Elon Musk shprehet se po krijon një rival të Gmail të quajtur ‘XMail’

Sipërmarrësi i teknologjisë ka zbuluar se një produkt i quajtur ‘XMail’ po ‘vjen’.

Elon Musk tashmë ka lëshuar versionin e tij të ChatGPT.

Tani duket se sipërmarrësi i teknologjisë do të përballet me Gmail-in e Google duke krijuar një shërbim emaili të tijin.

Në një shkëmbim në platformën e tij të mediave sociale X, Musk ka zbuluar se një produkt i quajtur ‘XMail’ po ‘vjen’.

Ai nuk ka ofruar më shumë detaje rreth shërbimit, kështu që është e paqartë se kur mund të jetë i disponueshëm, megjithëse pritet të integrohet brenda aplikacionit X. / KultPlus.com

Elon Musk dhe Inteligjenca Artificiale

Kur njerëzit më të pasur në botë ishin faraonët e Egjiptit të lashtë, sulltani mesjetar Mansa Musa perandori i Malit, Cornelius Vanderbilt dhe John Jacob Astor e John D. Rockefeller, ishte e pamundur të kishte konfuzion, sepse asnjëri prej tyre nuk u kundërvihej atyre që ne sot i quajmë “fuqi të mëdha”, asnjëri prej tyre nuk i sfidoi rivalët e vet të biznesit në një luftë në Koloseum, dhe mbi të gjitha asnjëri prej tyre nuk do të ishte propozuar si një figurë referimi për populizmin që urren elitat. Me pak fjalë, dikur miliarderët ishin elita, dhe pikë.

Kohë më të thjeshta, me të pasurit, të lumtur që thjesht janë të pasur. Ndoshta sepse teknologjia ka ndryshuar parametrat e pasurisë, ndoshta sepse me përjashtim të mundshëm të perandorit të Malit, askush në historinë njerëzore nuk ka qenë më i pasur se të pasurit e shekullit njëzet e një, ose ndoshta sepse thjesht herët a vonë ka ndodhur që njeriu më i pasur nga të gjithë të bëhej edhe më populisti.

Elon Musk, amerikan i natyralizuar por me origjinë nga Afrika e Jugut, 52 vjeç, me vlerë 222 miliardë dollarë në dhjetor 2023 (Bloomberg Billionaires Index), ishte bërë i famshëm falë x.com, që më vonë u bë PayPal, faqja e shërbimeve financiare e blerë nga eBay në vitin 2002, për një shumë afër një miliardë e gjysmë dollarë.

Musk, 21 vjet më parë, i befasoi vëzhguesit e Ëall Street-it, sepse ai thjesht kishte riinvestuar të gjitha paratë e mbledhura nga eBay – rreth 100 milionë dollarë – në bizneset e tij të tjera, në vend që të blinte shtëpi, jahte, makina të mëdha si kolegët e tij të “ekonomisë së re” digjitale të asaj kohe.

Musku i asaj kohe ishte shumë i ndryshëm nga ai aktuali: më shumë “nerd” se sa mburravec, i veshur (jo shumë mirë) “casual” dhe larg pamjes “gjithçka e zezë” e viteve të fundit.

Paratë e arkëtuara nga eBay kishin përfunduar në projekte më ambicioze: SpaceX për eksplorimin hapësinor, Tesla për të ndryshuar botën e automobilëve duke përmbysur motorrin e vjetër me karburant, pas dy shekujsh shërbim, kompania Boring për të gërrmuar tunele me anë të të cilëve të çlironte trafikun, Neuralink për të vendosur në tru mikroçipe, me të cilët të mund të shërojë mundësisht një seri të tmerrshme sëmundjesh, nga Alzheimeri tek paraliza, OpenAI për të ndryshuar botën me inteligjencën artificiale. Dhe në kohën e lirë, merrej me robotët e Optimus, me të cilët dëshiron të revoclucionarizojë përgjithmonë mënyrën e të punuarit dhe (druhet shumëkush), atë të të bërit luftë.

Lëshonte raketa në hapësirë ​​edhe në emër të NASA-s, furnizues i të cilës ishte bërë. Ai lidhi internetin nëpërmjet satelitëve me Starlink-un e tij, vërtitej me Teslën e tij, duke hapur fabrika në mbarë botën dhe duke thyer një rekord pas tjetrit.

Në vazhdën e famës së tij globale, ai bëri të famshme edhe nënën, Maye, një modele shtatëdhjetëvjeçare dhe zëdhënëse e Moncler.

Por atëherë ndodhi jo tamam rënia – ai bëhet gjithnjë e më i pasur dhe më i fokusuar në media – por metamorfoza. Ose, siç mendojnë të tjerët, më e thjeshta: shfaqja e karakterit të vërtetë të novatorit miliarder.

Walter Isaacson, në biografinë e Musk, shkruan: «Në kohën kur po mblidhja materiale për biografinë e Steve Jobs, ma shpjegoi partneri i tij Steve Wozniak, se cila ishte pyetja kryesore për t’i bërë: a ishte vërtet e nevojshme që ai të ishte kaq i keq, kaq i vrazhdë dhe mizor, kaq i varur nga situatat dramatike? Kur, pasi mblodha materialin, u ktheva tek Woz për t’i bërë përsëri pyetjen, ai u përgjigj se nëse do të kishte qenë në krye të Apple, do të kishte qenë më i mirë. Ai do t’i kishte trajtuar të gjithë si një familje e madhe dhe nuk do t’i kishte pushuar njerëzit nga puna. Më pas, ndaloi dhe shtoi: “Por nëse do të kisha drejtuar Apple, ne nuk do të kishim prodhuar kurrë Macintoshin.” Dhe kështu pyetja, në rastin e Musk, është: nëse ai do të kishte pasur një karakter më të qetë, a do të kishte qenë sërish njeriu që do të na kishte projektuar drejt Marsit dhe një të ardhmeje me makina elektrike?

Bëhet fjalë, në psikologji, për një shembull klasik të arsyetimit: domethënë, përpjekja për të maskuar motivet e vërteta (shiko fabulën e Dhelprës dhe rrushit). Fillimisht Jobs dhe më pas Musk, ishin/janë njerëz me karakter të pamundur? Eshtë çmimi i gjenialitetit të tyre.

