Drejtoria e Përgjithshme e Arkivave (DPA) fton studiuesit, ekspertët e arkivave të trojeve shqiptare dhe të mbarë rajonit, si edhe çdo të interesuar të bashkësisë shkencore, për të marrë pjesë në botimet e vitit 2026.
Drejtori i përgjithshëm i Arkivave, Ardit Bido tha në një deklaratë për shtyp se “për vitin e katërt radhazi, DPA-ja, e rikthyer në funksionin e botueses periodike, publikon studime mbi periudha dhe figura të rëndësishme në historinë e vendit. Po ashtu, pjesë e publikimeve të përvitshme janë edhe udhëzuesit mbi metodologjinë arkivore në hapësirën kombëtare”.
“Me synimin për të dhënë një kontribut në historiografinë shqiptare, DPA-ja propozon tematika që përkojnë me përvjetorët e ndodhive historike, me lindjen dhe me vdekjen e disa prej emrave më të angazhuar në veprimtarinë publike. Mes tematikave të dedikuara botimeve të këtij viti, sugjerojmë të trajtohen jubilarë të rëndësishëm, sikurse janë: Diplomacia shqiptare gjatë periudhës së Republikës (1925-1929); 130-vjetori i lindjes së Mujo Ulqinakut; 110-vjetori i themelimit të Komisisë Letrare të Shkodrës; 110-vjetori i vdekjes së Isa Boletinit; 100-vjetori i vdekjes së Aqif Pashë Elbasanit; 80-vjetori i vdekjes së Lef Nosit”.
Sipas tij, risia e këtij viti është publikimi i një udhërrëfyesi arkivor, që do të ketë për qëllim orientimin e studiuesve në procesin e kërkimit online, në platformën e Sallës së Studimit apo në Këndet Arkivore të çelura në dhjetëra qytete në Shqipëri, në Kosovë, në Maqedoninë e Veriut, në Mal të Zi, në Greqi dhe në jug të Italisë.
Për secilën prej këtyre gjinive të botimeve, të interesuarit duhet t’i drejtohen adresës botime.arkiva.gov.al për të depozituar kërkesën e tyre për pjesëmarrje dhe abstraktet e punimeve të propozuara.
“Po ashtu, në materialet të mundshme për botim përfshihen përmbledhjet e dokumenteve për një periudhë, çështje apo personalitet historik; punimet monografike të lidhura me historikun e arkivave, sfidat dhe problematikat e tyre në Shqipëri e më gjerë; botimet e dokumenteve në gjuhë të rralla (osmanisht, greqisht, latinisht etj.); botimet e akteve ligjore dhe nënligjore për punën me dokumentet arkivore; inventarët, katalogët dhe treguesit e punës kërkimore në arkiva”, theksoi Bido.
Bido tha se “çdo punim i paraqitur nuk duhet të kapërcejë kufirin prej 400 mijë shkronjash dhe shenjash, ose të 10 fletëve tipografike”.
Thirrja për pjesëmarrje do të qëndrojë e hapur deri më datën 5 prill 2025./ KultPlus.com
Muzeu Oriental “Bratko” në qytetin e Korçës, pas rikonstruksionit është shndërruar në një atraksion të jashtëzakonshëm për vizitorët.
Lajmin e bëri të ditur kryetari i bashkisë, Sotiral Filo, teksa ndau në rrjete sociale pamje nga mjediset e restauruara të muzeut dhe të arreduara me shumë kujdes me pajisje, objekte dhe piktura, që prezantojnë vlerat autentike të trashëgimisë historike e kulturore të qytetit.
“Me hapësira tashmë moderne muzeu ofron një përvojë fantastike për të zbuluar trashëgiminë e pasur orientale”, u shpreh Filo.
Sipas tij, ky muze do të jetë një tjetër pikë kyçe turistike dhe kulturore në Korçë, duke ofruar aktivitete dhe evente që do të tërheqin vizitorë nga e gjithë bota.
Muzeu i Artit Oriental “Bratko” u çel në qershor të vitit 2003, duke përmbushur ëndrrën e Dhimitër Borjes (1903-1990), artist, fotograf dhe koleksionist i artit aziatik dhe antikuareve.
Në këtë muze ekspozohen 432 objekte si piano, altar kinez, veshje për gra japoneze, funde e rripa kinezë, shpatë indoneziane, medalje europiane, piktura japoneze, fotografi të ndryshme, të cilat Borja i ka realizuar kur shërbente në Ballkan me misionin e OKB-së.
Pamjet fotografike janë krejt të veçanta. Ato tregojnë historinë shoqërore e kulturore menjëherë pas Luftës, si dhe rolin e rëndësishëm që luajti gjeneral MacArthur-i në rindërtimin ekonomik dhe institucional të Japonisë./ KultPlus.com
Kanga: lotët e syve t’i terë atëherë kur malli, o vëlla, të përvëlon. Kanga, o vëlla, të ngushëllon dhe atëherë kur prej zemrës vneri të pikon!
Këndo edhe atëherë; kur stuhia e kohës buzët e njoma t’i plasaritë; edhe atëherë kur flaka e barotit qepallat bashkë me vetulla t’i përcëllon Ti, vetëm këndo o bilbili i njerëzimit!
Edhe atëherë kur barra e jetës mbi Ty, do të përplaset, Ti, mos u krrus por çlirosi forcat tua. Se koha të mëson me iu shmang barrës. Ti, edhe atëherë këndo se bashkë me kangë, lindin plane të reja; të cilat të udhëzojnë për kangën e matejshme në jetë!
Hej, këndo edhe atëherë kur të mungon liria; këndo me flakë në gojë – se flaka dhe baroti armikun e braktisin planet ia kurthojnë!
O, këndo, këndo edhe në frymën e fundit. E me një buzëqeshje të ambël natyrën vështroje. Se melodia e kangës sate, dikujt do t’i kujtohet: dhe mallëngjyeshëm për Ty, dikush ka me ofsha…
*Poezi e shkruar nga profesori i ndjerë, Musa Lajçi, babai i heroit, Besnik Lajçi. Shkruar në vitin 1960./ KultPlus.com
Nëse dëshiron të ndërtosh një karrierë të suksesshme në fushat mjekësore ose dentare,Universum International College ofron edukim të klasit botëror, të ofruar dhe menaxhuar nga Arizona State University, përfitoni nga programet e nivelit Bachelor në Biomjekësi Laboratorike, Kozmetologji, Teknik Dentar dhe Higjienë Dentare.
REGJISTROHU TANI dhe përfitoni një ofertë ekskluzive -15% zbritje për pararegjistrim. Kjo mundësi është e kufizuar, pasi vendet janë të limituara.
Cili Program Është i Duhuri për Ty?
