Data 27.12.1946 është një ditë e madhe për komunistët e Shqipërisë. Këtë ditë, me vendimet numër 388 dhe 389, Kuvendi Popullor, ratifikoi dy marrëveshje me Jugosllavinë “mike e motër”:

Marrëveshjes mbi bashkëpunimin ekonomik në mes të Republikës Popullore të Shqipërisë dhe të Republikës Federative Popullore Jugosllavisë, bërë në Beograd më 1.7.1946 dhe Traktatin mbi koordinimin e planeve ekonomike, bashkimin doganor dhe barazimin e monedhave, midis Republikës Popullore të Shqipërisë dhe Republikës Federative Popullore të Jugosllavisë”. nënshkruar në Beograd më 27.11.1946. Votimeve “historike” historike i parapriu një plenum i jashtëzakonshëm i Komitetit Qendror të Partisë Komuniste, më 18-20 dhjetor 1946. Po kujtojmë një pjesë të vogël nga fjala e Enver Hoxhës, i cili nuk tutej nga asgjë para marrëdhënieve me Jugosllavinë. Ndërsa kërkohej që shqiptarët e Kosovës të ulnin kokën e vëllazëroheshin me jugosllavët, vetë Hoxha i cilëson miq ata.

Pjesë nga fjala e Enver Hoxhës në plenumin e jashtëzakonshëm të 18-20 dhjetor 1946:

Me nënshkrimin e këtij akordi, tregoi se vendi ynë hyn në një fazë të re historike. Kjo për partinë tonë nuk është gjë e papritur. Këtë partia jonë e dinte. Për këtë udhëheqja e partia duhet të jenë të qartë për këtë akord si nga ana politike dhe ekonomike për ta zbatuar mirë këtë akord. Nëse konsiston ky akord? Të gjithë neve e dimë se me vajtjen tonë në Beograd u nënshkrua akord i një ndihme materiale si rrjedhim i kësaj do të kishte si rrjedhim edhe marrëdhënie ekonomike konsekuencë logjike e vijës së partisë sonë..Në lidhje me këtë, është edhe një çështje tjetër se unë mendoj se disa anëtarë partie që duan të na filozofojnë se mos thotë populli se ç’bëhet me Kosovën. Në rast se një anëtar partie e ka të qartë vijën, ai e ka të qartë edhe çështjen e Kosovës. Jugosllavia është më e avancuar se ne, interesi jonë është që ajo që jetë e fortë. A është në interesin tonë të kërkojmë Kosovën? Kjo nuk është progresive. Pra në këtë situatën, përkundrazi duhet të bëjmë ç’është e munduar të kosovarët të vëllazërohen në Jugosllavi. Tash vjen çështja këtu kur ne të kemi arrirë në socializëm, do të thotë se atje dhe këtu mbeturinat e kapitalizmit kanë ngrënë dru. Ahere në një situatë të tillë Kosova dhe të bashkohet me Republikën Socialiste të Shqipërisë. Kjo është vija, këtë na mëson marksizmi. Ne do ta shpjegojmë. Kush nuk e kupton ne kemi për detyrë ta luftojmë. Kur ne bëjmë një akord, hapim doganat, është një hap drejt socializmit e marrëdhënieve të Kosovës me popullin shqiptar. Populli i Kosovës i ka të gjitha liritë, ai ka marrë tokën, kanë shkolla, jemi miq më të mirë, forca e argumenteve tona është më e madhe. /KultPlus.com

Më shumë se 100 mijë objekte duke përfshirë thesare nga varri i mbretit Egjiptian,Tutankhamun, do të ekspozohen në një muze që ka hapur dyert për qytetarët në Kajro.

Më shumë se 20 vjet në përgatitje, Muzeu i Madh Egjiptian prej 120 hektarësh pranë piramidave të Gizës, do të shfaqë më shumë se 100,000 objekte, duke përfshirë thesare nga varri i mbretit Tutankhamun.

Koleksioni i paçmuar i djalit-mbret ende nuk është shfaqur, por vizitorët tani mund të shohin objekte që ndryshojnë nga statujat faraonike deri te sarkofagët dhe trupat e mumifikuar.

Muzeu fillimisht ishte planifikuar të hapej në vitin 2012, por kostoja, trazirat politike dhe më vonë, pandemia Covid-19, shkaktuan vonesa të përsëritura. Deri më sot, mega-projekti ka kushtuar më shumë se 1 miliard dollarë (768 milion £).

Hapja e pjesshme është një provë, pas hapjes së vitit të kaluar të sallës kryesore dhe shkallëve. Data zyrtare e hapjes ende nuk është shpallur./oranews/ KultPlus.com

Nga Ag Apolloni

Vitin e kaluar e pata kritikuar Ministrinë e Kulturës se përfaqësimi i Kosovës në Panairin e Frankfurtit ishte i tmerrshëm, si një “shpajz” i panairit. Tash hapësirën e paskan rregulluar, por si na kanë përfaqësuar?

