Ministria e Kulturës, Rinisë dhe Sportit ka njoftur se zëvendësministrja Osmani ka pritur në takim ekipin e muaythait të Kosovës, kryetarin e Federatës së Muaythait të Kosovës, pas suksesit të arritur në Kampionatin Evropian të muaythait të organizuar në Prishtinë.

Ky kampionat, një nga më të rëndësishmit e këtij lloji, ka mbledhur në Kosovë sportistë nga 32 shtete, duke shënuar një moment historik për sportin dhe organizimet ndërkombëtare në vend.

Ekipi fitoi shtatë medalje, prej tyre dy të arta, tri të argjendta dhe dy të bronzta. Të artat i fituan: Lindon Demiri (U-23) dhe u shpall ylli i së ardhmes, Lorik Mehmeti (U-16), të argjendtat: Dior Guda, Erdonit Alija (juniorë), Agnesa Veseli (U-23). Me të bronztën u stolisën, Altina Topalli (U-23) dhe Orges Maliqi (junior).

Gjatë takimit, Osmani i ka përgëzuar medalistët për performancën e tyre të shkëlqyer, duke theksuar se suksesi i tyre është shembull frymëzues për të rinjtë tjerë dhe një promovim i imazhit pozitiv të Kosovës në arenën ndërkombëtare./ KultPlus.com

Ambasadori amerikan në Prishtinë, Jeff Hovenier, ka bërë të ditur se kanë festuar Ditën e Falënderimeve bashkë me ushtarët amerikanë që shërbejnë në Kosovë të shoqëruar edhe nga presidentja e Kosovës, Vjosa Osmani.

Hovenier ka thënë se është thellësisht falënderues për ushtarët amerikanë që shërbejnë në Kosovë larg familjeve të tyre dhe që kontribuojnë për një Kosovë të qetë dhe të sigurt.

“Jam mirënjohës që këtë vit e festuam Ditën e Falënderimeve me pjesëtarët e shërbimit amerikan në Kosovë dhe i nderuar që më janë bashkuar Presidentja Vjosa Osmani dhe miqtë tanë kosovarë. Thellësisht falënderues për ushtarët tanë që shërbejnë larg familjeve të tyre, të cilët çdo ditë po kontribuojnë për një Kosovë të qetë dhe të sigurt. Duke ju uruar të gjithëve një festë të lumtur të Falënderimeve!”, ka shkruar Hovenier./ KultPlus.com

Australia miratoi sot ndalimin e medieve sociale për fëmijët nën 16 vjeç – pas një debati të fortë – duke u bërë një pikë referimi në mbarë botën me një nga rregulloret më të ashpra që synon kompanitë e mëdha të teknologjisë, sipas “Reuters”.

Ligji detyron gjigantët e teknologjisë Instagram, Facebook, X, Tiktok që të ndalojnë të miturit të futen në këto platforma ose në të kundërt do të përballen me gjoba deri në 32 milionë dollarë.

Një provë për mënyrën sesi ligji do të zbatohet do të nisë në janar dhe urdhërndalimi do të hyjë në fuqi pas një viti.

Shteti do të krijoje një databazë të dhënash biometrike dhe të dhënash shtetërore ndërsa llogaritë aktive tashmë duhet të mbyllen.

Projektligji i ri e vendos Australinë si rast unik por edhe një test global – në krye të atyre shteteve ku qeveritë kanë bërë ligje ose planifikojnë të ligjërojnë kufizim të moshës në mediet sociale – mes shqetësimeve për ndikimin e tyre në shëndetin mendor të të rinjve.

Vende përfshirë Francën dhe disa shtete të SHBA-së kanë miratuar ligje për të kufizuar aksesin e të miturve pa lejen e prindërve – por ndalimi australian është absolut.

Një ndalim i plotë i të rinjve nën 14 vjeç në Florida po kundërshtohet në gjykatë me argumentin se cënohet fjala e lirë.

Miratimi i ligjit në Australi shënon një fitore politike për kryeministrin e qendrës së majtë Anthony Albanese – i cili kandidon në zgjedhjet e 2025 mes sondazheve negative për të.

“Ligji u kundërshtua nga mbrojtësit e privatësisë dhe disa grupe të të drejtave të fëmijëve – por 77% e popullsisë e dëshironte atë”, sipas sondazheve të fundit./ KultPlus.com

Ministri i Ekonomisë, Kulturës dhe Inovacionit, Blendi Gonxhja tha sot se një projekt unik është finalizuar në kuadër të 80-vjetorit të Çlirimit të Shqipërisë.

Gonxhja shprehet në një postim në rrjetet sociale: “Vinili filloi të rrotullohej pa ndërprerje nën gjilpërën e vjetër të gramafonit dhe sakaq muzika e çetave partizane filloi… Në kuadër të 80-vjetorit të Çlirimit të Shqipërisë, Ministria e Ekonomisë, Kulturës dhe Inovacionit sjell këtë projekt unik: “Tingujt që Sollën Lirinë” një përmbledhje të muzikës ikonike të filmave shqiptarë mbi luftën nacional-çlirimtare, interpretuar me mjeshtëri nga Kori dhe Orkestra e Teatrit Kombëtar të Operës dhe Baletit, e regjistruar në vinil”.

