Pogradeci çeli sot sezonin turistik 2025 me një sërë aktivitetesh kulturore, sportive si dhe me panaire.

Aktivitetet e çeljes së sezonit veror nisën me bandën frymore, e cila parakaloi në rrugët kryesore të qytetit të Pogradecit.

Në ceremoninë e organizuar me këtë rast ishin të pranishëm kryetari i bashkisë së Pogradecit, Ilir Xhakolli, ambasadori i Azerbajxhanit në Shqipëri, Anar Huseynov, nënkryetarja e bashkisë Entela Gusho, drejtues të pushtetit vendor, qytetarë, turistë etj.

Kryetari i bashkisë së Pogradecit, Ilir Xhakolli tha se ne kemi 5-6 vjet që punojmë për këtë ditë. Edhe investimet që kemi kryer në infrastrukturë, por edhe kujdesi që tregojnë vetë punonjësit e bashkisë për të mbajtur një ambient të pastër, të kuruar me kujdes duke ofruar mundësi për të pushuar për të gjithë brezat, edhe për brezin e tretë, për rininë dhe fëmijët”.

“Jo vetëm nga turistët vendas, por edhe të huaj ka pasur interes, pasi oferta turistike e Pogradecit ka qenë e përshtatshme për ta”, tha Xhakolli duke shtuar se bashkia ka bërë gjithçka që turistët të ndihen si në shtëpinë e tyre.

Ndërsa në fjalën e saj nënkryetarja e bashkisë së Pogradecit, Entela Gusho tha se “një risi këtë vit do të jenë jo vetëm aktivitetet kulturore, por edhe ato sportive si dhe evidentimi i trashëgimisë së pasur kulturore e natyrore, por edhe nxitja e krijimit të bashkëpunimit ndërinstitucional duke u ofruar turistëve vendas e të huaj shërbime të duhura”.

“Gjatë këtij sezoni bashkia Pogradec do të identifikohet me një kalendar të pasur aktivitetesh ku secili prej jush mund të gjejë veten për të pushuar në flladin pogradecar ashtu si e përshkruajnë vargjet e poezisë së Lasgushit dhe Mitrush Kutelit”, tha Gusho.

Duke ftuar vizitorët të vizitojnë Pogradecin, nënkryetarja Gusho u shpreh se “të shijojmë së bashku kulinarinë, mikpritjen dhe traditën, trinomin e të cilit e gjeni vetëm në Pogradec”.

Në ditën e çeljes se sezonit turistik, vizitorët e huaj janë të shumtë në qytetin liqenor. Dy prej tyre tregojnë se vijnë për herë të parë në Pogradec e se mikpritja, por dhe kulinaria e çmimet bëjnë që ata të mendojnë rikthimin vitin tjetër

“Ne jemi nga Austria, kemi ardhur për herë të parë në Pogradec. Një pamje fantastike, vend i mirë për të qëndruar, diell, ushqim fantastik, do rikthehemi përsëri”, tha një turist.

Një tjetër turist u shpreh se “kisha dëgjuar për Pogradecin në internet, sa shumë dyqane e njerëz. Liqeni fantastik, plazh bëmë dhe u relaksuam. Çmimet ishin shumë të lira”.

Bujtinat dhe restorantet e qytetit organizuan një panair me ushqimet tradicionale të zonës, ndërkohë artizanët ekspozuan punimet e tyre si në qëndisje, punime me grep, gliko, reçelra të ndryshëm.

Gjithashtu, u zhvilluan edhe një sërë aktivitetesh si koncerte me këngë dhe lojëra për fëmijë.

Pogradeci dhe fshatrat turistikë të Linit e Tushemishtit edhe këtë vit vijojnë të jenë të kërkuara nga turistët vendas e të huaj, për bukurinë që ofron kjo krahinë aq e për kulinarinë e mikpritjen.

Pogradeci dhe rrethinat e tij ofrojnë për turistët një atraksion të përhershëm turistik me natyrën, kulturën dhe historinë që i japin madhështinë, ndërsa liqeni i jep hijeshinë.

Përveç liqenit, Pogradeci ka edhe shumë bukuri të tjera natyrore në periferinë e tij, në fshatrat që e rrethojnë, ka monumente të rëndësishme kulturore e historike që të tërheqin t’i vizitosh./atsh/ KultPlus.com

Nga data 17 deri më 31 maj, në Shqipëri po zhvillohet edicioni i radhës i Javëve Kulturore të Evropës, një festë gjithëpërfshirëse e artit dhe kulturës që shtrihet në nëntë qytete: Tiranë, Kamzë, Shkodër, Durrës, Elbasan, Vlorë, Korçë, Berat dhe Pilur (Himarë).

Mbrëmjen e djeshme, në fshatin Pilur të Himarës u organizua aktiviteti “Vëndçe”, i cili u rikthye atje ku gjithçka nisi, mes zërave që mbajnë gjallë një trashëgimi të rrallë.

Sipas njoftimit të Bashkimit Evropian, në këtë mbrëmje të bukur ku i pranishëm ishte edhe ambasadori i BE-së, Silvio Gonzato u shfaq dokumetari i Lorin Terezit, ndërsa u zhvilluan edhe biseda, këngë polifonike, që përcollën lidhjen e fortë mes zërit, vendit dhe identitetit kulturor shqiptar.