Në stendën e Kosovës, nuk duket asnjë shkrimtar rezident kosovar, ndërsa duken dy këngëtare (Rita Ora dhe Dua Lipa) dhe një sportiste (Majlinda Kelmendi). A po ndahen çmimet Grammy, a mos kanë nisë lojërat olimpike në Frankfurt? Është panair i librit, o njerëz!

Si mundet ministri ta financojë një shoqatë të tillë humoristësh? Kjo shoqatë (zyrtarisht e njohur si Shoqata e Botuesve të Kosovës), e drejtuar nga familja Zeneli, asnjëherë askund s’e ka përfaqësuar Kosovën si duhet. Nga ata pak botues që paskan marrë pjesë sivjet, tre janë të asaj familje (Buzuku, Pema dhe Skanderbeg Books).

Ka disa vjet që kam kërkuar nga Ministria e Kulturës që të themelohet Qendra e Librit, që do të zgjidhte shumë punë (si mënjanimi i oligarkëve, heqja e monopolit mbi librin, si dhe do të bënte organizime të takimeve letrare, panele diskutimi mbi letërsinë, promovime etj.) dhe do të na përfaqësonte si duhet nëpër panaire, por ministri i ka futë veshët në lesh. Tash ec e mos qesh!/ KultPlus.com

Autostrada Biennale ka njoftuar se në vitin e festimit të 10-vjetorit të saj, është bërë anëtare e Shoqatës Ndërkombëtare të Bienaleve (IBA), një rrjet global që promovon zhvillimin e artit bashkëkohor.

Ky njoftim vjen pas pjesëmarrjes së Drejtorëve Bashkë-themelues të Autostrada Biennale Leutrim
Fishekqiu, Vatra Abrashi dhe Barış Karamuço, në Asamblenë e 11-të të Përgjithshme të IBA, e
cila u mbajt në Lyon, Francë. IBA ofron një platformë zhvillimore për kuratorë, artistë dhe institucione që organizojnë bienale në të gjithë botën, duke nxitur bashkëpunimin dhe shkëmbimin
e njohurive në kultura dhe kontekste të ndryshme.

Si një bienale ndërkombëtare e artit bashkëkohor që zhvillohet çdo dy vjet, Autostrada Biennale
është krenare t’i bashkohet këtij rrjeti global dhe të vazhdojë të ndihmojë në ndërtimin e trashëgimisë duke promovuar kreativitetin dhe gjithpërfshirjen. Përveç ekspozitave tona çdo dy
vite dy, ne e kemi krijuar Autostrada Hangar, Qendrën për Art Bashkëkohor. Kjo hapësirë unike
është e hapur për publikun dhe ofron ekspozita, hapësirë për prodhimin e veprave të artit dhe
rezidenca për artistët. Autostrada Hangar do të bashkëpunojë me bienale anëtare të IBA në të
gjithë botën, duke ofruar programe të përbashkëta që do të forcojnë lidhjet tona ndërkombëtare
dhe do të nxisin shkëmbimet artistike në nivel global.

Në këtë rast, bashkëthemeluesit e Autostrada Biennale, Leutrim Fishekqiu, Vatra Abrashi dhe
Barış Karamuço, shprehen: “Të bëhesh pjesë e Shoqatës Ndërkombëtare të Bienaleve është një
moment historik për Autostrada Biennale, veçanërisht në 10-vjetorin tonë. Kjo thekson angazhimin tonë për të nxitur zhvillimin e artit bashkëkohor që i kapërcen kufijtë, duke bashkuar artistët, kuratorët dhe k munitetet e ndryshme. Ne mezi presim të kontribuojmë dhe të mësojmënga ky rrjet aktiv dhe global, duke forcuar zërin e artit në adresimin e ndryshimeve sociale dhe kulturore.”

Gjithashtu, dëshirojmë ta falënderojmë sinqerisht ekipin e IBA-s dhe ekipin e Lyon Biennale për
mikpritjen dhe mbështetjen e tyre të ngrohtë gjatë Asamblesë së Përgjithshme.

Ky anëtarësim shënon një kapitull të ri për Autostrada Biennale, ndërsa vazhdojmë të krijojmë një
platformë për artin bashkëkohor që rezonon si në nivel lokal ashtu edhe ndërkombëtar./ KultPlus.com

Botimi shkollor “Edukatë muzikorë 3” i shtëpisë botuese “Dukagjini” i autorëve Drita Rudi, Rafet Rudi dhe Donika Rudi ka triumfuar në garën ‘‘Grupi i Botuesve Evropianë për Arsim – EEPG, duke fituar çmimin BELMA – PËR MATERIALET MË TË MIRA MËSIMORE EVROPIANE’’.