Biomjekësi Laboratorike – Ky program është i dizajnuar për ata që kanë pasion për shkencën dhe duan të kontribuojnë në diagnozat mjekësore. Studentët do të mësojnë të analizojnë mostra biologjike, të përdorin pajisje laboratorike të teknologjisë së fundit dhe të ndihmojnë në identifikimin e sëmundjeve. Puna e tyre është thelbësore në spitale, klinika dhe laboratorë kërkimorë.
Kozmetologji – Në një botë ku kujdesi estetik po bëhet gjithnjë e më i rëndësishëm, ky drejtim ofron trajnim profesional në kujdesin e lëkurës, trajtime dermatologjike dhe teknika të avancuara të estetikës. Studentët do të mësojnë përdorimin e aparaturave moderne dhe teknologjive të reja për të ofruar shërbime cilësore në qendrat estetike dhe spa.
Teknik Dentar – Ky program është ideal për ata që duan të punojnë në fushën e stomatologjisë, duke ndihmuar në krijimin e protezave, aparateve ortodontike dhe implanteve dentare. Studentët do të marrin njohuri të thelluara mbi materialet dentare dhe teknikat e përpunimit të tyre në laboratorë të specializuar.
Higjienë Dentare – Një profesion kyç në shëndetin oral, i cili përgatit specialistë për pastrimin profesional të dhëmbëve, trajtimin e mishrave të dhëmbëve dhe edukimin e pacientëve mbi higjienën orale. Ky drejtim ofron mundësi të shumta punësimi në klinika dentare, spitale dhe qendra shëndetësore.
Përse të Regjistrohesh Tani?
✔ -15% zbritje për pararegjistrim.
✔ Numër i kufizuar vendesh – Rezervo vendin para se të plotësohen kuotat.
✔ Mësim praktik dhe teorik në ambiente moderne – Pajisje të avancuara dhe mësimdhënie nga ekspertë.
✔ Diplomë të dyfishtë & e fuqizuar nga Arizona State University.
✔ Qasje në kurrikulën e Arizona State University.
✔ Mundësi të shkëlqyera punësimi pas diplomimit – Fushë me kërkesë të lartë në treg.
TI JE UNIK! Krijo suksesin tënd, me edukim amerikan. Fuqizohu nga Arizona State University, Universiteti më i madh publik në SHBA. Studio në UNI duke aplikuar këtu!
Presidentja e Republikës së Kosovës, Vjosa Osmani, ka pranuar një mesazh urimi nga presidenti i Republikës së Kroacisë, Zoran Milanović, me rastin e 17-vjetorit të Pavarësisë së Kosovës.
Në mesazhin e tij, presidenti Milanović ka shprehur urimet e përzemërta për presidenten Osmani dhe për të gjithë qytetarët e Kosovës, duke dëshiruar progres dhe mirëqenie për vendin tonë.
Ai ka vënë në pah marrëdhëniet tradicionale miqësore dhe të ngushta mes dy shteteve dhe ka theksuar rëndësinë e forcimit të mëtejshëm të bashkëpunimit në fusha me interes të përbashkët, për të mirën e dy popujve.
Presidenti kroat ka nënvizuar gjithashtu rolin e rëndësishëm të bashkëpunimit midis Kosovës dhe Kroacisë për stabilitetin, sigurinë dhe bashkëpunimin në Evropën Juglindore. Ai ka ritheksuar mbështetjen e palëkundur të Kroacisë për integrimin e Kosovës në organizatat ndërkombëtare dhe formatet rajonale të bashkëpunimit, duke përfshirë anëtarësimin e saj në Bashkimin Evropian dhe NATO./ KultPlus.com
Manastiri i Shën Pjetrit dhe Pavlit (Vithkuq) ruan afreske të jashtëzakonshme, pikturuar në vitin 1763 nga mjeshtrit ikonografë Kostandin dhe Athanas Zografi.
Këto afreske janë një dëshmi e rëndësishme e trashëgimisë bizantine duke reflektuar mjeshtërinë e vëllezërve Zografi.
Drejtoria Rajonale e Trashëgimisë Kulturore Korçë publikoi në rrjetet sociale pamjet mahnitëse të afreskeve të këtij manastiri, i cili është një monument i rëndësishëm i kulturës dhe historisë së rajonit të Korçës. Ndërtuar në mesin e shekullit të 18-të, kjo strukturë e shenjtë ka kishën me një bazilikë trinefëshe, e cila ka një kupolë imponuese.
Ikonostasi, i punuar me teknikën e gdhendjes së rrafshtë në dru, është një prej veprave më tërheqëse të këtij manastiri, duke përmbajtur motive floreale dhe skena të përshtatura nga jeta e fshatit.
Manastiri ka një histori të pasur, duke shërbyer si qendër e jetës kulturore dhe fetare në zonën përreth. Sot, Manastiri i Shën Pjetrit dhe Pavlit është një destinacion i rëndësishëm turistik dhe një vend i qetë për reflektim dhe adhurim për besimtarët dhe të interesuarit për historinë dhe kulturën e rajonit./ KultPlus.com
Më 19 shkurt të vitit 1879, u lind në Shkodër poeti, nënshkruesi i Deklaratës së Pavarësisë, patrioti i përkushtuar ndaj çështjes së atdheut, Luigj Gurakuqi.
Drejtoria e Përgjithshme e Arkivave kujton se në vitet 1901-1906, Gurakuqi kreu studimet universitare në Napoli, e më tutje, debutoi me sukses si poet lirik, frymëzuar nga Filip Shiroka.
Me veprën “Vargënimi n’gjuhë shqype me nji fjalorth shqyp-frëngjisht n’marim” (Napoli, 1906), Gurakuqi bëri të parën orvatje për kodifikimin e metrikës së poezisë shqiptare. Pak kohë më pas, botoi në Bukuresht veprën “Abetar i vogël shqyp mas abevet t’Bashkimit e t’Stambollit me tregime n’dy dhialektet”, që qendron si gurthemel i të gjithë përpjekeve të tij në drejtim të lëvizjes kombëtare, arsimore e kulturore në epilog të Rilindjes Kombëtare dhe në nisje të zhvillimeve të Pavarësisë.
Mori pjesë në Kongresin e Manastirit krah përfaqësuesve të Shkodrës: Gjergj Fishtës, Dom Mjedës, Hilë Mosit e Mati Logorecit. U zgjodh nënkryetar dhe anëtar i komisionit për njësimin e alfabetit. Më 1909-n, në cilësinë e drejtorit të Normales së Elbasanit, kontribuoi në kristalizimin e arsimit mbi baza kombëtare.
Në 1912-n, u angazhua në mënyrë të intensifikuar në organizimin e kryengritjes së përgjithshme. Mëvetësia, u komunikua në deklaratën e formuluar nga Ismail Qemali, të shkruar prej Gurakuqit. Në Qeverinë e Përkohshme të Vlorës, u zgjodh ministër i Arsimit. Më 1913-n, mori pjesë në Konferencën e Londrës.