Ministri thekson se ky projekt është një dhuratë për të ruajtur historinë dhe për ta përcjellë brez pas brezi, me melodi që na kujtojnë heroizmin dhe shpirtin e papërkulur të një populli.

Përmbledhja muzikore e filmave shqiptarë ikonikë erdhën përmes duarve të arta të pianistes Etrita Ibrahimi, zërave të fuqishëm të sopranos Renisa Laçka, tenorit Gerald Murrja dhe Biorn Hoxha, orkestrës dhe korit të TKOBAP-së, nën drejtimin e maestro Dritan Lumshi.

Kori i Zërave të Bardhë, drejtuar nga Sonila Baboçi, i dha koncertit një emocion të veçantë, duke e bërë këtë mbrëmje një homazh të denjë për historinë tonë kombëtare./ KultPlus.com

Shqipëria përkujton sot 80-vjetorin e Çlirimit të vendit.

Gjatë Luftës së Dytë Botërore ushtria nacionalçlirimtare e Shqipërisë zhvilloi luftë të armatosur, të organizuar kundër okupimit të vendit nga pushtuesit nazifashistë.

Prej 7 prillit të vitit 1939 e deri më 29 nëntor të vitit 1944, Shqipëria ishte e pushtuar nga Italia fashiste dhe pas kapitullimit të saj, në vjeshtë të vitit 1943, Shqipëria u pushtua nga forcat gjermane.

Pas Çlirimit të Tiranës më 17 Nëntor 1944, komanda e përgjithshme e Ushtrisë Nacionalçlirimtare në Tiranë, do të njoftonte zyrtarisht dhe çlirimin e Shkodrës më 29 nëntor 1944. Kjo datë, u sanksionua e u skalit edhe si data e Çlirimit të Shqipërisë.

Në këtë mënyrë do të mbyllej njëherë e gjithmonë lufta epike nacionalçlirimtare e popullit shqiptar.

Disa nga rëndësitë thelbësore të kësaj lufte, ishin largimi i pushtuesve italianë dhe gjermanë, shkëputja e Shqipërisë nga blloku nazifashist dhe ripohimi i integritetit territorial të vendit, i cili prej kohësh ishte parë si objekt copëtimi nga Fuqitë e Mëdha dhe vendet fqinje.

Një ndër veçantitë e çlirimit është se Shqipëria ishte vendi i parë në Ballkan i çliruar me forcat e veta dhe pa ndihmën e Ushtrisë së Kuqe apo të forcave të koalicionit antifashist.

Gjithashtu, kjo luftë ishte lufta më gjithëpërfshirëse në historinë e popullit shqiptar, si për sa i përket numrit të njerëzve që morën pjesë dhe e mbështetën atë, edhe për sa i përket gjithëpërfshirjes territoriale të Shqipërisë.

Nga jugu në veri, thuajse të gjitha krahinat, qytetet dhe fshatrat e Shqipërisë u mobilizuan duke dhënë mbështetjen e tyre në luftën kundër fuqive pushtuese.

Në këtë mënyrë Shqipëria u bë pjesë e koalicionit fitues antifashist. Si vend anëtar i NATO-s, ajo i ruan dhe i çon përpara vlerat e lirisë e demokracisë edhe sot, duke u radhitur përkrah vendeve demokratike e paqedashëse, e duke dhënë kontributin e saj për ruajtjen e paqes në botë./ KultPlus.com

 Shqiptarët festojnë sot 29 Nëntorin, 80-vjetorin e Çlirimit të vendit nga pushtuesit nazifashistë.

Këshilli i Ministrave e shpalli këtë vit si Vit Jubilar Mbarëkombëtar për të shërbyer për përkujtimin e përfundimit të betejës së shqiptarëve për çlirimin nga pushtimi nazifashist, si një përkujtesë e detyrës qytetare të çdo shtetasi shqiptar për të mbrojtur atdheun kur ai është në rrezik.

Në këtë kuadër, të gjitha institucionet shtetërore e përçuan këtë mesazh, përmes logos së miratuar, në çdo shkresë zyrtare, e cila do të vazhdojë të përdoret deri në fund të vitit 2024.

Si çdo vit, në përkujtim të kësaj dite, pritet që autoritetet më të larta shteterore të kryejnë homazhe në Varrezat e Kombit, ndërkohë që janë në program një sërë aktivitetesh në nder të dëshmorëve të Luftës Antifashiste Nacionalçlirimtare dhe sakrificës sublime të tyre.

Institucione të ndryshme të kulturës kanë njoftuar për program të larmishëm, si një mundësi e shkëlqyer për të festuar kulturën, historinë dhe traditat shqiptare me aktivitete që përfshijnë art, muzikë, valle, ekspozita dhe shumë më tepër./ KultPlus.com