Polonia fillon zbatimin e vendimit për ndalimin pothuajse total të abortit

Një vendim për ndalimin pothuajse total të abortit në Poloni ka hyrë në fuqi dhe ka filluar zbatimin nga 3 shkurti. Ky vendim gjykate kishte nxitur protesta të mëdha në tetor të vitit të kaluar. Aborti tani lejohet vetëm në rastet e përdhunimit dhe incestit ose kur shtatzënia kërcënon jetën e nënës.

Në kundërshtim të këtij vendimi në qytetet polake përsëri u zhvilluan protesta javën e kaluar. Vendimi shkaktoi zemërim tek mbështetësit e të drejtës për abort, por qeveria konservatore e Polonisë, e cila ka lidhje të forta me kishën e fuqishme katolike të vendit, po mbështet vendimin.

Gjykata arsyetoi vendimin e saj me faktin se “një fetus është një qenie njerëzore” dhe për këtë arsye meriton mbrojtje sipas kushtetutës së Polonisë e cila siguron të drejtën për jetë.

Në anën tjetër grupet që mbështesin vendimin për ndalim thonë se bëhet fjalë për të drejtat e fëmijëve. “Ne jemi shumë të lumtur që ky gjykim është publikuar. Është një hap i madh drejt realizimit të të drejtave të njeriut për të gjitha qeniet njerëzore,” i tha BBC-së Karolina Pawlowska nga qendra e së drejtës ndërkombëtare Ordo Iuris.

“Unë dua që ne të kemi të drejtat tona themelore, të drejtën për të vendosur në lidhje me trupat tanë, të drejtën për të vendosur se çfarë duam të bëjmë, nëse duam të lindim fëmijë dhe në cilat rrethana dëshirojmë të kemi fëmijë,” u tha një protestuese, Gabriela Stepniak, agjencisë së lajmeve Reuters.

Kryetari i Bashkisë së Varshavës – Rafał Trzaskowski postoi kundërshtimin e tij ndaj vendimit në platformën Twitter, duke u bërë thirrje grave të refuzojnë vendimin.

Edhe para këtij vendimi Polonia veçse kishte disa nga ligjet më kufizuese të abortit në Evropë. /qika/ KultPlus.com

“Çikat që s’u lindën kurrë”, paneli që shpalosi shqetësimin mbi abortet në Kosovë

Bujar Meholli

Sot shënohet Dita Ndërkombëtare e fëmijës vajzë dhe në ambientet e Bibliotekës Kombëtare në Prishtinë është mbajtur paneli “Çikat që s’u lindën kurrë”, i organizuar nga Qendra për Art dhe Komunitet — Art Polis, shkruan KultPlus.

Panelistë të kësaj ngjarjeje ishin: Donjeta Morina, hulumtuese, Adelina Berisha nga Rrjeti i Grave, Blerim Syla, Kryetar i Federatës së Sindikatave të Shëndetësisë së Kosovës, Besa Ismaili, profesoreshë në FSI, si dhe Leonida Molliqaj, hulumtuese.

Para audiencës u shpalos raporti i Ilirjana Banjskës i cili analizon abortet e nxitura në Kosovë nga viti 1999 deri më tani, të cilin e paraqiti Donjeta Morina nga KIPRED.

Për këtë raport, Morina foli gjatë para se të hapej mundësia e diskutimit. Ajo ndër të tjera theksoi se në Kosovë mungon një institucion i besueshëm mbi abortet. Morina e prezantoi raportin në fjalë, duke shprehë shqetësimin për rritjen e aborteve në vendin tonë.

“Vlerësimi brenda këtij hulumtimi ka qenë se ka pasur më shumë aborte në zonat rurale, kjo ka bërë që gratë në zonat rurale janë më të stigmatizuara sesa gratë në zonat urbane, por kjo s’do të thotë që nuk janë të stigmatizuara edhe gratë nga zonat urbane”, potencoi ajo.  

“Çdo femër mund të vendos lirshëm mbi ndërprerjen e shtatzënisë sipas kritereve të përcaktuara me ligj. Mjeket kanë të drejtë të refuzojnë abortin që kryhet në të institucion por duhet ta gjej një zgjidhje brenda atij institucioni”, tha Morina.”

