Koleksioni bardh e zi i disenjatores Jetmira Bejtullahu, një frymëzim nga ikonat e modës

Jeta Zymberi

Në një kohë ku moda duket sikur është në një garë të pandërprerë për të eksperimentuar me ngjyra të ndryshme dhe stile të kundërta, disenjatorja Jetmira Bejtullahu ka arritur të marr vëmendje duke na sjellë një thesar të vërtetë të elegancës, ku janë të lidhura në harmoni të plotë klasikja dhe modernja, shkruan KultPlus.

Klasikja është një vlerë e përhershme që pavarësisht ndryshimeve nuk e humbet aktualitetin dhe po të hysh këto ditë në profilin e disenjatores Bejtullahu, ti mund të takosh Charlotte, Naomi, Jennifer, Dianan, Elizabeth, Mollyn, Sophian, Marilyn apo Pamelan.

Janë fustanet e Jetmirës që bartin emrat e këtyre ikonave të artit e modës duke na shpalosur disa kreacione të cilat janë një interpretim i estetikës së pastër dhe të thjeshtë por që eleganca e tyre arrin të marr vëmendjen e secilit nga ne përkundër faktit që përbërja e tyre është me vetëm dy ngjyra, bardh e zi.

Jetmira Bejtullahu ka treguar për KultPlus se synimi kryesor ishte që të krijoj një koleksion që është i sofistikuar dhe i përshtatshëm për ngjarjet e rëndësishme.

“Ky koleksion është i ndërtuar në mënyrë të tillë që të përcjell një mesazh. Klasikja dhe modernja mund të jetojnë në harmoni të plotë kur bëhet zgjedhja e duhur. Përdorimi i ngjyrave bardh e zi është zgjedhje që simbolizon elegancën”, thotë Jetmira e cila tutje tregon se emrat e fustaneve janë inspiruar nga ikonat e modës duke dashur të nderojë vlerat e tyre.

“Për përzgjedhjen e emrave për fustane jam ndikuar thellësisht nga ikonat e modës dhe artit. Emrat e fustaneve reflektojnë stilin, linjat dhe elemente të dizajnit që lidhen me kontributin e tyre në botën e modës. Ky proces ndihmon të ndërtohet një identitet unik për secilin fustan dhe të komunikojë me përdoruesit (klientët) potencialë”, thotë Bejtullahu.

Klasikja ka një vend të rëndësishëm në koleksionin e Jetmirës, duke ofruar një alternativë të përhershme në botën e modës, duke reflektuar ngjyrat bardh e zi në mënyrë të përsosur.

Kur krijon modele të tilla, padyshim se në mendje gjithmonë ke një person të cilit dëshiron të ja shohësh të veshur atë kreacion dhe kjo padyshim është një ndjenjë e këndshme për të cilën flet edhe Jetmira.

“Është një ndjenjë e bukur kur shoh dikë që ka zgjedhur të veshë një nga krijimet tona. Është një nder për ne të kontribuojmë në shkëlqimin e tyre.”

Për gratë që duan të duken elegante me një fustan nga koleksioni i saj, Jetmira jep disa këshilla të thjeshta.

“Zgjidhni një model që i përshtatet formës së trupit tuaj dhe kombinojeni me aksesorë të thjeshtë për të arritur një pamje të sofistikuar.”

Për të ardhmen, Jetmira Bejtullahu ka plane që të sjell koleksione të tjera të ngjashme dhe të eksperimentojë me stile të reja të modës, duke ruajtur gjithmonë elemente të klasikes dhe elegancës në krijimet e saj.

Përmes këtij koleksioni i cili tashmë është i gatshëm për ju, disenjatorja Jetmira Bejtullahu ka nderuar ikonat e artit duke na rikujtuar se eleganca klasike është gjithmonë në stil. / KultPlus.com

Stina e vjeshtës inspirim për koleksionin e ri të disenjatores Jetmira Bejtullahu (FOTO)

Jeta Zymberi

Si një dizajnere e re në treg, Jetmira Bejtullahu mundohet që çdo sezon të sjellë trende të reja për ata që e donë dhe e çmojnë punën e saj sa të veçantë aq edhe praktike, shkruan KultPlus.

Në këto ditë vjeshte, Bejtullahu ka vendosur të sjellë për publikun një koleksion që është linjë e veshjeve ready to wear.

“Në këtë koleksion shihet shumë mirë stili ku kam kombinuar urbanen me solemnen, kjo është edhe një veçanti që besoj më veçon nga tjerët”, ka treguar disenjatorja Bejtullahu për KultPlus.

“Feuillemort” quhet koleksioni i cili prezanton veshje për sezonin vjeshtë – dimër me gjithsej 14 veshje duke filluar prej fundave të shkurtër deri tek bunda. Ndërsa ngjyrat e përdorura janë ngjyrat që janë trendi këtë sezon si: portokalli, mustard, bezh etj.

“Ky është koleksioni i pestë që krijoj dhe këtë herë emrin e kam vendos në fund, pasi janë përfunduar të gjitha veshjet e pash çka i shkonte më shumë. E kam quajtur “Feuillemort” që do të thotë ngjyra e gjetheve të vyshkura, dhe siç shihet kjo ngjyrë dominon në këtë koleksion. Për këtë koleksion jam inspiruar nga vet stina e vjeshtës dhe trendet e fundit”, ka thënë tutje Bejtullahu.

Gjithashtu disenjatorja ka treguar edhe për materialet e përdorura për këtë koleksion e që sipas saj janë trendët e fundit.

“Materialet që kam përdorur për këtë koleksion janë: somoti antilop, plish, pelqie etj”, ka pohuar ajo.

Fotografitë e këtij koleksioni janë realizuar nga fotografi Korab Kusari, ndërsa veshjet janë prezantuar nga modelet Fjolla Këndusi dhe Laura Geci.

Bejtullahu tashmë ka filluar punën për koleksionin e radhës. “Kam filluar t’i skicoj fustanet për koleksionin e rradhës haute couture dhe besoj që shumë shpejt do të filloj linjën e re me fustane të bardh të nusërisë”, ka thënë krejt për fund Bejtullahu. / KultPlus.com