Në kabinetin disaditor të Hasan Prishtinës, iu besua posti i ministrit të Brendshëm. Gurakuqi mori pjesë në Kongresin e Durrësit (1918), prej nga ku u vendos rikthimi i tij në krye të Ministrisë së Arsimit. Qe anëtar i delegacionit në Konferencën e Paqes në Paris.
Udhëhoqi Revolucionin e Qershorit 1924 dhe u emërua ministër i Financave në qeverinë e kryesuar nga Fan S. Noli. Pas shtypjes së Revolucionit, u largua drejt Italisë, në Bari, ku më 2 mars 1925, ra viktimë e një atentati. / KultPlus.com
Kosovë, o vend’ i famshëm i trimnis, Kosovë, o lule e bukur e Shqipnis! Ti bjeshkat plot vjollca rreth i ke, …Si vashë e virgjen: nuse sikur je; Dhe malet me bor Mi krye i ke kunor!
Kosovë, o atdhe i lavduem i burrnis Ti ke pas kjen mbretnesha e Rumelis! Nalt mbaje kryet t’and si gjithmon Difto-u e zonja; koha sot e don Ti t’çohesh përseri N’luftë t’mbarë për liri!
Se teje të madhe shpresë ushqen Shqipnija Me burra ti q’i len, t’gjatë si selvija, Sakola mali, shoq në bot’ që s’ kanë Si luaj e si dragoj plot forcë që janë, Që e derdhin gjakun prrue Atdheun për m’e shpëtue!
Ke bij që s’kanë drojë asnjë pikë As syni far’ u tutet, s’dinë as frikë Anmikut kur i sulen me rrebtsi Si breshni mi te hidhen me duhi.
Gra e vasha ke, si zana sy-mëdha Trimnesha qi Shqipnija din m’i ba Qi rrokin armët në luftë me gas tuj shkue Ja se me mund, ja se me dekun tuj luftue! Për nder të shtëpis s’vet; E falin shpirt e jet!
Kosovë, o trimneshë, lule e rrallë Detyrën tin’ e ke me dal sot n’ballë Se mbrrini koha, tokën për m’e mprue Anmiqt e motçëm jashtë me i dëbue Se mjaft e kanë robnue Dhe n’ zjarm e kanë prue!
A mund m’e durue pa pra kët zgjedhë Që të huejt para syve të t’venë ledhe Për me t’rrzue nër kamb’ e për me t’shkel Për me t’ba gjithë copë, mirë si ju del Dhe duersh mos të lëshojn’ Prej faqes s’dheut të t’shojn!
Disa “Serbi e vjetër” duen me i thanë “Maqedhoni” do t’ jerë emnin ja lanë! Atyne si u pëlqen kufijt i venë Shqipnija veç mbas dojes s’tyne me kjenë; Mendojnë pa turp kurrfarë Se s’ka nji komb Shqiptarë!
Përpara burra, rrokni hut’ e shpatë Prej zis pështonëje Kosovën e ngratë At’ nanën t’uej t’lidhun kamb’ e dur Q’ anmiqt e kan vorrue me dhe e me gur, Me lott qi qan e ankon E asnji nuk i ndihmon!
Shqyptarë mos kujtoni bes’ e fe Po nanën ju kujtoni qi u ka le Qi ka mbet fill e vetum si gru e ve Prej bijet e harrume mi ket dhe! Se ansht turp i math për ju Të huejt me i u çnderu!
Sot ora mbrrini, dita e bekueme Shqipnin m’e ba në bot’ një vent t’lirueme! Kosovës emnin me ja ngref te qilli Për çud të botës sa ka me shkëlzy dilli Me rrnue një Shqypni Si zonjë në lumni.
Shqyptarë, çoni-u, vllazën ora mbrrini Si Geg’ e Toskë nalt flamurin e ngrini! Një Manastir, Shkup, Shkodër e Janinë Një trup bani-e an’ e mb’anë Shqypninë Si ç’trimit mirë i prek Me nder n’luftë me dek! / KultPlus.com
Tradita shqiptare e artit komik është padyshim një nga thesaret e kulturës sonë kombëtare. Rrugëtimi i kahershëm i kësaj marrëdhënie vlerash dhe përfaqësimi është gjithçkaja dëshiruese e shumë personaliteteve të shquara, ndër të cilët rrekemi të veçojmë Vasillaq Vangjelin. Më shumë se një vlerësim për punën dhe kontributin që ai ka dhënë në pasurimin e kësaj tradite, kjo ndërmendje është shkas përshpirtje në përvjetorin e vdekjes. Vasillaq Vangjeli ishte dhe mbeti, për tu përjetësuar në panteonin e vlerave të artit skenik shqiptar një zë dhe një karakteristikë, një profil dhe një tipar, unik. Kjo është thelbësore në art, këtë e jetësoi ai në skenë.
Vasillaq Vangjeli njihet kryesisht si aktor komik. Ai i lindur në 19 shkurt 1948 dhe u shua më 26 shtator 2011, ende pa mbushur 64 vjeç pas një bashkëjetese dhe lufte të gjatë me diabeti. Për më shumë se 45 vjet në skenë, Vangjeli ka luajtur mbi 100 role në teatër, kinematografi dhe estradë.
Në vitin e tretë të Mjekësisë, Vasillaq Vangjeli e braktis shkollën për të hyrë në Institutin e Lartë të Arteve (vitet 1973-1975). Pas përfundimit të tij e çuan për të bërë stazhin në teatër. Nga Teatri Popullor e kaluan në Estradën e Shtetit si aktor i humorit dhe që nga viti 1976 deri më 1 prill 2005 ka qenë aktor dhe regjisor në estradë dhe aktor i Estradës së Tiranës. Në këto kushte aktivizohej që atëherë në Estradën e Shtetit, që nga viti 1967-1968 kur ka qenë regjisor Bujar Kapexhiu.
Për rreth 45 vjet në skenë, me intuitë të hollë e spontanitet të admirueshëm Vangjeli ka bërë për vete me qindra-mijëra spektatorë duke u kthyer kështu në një ndër artistët më të dashur për ta e sidomos në fushën e humorit e të skenës. Ka qenë ndër artistët më të rëndësishëm të Estradës së Tiranës duke luajtur pothuaj në të gjitha premierat. Është një aktor me diapazon të gjerë, vokal, vesh absolute, humorist, recitues. Aktor tragjik-komik me cilësi të mëdha artistike, intuitë e depërtues i thellë në tipa e karaktere, këto janë disa nga cilësitë e Vasillaqit, i cili me mjeshtëri e finesë di ti verë në shërbim të asaj çfarë ai bën. Humorin nuk ta jep shkolla. Ajo vetëm të zhvillon, të drejton nëpërmjet dhuntive të lindura. E kështu ndodh edhe me Vasillaqin.