Po a është vërtet kështu?

Tipari i spikatur i klubit të shkëlqyer dhe të populluar të tifozëve të Elon Musk është se vërejnë cilësitë e tij – që janë të pamohueshme. Të gjitha të tjerat? Fillimi i jetës së re të Musk, i cili nga “njeriu më i pasur” u bë edhe më i famshmi, është për shkak të blerjes së Tëitter, më 27 tetor 2022, për 44 miliardë dollarë. Lëvizje brilante? Gabim në vlerësim? Sigurisht, 14 muaj më vonë, Tëitter (të cilin e riemëroi X humbet para, Musk është bërë idhulli i republikanëve amerikanë që janë kundër sistemit, fshikullues i George Sorosit, kritik i ashpër i të majtës progresiste, i aktivistëve Lgbt, i shoqatës hebraike amerikane me më shumë ndikim, të cilën e akuzon se e ka armiqësuar me reklamuesit më të mëdhenj të Tëitter/X.

Sepse Musk-ut, i cili një herë e një kohë lëvdohej se nuk bënte reklama në kompanitë e tij, dhe që nuk kishte përdorur asnjëherë për Teslan një zyrë shtypi, për shkak se për marrëdhëniet publike kujdesej vetë nëpërmjet mediave sociale dhe intervistave të posaçme, tani e gjen veten duke drejtuar një biznes, i cili mbështetej mbi publicitetin.

Për nga temperamenti dhe ndoshta edhe nga të qenit pak arrogant, Musk nuk është i zoti në të ardhurat nga reklamat. Madje bëri goxha bujë ajo “fuck ju” që u tha në një konferencë ish-reklamuesve të mëdhenj – si Disney – të cilët po bojkotojnë menaxhimin e ri të Twitter/X, i parë nga shumë njerëz si shumë i butë ndaj dezinformatave dhe trollëve të krahut të djathtë.

Atëherë ishte e pashmangshme që ata që nuk e donin, do të fillonin t’i përmendnin babanë e sertë dhe minierat e smeraldit në Afrikën e Jugut të aparteidit, gjyshin e tij antisemit, klauzolën kontraktuale që e tregon atë si bashkëthemelues të Tesla-s, edhe pse ai erdhi më vonë në kompaninë që në fund e bëri të tijën, premtimet e dështuara në Neuralink që po përpiqet të ngrihet, dhe atë projekt të dështuar në trenat me shpejtësi shumë të lartë, që sipas shumë njerëzve ishte thjesht një dredhi për të bllokuar projektet e shtetit të Kalifornisë në të njëjtën fushë.

Sigurisht, Musk mbetet shumë i mirë në organizimin e ngjarjeve mediatike, të tilla si inaugurimi i Cybertruck, një kamion elektrik anti-mitraloz.

Eshtë e vështirë të mos argumentosh që Musk e sheh veten si Steve Jobs i ri – ai gjithashtu ndan me të biografin zyrtar, Walter Isaacson – dhe ndonëse shumëkujt i kujton Pt Barnum, talenti i tij është i padiskutueshëm: ai luan provokuesin e borgjezisë – Bürgerschreck do ta kishin quajtur në Vjenën e një shekulli më parë – dhe çdo instrument cirku është i mirë për t’u angazhuar.

Ai sfidoi Mark Zuckerbergun e Facebook-ut (i cili peshon 70 kg në krahasim me 134 të Musk) në një duel-lufte të çuditshëm në Koloseum duke përfshirë fatkeqësisht edhe politikën italiane, ai pozon si superhero à la Tony Stark (miliarderi teknologjik i filmave Marvel i cili shndërrohet në Iron Man).

Musk i përket asaj rryme mendimi që fatkeqësisht është shumë e përhapur në Silicon Valley e quajtur transhumanizëm, pra aspirata për ta bërë homo sapiensin një specie shumëplanetare duke na dërguar në Mars me raketa Space X dhe me mikroçipe Neuralink brenda kafkës, për të drejtuar Teslën në planetin e kuq, ndoshta duke i dorëzuar timonin një roboti të drejtuar nga inteligjenca artificiale.

Gjithçka shumë bukur, por kur promovoi nga llogaria e tij në Twitter një postim që akuzonte hebrenjtë se ushqejnë “urrejtje dialektike” për të bardhët, iu desh që për një herë të kërkojë falje (për Sorosin, hebre, vazhdon të thotë gjëra të rënda).

Ish bashkëshortja, këngëtarja Grimes me të cilën ka tre fëmijë me emra të ndërlikuar (X Æ A-Xii, Exa Dark Sideræl dhe Techno Mechanicus) thotë se një pjesë e problemeve të Musk burojnë nga Sindroma Asperger – një formë autizmi. “Nëse dikush vuan nga depresioni apo nga kriza të ankthit, të gjithë tregojnë dhembshuri. Nëse dikush ka Asperger, njerëzit thonë thjesht që është një hajvan”./bota.al/KultPlus.com

Musk: Lajmi për bllokimin e shërbimit për përdoruesit në BE, krejtësisht i rremë

Elon Musk ka hedhur poshtë një raportim mediatik për një tërheqje të mundshme të platformës së tij në internet X, e njohur më parë si Twitter – nga Bashkimi Evropian.

“Kjo është krejtësisht e rreme”, shkroi sot Musk në X, duke iu përgjigjur një raporti të “Business Insider” se ai kishte shqytuar bllokimin e shërbimit për përdoruesit në BE për shkak të kërkesave të BE-së.

“Shkaku për një tërheqje do të kishte qenë pakënaqësia e miliarderit të teknologjisë me Aktin e Shërbimeve Dixhitale (DSA)”, shkroi gazeta amerikane.

DSA detyron platformat e mëdha në internet të ndërmarrin veprime të vazhdueshme dhe të shpejta kundër gjuhës së urrejtjes, ndër të tjera.

