas rregullores së Akademisë, nëse një anëtar nuk shkon në mbledhjet e saj për gjashtë muaj atëherë ai përjashtohet e profesor Qosja po besoj që ka një dekadë që nuk ka shkuar dhe po ashtu përjashtohet nëse dikush e denigron akademinë”, ka thënë ai.

Ndërsa, i pyetur nëse Qosja vazhdon të merr pagë nga Akademia, Gashi ka thënë se beson që po mirëpo më mirë që të pyetet edhe vetë ai.

“Me paratë e Akademisë botohen memoaret e kryeakademikut Daci”

Shkëlzen Gashi ka pohuar të ketë dëgjuar që Nexhat Daci, kryetar i Akademisë së Shkencave dhe Arteve të Kosovës, me paratë e institucionit që drejton, ka publikuar memoaret e veta.

“Duke ardhur këtu [në Rubikon] dëgjova që kryetari me para të akademisë ka financuar publikimin e memoareve të tij personale. Është botim luksoz dhe u kushton taksapaguesve të Kosovës”, ka thënë Gashi.

“Memoaret nuk janë kategori e veprave shkencore”, ka shtuar ai.

Gashi: Akademia është politizuar nga LDK-ja

Një ndër qëllimet kryesore të AshAK-ut është realizimi i projekteve shkencore me interes në zhvillimin e vendit. Mirëpo sipas Shkëlzen Gashit, deri tash as edhe një projekt shkencor në kuadër të Akademisë së Shkencave dhe të Arteve, nuk është realizuar.

“As edhe një projekt shkencor me interes për vendin nuk është bërë. Ata janë shumë të mbyllur, po iu bëjmë thirrje publike t’i publikojnë, ata është mirë m’i publiku buxhetet, raportet e auditimit, qëllimet e tyre, projektet shkencore, sa janë realizu dhe çka ka ndodh me to”, ka thënë Gashi.

“Nuk ka. Janë të mbyllur edhe ndaj gazetarëve e anëtarëve të shoqërisë civile. Natyrisht që kur kanë me promovu diçka, do të vijnë. Mirëpo kur i thirr t’i sfidosh, lere që nuk do të vijnë, po nuk kanë me kthyer fare përgjigje”.

Sipas Gashit, pika që është zbatuar në listën e qëllimeve të kësaj akademie, është ajo e 11-a me renditje.

“Asnjë akademi nuk ka objekt dhe kushte më të mira. Nuk është problemi të objekti po edhe te honorarët dhe mëditjet që i marrin. Nuk duhet me harru që Kosova është vendi më i varfër në Evropë”, ka thënë ai.

“Objekti është shumë i bukur po duket se po hyn në një objekt të fantazmave sepse nuk është askush. Ai objekt është bërë për me punu po aty gjen veç disa punëtorë të administratës, nuk është askush”, ka thënë Kushtrim Koliqi nga organizata “Integra”.

Autori i këtij raporti, Shkëlzen Gashi ka thënë se politizimi i Akademisë filloi nga vitet ’90 dhe kjo nga Lidhja Demokratike e Kosovës.

“Nga 22 anëtarë të rregullt të AShAK-ut, pak më shumë se gjysma, 12 prej tyre, kanë qenë të angazhuar nëpër parti politike. 8 tetë në LDK dhe prej tyre më vonë dy në Lidhjen Demokratike të Dardanisë, dy në PFK, një në LBD dhe një në ORA”.

“Kurse nga 16 anëtarë korrespodentë, gati gjysma, shtatë prej tyre, kanë qenë të angazhuar nëpër parti politike, katër në LDK, dy në PDK dhe një në PSD”.

“Prej viteve të 90-ta është politizuar nga Lidhja Demokratike e Kosovës”, ka thënë tutje Gashi.

Në Rubikon të KTV-së, Shkëlzen Gashi dhe Kushtrim Koliqi lansuan raportin “Kriza në Akademi” – Vlerësim i shoqërisë civile për Akademinë e Shkencave dhe Artëve të Kosovës, me përkrahjen e projektit Promovimi i Shoqërisë Demokratike– i financuar nga Agjencia Zvicerane për Zhvillim dhe Bashkëpunim dhe Ministria e Punëve të Jashtme e Danimarkës dhe i menaxhuar nga Fondacioni Kosovar për Shoqëri Civile.

Përmbajtja e këtij botimi është përgjegjësi e autorit dhe e organizatës Integra.

Autori Shkëlzen Gashi bëri të ditur se për realizimin e këtij raporti përveç metodave tjera provuan të intervistonin edhe anëtarët e akademisë mirëpo nuk morën përgjigje pozitive.

“Diku 10 prej tyre, udhëheqës të seksioneve, kryetarët, ish udhëheqësit, të gjitha janë përgjigje negative. I vetmi prej anëtarëve që ka kthyer përgjigje pozitive është Fetah Podvorica. Jo rastësisht është përgjigj pasi studimet master dhe PHD nuk i ka në universitetet shqipfolëse por në Paris. Prej që ai është udhëheqës i seksionit të shkencave natyrore dhe redaktor i revistës ‘Kërkimet’, numri i fundit i saj ka dalë në anglisht”, ka thënë Gashi.

“Anëtarët si ata të rregullt dhe korrespodent të Akademisë së arteve i kanë të publikuara biografitë e tyre goxha të detajuara mirëpo nuk i kanë në ndonjë format të CV-së”, ka thënë ai./KultPlus.com