Piktura të reja mahnitëse gjenden në qytetin e lashtë të Pompeit

Vepra mahnitëse të artit janë zbuluar në një gërmim të ri në qytetin romak, Pompei. Arkeologët thonë se afresket janë ndër më të bukurat që gjenden në rrënojat e vendit antik. Figura mitike greke si Helena e Trojës përshkruhet në muret e larta të zeza të një salle të madhe banketesh.

Dyshemeja e mozaikut pothuajse e kompletuar e dhomës përfshin më shumë se një milion pllaka të bardha. E ashtuquajtura “dhoma e zezë” është shfaqur vetëm në javët e fundit. Dyshemeja e saj me mozaik të bardhë është pothuajse e përfunduar.

Një e treta e qytetit të humbur ende duhet të pastrohet nga mbeturinat vullkanike. Gërmimi aktual, më i madhi në një brez, po nënvizon pozicionin e Pompeit si dritarja kryesore në botë për njerëzit dhe kulturën e perandorisë romake.

 Dr Alessandro Russo ka qenë një ndër arkeologët që kanë punuar për këtë zbulim. Ai ka treguar për BBC News afresk tavani të nxjerrë nga një dhomë. Të copëtuara gjatë shpërthimit, pjesët e tij të gjetura janë hedhur në një tavolinë të madhe. Aty mund të shihen peizazhe me karaktere egjiptiane, ushqime dhe lule, dhe disa maska ​​teatrale imponuese.

“Ky është zbulimi im i preferuar në këtë gërmim, sepse është kompleks dhe i rrallë. Është me cilësi të lartë për një individ me status të lartë,” shpjegoi Russo.

Furra e burgut të Pompeit e zbuluar gjatë gërmimeve të fundit hapet për publikun

Zona e Regio IX, një nga nëntë lagjet, u bë e qasshme për publikun këtë javë.

Vendet e reja të gërmuara në zonën Regio IX të parkut arkeologjik të Pompeit u hapën për publikun në fillim të kësaj jave, duke zbuluar gjetje të reja, duke përfshirë një furrë buke ku burgoseshin njerëzit e skllavëruar, shkruan ANP.

Sipërfaqja 3200 metra katrorë Regio IX është një nga nëntë lagjet që përbëjnë sitin e qytetit antik, duke zënë një “bllok të tërë” të metropolit, thuhet në një deklaratë nga zyrtarët e Pompeit.

Pompei u përfshi nga hiri vullkanik në vitin 79 pas Krishtit, i cili derdhej nga mali Vezuv.

Në një deklaratë në internet thotë se “burgu-furrë buke” mbante punëtorë të skllavëruar, të cilët duhej të bluanin drithin e nevojshëm për të bërë bukë, duke shtuar se ka “gërvishtje në dyshemenë e furrës për të koordinuar lëvizjen e kafshëve, të detyruar të ecin rrotull për orë të tëra, me sy të lidhur”.

Gërmimet në Regio IX, përgjatë Via di Nola, filluan në 1888, por shpejt u ndalën, vetëm pjesërisht rifilluan një shekull më vonë.

Gjetje të tjera të reja në lagje përfshijnë një dhomë lavanderi të vendosur në hollin e një apartamenti, me banakë pune dhe vaska për larjen dhe lyerjen e rrobave./KlanKosova/KultPlus.com

Monedha e artë romake e gjetur në Pompei shitet për 22 mijë e 400 dollarë në ankand

Një monedhë romake ari që feston pushtimin e Britanisë nga Perandori Claudius – një monedhë e zbuluar për herë të parë në vitin 1895 në hirin e Pompeit – është shitur në ankand për gati 22 mijë e 400 dollarë.

Ekspertët thanë se nuk ishin të befasuar që monedha, e lidhur me dy nga ngjarjet më dramatike të botës së lashtë, arriti një çmim kaq fantastik në ankand, vuri në dukje i njëjti burim.

Monedha e vogël, e cila ka parë një interes të madh nga koleksionistët dhe muzetë në të gjithë Evropën, shihet si edhe më e vlefshme tani që gjuetia e thesarit është e ndaluar në zonat e mbrojtura nga UNESCO përreth Pompeit, tha SWNS.