X së fundmi ka marrë një listë pyetjesh nga Komisioni Evropian, i cili dëshiron të dijë më shumë se si platforma e medias sociale i përmbush detyrimet e saj./KultPlus.com

Kompanisë ‘Neuralink’ të Elon Musk i jepet ‘drita jeshile’ për të testuar implantet në trurin e njerëzve

Kompania e Elon Musk, mori dritën jeshile nga një komitet i pavarur ekspertësh, që punon me Administratën Amerikane të Ushqimit dhe Barnave (FDA), për të kryer studimin e parë klinik të kompanisë neuroteknologjike “Neuralink” .

Kjo do të thotë se kompania ka filluar të “rekrutojë” pacientë të paralizuar për të testuar pajisjen e saj eksperimentale, një implant truri.

Siç raporton gazeta britanike “Guardian”, kohëzgjatja e provave të para klinike do të zgjasë gjashtë vjet, megjithatë, kompania neuroteknologjike shmangu specifikimin e numrit të vullnetarëve që do të marrin pjesë në eksperiment.

Reuters thekson se kompania e Musk Neuralink është e gatshme të nisë Studimin Prime, duke u kërkuar vullnetarëve, mundësisht me probleme lëvizëse, që të vendoset një implant në trurin e tyre me qëllim që të lehtësojë jetën e tyre të përditshme.

Ky implant synon të ndihmojë pacientët e paralizuar të rifitojnë aftësinë për të komunikuar dhe kontrolluar teknologjitë e jashtme.

Pajisja përbëhet nga një çip me madhësinë e një monedhe që futet në tru dhe disa tela të hollë që lidhen me të.

Kompania Neuralink pretendon se mund të regjistrojë dhe stimulojë aktivitetin e trurit me saktësi dhe shpejtësi të madhe, por për të vendosur implantin nevojitet një operacion invaziv, pasi telat futen direkt në indin e trurit, ku zbulojnë sinjalet nervore.

Ky operacion delikat është ndërmarrë nga një robot.

Qëllimi i implantimit të çipave në tru

Qëllimi i studimit është që pacientët vullnetarë të mund të lëvizin me valë kursorin e kompjuterit dhe të shkruajnë me ndihmën e çipit, thjesht me mendimet e tyre.

Në një deklaratë të postuar në internet, kompania e Musk shprehu kënaqësinë e saj me vendimin e autoriteteve kompetente amerikane për t’i dhënë “bekimet” e tyre sipërmarrjes së tij pioniere: “Ne jemi të kënaqur të njoftojmë se kemi marrë miratimin nga komiteti i pavarur i rishikimit dhe spitali ynë i parë për të filluar procesin e përzgjedhjes për provën tonë të parë klinike njerëzore.

“Studimi PRIME” (Ndërfaqja e saktë e implantuar robotikisht truri-kompjuter) – një test kërkimor i pajisjes mjekësore pioniere për ndërfaqen tru-kompjuter plotësisht të implantueshëm pa tel (BCI) – synon të vlerësojë sigurinë e implantit tonë (N1) dhe robotit kirurgjik (R1).) Përveç kësaj, ai dëshiron të vlerësojë funksionalitetin fillestar të kompjuterit BCI për t’u mundësuar njerëzve me paralizë të kontrollojnë pajisjet e jashtme vetëm me mendim.

Gjatë studimit, roboti R1 do të përdoret për të vendosur në mënyrë kirurgjikale fijet ultra të holla dhe fleksibël të implantit N1 në një zonë të trurit që kontrollon lëvizjen. Pasi të vendoset, implanti N1, i cili është i padukshëm, do të regjistrojë dhe transmetojë sinjalet e trurit me valë në një aplikacion që dekodon qëllimin e lëvizjes. Qëllimi fillestar i kompjuterit tonë (BCI) është t’u japë njerëzve mundësinë për të kontrolluar kursorin ose tastierën e kompjuterit duke përdorur vetëm mendimet e tyre.”

“Studimi PRIME po kryhet nën përjashtimin e pajisjeve (IDE) të dhënë nga FDA në maj 2023 dhe është një hap i rëndësishëm në misionin tonë për të krijuar një ndërfaqe të përgjithshme të trurit për të rivendosur autonominë për njerëzit me nevoja mjekësore të paplotësuara. Ata që kanë kuadriplegji për shkak të dëmtimit të palcës kurrizore të qafës së mitrës ose sklerozës laterale amiotrofike (ALS) mund të kualifikohet”, thuhet në deklaratë./balkanweb/KultPlus.com

Sot nis kthimi i astronautëve nga hapësira

NASA dhe SpaceX po synojnë që më 3 shtator të nisë procesi i kthimit nga hapësira drejt planetit Tokë.

Në njoftimin zyrtar të kompanisë SpaceX, që udhëhiqet nga Elon Musk, është thënë që pas kryerjes së një sërë manovrimesh, raketa Dragon do të rifutet në atmosferën e Tokës, për t’u ulur përfundimisht në Florida të Shteteve të Bashkuara të Amerikës.

Në bordin e raketës janë Stephen Bowen, Woody Hoburg, Rocosmos Andrew Fedyaev dhe Sulltan Alneyadi, që ishin nisur nga Qendra Hapësinore më 2 mars.

I tërë misioni i rikthimit do të përcillet drejtpërdrejt nga ekipet e NASA-s dhe të SpaceX. / KultPlus.com

“Forbes” publikon listën e më të pasurve, kush zë vendin e parë

“Forbes” ka publikuar listën e personave më të pasur në botë, të cilët sipas saj gjithashtu kanë një ndikim shumë të madh në ekonomi. Lista që përfshin në total 2640 persona udhëhiqet nga CEO i Teslës, Elon Musk.

Musk është personi më i pasur në botë, një pozicion që ai e mbajti edhe për pjesën më të madhe të vitit 2022.

Më poshtë janë 10 njerëzit më të pasur në botë që nga 1 shtatori 2023, sipas Forbes, të cilët janë të gjithë burra.