Humori është i lindur që me lindjen e tij. Në rininë e hershme, sapo kishte mbaruar Akademinë e Arteve për aktrim, i filluan peripecitë e punës apo të emërimit ku do të punonte. Djalë i formuar e plot dëshirë. Kërkonte me çdo kusht të fillonte aktrimin në Teatrin Kombëtar, aq më tepër i dhanë edhe një rol tek drama “Lëvizja” me regji të Pirro Manit, rol që e realizoi me sukses. Por megjithatë, mendimi i partisë ishte që ai të shkonte në Estradën e Tiranës ku edhe e emëruan. Urdhëri ishte urdhër pavarësisht kërkesave e letrave të artistëve të teatrit të cilët kërkonin ta mbanin në kolektivin e tyre. E Vasillaqi nuk donte të shkonte, por pa punë nuk rrihej. Frikë kishte se mos e degdisnin në ndonjë vatër kulturore të humbur, si hakmarrje për moszbatim urdhri. E kështu përfundoi aktor në teatrin e Estradës së Tiranës deri në fundin e merituar të kësaj të fundit.
Estrada nuk e deshi në fillim, punonte pa dëshirë, pa vëmendje. Bënte mungesa në punë, role pa cilësi. Por është po ky artist që u lidh aq shumë me estradën, me humorin, instrumentet, paroditë sa nuk shpjegohet dot më. Më pas Estrada u bë vendi ku shpërfaqi me të gjitha energjitë krijuese talentin dhe vlerat etike, u bë vendi ku realizoi ëndrrën aktoreske. Vlerat i maten me rolet e interpretuara, e nuk janë pak. Të freskët e cilësor e plot shaka. I kalojnë të 100 role të krijuara në estradë, teatër, kinematografi, etj. Të gjithë i kujtojnë : dhëndrin Koçi tek “Zonja nga qyteti”, “Një gjel në qymez”, “Një mburravec që ka frikë nga pëllitja e lopës”, “Dordoleci”, “Donkishoti”, ose rolin e Lolos, një lolo tragjik-komik me nuanca tepër fine të interpretimit.
Të shumtë janë rolet në Estradë si : tek komedia e Vodvil “Mirelo”, Xhixh, “Pa martuar 50-vjeçar” apo të kujtojmë skeçet e paroditë. Tani është i angazhuar me një rol në komedinë “HARVEY”. Komedi e bukur, rol i bukur. Regjia është e Hervin Çulit. Më pas ka regjinë e një varjetee, a një tjetër ftesë në Teatrin Kombëtar, e pastaj një tjetër ftesë…Vaso tani nuk punon më si aktor profesionist pranë ndonjë institucioni.
Ai doli në asistencë si e gjithë trupa e Estradës së Tiranës. Shtëpinë e tij e kishte kthyer në lokal ku argëtonte të tjerët, por argëtohej edhe vetë. I shkonin vazhdimisht miq e shokë, kolegë. Edhe aty humorin nuk e linte, me barcaleta, ngjarje të vërteta e të sajuara. “Pjesë e profesionit”- thoshte./ KultPlus.com
Umberto Eco, i lindur më 5 janar 1932, ishte një shkrimtar, filozof, kritik letrar, semiolog dhe profesor universiteti italian. Njihet më së shumti për romanin e tij të 1980 Il nome della rosa, më pas shkruajti romane të tjera si Il pendolo di Foucault dhe L’isola del giorno prima. Romani i tij Il cimitero di Praga, botuar më 2010, kryesoi listën e librave më të shitur në Itali.
Umberto Eco, një shkollar në fushën e errët të semiotikës, që u bë autor i suksesshëm romanesh, mbi të gjitha me veprën “Emri i Trëndafilit”, vdiq në vitin 2016 në Itali. Ai ishte 84 vjeç. Si një semiotikan, Eko kërkoi të interpretonte kulturat përmes shenjave dhe simboleve të tyre ? fjalëve, ikonave fetare, banerave, veshjeve, notave muzikore dhe madje edhe filmave vizatimorë.
Ai ka publikuar mbi 20 libra mbi këto çështje ndërsa jepte mësim në Universitetin e Bolonjës, më i vjetri në Europë. Por në vend që të veçonte jetën e tij akademike nga krijimtaria e tij popullore, Eko përfshiu në shtatë romanet e tij shumë prej shqetësimeve të veta akademike. Në bashkimin e këtyre dy botëve, ai nuk ka qenë kurrë më i suksesshëm sesa tek “Emri i Trëndafilit”, romani i tij i parë, që u publikua në Europë në vitin 1980.
Suksesi qe i madh dhe ai shiti më tepër se 10 milionë kopje në rreth 30 gjuhë dhe pati edhe një adaptim kinematografik në Hollivood.
Libri tregon për ngjarjet që ndodhin në një manastir italian në shekullin 14, kur murgjit vriten nga besimtarë të tjerë duke risjellë bukur një qasje filozofike të Aristotelit, harruar kohë më parë.
Umberto Eco ishte një prozator, kritik, filozof, semiotikan dhe profesor italian me peshë të madhe në letërsinë dhe kulturën europiane. Ai lindi më 5 janar 1932 dhe u nda nga jeta më 19 shkurt 2016. /KultPlus.com
Muaji shkurt i takimeve kulturore “Pena e Dritës”, tradicionalisht i kushtohet prezantimit të botimeve të shtëpisë botuese “Drita”, të publikuara gjatë një viti.
Sivjet, prezantimi i botimeve të vitit 2024 do të mbahet të enjten, më 20 shkurt 2025, në orën 19:00, në bibliotekën “Ernest Koliqi”, që gjendet në Katedralen Shën Nënë Tereza në Prishtinë.
Do të prezantohen gjashtë libra nga pesë seritë e botimeve: zëri i kishës, letërsi, histori, humanitas dhe përshpirtëri.
Prezantimi do të shoqërohet edhe me disa pika muzikore në piano e kitarë.
Për këtë rast, për të gjithë dashamirët e librave, botimet që do të prezantohen dhe të gjitha të tjerat nga Sh. B. “Drita”, ofrohen me një çmim prej 50%.
Pas promovimit do të ketë një koktej në “Agora” të Qendrës “BogdaniPolis”./ KultPlus.com
Kryeministri i Republikë së Kosovës, Albin Kurti ka pranuar urime nga kryeministri i Shqipërisë, Edi Rama me rastin e 17-vjetorit të shpalljes së Pavarësisë së Kosovës.
“Përtej sfidave të shumta e sakrificave të mëdha, me mbështetjen e vazhdueshme dhe të pakursyer të aleatëve tanë të pazëvendësueshëm, Shteteve të Bashkuara të Amerikës dhe Bashkimit Evropian, Republika e Kosovës ka shënuar arritje të paimagjinueshme në ndërtimin e institucioneve demokratike dhe Shtetit të së Drejtës”, thuhet ndër të tjera në letër urimin e kryeministrit Rama.
