Projekti për shkollën Canuana, i njohur si Fshati i Fëmijëve (Children Village) nga arkitektët brazilian Aleph Zero dhe Rosenbaum ka fituar çmimin ndërkombëtar RIBA për vitin 2018.

I vendosur buzë një pylli, në pjesën veriore të Brazilit, ky kompleks i ri shkollor ofron strehim për 540 fëmijë që ndjekin shkollën Canuanã. Fshati i Fëmijëve u bë i njohur për vizionin dhe imagjinatën artikitekturore të cilën e përdori si një mjet për transformimin e shoqërisë, transmeton Ndëritmi.info.

Duke kombinuar një estetikë bashkëkohore me teknikat tradicionale, Fshati i Fëmijëve është përshkruar nga juria si ‘objekt folklorik brazilian’. Objekti është ndërtuar me kosto efektive dhe është rezistent ndaj ndryshimeve klimatike.

“Jemi të lumtur që kemi marrë çmimin ndërkombëtarë RIBA për vitin 2018. Është gëzim të shohim fëmijët që e përvetësojnë ndërtesën dhe e përshtatin hapësirën në bazë të nevojave të tyre”, janë shprehur drejtorët e Aleph Zero, Gustavo Utrabo dhe Pedro Duschenes në një prononcim per Arch Daily.

E për çmimin folën edhe drejtorët e kompanisë së njohur Rosenbaum, Marcelo Rosenbaum dhe Adriana Benguela, njëherish bashkëpunëtorë të “Fshatit të Fëmijëve”, duke thënë se ky çmim e forcon kuptimin e arkitekturës për transformim shoqeror.

“Jemi të nderuar që kemi pranuar çmimin ndërkombëtar të RIBA-s. Ky çmim e forcon kuptimin mbi arkitekturën si një mjet për transformimin shoqëror, si një mjet që tejkalon ndërtimin dhe krijon një lidhje të thellë mes të rinjëe dhe paraardhësëe”, u shprehën drejtorët e “Rosenbaum” Marcelo Rosenbaum dhe Adriana Benguela.

Çmimi Ndërkombëtar RIBA ndahet çdo dy vjet për një ndërtesë që ilustron përsosmërinë e projektimit dhe ambicies arkitektonike dhe që ka ndikim në shoqëri.

Muaj më parë Instituti Mbretëror i Arkitektëve Britanikë (RIBA) pati shpallur listën e ngushtë të katër projekteve finale, që garonin për çmimin ndërkombëtar “RIBA 2018”.

Ato ishin Universiteti Qendror i Evropës nga O’Donnell + Tuomey, Fshati i fëmijëve nga Aleph Zero + Rosenbaum, Shkolla e Muzikës Toho Gakuen nga Nikken Sekkei dhe Il Bosco Verticale (Pylli vertikal) nga Boeri Studio./ Ndërtimi.info / KultPlus.com