Elon Musk – Pasuria: 248,8 miliardë $ -Mosha: 52 vjeç – Burimi: Tesla, SpaceX – Shteti: SHBA

Bernard Arnault – Pasuria: 208 miliardë $ – Mosha: 74 vjeç – Burimi: LVMH – Shteti: Francë

Jeff Bezos – Pasuria: 160,9 miliardë $ – Mosha: 59 vjeç – Burimi: Amazon. Shteti: SHBA

Larry Ellison – Pasuria: 152,3 miliardë $ – Mosha: 79 vjeç – Burimi: Oracle – Shteti: SHBA

Warren Buffett – Pasuria: 121,1 miliardë $ – Mosha: 93 vjeç – Burimi: Berkshire Hathaway – Shteti: SHBA

Bill Gates – Pasuria: 115,1 miliardë $ – Mosha: 67 vjeç – Burimi: Microsoft – Shteti: SHBA

Larry Page – Pasuria: 114,6 miliardë $ – Mosha: 50 vjeç – Burimi: Google – Shteti: SHBA

Sergey Brin – 108,8 miliardë $ – Mosha: 50 vjeç – Burimi: Google – Shteti: SHBA

Mark Zuckerberg – Pasuria: 105,2 miliardë $ – Mosha: 39 vjeç -Burimi: Facebook – Shteti: SHBA

Steve Ballmer – Pasuria: 101 miliardë $ – Mosha: 67 vjeç – Burimi: Microsoft – Shteti: SHBA. / KultPlus.com

Elon Musk riemëron Twitter në X, arsyeja përse dëshiron të imitojë aplikacionin WeChat

CEO i Tesla-s Elos Musk, e ka riemëruar Twitter-in në X, një hap tjetër në planin e tij për të imituar mega aplikacionin kinez WeChat.

Musk ka thënë prej kohësh se dëshiron ta transformojë firmën e tij të mediave sociale, të cilën e bleu vitin e kaluar për 44 miliardë dollarë (34.4 miliardë paund), në një platformë shumë më të madhe.

Ai ka lavdëruar më parë WeChat, një aplikacion që kombinon bisedat, takimet, pagesat dhe mediat sociale, dhe ka thënë se krijimi i një platforme afër WeChat me Twitter do të ishte një sukses i jashtëzakonshëm.

Në një postim në X, Musk tha se gjatë muajve të ardhshëm do të shtojë komunikime gjithëpërfshirëse dhe aftësinë për të drejtuar të gjithë botën financiare. Ai shpreson se rritja e X do të çojë në një rritje të të ardhurave.

Por çfarë është WeChat dhe pse Musk dëshiron ta imitojë atë?

I lançuar nga gjigandi i teknologjisë Tencent në vitin 2011, WeChat përdoret nga 1.4 miliardë banorët e Kinës.

Shërbimet e tij përfshijnë mesazhe, thirrje zanore dhe video, media sociale, shpërndarje ushqimi, pagesa celulare, lojëra, lajme dhe madje edhe takime. Është si WhatsApp, Facebook, Apple Pay, Uber, Amazon, Tinder dhe shumë të tjera të përfshira në një.

/rtsh.al/

Fiton sërish ‘garën’ me Bernard Arnault, Forbes: Elon Musk i pari në listën e personave më të pasur në botë

151.9 miliardë dollarë. Kjo është vlera neto në kohë reale e themeluesit të Amazon dhe ish-personit më të pasur në botë, Jeff Bezos, personi i tretë më i pasur në botë, pas Musk dhe Arnault.

Ceo i ‘Twitter’ Elon Musk ka marrë sërish titullin e njeriut më të pasur në botë, duke lënë pas manjatin francez të mallrave luksoze Bernard Arnault. 

Pasuria neto astronomike e Musk shkoi 4.1 miliardë dollarë të tjerë të hënën, sipas llogaritjeve të Forbes, duke rritur vlerën e tij neto me më shumë se 1.75% në një vlerë të rehatshme prej 240.7 miliardë dollarësh, që nga mesdita EDT.

151.9 miliardë dollarë. Kjo është vlera neto në kohë reale e themeluesit të Amazon dhe ish-personit më të pasur në botë, Jeff Bezos, personi i tretë më i pasur në botë, pas Musk dhe Arnault. Bezos pasohet nga themeluesi dhe ish-CEO i Oracle, Larry Ellison (148.1 miliardë dollarë), themeluesi i Microsoft, Bill Gates (120.6 miliardë dollarë), CEO i Berkshire Hathaway, Warren Buffet (117.3 miliardë dollarë) dhe ish-CEO i Microsoft, Steve Ballmer (104.9 miliardë dollarë).

Musk, 52 vjeç dhe Arnault, 74 vjeç, u takuan për drekë muajin e kaluar në një hotel luksoz në Paris në pronësi të LVMH Moët Hennessy Louis Vuitton. Arnault i tha gazetës franceze Quotidien në kohën kur donte të darkonte me Musk sepse ai mendon se është një sipërmarrës i jashtëzakonshëm, shkruan Forbes.  / KultPlus.com

Përdoruesit i thonë lamtumirë zogut blu, Musk ndryshon logon historike të Twitter

Miliarderi amerikan Elon Musk ka vendosur të ndryshojë logon historike të Twitter.

Përdoruesit e platformës i kanë thënë lamtumirë zogut blu që është zëvendësuar me ikonën e shkronjës “X” në ngjyrë të bardhë, vendosur në një sfond të zi.

Obsesionin për këtë shkronjë, Musk e ka treguar edhe në kompaninë tjetër që ai zotëron e cila është Space X. Musk pyeti më herët miliona ndjekësit e tij nëse ata do të ishin dakord që të ndryshonte logoja e famshme. Që kur Musk bleu Twitter-in në Tetor, kompania ka ndryshuar emrin e saj të biznesit në X Corp, duke reflektuar vizionin e miliarderit për të krijuar një “super aplikacion” si WeChat i Kinës.

Twitter mendohet të ketë rreth 200 milionë përdorues aktivë çdo ditë, por nuk ka performuar mirë ekonomikisht që kur Musk bleu platformën e rrjeteve sociale për 44 miliardë dollarë. Musk shkarkoi rreth gjysmën e stafit në përpjekje për të ulur kostot. Nga ana tjetër reklamuesit kanë qenë të shqetësuar për moderimin e përmbajtjes, por edhe pasigurinë e përgjithshme për të ardhmen e Twitter. / KultPlus.com

Musk: Nëse Twitter nuk u bindet ligjeve lokale, mund të ndërpritet qasja në të

Pronari i Twitter-it, Elon Musk, tha se nëse platforma sociale nuk u bindet ligjeve lokale, atëherë qasja në platformë në atë vend mund të ndërpritet.