Në urimin e tij drejtuar kryeministrit Kurti, e përmes tij të gjithë qytetarëve të Republikës së Kosovës, kryeministri Rama thekson vullnetin e tij dhe Republikës së Shqipërisë për bashkëpunim të gjithanshëm./ KultPlus.com
Nobelisti Andre Gide dëshiron të na dritësojë mendjen. Një punë e artit, e artit të bukur të botës të cilin nuk ka sy njeriu që nuk e çmon, për të qenë e përjetuar duhet të përmbajë këto pesë elemente.
Por, para se ti zbulojmë elementet, titani i letërsisë dhe fituesi i Nobelit për Letërsi, francezi Gide – i cili vdiq më 19 shkurt të vitit 1951, duhet lexuar në vazhdimësi për librat të cilat ia dha botës, dhe ia la në fund asaj.
“Të gjitha punët artistike janë të vështira. Ai që i sheh si të lehta, ka dështuar ta kuptojë esencën e veprës” tregon Gide.
Për pesë elementet që e përbëjnë një vepër të mahnitshme arti, ai thotë
– Rendi (logjika, dispozita e arsyeshme e pjesëve) – Bukuria (profile, linja) – Luksi (Pasuria e disiplinuar) – Qetësia (Qetësimi i trazirës emocionale) – Kënaqësia e shqisave, ndjenjave (sensualiteti, aktraktiviteti
Andre Gide i ka lënë të shkruara pasuritë e tij dhe këshillat e tij në “The Journals of Andre Gide”.
Gide e fitoi Nobelin në vitin 1947. Atë e influencuan Franz Kafka, Niçe, Dostojevski, Tagora e Stephane Mallarme. / KultPlus.com
Kanë kaluar dhjetë ditë nga zgjedhjet parlamentare të 9 shkurtit 2025, përderisa Komisioni Qendror i Zgjedhjeve (KQZ) nuk ka arritur t’i numëroj të gjitha votat për subjektet politike e as për kandidatët për deputetë.
Në ueb faqen e KQZ-së potencohet se deri më tani janë numëruar 99.72% të votave, pa i përfshirë votat me kusht, votat e personave me nevoja të veçanta dhe votat jashtë Kosovës, me ç’rast VV-ja ka fituar 40.84% të votave, PDK-ja 22.05%, LDK-ja 17.67% dhe AAK-ja 7.45%.
Vonimi i shpalljes së rezultateve zgjedhore nga Komisioni Qendror i Zgjedhjeve ka shkaktuar shqetësime të konsiderueshme në opinionin publik.
Problemet teknike gjatë procesit të numërimit të votave, përfshirë gabime në sistemet elektronike dhe vonesa në përpunimin e të dhënave, kanë shtuar dyshimet mbi transparencën dhe saktësinë e rezultatit përfundimtar.
Kjo ka krijuar një atmosferë pasigurie dhe ka ngritur pyetje për mundësinë e manipulimit të procesit zgjedhor, duke minuar besimin e qytetarëve në integritetin e zgjedhjeve.
Për ish-kreun e KQZ-së, qytetarët s’duhet të kenë vend për dyshime.
Ish-kryetari i Komisionit Qendror të Zgjedhjeve, Mazllum Baraliu, ka folurr reth vonesës se publikimit të rezultateve përfundimtare të zgjedhjeve të 9 shkurtit, duke sqaruar se kjo është shkaktuar nga probleme teknike.
Megjithatë, Baraliu ka paralajmëruar se nuk dihet ende se sa do të zgjasë ky proces.
Ai ka siguruar opinionin publik se procesi zgjedhor nuk do të preket dhe se integriteti i tij është i garantuar.
“Kjo vonesë ndodhi për shkak të probleme teknike dhe kanë filluar të rikuperohen. KQZ ka filluar të bëjë verifikimin e rezultateve të votave të subjekteve politike në teren dhe numërimin për kandidatët për deputet. Kjo vonesë nuk dihet sa do të zgjasë. Nuk do të jetë i prekur dhe cenuar procesi i integritetit të procesit zgjedhor”, shprehet Baraliu.
Për herë të parë, ka shtuar Baraliu se mbikëqyrja është 100% teknike, duke eliminuar çdo mundësi për dyshime.
“Nuk mund të ketë manipulime të votave kur kemi monitorime të pandërprerë nga kamerat se prania e vëzhguesve është aty. Për herë të parë është kjo mbikëqyrke 100% teknike, s’duhet të ketë dyshime nga askush”, deklaroi Baraliu per Frontonline.
Të martën, zëdhënësi i KQZ-së, Valmir Elezi, në një konferencë për media ka folur edhe për hetimet që po ndodhin nga Prokuroria rreth dyshimeve të ngritura për parregullsi në zgjedhje dhe për problemet që kanë ndodhur me faqen e KQZ-së në natën e 9 shkurtit.
Elezi ka thënë se adresa për pyetje rreth hetimeve është Prokuroria e Shtetit dhe vetëm ata mund të flasin për procesin e hetimit, ndërkohë që ka shtuar se KQZ është e gatshme të ofrojë të gjitha materialet e nevojshme që i nevojiten Prokurorisë për hetimin.
“Është prokuroria që mund t’iu japë përgjigje për natyrën e hetimeve që është duke i zhvilluar. Ne si KQZ ofrojmë të gjitha materialet e nevojshme për hetimin”, ka thënë Elezi./ KultPlus.com
Jean-Paul Sartre (1905-1980) ishte një nga figurat më të shquara të ekzistencializmit dhe një mendimtar me ndikim të thellë në filozofinë dhe letërsinë e shekullit XX. Ai zhvilloi një kornizë filozofike sipas së cilës qeniet njerëzore nuk lindin me një qëllim ose thelb të paracaktuar, por janë të detyruara ta krijojnë vetë kuptimin e ekzistencës së tyre përmes veprimeve dhe zgjedhjeve që bëjnë.
Idetë e Sartrit u formësuan ndjeshëm nga realitetet historike dhe shoqërore të kohës së tij, veçanërisht nga Lufta e Dytë Botërore dhe periudha pas saj. Përvoja e tij gjatë luftës, përfshirë kapjen nga nazistët dhe rezistencën intelektuale kundër fashizmit, e ndikoi thellësisht në konceptimin e lirisë, përgjegjësisë dhe rolit të vuajtjes në vetëpërkufizimin e njeriut. Në kryeveprën e tij filozofike, Qenia dhe asgjëja (1943), ai artikuloi parimin themelor të ekzistencializmit: “Ekzistenca i paraprin thelbit”, duke argumentuar se individët nuk lindin me vlera ose role të përcaktuara, por i krijojnë ato nëpërmjet ndërgjegjes dhe veprimit.
Filozofia e Sartrit theksoi lirinë radikale dhe barrën e përgjegjësisë që ajo sjell, një temë që gjeti jehonë të thellë në klimën intelektuale të Evropës së pasluftës, e cila përpiqej të rigjente kuptimin mes plagëve të fashizmit dhe tmerreve të Holokaustit. Pikëpamjet e tij ekzistencialiste ndikuan gjerësisht jo vetëm në filozofi, por edhe në letërsi, psikologji dhe lëvizjet politike, duke u bërë një pikë referimi për debatet mbi identitetin individual dhe angazhimin shoqëror.