Me një program të pasur prej mbi 45 aktivitetesh, kjo javë ofron një platformë për bashkëpunim ndërkombëtar, reflektim publik dhe shprehje artistike.

Programi përfshin gjithashtu biseda me artistë, forume për dialog dhe reflektim mbi rolin e artit në shoqëri duke shndërruar qytetet shqiptare në skena të hapura të mendimit kritik dhe krijimtarisë kolektive.

Java e Evropës 2025 është një hapësirë bashkëpunimi ku kultura vepron si urë mes qytetarëve, komuniteteve dhe vlerave evropiane. Kjo iniciativë nuk synon të përshkruajë Evropën, por t’i japë zë atyre që e jetojnë dhe e ripërfytyrojnë atë, përmes gjuhës së përbashkët të artit.

Pas Javës Kulturore të Evropës, Javët Kulturore Ndërkombëtare, nismë e Ministrisë së Ekonomisë, Kulturës dhe Inovacionit vijojnë me Italinë, për t’u pasuar nga Izraeli, Suedia, Franca etj./atsh/KultPlus.com

Muzeu Etnografik në Elbasan, i shpallur Monument Kulture kategoria e I, pas restaurimit po tërheq vizitorë vendas e të huaj, duke u ofruar një përvojë autentike në rrënjët e historisë, kulturës dhe jetesës tradicionale të qytetit.

I njohur ndryshe dhe si “Shtëpia e Sejdinasve”, në këtë ndërtesë dykatëshe të shekullit të 18-të prezantohet kultura, folklori dhe stili i jetesës së qytetit.

Përgjegjësja e Muzeut Etnografik, Denada Kristo tha për ATSH-në se “pas përfundimit të punimeve më 14 mars të këtij viti ky muze është vizituar nga 2500 vizitorë vendas e të huaj”.

“Turistët e huaj kryesisht janë gjermanë, francezë, italianë, spanjollë, amerikanë, por nuk mungojnë edhe vizitorët nga Kosova. Interes të veçantë për këtë muze kanë treguar edhe përfaqësues diplomatikë që vizitojnë Elbasanin”, theksoi Kristo.

Sipas saj, vizitorët njihen nga afër me objektet e pasura etnografike, veshjet tradicionale dhe elementët e jetës së përditshme të shekujve të kaluar.

Në këtë muze ekspozohen rreth 80 zeje tradicionale, duke pasqyruar mjeshtërinë, stilin e jetës dhe zhvillimin ekonomik të qytetit ndër shekuj. Muzeu mbart në çdo kënd frymën e një qyteti të lashtë që di të ruajë dhe vlerësojë trashëgiminë.

Restaurimi i muzeut ka rikthyer shkëlqimin e një prej godinave më përfaqësuese të trashëgimisë sonë. Restaurimi përfshiu çatinë, çardakun, parmakët, fasadën, dritaret dhe elementë të tjerë autoktonë të banesës, gjithmonë me kujdes për të ruajtur identitetin e saj historik dhe arkitekturor.

Muzeu Etnografik qëndron i hapur çdo ditë të javës dhe mirëpret vizitorë nga vendi dhe jashtë, që duan të njihen më nga afër me jetën e të parëve tanë, veshjet, traditat, artizanatin dhe gjithë pasurinë shpirtërore të këtij qyteti./atsh/KultPlus.com

Turizmi në Shqipëri po përjeton zhvillime cilësore me shtimin e destinacioneve unike që synojnë të ofrojnë përvoja të veçanta për vizitorët.

Në zemër të kryeqytetit, brenda mureve historikë të Kalasë së Tiranës, është hapur “Castle Boutique Hotel”, një investim elegant që bashkon harmoninë mes historisë së pasur dhe komoditetit modern.

Ky hotel me stil “boutique” është një shembull i mirëfilltë i zhvillimit të turizmit cilësor, që vlerëson trashëgiminë kulturore ndërkohë që ofron shërbime dhe ambiente moderne, duke i dhënë qytetit një dimension të ri mikpritjeje.

Kryeministri Edi Rama ndau pamje nga objekti, duke theksuar se “Castle Boutique Hotel” ofron një përvojë unike për çdo vizitor që dëshiron të ndiejë Tiranën në mënyrë të veçantë dhe autentike.

Ai theksoi rëndësinë e investimeve të tilla në zhvillimin e sektorit turistik dhe nxitjen e vizitorëve vendas dhe të huaj që të eksplorojnë thesaret kulturore dhe historike të vendit.

“Plot elegancë, në zemër të Tiranës, brenda mureve të vjetra të Kalasë, “Castle Boutique Hotel” është një shembull i shkëlqyer i harmonisë mes historisë dhe modernes. Ky vend ofron një përvojë unike për çdo vizitor që dëshiron të ndiejë kryeqytetin në një mënyrë krejt të veçantë”, tha Rama.

Kjo iniciativë vjen në vazhdën e rritjes së përgjithshme të sektorit turistik në vend, që po shënon rekorde në numrin e vizitorëve dhe në investimet në hoteleri dhe shërbime të cilësisë së lartë.

Të dhënat zyrtare flasin për mbi 2,4 milionë të huaj që vizituan vendin në 4-mujorin e parë të vitit./atsh/KultPlus.com