I pyetur rreth komenteve të fundit nga bashkëthemeluesi i Twitter-it, Jack Dorsey, Musk tha se Twitter nuk ka zgjidhje tjetër veçse t’u bindet qeverive lokale.

Së fundmi, Dorsey tha se India kërcënoi të mbyllte platformën nëse nuk zbatonte urdhrat për të kufizuar llogaritë që kritikonin qeverinë e kryeministrit Narendra Modi për trajtimin e protestave të vitit 2021. Zyrtarë të qeverisë së Indisë përgënjeshtruan këto akuza.

“Nëse nuk u bindemi ligjeve të qeverisjes vendore, atëherë do të mbyllemi. Kështu që më e mira që mund të bëjmë është të punojmë afër ligjeve në çdo vend”, tha Musk, duke paralajmëruar se përndryshe “do të jemi të bllokuar ose të arrestuar”.

Duke u shprehur se “nuk mund thjesht të zbatohet Amerika në të gjithë botën”, Musk tha: “Ne do të bëjmë çmos për të ofruar lirinë sa më të madhe të shprehjes që është e mundur sipas ligjit”.

Më parë, Musk u takua me kryeministrin indian, Narendra Modi, i cili ndodhet në SHBA në vizitën e tij të parë shtetërore.

Musk, gjithashtu shef ekzekutiv i kompanisë Tesla, tha se Modi e ftoi prodhuesin e makinave elektrike të bëjë investime të rëndësishme në Indi. I pyetur nëse Tesla do të hyjë në tregun indian, ai tha se planifikon të vizitojë Indinë vitin e ardhshëm.

“Kam besim se Tesla do të jetë në Indi dhe kjo do të ndodh sa më shpejt që të jetë e mundur nga ana njerëzore. Unë do të doja të falënderoja kryeministrin për mbështetjen e tij dhe shpresoj se do të jemi në gjendje të shpallim diçka në një të ardhme jo shumë të largët”, tha Musk./KultPlus.com

Elon Musk bëhet përsëri njeriu më i pasur në botë

Elon Musk rifitoi titullin e njeriut më të pasur në botë, pas rënies së aksioneve të LVMH, e cila “hodhi” nga maja manjatin francez Bernard Arnault.

Kreu i Tesla, SpaceX dhe Twitter dhe 74-vjeçari Arno janë vazhdimisht në garë për kryesimin e listës së Bloomberg të njerëzve më të pasur në botë.

Megjithatë, Arnaud humbi vendin e parë për shkak të rënies së çmimit të aksioneve të LVMH. Besimi i tregjeve në fuqinë e sektorit të luksit po pakësohet dhe aksionet e LVMH kanë rënë me rreth 10% që nga prilli.

Në të kundërt, Elon Musk ka fituar më shumë se 55.3 miliardë dollarë këtë vit, kryesisht për shkak të Teslës. Pasuria e tij tani vlerësohet në rreth 192 miliardë dollarë, sipas Indeksit të Miliarderëve të Bloomberg./abcnews.al/KultPlus.com

Elon Musk duke puthur robotë, fotot bëhen virale

Fotot e Elon Musk duke u puthur me një robot po bëjnë xhiron e internetit.

Themeluesi i kompanive “Tesla” dhe “SpaceX” shihet me disa modele, që “janë robotë të dizajnuar me inteligjencë artificiale, me personalitet dhe karakteristika të gruas që gjithmonë ka ëndërruar”, sipas drejtorit të një firme ndërtimi, David Marven.

Ai shtoi se roboti punon me energji diellore dhe nuk ka nevojë për karikim.

Por, më pas sqaroi se fotot e çuditshme janë bërë duke përdorur inteligjencën artificiale.

“Qëllimi i këtij postimi është për të bërë të qartë rreziqet e inteligjencës artificiale”, shkruan në fund të postimit David Marven. / KultPlus.com

Elon Musk padit Microsoft për përdorim të paautorizuar të të dhënave të Twitter-it

 Shefi ekzekutiv i Twitter-it, Elon Musk deklaroi se do të padisë Microsoft-in, të cilin e akuzon se ka përdorur të dhënat e platformës së tij të mediave sociale pa leje.

Sipas lajmit të BBC-së, Musk postoi në Twitter se Microsoft do të heqë Twitter-in nga platforma e saj e reklamave të korporatave. “Ata morën trajnime të paligjshme duke përdorur të dhënat e Twitter-it. Është koha e procesit gjyqësor”, tha Musk.

Megjithatë, ai nuk ndau asnjë provë apo ndonjë detaj për të mbështetur pretendimin e tij.

Në një postim të veçantë, Musk tha se ai është i hapur ndaj ideve për diskutimin e të dhënave të Twitter-it, por grabitja e bazës së të dhënave të Twitter-it, demonizimi i saj duke hequr reklamat dhe më pas shitja e të dhënave të tij tek të tjerët nuk është një zgjidhje fituese.

Microsoft-i nuk pranoi t’u përgjigjej pyetjeve në lidhje me këtë çështje. Microsoft-i raportoi më parë se platforma e saj e reklamave nuk do të mbështesë më Twitter-in nga 25 prilli.

Si rezultat, blerësit e reklamave nuk do të jenë në gjendje të hyjnë në llogaritë e tyre në Twitter përmes mjetit të menaxhimit të mediave sociale të Microsoft-it. /KultPlus.com

Elon Musk bëhet njeriu më i ndjekur në Twitter

Shefi i Twitter, Elon Musk tani ka llogarinë me më shumë ndjekës në platformën e njohur të rrjeteve sociale, duke rrëzuar nga froni ish-presidentin e SHBA-së, Barack Obama.

Llogaria e biznesmenit miliarder aktualisht ndiqet nga 133.08 milionë përdorues të Twitter, krahasuar me 133.04 milionë për ish-presidentin e Shtëpisë së Bardhë.

Brenda disa muajsh nga shprehja e interesit për blerjen e Twitter, Elon Musk fitoi më shumë se 50 milionë ndjekës të rinj.