Morina prezantoi hulumtimin tutje, duke shpalosur statistika nga vitet e kaluara me numrin e aborteve të kryera.

Morina theksoi se nuk ka numra të saktë të aborteve të kryera, pasi gjysma e tyre kryhen në klinika private, kurse sipas statistikave të QKUK-së thonë se janë kryer 1007 aborte, mosha e tyre ka qenë prej 20-35.

Kurse hulumtuesja Leonida Molliqaj nga ana tjetër shprehi shqetësimet e saj për këtë dukuri. “Në përgjithësi shëndeti riprodhues i grave në Kosovë, nuk e ka marrë fokusin e duhur as nga Ministria e Shëndetësisë dhe as nga shteti”, konstatoi ajo.

Kurse Adelina Berisha, aktiviste për çështje të të drejtave të grave (RrGK), kërkoi të bëhet inspektimi i klinikave private, aty ku kryhet pjesa më e madhe e aborteve.

“Aborti është i lejueshëm deri në javën e 10 të shtatzënisë. Fatkeqësia më e madhe është se ka numër të vogël të aborteve pasi abortet kryhen në mënyrë ilegale. Me të vërtetë diçka është duke u rrezikuar. Të ketë inspektim më të madh të klinikave private”, tha ajo.

Ndërsa, Blerim Syla – Kryetari i Federatës së Sindikatave të Shëndetësisë dhe Gjinekolog, u shpreh se edukata seksuale duhet të jetë pjesë në të gjitha shkollat e vendit, dhe se nxënësit duhet të vetëdijesohen për abortet apo edhe për sëmundjet e transmetueshme.

Ky panel është bërë me qëllim të vetëdijesimit të masës, veçanërisht për gratë e moshës madhore, pasiqë ato duhet të jenë të lira të marrin vendime mbi veprimet e tyre, sidomos kur ky veprim ka të bëjë me abortin.

Po ashtu kërkohet që të ketë më shumë biseda rreth kësaj çështjeje edhe në diskursin publik sepse ajo vazhdon ende të jetë temë tabu në vendin tonë. Organizimi është mbështetur nga Agjencia Austriake për Zhvillim. / KultPlus.com

Vrasja e vajzave! Nënat e reja detyrohen të abortojnë, pasi fëmija duhet të jetë djalë

Djalë apo vajzë? Shqiptarët vazhdojnë edhe sot e kësaj dite të jenë në kërkim të djalit. Djali do të thotë fitore, vajza humbje.

TopChanel ka bërë një hulumtim rreth kësaj teme, ku përveç nënave që janë përballur me këtë rast, rrëfehen edhe doktorët.

Rastet e nënave, që detyrohen të abortojnë vetëm e vetëm se është vajzë, janë të shumta, megjithëse kjo gjë ndalohet me ligj.

“E kam djalë, është shtylla e shtëpisë”, thotë një nënë në maternitet, e cila sapo ka lindur.

“Aborti u bë kur vajza ishte katër muajshe. Ishte ultimatum. Nuk kisha mundësi të kthehesha në shtëpi pa e kryer atë punë”, rrëfen një tjetër grua.

Një studim i fundit në vend tregon të dhëna të frikshme për abortin selektiv.

“Që nga viti 1990 e deri më sot, në Shqipëri janë 33 mijë vajza të munguara”, thotë Eglantina Bardhi, nga “Together For Life”.

“Nëse investohet për shkollimin e saj, kjo konsiderohet një para e humbur”, tregon një tjetër nënë rreth mendimeve që kanë për vajzat në Shqipëri.

Një tjetër grua rrëfen se pas dy vajzave kur ngeli shtatzënë dhe u konstatua që po pret prapë vajzë, u detyrua nga bashkëshorti të bëjë abort, pasi nuk ju duheshin vajzat por duhej një djalë si shtyllë shtëpie dhe të marrë mbiemrin e familjes. Ajo rrëfen se u detyrua të bëjë një raport të rremë mjekësor për të arritur të abortojë vajzën.

“Ne mbajmë vendin e parë në Europë”, pranon fatkeqësisht mjekja Rubena Moisiu, ish-drejtoreshë materniteti. /KultPlus.com