Antikuarët e gjetën për herë të parë monedhën në vitin 1895 nën tumat e hirit vullkanik brenda vilës romake të shkatërruar dhe ruajtur nga shpërthimi i Vezuvit në vitin 79 pas Krishtit.

Shpërthimi i Vezuvit në vitin 79 pas Krishtit vrau mbi 16,000 banorë të qytetit dhe rrethinave të tij përreth, duke përfshirë qytetin e vogël Herculaneum dhe qytete dhe fshatra të tjerë në rajon në bregun e Amalfit.

Monedha u zbulua së bashku me trupin e një shërbëtori në dhomën e shtypjes së verës të Villa della Pisanella në periferi të qytetit Boscoréale, vuri në dukje SWNS.

Temperaturat vullkanike të shpërthimit e tonifikuan monedhën me një nuancë dalluese të kuqërremtë.

Kjo monedhë e veçantë u varros mjaft thellë nën hi, saqë shkëlqimi i saj i artë u ruajt.

Sidoqoftë, kjo monedhë e veçantë u varros mjaft thellë nën hi, saqë shkëlqimi i saj i artë u ruajt, tha SWNS.

Monedha vlerësohet të ketë qenë me vlerë ekuivalente me pagën e barabartë me gjashtë deri në tetë javë për një ushtar mesatar romak, tha SWNS./klankosova/KultPlus.com

Arkeologët zbulojnë karrocën e lashtë ceremoniale pranë Pompeit

Arkeologët kanë zbuluar një karrocë ceremoniale të antikitetit Romak, pak jashtë Pompeit.

Karroca me katër rrota e ruajtur pothuajse në mënyrë të përsosur e bërë prej hekuri, bronzi dhe kallaji u gjet pranë stallave të një vile antike në Civita Giuliana, rreth 700 metra në veri të mureve të Pompeit antik, shkruan Reuters.

Drejtori në largim i stilit arkeologjik Pompei, Massimo Osanna, tha se karroca është unike sepse është e para e këtij lloji sepse në të kaluarën ishin gjetur vetëm automjete të përdoruara për transport dhe punë.

Edhe Ministra e Kulturës e Italisë e quajti këtë zbulim unik, dhe të pa precedent.

“Pompei vazhdon të na mahnisë me zbulimet e saj dhe do ta bëjë këtë për shumë vite, me 20 hektarë akoma për t’u gërmuar,” tha ministri i kulturës Dario Franceschini.

Pompei i cili gjendet 23 km në juglindje të Napolit, ishte shtëpia e rreth 13 mijë njerëzve kur u shkatërrua nga një shpërthim vullkanik dhe deri më tani nga 66 hektarë sa ka ky qytet dy të tretat janë zbuluar.

Pompei është një nga atraksionet më të njohura të Italisë dhe një Trashëgimi Botërore e UNESCO-s./ KultPlus.com

Zbulim i jashtëzakonshëm: Si ishte një Fast Food në Pompein e famshëm dhe tragjik?

Dy rosa të varura nga këmbët, një gjel, një qen në  zinxhir, ndërkohë që të gjithë dukeshin si të pikturuar në 3D.

Premisat pothuajse të paprekura të një termopoliumi, një ”fast food” në rrugë, me pjata të të gjitha llojeve, nga kërmijtë deri te një lloj “pajela”, dalin në dritë në Pompei.

(Në botën antike greko-romake, një termopolium, fjalë për fjalë do të thotë “një vend ku shitet nxehtësia”, pra një dyqan ku ishte e mundur të blije ushqim të shpejtë – shën.  përkth.).

”Ky është një zbulim që na jep një pamje të pabesueshme të ditës së shpërthimit të Vezuvit dhe hap studime të reja mbi jetën dhe mënyrën e ngrënies së banorëve të Pompeit”, thotë drejtori i sitit arkeologjik, Massimo Osanna.

“Vizitorët do ta shohin për Pashkë”, shtoi ai.

Ndërkohë, ministri i Kulturës, Dario Franceschini përshëndeti zbulimin duke e quajtur atë “një shembull të virtytshëm për rimëkëmbjen e vendit”./ atsh/ KultPlus.com