Në shkurt, faqja e internetit Platformer raportoi se Musk u kishte bërë presion zhvilluesve të Twitter për të promovuar përhapjen e mesazheve të tij në platformë. Natyrisht, dëshira e tij u realizua, pasi falë korrigjimeve të filtrit, postimet e Elon Musk u bënë virale, tha botimi.

Elon Musk dhe Barack Obama ndiqen nga pas nga këngëtari Justin Bieber (113 milionë ndjekës), Katy Perry dhe Rihanna me rreth 108 milionë ndjekës secila, sipas të dhënave nga uebsajti i specializuar Social Blade.

Twitter ka njoftuar se certifikimi blu do të hiqet më 1 prill nga përdoruesit që nuk janë regjistruar për shërbimin e ri të abonimit Twitter Blue. Në një memo të brendshme për punonjësit e platformës, Elon Musk tha javën e kaluar se vlera e vlerësuar e Twitter është 20 miliardë dollarë, gati gjysma e asaj që pagoi në tetor (44 milionë dollarë). /abcnews.al/ KultPlus.com

Elon Musk do të ndërtojë një qytet për punëtorët e tij

Pronari i kompanive SpaceX dhe Twitter, Elon Musk, planifikon të ndërtojë qytetin e tij në një zonë në shtetin amerikan të Teksasit.

Sipas një lajmi të publikuar në Wall Street Journal (WSJ), qyteti në fjalë do të ndërtohet në Kontin Bastrop, i cili ndodhet pranë qytetit Austin.

Thuhet se qyteti, themeli i të cilit është planifikuar të hidhet në një zonë pranë objekteve të kompanive Boring dhe SpaceX, të cilat janë në ndërtim e sipër, do t’u mundësojë punonjësve të kompanive të Musk-ut të zhvendosen në shtëpi të reja me çmime qiraje nën nivelin e tregut.

Ligji i Teksasit kërkon që të paktën 201 njerëz të jetojnë në një zonë përpara se të bëhet aplikimi që ajo të pranohet si qytet. Pas këtij procesi merret miratimi nga gjyqtari i qarkut.

Një zyrtar nga Konti Bastrop ka thënë në një deklaratë se ende nuk ka arritur asnjë aplikim nga Musk apo ndonjë subjekt që ai zotëron. / KultPlus.com

Elon Musk është zyrtarisht më i pasuri në botë, kaq është pasuria e tij

Pronari i Twitter dhe Tesla, Elon Musk, edhe njëherë është shpallur njeriu më i pasur në botë dhe kjo falë rritjes së vlerës së aksioneve të Tesla-s. Pasuria e Musk ka arritur në 24 orët e fundit në 187 miliardë dollarë, pasuri neto. Që prej janarit të këtij viti, pasuria e miliarderit është rritur me 50.1 miliardë dollarë, sipas Indeksit të miliarderëve të Bloomberg.

Në këtë mënyrë, 51-vjeçari, ka tejkaluar për pasurinë, miliarderin tjetër, themeluesin e brand-it luksoz, Louis Vuitton, Bernard Arnault, i cili ka një pasuri prej 185 miliardë dollarësh, 2 miliardë më pak se Musk aktualisht.

Vlera e aksioneve të Tesla-s u rrit ndjeshëm, me thuajse 100% këtë janar, falë uljes së çmimit të automjeteve dhe rritjes së kërkesës nga investitorët.

Musk dhe Arnault, mbeten në krye të listës së më të pasurve në botë, duke lënë pas Jeff Bezos, themeluesin e Amazon, themeluesin e Microsoft Bill Gates dhe miliarderin investitor Uarren Buffett, që kanë respektivisht pasuri neto prej 117, 114 dhe 106 miliardë dollarë./A2CNN / KultPlus.com

U padit për një postim në Twitter, Elon Musk shpallet i pafajshëm

Themeluesi i Tesla-s, Elon Musk është shpallur i pafajshëm për një postim në Twitter në të cilin ai tha se kishte siguruar fonde për të privatizuar prodhuesin e makinave elektrike. Musk u përball me një padi grupore në emër të aksionerëve të Tesla-s, të cilët thanë se po i mashtronte me postimet në 2018-ën.

Blerja e propozuar prej 72 miliardë dollarësh nuk u realizua kurrë. Nëse gjykata e San Franciskos do ta kishte shpallur Musk përgjegjës, ai do të duehj të paguante miliarda dollarë dëmshpërblim. Nëntë anëtarëve të jurisë iu deshën më pak se dy orë për të marrë vendimin e tyre të premten pasdite.

Musk, i cili donte që gjyqi të zhvendosej në Teksas, ku është vendosur Tesla, duke argumentuar se nuk mund të merrte një gjykim të drejtë në San Francisko, e mirëpriti rezultatin. “Falë Zotit, mençuria e njerëzve ka mbizotëruar! Jam thellësisht mirënjohës për gjetjen unanime të jurisë për pafajësinë në çështjen “Tesla 420 take-private”.

Në qendër të padisë ishte postimi i Musk në Tëitter më 7 gusht 2018: “Po shqyrtoj marrjen e Tesla-s private me 420 dollarë. Financimi i siguruar”. Paditësit gjithashtu argumentuan se Musk kishte gënjyer kur ai postoi në Tëitter më vonë gjatë ditës se “mbështetja e investitorëve është konfirmuar”.

Çmimi i aksioneve u rrit pas postimeve në Twitter, por ra përsëri brenda disa ditësh pasi u bë e qartë se marrëveshja nuk do të realizohej. Humbjet e investitorëve u llogaritën deri në 12 miliardë dollarë, sipas një ekonomisti të punësuar nga aksionerët. /abcnews.al/ KultPlus.com

Kaos në Twitter: Erë e keqe, tualete të pista dhe letra higjienike, pastruesit në grevë

Erë e keqe, mungesë pastërtie dhe tualete të pista. Kjo është situata që duket se mbizotëron në Twitter, pasi Elon Musk mori postin e CEO, vendimet e të cilit kanë shkaktuar kaos në jetën e përditshme të punonjësve.

Sipas New York Times, plani i uljes së kostos i vendosur nga Elon Musk ka të ngjarë të ketë një ndikim negativ tek punëtorët, madje edhe ata që kanë mbetur.

Në selinë qendrore të Twitter në San Francisko, katër kate u mbyllën, duke lënë punëtorët të grumbulluar në vetëm dy.

