Aktori Vedat Bajrami, bllogerja Rita Saraçi, notuesi Lum Zhaveli dhe alpinistja Arineta Mula janë katër personazhet të cilat do të jenë fytyra të Fushatës për Mjedisin, e cila do të nisë të hënën në Kosovë.

Organizuar nga Zyra e Bashkimit Evropian në Kosovë dhe implementuar nga Zyra Informative dhe Kulturore e Bashkimit Evropian, Fushata do të nisë në Prishtinë për të vazhduar edhe në qytetet tjera, derisa personazhet publike do të ndihmojnë në katër fushat kryesore të Fushatës, shkruan KultPlus.

Fushata do të fokusohet në ujë, ajër, energji dhe në menaxhim të mbeturinave. Katër personazhet do të përkujdesen të ndajnë përvojën e tyre me audiencën në Kosovë, për tregimet e suksesit në fushat ku ata veprojnë dhe ku mbrojtja e ambientit për një jetë më të shëndetshme ka shumë rëndësi.

Kjo është fushata e dytë pas asaj për arsim cilësor e cila u zhvillua nga muaji maj deri në qershor.

Fushata do të hapet me 24 shtator, në ora 10:00 në Bibliotekën Kombëtare të Kosovës. / KultPlus.com