Kjo është hera e parë që një shtëpi botuese shqiptare e fiton këtë çmim, andaj përfaqësuesja e shtëpisë botuese “Dukagjini”, Erza Mati është shprehur tejet e lumtur për këtë vlerësim.

“Për ne është një kënaqësi e jashtëzakonshme dhe vlerësim i punës sonë, të cilën e bëjmë me përkushtim të madh, në bashkëpunim me profesionistët më të mirë të fushës. Por, mbi të gjitha, vlerësimi i botimit tonë në mesin e teksteve nga e gjithë Evropa, konsiderojmë që përbën një vlerësim të veçantë për vendin tonë, Republikën e Kosovës”, thotë Mati.

EEPG, garën për çmimin BELMA – PËR MATERIALET MË TË MIRA MËSIMORE EVROPIANE e organizon që nga viti 2009, së bashku me Panairin e Librit në Frankfurt dhe Shoqatën Ndërkombëtare për Hulumtime për Tekstet Shkollore dhe Mediet Arsimore. Të gjitha materialet vlerësohen nga një juri profesionale me ekspertë të lartë të teksteve shkollore, si dhe çmimet ndahen në katër kategori nga arsimi fillor deri tek ai i mesëm i lartë.

Me plot 30 vjet përvojë në botime, shtëpia botuese “Dukagjini” është ndër shtëpitë më të mëdha botuese shqiptare që është gjendur afër lexuesit me botime të ndryshme dhe tekste shkollore, duke krijuar një reputacion të padiskutueshëm për cilësi dhe përkushtim ndaj arsimit për të ardhmen e fëmijëve tanë, sot dhe atyre të nesërm./ KultPlus.com

Kryeministri i Republikës së Kosovës, Albin Kurti, mori pjesë në hapjen e Panairit Ndërkombëtar AGROKOS, panairit me traditë 24- vjeçare, i cili jo vetëm që lidh bizneset dhe produktet me konsumatorët, por krijon një urë të fortë midis teorisë dhe praktikës për studentët dhe të rinjtë.

Kryeministri tha se si Qeveri, në bashkëpunim me partnerë të ndryshëm që e mbështesin zhvillimin e bujqësisë, përpunimin e ushqimit dhe prodhimin e pijeve, Kosova po bëhet gjithnjë e më shumë tërheqëse për investitorët, njoftojnë nga zyra e kryeministrit.

Sipas tij, investimet nga projektet strategjike të Qeverisë, të kombinuara me faktorë të tjerë mbështetës, po na drejtojnë te një e ardhme premtuese.

Si faktorë mbështetës, kreu i qeverisë veçoi stabilitetin institucional të vendit, rritjen mesatare ekonomike prej 6.2% mesatarisht në tri vjetët e fundit, afërsia me tregjet e Evropës Perëndimore, zhvillimi i projekteve infrastrukturore në sektorët e transportit, përparimi i sektorëve si bujqësia, përpunimi i ushqimit dhe teknologjia informative, rinia e madhe, e talentuar dhe shumëgjuhëshe, si dhe energjinë e lirë elektrike e mungesën e taksave doganore për lëndë të parë dhe makineri prodhuese.

E rëndësishmja e këtij panairi, sipas Kurtit, medoemos që ishte edhe roli i agrobiznesit në zhvillimin profesional të studentëve dhe të rinjve.

“Kur arsimi dhe biznesi bashkëpunojnë, ndodhin mrekulli: studentët përfitojnë aftësi praktike të vlefshme, ndërkaq bizneset fitojnë ide të freskëta dhe burime të reja pune. Sot, agrobiznesi nuk është më thjesht një fushë tradicionale; inovacioni, digjitalizimi dhe inteligjenca artificiale po ndryshojnë rrënjësisht mënyrën se si përparon bujqësia”, deklaroi ai.

Edhe përfshirja e grave në agrobiznes, është një aspekt tjetër i rëndësishëm, tha kryeministri Kurti, sepse gratë tona janë ndërmarrëse të shkëlqyera dhe përmes bizneseve të tyre të vogla, jo vetëm që fuqizojnë ekonominë lokale, por krijojnë zhvillim të qëndrueshëm në zonat rurale.

Në fund, kryeministri ftoi të gjithë që të shfrytëzojnë këtë panair për të krijuar lidhje të reja për të ndarë ide dhe për të hulumtuar mundësitë për bashkëveprim të mëtejshëm. Ai cilësoi panairin AGROKOS si shembull i mirë se si biznesi, arsimi dhe inovacioni mund të bashkëpunojnë për të ndërtuar një të ardhme të ndritur për Kosovën.