Shërbimet e pastrimit janë ndërprerë kryesisht pasi punëtorët hynë në grevë për paga më të mira, duke lënë të fortë erën e djersës dhe erën e mbetjeve ushqimore.

Punëtorët flasin për tualete të pista, ndërsa disa janë të detyruar të përdorin letra higjienike që marrin nga shtëpia.

Musk ka pushuar nga puna punonjësit e pastrimit në zyrat në Nju Jork. Burime të brendshme thonë se në bazë të të dhënave një nga dy godinat aty mund të mbyllet. Në Krishtlindje, Musk urdhëroi gjithashtu njerëzit në Sacramento të mbyllnin qendrën e të dhënave në Twitter.

Twitter gjithashtu ndaloi pagesën e qirasë për zyrat e Seattle, sipas dy personave që folën për The New York Times.

Kompania thuhet se ndaloi pagesën e qirasë në zyra të tjera javët e fundit, si dhe në selinë e saj në San Francisko. Për të ulur kostot, Twitter po përpiqet të rinegociojë kushtet e marrëveshjeve të tij të qirasë.

Musk u përpoq të kursente rreth 500 milionë dollarë në kosto që nuk lidhen me punën, raportoi NYTimes, duke cituar një dokument të brendshëm.

CEO i Boring Company, Steve Davis, i cili thuhet se flinte në selinë e Twitter me partneren e tij dhe foshnjën e tyre të porsalindur, ka marrë përsipër biznesin e uljes së kostove me ndihmën e Jared Birchall, shefit të zyrës së familjes së Musk.

Megjithatë, punëtorët presin më shumë pushime nga puna, duke pasur parasysh rënien e të ardhurave nga reklamat në fillim të dhjetorit./oranews/ KultPlus.com

Musk: Sondazhet e ardhshme vetëm për abonentët e “Twitter Blue”

Elon Musk njoftoi dje se vetëm abonentët e “Twitter Blue” do të mund të votojnë në sondazhet e ardhshme të lidhura me politikat në platformë, pasi miliona përdorues votuan që ai të largohej nga posti i shefit ekzekutiv të faqes.

Presidenti i “Tesla” tha se do t’i përmbahej rezultatit të sondazhit, të cilin ai krijoi, duke pyetur përdoruesit e “Twitter” nëse ai duhej të largohej apo jo.

Rezultati u konfirmua sot në mëngjes, me 57,5% të mbi 17.5 milionë llogarive që votuan  thanë se ai duhet të tërhiqet nga roli i tij.

Musk nuk postoi asnjë koment në Twitter pas publikimit të sondazhit.

Heshtja e tij më në fund u thye sot në mëngjes, kur ai iu përgjigj “Interesante” një sugjerimi të Kim Dotcom, themeluesja e faqes së internetit, se rezultatet e sondazhit ishin kryer nga llogari të rreme.

Duke iu përgjigjur sugjerimit të një përdoruesi tjetër se, abonentët e “Twitter Blue” duhet të jenë të vetmit që mund të votojnë në sondazhet e lidhura me politikat, Musk tha se Twitter do ta bënte këtë ndryshim.

“Twitter Blue” është një platformë me pagesë, që lejon këdo të blejë një llogari të verifikuar.

Sondazhi i Musk të dielën mbrëma erdhi pas disa javësh vendimesh të diskutueshme.

Disa grupe të sigurisë në internet kanë akuzuar miliarderin se ka lejuar urrejtjen, abuzimin dhe dezinformimin të qarkullojnë më lehtë në platformë për shkak të parimeve të tij të fjalës së lirë.

Gjatë mandatit të tij, Musk ka pushuar gjithashtu më shumë se gjysmën e fuqisë punëtore globale të kompanisë.

Ndërsa mbetet e paqartë se kush do të zëvendësojë Musk nëse ai tërhiqet, disa komentues kanë theksuar se miliarderi do të kishte ende rolin e vendimmarrjeve kryesore si pronar i “Twitter”./ KultPlus.com

Elon Musk shndërron zyrat e Twitter-it në ‘hotel’ për stafin

BBC-së i janë dhënë fotografi të hapësirës së zyrës në Twitter, e cila është shndërruar në dhoma gjumi, të cilat autoritetet e San Franciskos po i hetojnë si shkelje të mundshme të kodit të ndërtimit.

Një imazh tregon një dhomë me një krevat dopio, duke përfshirë edhe një gardërobë.

Një ish-punëtor tha se shefi i ri i Twitter, Elon Musk ka qëndruar në selinë që kur bleu firmën.

Ai muajin e kaluar i dërgoi email të gjithë stafit të Twitter duke thënë se “do të duhet të jenë jashtëzakonisht të fortë” për të pasur sukses.

Departamenti i Inspektimit të Ndërtimit në San Francisko ka konfirmuar se po heton shkeljet e mundshme pas një ankese.

Musk tha se qyteti po sulmonte kompanitë për sigurimin e shtretërve për “punonjësit e lodhur”.

Në një postim të fshirë tani, Musk postoi se ai do të punonte dhe do të flinte në zyrë “derisa të rregullohet organizata”.

BBC-së i janë dhënë gjithashtu fotografi të divaneve në Twitter duke u përdorur si shtretër.

Një dhomë tjetër konferencash ka një orë alarmi dhe një fotografi të vendosur mbi një shtrat të grimuar.

“Duket si një dhomë hoteli,” tha një ish-punëtor. Ata vazhduan duke thënë se Musk fle rregullisht në selinë e Twitter në San Francisko.

Twitter nuk iu përgjigj menjëherë një kërkese për koment nga BBC.

Muajin e kaluar, Musk – i cili përfundoi marrjen e tij në Twitter në tetor – i dërgoi email të gjithë stafit të kompanisë duke thënë se do të duhej të punonin “orë të gjata me intensitet të lartë”. /KultPlus.com

Musk: Brenda 6 muajve do vendosim çipin e parë në trurin e një njeriu

Kompania po zhvillon çipe për trurin Neuralink brenda 6 muajsh do të fillojë testet në njerëz.

Kështu ka deklaruar Elon Musk. Ai tha se një pajisje wireless e krijuar nga kompania e tij e çipeve të trurit do vendoet në tru.