Së bashku me mendimtarë si Simone de Beauvoir, Albert Camus dhe Martin Heidegger, Sartre luajti një rol kyç në formësimin e diskursit intelektual të shekullit XX. Besimi i tij se individi duhet të krijojë vetë thelbin e tij nëpërmjet veprimit dhe përballjes me realitetin frymëzoi breza të tërë për të sfiduar kufizimet e pritshmërive shoqërore dhe për të eksploruar thellësitë e ekzistencës njerëzore. Përmes veprave të tij filozofike dhe letrare, ai la një trashëgimi të pashlyeshme, duke ndikuar jo vetëm mendimin akademik, por edhe kulturën popullore dhe lëvizjet shoqërore./ KultPlus.com
Të hënën, do të promovohet monografia e këngëtarit Qamili i Vogël “Gjurmët e Qamilit të Vogël në Muzikë” nga autorët Krenar Doli dhe Bestar Vula, shkruan KultPlus.
Në ceremoninë promovuese për monografinë “Gjurmët e Qamilit të vogël në Muzikë” do të flasin Bekim Ramadani dhe Albin Sadiku. Ndërsa me performancë artistike do të paraqiten Jahja Shehu dhe grupi muzikor “Rilindja”.
Aktiviteti do të moderohet nga Ardiana Salihu Gashi.
Promovimi do të bëhet më më 24 shkurt, në ora 19:00, në Menzën Ramiz Sadiku./ KultPlus.com
Lideri i grupit muzikor Placebo, Brian Molko, është akuzuar për shpifje pasi kishte fyer kryeministren e Italisë Giorgia Meloni gjatë një koncerti.
Brian Molko nisi të ofendonte në italisht Melonin, e cila drejton partinë e ekstremit të djathtë “Vëllezërit e Italisë”, në skenë në festivalin Sonic Park në Torino, në korrik të vitit 2023.
Duke folur para rreth 5000 fansave, vokalisti i grupit të rock-ut alternativ e quajti kryeministren një “copë m***” dhe e përshkroi atë si “fashiste” dhe “raciste”.
Fjalët e tij nxitën brohoritje nga publiku.
Prokurorët në Torino hapën zyrtarisht një hetim ndaj Molkos për “përçmim të institucioneve” në gusht të 2023-shit.
Raportet në Itali thonë se Ministria e Drejtësisë tani po i lejon prokurorët të ecin përpara me procedurat ligjore.
Ai mund të gjobitet deri në 5,000 euro nëse shpallet fajtor.
Në kuadër të festimeve për 17-të vjetorin e Pavarësisë së Kosovës, Opera e Kosovës do të prezantojë një koncert artistik nën interpretimet e solistëve Liridon Sadriu (tenor) dhe Elona Sadiku (mexosoprano), të shoqëruar nga Albanian Brass Quintet nga Shqipëria dhe me pjesëmarrjen si mysafir të ansamblit vokal “Okteti Plus“.
Po ashtu, Opera e Kosovës do të bëjë edhe promovimin e librit “14 këngë popullore shqiptare” për kuintet tunxhi dhe zë, me autor dirigjentin dhe orkestruesin e mirënjohur nga Shqipëria Edmond Doko.
“Një kombinim i tillë i muzikës tradicionale me një qasje të re instrumentale dhe vokale, pritet të sjellë një përvojë artistike të veçantë për publikun”, thuhet në faqen zyrtare të Operës së Kosovës.
Ngjarja mbahet më 20 shkurt (e enjte) pranë Modelariumit të fakultetit të Arkitekturës në Prishtinë, duke filluar nga ora 19:00./ KultPlus.com
Presidentja e Republikës së Kosovës, Vjosa Osmani, ka pranuar një mesazh urimi nga Presidenti i Republikës së Panamasë, Jose Raul Mulino Quintero, me rastin e 17-vjetorit të Pavarësisë së Kosovës.
Në mesazhin e tij, Presidenti Mulino i ka përcjellë Presidentes Osmani urimet më të sinqerta për këtë ditë të rëndësishme për Republikën e Kosovës, duke shprehur vullnetin e qeverisë së Panamasë për të vazhduar forcimin e marrëdhënieve miqësore dhe të bashkëpunimit ndërmjet dy vendeve.
Presidenti i Panamasë ka theksuar rëndësinë e ruajtjes dhe zhvillimit të këtyre marrëdhënieve në të gjitha fushat me interes të ndërsjellë, duke shprehur dëshirën që ato të vazhdojnë të avancojnë në vitet e ardhshme.
Mbrëmë, Orkestra dhe Kori i Filharmonisë së Kosovës ka mbajtur Koncertin Festiv pothuajse premierë dedikuar 17-të vjetorit të Pavarësisë së Kosovës, me solistët Shkëlzen Baftiari dhe Flaka Goranci nën drejtimin e dirigjentit Baki Jashari, shkruan KultPlus.
Intonimi i Himnit të Republikës së Kosovës ishte pika e parë e cila u interpretua në ditëlindjen e 17-të të shtetësisë së Kosovës. Ngjajshëm me vitet e vendit ka vazhduar të rritet edhe vet institucioni i Filharmonisë, i cili edhe sot e kësaj dite vazhdon të performojë në salla të improvizuara.
Koncerti Qendror i Filharmonisë i mbajtur më 17-të shkurt 2008 është drejtuar po nga Dirigjenti Baki Jashari, i cili në atë kohë para vetes ka pasur pothuajse mbi gjysmën e instrumentistëve të huazuar nga Shqipëria dhe Maqedonia e Veriut. Ky përvjetor Filharmoninë e gjen të kompletuar në kapacitetin artistik. Mirëpo, mungesa e sallës dinjitoze është evidente edhe 17 vite pas Pavarësisë dhe 25 viteve të Lirisë.
Vepra “Suitë Ilire” e autorit Mark Kaçinari ishte vepra e parë e programit Festiv të Filharmonisë, e cila dërgonte memorien në histori dhe ngjarje të paraardhësve. Njëtrajtshmëria e tingujve e përshkonte veprën që herë pas here prekte në mallëngjim. Me radhë në interpretim vijnë frymorët dhe harkorët që i shtojnë vlerë një epoke të historisë.
Pjesa e radhës interpretative ishte “Fantazi për piano dhe orkestër” e autorit Blond Krasniqi. Tingujt e pianos që emetoheshin nga pianisti Shkëlzen Baftiari ishin kryefjala e veprës. Notat e fuqishme që shkonin duke u shuar deri në tinguj shumë të qetë të pianos, e karakterizonin veprën premierë, përderisa kombinimi i instrumentëve në interpretim krijonte harmoninë dhe kulminacionin e veprës.
