Qendra Kosovare për Rehabilitimin e të Mbijetuarve të Torturës (QKRMT), përmes rrjeteve sociale ka njoftuar se Kongresi Amerikan ka paraqitur Rezolutën 26 – një zë i fuqishëm kundër krimeve të dhunës seksuale në Kosovë.

“Një betejë e gjatë, e dhimbshme dhe e heshtur që më në fund po merr vëmendjen që meriton.  Mirënjohje për Vasfije Krasniqi Goodman – simbol i guximit – dhe Vera Mjeku për përkushtimin dhe zërin e palodhur në këtë rrugëtim drejt së vërtetës. Kjo rezolutë sjell shpresë për çdo të mbijetuar që ka pritur drejtësi për vite me radhë. Shyrete Tahiri Ramadan Nishori”, thuhet në njoftimin e qendrës.

Një ndër të mbijetuarat e dhunës seksuale në Kosovë, Vasfije Krasniqi – Goodman është shprehur se ky është një hap i rëndësishëm në luftën tonë për drejtësi.

“Anëtarë të Kongresit Amerikan Demokrat dhe Republikanë kryesuar nga Kongresistët Julie Johnson, Keith Self, Ritchie Torres, Jim McGovern, Marc Veasey, Alexandra Ocasio-Cortez, George Latimer, Mike Lawler, dhe Ilhan Omar paraqitën në Kongresin Amerikan Rezolutën 26 që bën thirrje për drejtësi dhe që t’i jepet fund pandëshkueshmërisë së krimeve të dhunës seksuale nga forcat serbe gjatë luftës së vitit 1999 në Kosovë në rastin tim dhe gjithë të mbijetuarve të tjerë”, shkruan ajo.

Tutje, Krasniqi – Goodman është shprehur falënderuese ndaj Vera Mjekut, bashkëhartuese e rezolutës dhe promotore e përpjekjeve tona për mbështetje në Kongresin Amerikan dhe gjithë atyre që na kanë përkrahur dhe vazhdojnë të na përkrahin që rezoluta të paraqitet në Komisionin e Punëve të Jashtme dhe gjithë Kongresin./KultPlus.com

Nga zgjedhjet e fundit presidenciale në ShBA duket se një numër rekord grash do të shërbejnë në Kongresin amerikan dhe po ashtu një numër rekord grash Republikane do të shërbejnë në Dhomën e Përfaqësuesëve.

Mediat e huaja bëjnë me dije se me garën zgjedhore ende të papërfunduar, të paktën 141 gra do të shërbejnë në Kongres vitin e ardhshëm, duke thyer rekordin prej 127 grash të vendosur në 2019, sipas të dhënave nga Qendra për Gratë Amerikane dhe Politikën në Universitetin Rutgers.

Këto shifra përfshijnë të paktën 116 gra në Dhomën e Përfaqësuesëve, duke thyer rekordin 102 të vendosur gjithashtu në vitin 2019, dhe 25 në Senat, megjithëse ky numër mund të tkurret me ngjitjen e Senatores së Kalifornisë, Kamala Harris në postin e zv.presidentes.

Do të ketë të paktën gjashtë gra me ngjyrë në Kongres, katër demokrate dhe dy republikane, përfshirë Cori Bush, e cila do të jetë kongresmenja e parë me ngjyrë e Misurit./ KultPlus.com