Kemi punuar shumë që të jemi gati për njeriun tonë të parë dhe duam që të jemi shumë të kujdesshëm dhe të sigurt se do të funksionojë përpara se ta implementojmë, por kemi dorëzuar besoj pjesën më të madhe të punës sonë në FDA dhe mendoj se brenda 6 muajsh do të mund të kemi Neuralink-un tonë të parë te një njeri”, tha Musk.

Pajisja mund të ndihmojë pacientët me aftësi të veçanta të lëvizin dhe komunikojnë sërish. / KultPlus.com

Elon Musk po dështon me premtimin e tij mbi racizmin, lojtarët me ngjyrë të Botërorit 2022 po fyhen në Twitter

Pavarësisht garancive të Elon Musk se Twitter do të ishte pa gjuhën e urrejtjes, një raport tregon se postimet raciste kundër futbollistëve në Kampionatin Botëror po lejohen dhe platforma e rrjeteve sociale me sa duket nuk po bën asgjë për t’i fshirë ato ose për të sanksionuar llogaritë që i kanë postuar, edhe pse ato ishin raportuar gati një javë më parë.

Përpara fillimit të Botërorit 2022 shumë të diskutueshëm në Katar, Elon Musk publikoi një status në Twitter duke thënë se politika e re në Twitter është liria e fjalës, por jo liria e arritjes, duke shtuar se çdo status negativ ose urrejtje do të debostohet dhe demonetizohet maksimalisht, duke nënkuptuar se nuk do të ketë mundësi fitimi parash nga Twitter në këtë mënyrë.

Raporti tregon që postimet racore në Twitter të lojtarëve të Kampionatit Botëror nuk janë fshirë, shkruan Marca.

Qendra kundër urrejtjes digjitale është një organizatë jofitimprurëse britanike që bëri një studim i cili zbuloi se mbi 100 statuse abuzive racore u drejtoheshin lojtarëve të Kampionatit Botëror përpara fillimit të turneut, pa u fshirë nga poseduesit e faqes.

Ndër mënyrat më ofenduese në statuset në Twitter gjendet fjala “nigger (zezak)”, si dhe emoji me majmun dhe banane, me të cilat ofenduesit iu referohen njerëzve me ngjyrë që të kthehen në vendet e tyre.

Disa nga lojtarët me ngjyrë që ky studim kërkimor zbuloi se ishin në shënjestër të racizmit janë: Bukayo Saka, Marcus Rashford, Gabriel Jesus, Jadon Sancho, Richarlison, Mohamed Salah dhe të tjerë.

Twitter po e ka të vështirë të trajtojë rritjet masive të trafikut të prodhuara nga Kampionati Botëror 2022 në Katar, edhe më shumë për shkak të faktit se rreth 5,000 punonjës janë pushuar nga puna në tri javët e fundit që kur Musk mori drejtimin e platformës së rrjeteve sociale.

Imran Ahmed, CEO i Qendrës kundër urrejtjes digjitale tha se hulumtimi i tyre dëshmon se Twitteri i Elon Musk nuk është më i përshtatshëm për qëllimin dhe duhet të frenohet.

“Racistët kërkojnë të dërgojnë një mesazh se nëse edhe heronjtë kombëtarë mund të jenë në shënjestër të pandëshkueshëm, atëherë as ne të tjerët nuk jemi të sigurt”, tha Ahmed për VICE. / KultPlus.com

AP

OKB i kërkon Musk që të respektojë të drejtat e njeriut në Twitter

Komisionari i Lartë për të Drejtat e Njeriut i OKB-së, Volker Turk, i ka shkruar një letër të hapur Elon Muskut, duke i bërë thirrje të sigurojë që të drejtat e njeriut të jenë në qendër të menaxhimit të Twitter-it.

“Twitter është pjesë e revolucionit global dhe ka transformuar mënyrën se si ne komunikojmë. Por, iu shkruaj me shqetësim dhe frikë lidhur me sferën publike dhe rolin e Twitterit në të”, tha Turk.

Kjo letër vjen pasi Musk njoftoi për largime masive nga puna në Twitter, përfshirë edhe të gjithë stafin e drejtave të njeriut, përveç dy pjesëtarëve të ekipit etik të inteligjencës artificiale.

Njeriu më i pasur në botë, Elon Musk, bleu platformën sociale Twitter në fund të tetorit, në vlerë prej 44 miliardë dollarë.

Ai ka thënë se dëshiron që Twitter të ketë më pak kufizime lidhur me përmbajtjen që postohet në të. /REL/ KultPlus.com

Twitter konfirmon blerjen e verifikimit të llogarisë me shenjë blu

Twitter ka konfirmuar planet për të lejuar përdoruesit të blejnë statusin e verifikuar, transmeton KultPlus.

Në një përditësim për pajisjet Apple, kompania tha se funksioni do të jetë i hapur për përdoruesit në vende të caktuara që regjistrohen në shërbimin e saj Twitter Blue për 7,99 dollarë në muaj.

Ndryshimi i politikës është i diskutueshëm, mes shqetësimeve se platforma mund të mbushet me llogari të rreme.

Ky vendim vjen nga Elon Musk, i cili të premten pushoi nga puna rreth gjysmën e fuqisë punëtore të kompanisë.

Tiku blu i kërkuar më parë ishte i disponueshëm vetëm për individë dhe organizata të profilit të lartë ose me ndikim – të cilëve iu kërkua të provonin identitetin e tyre.

Është përdorur si shenjë se një profil është autentik dhe është një mjet kyç për të ndihmuar përdoruesit të identifikojnë informacione të besueshme në platformë.

Ndryshimi i politikës mund të nxisë shqetësimet se figurat qeveritare, të famshëm, gazetarë dhe marka mund të imitohen nga çdo përdorues i gatshëm të paguajë një tarifë mujore.

Musk, personi më i pasur në botë, duket se po kërkon të diversifikojë të ardhurat e Twitter-it, pas blerjes së tij të firmës në fund të muajit të kaluar në një marrëveshje prej 44 miliardë dollarësh.

Të premten, miliarderi tha se Twitter po humbte më shumë se 4 milion dollarë në ditë. /KultPlus.com