“Poema Simfonike MIZER- Reçak” e autorit Liburn Jupolli që poashtu u soll premierë është pjesë e një cikli më të madh veprash simfonike të dedikuara viktimave të masakrave në Kosovë në vitet 1998 dhe 1999. Vepra erdh si homazh i të gjitha viktimave që janë vrarë më 16 janar 1999, në fshatin Reçak. Shqiptimi i emrave të të vrarëve dy herë në fillim të veprës e gdhendte në kujtesë identitetin e tyre.
Pjesa e parë e veprës “Rrethimi në mëngjes” paraqiste fillimin e ngjarjes tragjike. Pjesa “Granatimet dhe bastisjet” jepnin ciklin e sulmeve në mënyrë të përsëritur, derisa goditja e tupanit jepte kulminaconin e dramacitetit të ngjarjes makabre. “Ekzekutimi i Banushit”, “Shkatërrimi i fshatit dhe shtëpia e Sadi Osmanit”, “Kolona Tragjike”, “Masakra te gropa e Bebushit” dhe “Të mbijetuarit” ishin pjesët tjera interpretuese. Te pjesa “Masakra te gropa e Bebushit” që shënonte momentet më të dhimbshme të kësaj ngjarjeje kori në nderim thërret një nga një përsëri emrat e të rënëve, që rrënqethnin pashmangshëm.
Vepra e Korab Shaqirit “I miri i motrës” u dha nën interpretimin e mexosopranos Flaka Goranci. Veshja e solistes në të zeza, e kombinuar me përgatitjen profesionale që në sfond përcillej nga Orkestra dhe Kori i Filharmonisë paraqisnin një ngjarje tragjike në një dasmë shqiptare. Vepra përbëhej nga pjesët Intro, Ninulla, Pastorale, Dasma, Lufta, Drama, Balada dhe Elegjia.
Vepra “Dies Irae nga “Rekuiem” nga Guiseppe Verdi qe një vepër që po ashtu nderonte viktimat. Kurse vepra emblematike “Mallëngjimi” nga autori Valton Beqiri erdh në fund si një pjesë për ta përmbyllur programin në mënyrë festive të oranizuar për nder të 17-të vjetorit të Pavarësisë.
Pas koncertit, kompozitori Liburn Jupolli në një prononcim për KultPlus ka thënë se vepra “MIZER- REÇAK” është një projekt i vazhdueshëm, i cili ka më shumë se tre vjet që është duke u zhvillluar.
“Vazhdimisht po studioj dokumentacionin e disponueshëm lidhur me këto ngjarje makabre. Bazuar në këto dokumentacione, po përpiqem të krijoj vepra simfonike që janë të denja dhe shërbejnë si homazh për të gjitha viktimat. Kjo pjesë është dedikuar viktimave të masakrës së Reçakut dhe trajton ditën specifike kur ndodhi masakra, duke përfshirë edhe ngjarjet pas saj, si vizita e William Walker-it dhe raportimi ndërkombëtar për masakrën”, ka thënë kompozitori Jupolli.
Tutje, kompozitori Jupolli tha se është shumë e rëndësishme që të edukojmë veten me të gjitha informacionet që lidhen me historinë e republikës, e cila ka kaluar nëpër sakrifica të mëdha për të qenë aty ku gjendet sot.
“Është e rëndësishme që ta kujtojmë këtë jo vetëm si Kosovë, por edhe si Evropë dhe si botë. Po ashtu, është e rëndësishme që të kemi përfaqësime të historive tona të përbashkëta si njerëz. Dhe që të mbajmë një kujtesë emocionale në respekt të njerëzve që kanë rënë viktima të këtyre ngjarjeve makabre. Prandaj, emrat e tyre në këtë vepër shërbejnë edhe si një nivel tjetër i përkujtimit të ekzistencës së tyre, pasi ata nuk janë thjesht numra, por njerëz me emra, jetë, histori, marrëdhënie, familje dhe mendime që janë krejtësisht njerëzore dhe nuk duhet të harrohen kurrë si të tilla”, ka thënë Jupolli.
Kurse, solisti Shkëlzen Baftiari interpretimin në koncertin qendror për 17-të vjetorin e Republikës së Kosovës e ka cilësuar si nder të madh.
“Është nder për mua dhe për secilin instrumentist të interpretojë në Koncertin Festiv të organizuar për 17- të vjetorin e Pavarësisë së Kosovës. Unë jam nga Maqedonia, ne jemi rritur me mendje dhe zemër drejtuar nga Kosova. Kujtoj ditën kur është shpallur Pavarësisa e Kosovës, kemi festuar tërë natën. Tash, pas 17 vitesh unë jam pjesë e koncertit të Filharmonisë pikërisht në përvjetorin e 17-të Pavarësisë së Kosovës. Është kënaqësi dhe nder i madh”, ka thënë solisti Baftiari, duke shprehur kënaqësinë e tij që ka interpretuar një vepër të një kompozitori të talentuar.
Ndërkaq, dirigjenti Baki Jashari ka thënë se ndihet i lumtur që koncerti me sens tradicional që çdo përvjetor organizohet nga Filharmonia e Kosovës ka përfunduar me sukses.
“Veçantia e këtij përvjetori është përmbajtja programore shumë specifike, me vepra ekskluzivisht premierë të kompozitorëve shqiptarë duke filluar nga Mark Kaçniari me një “Suitë Ilire”, një vepër që është shkruar më herët por që asnjëherë nuk është interpretuar. Vazhduam me veprën e kompozitorit Blond Krasniqi, më pas edhe me veprën e Liburn Jupllit që ishin vepra krejtësisht me një fizionomi të veçantë. Vepra “Mizer Reçak” është një vepër me përmbajtje tragjike ku përshkruhet tmerri dhe masakra e Reçakut, ku gjatë interpretimit dëgjohen emrat e viktimave të cilët nuk do të harrohen kurrë edhe pse ne jemi në ditën që festojmë. Është e paimagjinueshme të mos kujtohen të gjithë martirët e lirisë, andaj edhe në këtë program muzikor e gjetën vendin”.
Dirigjenti Baki Jashari ka kujtuar edhe ditën e shpalljes së Pavarësisë, ku edhe e ka drejtuar koncertin e Filharmonisë.
“Kur e kujtoj 17 shkurtin e vitit 2008, mbrëmjen kur ne e kemi mbajtur koncertin inaugurues, kujtoj që në skenë gjysma e orkestrës ka qenë nga Shqipëria. Ndërsa sonte, 17 vite më vonë praktikisht kemi pasur si musafir dy apo tre për dallim nga ajo kohë. Natyrisht, nuk është edhe kohë e shkurtër por megjithatë kuadri i profesionistëve të Filharmonisë nuk krijohet lehtë, andaj ne jemi pothuajse të kompletuar”, ka thënë Dirigjenti Jashari duke e potenduar edhe mungesën e sallës adekuate.
“Minusi i tërë kësaj është objekti, infrastruktura, salla koncertale. Ne vazhdojmë edhe pas 17-të vitesh të koncertojmë në Sallën e Kuqe, që krahas respektit historik që e ka kjo sallë për zhvillimet e shumta që kanë ndodhur, megjithatë nuk është sallë koncertale dhe nuk i përmbush kushtet për gjithë orkestrën dhe korin interpretativ. Ishte dashur të kemi një sallë dinjitoze për shkak të akustikës por edhe për akomodimin e publikut të shumtë” ka thënë ai.
Tutje, Drejtori i Filharmonisë, Dardan Selimaj ka thënë se si institucion kanë hyrë në fazën që koncertet që janë pjesë e festave të rëndësishme, janë njëkohësisht edhe pjesë e kalendarit të rregullt të Filharmonisë.
“Mua më vjen mirë për këtë. Filharmonia në agjendën e saj e ka koncertin që i dedikohet Pavarësisë, ajo është edhe pjesë e agjendës shtetërore, por koncerti funksionon si ngjarje e veçuar në raport me pjesën protokolare. Kjo na ofron mundësi që artistikisht të jemi më të lirë në kuptimin që të programojmë vepra që janë edhe premierale dhe janë të shkruara posaqërisht për raste të tilla, që e pasurojnë edhe literaturën e muzikës klasike tek ne, e në të njëjtën kohë edhe muzikën e angazhuar që i dedikohet tregimit të popullit të Kosovës edhe përmes tingujve, jo vetëm ndoshta një ekspozite apo librave që mund të shkruhen ose të këngëve të cilat janë shumë popullore”, ka thënë Selimaj.
Ai gjithashtu ka thënë se veprat vendore të muzikës klasike përbëjnë një repertor që përfaqëson denjësisht Filharmoninë kur ajo të prezantohet jashtë Kosovës, ku bashkë me kapacitetet artistike bart me vete edhe një copë të historisë së vendit./ KultPlus.com
Presidenti i Finlandës, Alexander Stubb, e ka uruar presidenten e vendit, Vjosa Osmani, në 17-vjetorin e Pavarësisë së Kosovës.
Në mesazhin e tij, presidenti finlandez i ka përcjellë Osmanit urime për popullin e Kosovës, duke dëshiruar prosperitet dhe mirëqenie.
“Gjithashtu, Presidenti i Finlandës ka shprehur pritshmëritë e tij për forcimin e mëtejshëm të marrëdhënieve dypalëshe në mes dy shteteve dhe ka theksuar rëndësinë e bashkëpunimit në çështjet aktuale të politikës së jashtme”, thuhet në njoftimin e presidencës, transmeton Klankosova.tv.
E para e shtetit gjatë ditës së djeshme ku Kosova festoi 17-vjetorin e Pavarësisë ka pranuar një sërë urimesh nga liderë botërorë.
Me rastin e Ditës së Pavarësisë së Republikës së Kosovës, Presidentja Vjosa Osmani ka pranuar një mesazh urimi nga Presidenti i Estonisë, Alar Karis.
Në mesazhin e tij, Presidenti Karis ka potencuar marrëdhëniet e shkëlqyera që ekzistojnë sot midis dy shteteve dhe ka shprehur dëshirën për ta forcuar më tej miqësinë në vitet e ardhshme, veçanërisht në fushat e digjitalizimit dhe qeverisjes elektronike.
Ai ka ritheksuar mbështetjen e vazhdueshme të Estonisë për zgjerimin e Bashkimit Evropian dhe integrimin e Kosovës në organizatat ndërkombëtare, duke konfirmuar gatishmërinë për të ndarë përvojën e Estonisë në procesin e integrimit në BE dhe reformat përkatëse.
Duke iu referuar takimit të fundit me Presidenten Osmani në Konferencën e Sigurisë në Mynih, Presidenti Karis ka shprehur shpresën se diskutimi ka dhënë një shtysë të re për bashkëpunimin e ardhshëm dhe se iniciativat e diskutuara do të hapin rrugën për një bashkëpunim domethënës në fusha kyçe me interes të përbashkët.
Shkodra Elektronike ka realizuar videoklipin e këngës “Zjerm” me të cilën do përfaqësojnë Shqipërinë në Eurovizion më 13 maj në Bazel.
Ka qenë vetë dyshja e këngëtarëve Beatriçe Gjergji dhe Kolë Laca të cilët kanë njoftuar në rrjetin social Instagram përfundimin e xhirimeve të videoklipit të “Zjerm”.
Por Beatriçja dhe Kola ende nuk kanë dhënë detaje mbi datën e lëshimit të videoklipit të këngës së tyre e cila fitoi zemrat e publikut dhe votat e jurisë në Fest 63.
Më herët, Beatriçja dhe Kola kanë bërë me dije në emisionin “Miqtë e Pasdites” në RTSH se performanca dhe veshja skenike në Eurosong, do të jetë e njëjtë me atë të Fest 63.
Po ashtu, dyshja e këngëtarëve kanë ndarë me publikun edhe disa detaje mbi vendet të cilat do të “njohin nga afër” këngën “Zjerm” para performimit në Eurovizion.
Shkodra Elektronike ka bërë me dije se më 3 mars do të performojnë në Berlin, më pas në Selanik më 14 mars, duke vijuar me Marseille të Francës më 20 mars, më tej në Oslo më 22 mars, duke vijuar me Amsterdamin më 5 prill, me Manchesterin më 12 prill, më pas me Londrën më 13 prill dhe duke e mbyllur me Madridin më 19 prill.
“Shkodra Elektronike” do të përfaqësojë Shqipërinë në Eurosong të martën e 13 majit.
Shqipëria do të performojë në natën e parë gjysmëfinale të Eurovision 2025 që do të zhvillohet në Bazel të Zvicrës.
Shqipëria, pas hedhjes së shortit, është përcaktuar që të konkurrojë të martën e 13 majit, në gjysmën e dytë të natës së parë.
Shqipëria do të përfaqësohet nga “Shkodra Elektronike” me këngën “Zjarr”, me të cilën triumfuan në Festivalin e Këngës.
Përzgjedhja e radhës së interpretimit u bë në mënyrë rastësore përmes shortit. Nga pesë vazo të përgatitura nga EBU-ja për 31 shtetet pjesëmarrëse në gjysmëfinale, Shqipëria u listua në vazon e tretë.
Franca, Gjermania, Italia, Spanja dhe Mbretëria e Bashkuar, të konsideruara si vendet “e mëdha”, janë kualifikuar automatikisht pa u dashur të garojnë në gjysmëfinale. Po ashtu edhe Zvicra, si fituese e edicionit të kaluar të Eurovision, nuk garon në gjysmëfinale.
Finalja madhe e Eurovizion 2025 do të zhvillohet më 17 maj./rtsh/ KultPlus.com
