Me këngë të vjetra shqipe, “Kosova Brass” dhe Nezafete Shala ngritën publikun në këmbë

Suada Qorraj

Salla e Kino Armatës tashmë ishte mbushur me një numër të madh të njerëzve, teksa ora shënoi shtatë, të gjithë kishin zënë vendet e tyre, përfshirë edhe instrumentistët në skenë të cilët do bënin edhe hapjen e koncertit ‘13 vjet shtet’, shkruan KultPlus.

Ishte drejtoresha e Departamentit të Kulturës në Komunën e Prishtinës, Blera Basholli ajo që para tingujve të parë të muzikës e hapi koncertin. Duke qenë edhe vetë artiste, ajo potencoi se ky vit nuk ishte i lehtë për askënd mirëpo më të prekurit kishin qenë artistët. Ajo gjithashtu uroi që vitet e ardhshme të jenë më të mira.

“Viti i kaluar s’ka qenë një vit i mirë as për Kosovës e as për të gjithë botën, e sidomos për artistët. Uroj që viti tjetër të jetë më i mirë”, tha ndër të tjera Basholli.

Prishtina Brass filloi koncertin e përvjetorit të pavarësisë së Kosovës, pikërisht nën tingujt e himnit shtetëror. Të pranishmit në sallë tashmë ishin ngritur në këmbë, ndonëse të heshtur, fytyrat e tyre po reflektonin paqe e dashuri. Por nata e mbrëmshme nuk u kufizua vetëm me himnin shtetëror. Salla e Kino Armatës mirëpriti mbrëmë një numër të madh të këngëve shqipe si ‘ Për mëmëdhenë’, ‘Por si fleta’, por edhe shumë të tjera.

 Për Avni Krasniqin, instrumentistin në ‘ Kosova Brass’ pjesëmarrja në koncertin e mbajtur për 13-të vjetorin e Pavarësisë së Kosovës ishte një nder i madh.

“Për neve është çdo herë kënaqësi e veçantë, por e përcjellur edhe me emocione dhe ndjenja të përziera, që të interpretojmë për festa kombëtare, e sidomos për përvjetorin e 13-të të Pavarësisë”, tha ai për KultPlus.

Nata e mbrëmshme ndonëse filloi me ansamblin e tunxhit ‘Kosova Brass’, nuk përfundoi aty, Nezafete Shala & Melodia e Vjetër e vazhduan magjinë që sollën instrumentet për pak minuta sa u luajtën në skenë. Të pritur me duartrokitje të mëdha ata i dhanë zë Kino Armatës me ‘Marshin e UÇK-së’, ku për disa minuta i ofruan publikut emocione të shumta të cilat u shoqëruan me duartrokitje e brohorima.

Nezafete Shala & Melodia e Vjetër, natën e mbrëmshme, sollën përballë publikut një repertor të gjerë të këngëve të vjetra shqipe. Pas secilës këngë ishte publiku ai që me entuziazmin e vet e bëri edhe më të magjishëm koncertin e mbajtur nën patronazhin e Komunës së Prishtinës. / KultPlus.com

Të gjithë instrumentistët e tunxhit në vend përmbyllën mbrëmë festivalin “Kosova Brass”

Mbrëmë Festivali “Kosova Brass”, solli edhe koncertin përmbyllës të edicionit të tij të dytë ndërsa në këtë mbrëmje në skenë ishte ngjitur orkestra e këtij festivali e dirigjuar nga dirigjenti amerikan, Gregory Jones, shkruan KultPlus.

Gili Hoxhaj

Në këtë koncert poashtu me orkestrën para saj interpretuan edhe organizatori dhe trumpetisti kosovar, Avni Krasniqi kurse tinguj nga instrumenti i kornos i solli Bledar Bujupi.

Orkestra kishte mbledhur të gjithë instrumentistët e tunxhit në vend, të cilët kishin zënë vendet e tyre brenda Amfiteatrit të Bibliotekës Universitare. Kur atyre u vihet përballë dirigjenti Gregory Jones, salla rrëmbehet nga tingujt e këtyre instrumentistëve, disa të rinj e disa më profesionist në këtë instrument.

Përtej kënaqësisë së dëgjuarit këto vepra, interpretimi i tyre depërtonte thellë tek publiku, pasi që, secilës vepër i paraprinte shpjegimi i tyre nga dirigjenti amerikan Jones. Kur ai erdhi tek vepra Afagio “Concerto de Aranjuz”, dukej sikur bëri një kthesë emocionale tek të gjithë të pranishmit derisa shpjegoi se kompozitori i kësaj vepre Rodrigo, kishte qenë i verbër derisa gruaja e tij kishte qenë e sëmurë në spital, ai pasi që nuk mund ta shihte, shpesh nuk e dinte nëse ajo është e gjallë, dhe kështu ai e vendoste veshin e tij tek zemra e saj e cila rrihte ngadalë, dhe pikërisht me këtë ritëm nisi edhe kjo vepër e cila më pas vazhdoi me tinguj më të shpeshtuar.

Ky dirigjent në Kosovë kthehet pas shumë vitesh, ndërsa ndihet i lumtur që këtë vend e gjen më të zhvilluar. Ai tregon se kur i kishte takuar fillimisht organizatorët e këtij festivali, ata kishin qenë shumë të vegjël dhe sot thotë se ndihet i mahnitur nga suksesi i tyre dhe nga mënyra se si ata punojnë me studentët.

“Ata me të vërtetë kujdesen për studentët e tyre, kemi pasur prova të dielën në mëngjes dhe të gjithë ishin aty, dhe kur ne i përfundonim provat studentët nuk largoheshin menjëherë por vazhdonin të flisnin me profesorët e tyre, kjo do të thotë se profesorët janë të mrekullueshëm”, ishin fjalët e dirigjentit amerikan Gregory Jones i cili tha se kur është në Amerikë, ai sikur bën marketing për Kosovën dhe Shqipërinë dhe se do të kthehet në mundësinë e parë.

Në një bisedë të shkurtër për KultPlus, ai theksoi se ka qenë shumë kërkues ndaj studentëve ndërsa ishte mahnitur me entuziazmin e tyre, derisa shton se ata i kapnin gjërat shumë lehtë.

“Studentët erdhën çdo ditë, ishin shumë të interesuar, ata ndryshonin pjesët kur unë u thosha kurse gjëja më e mirë në këtë ansambël është se fillon të ndihesh sikur jeni një familje e madhe”, tha dirigjenti Jones, i cili tregoi se atij nuk i ndodh shumë shpesh të has në studentë kaq të disiplinuar.

Organizatori i këtij festivali Avni Krasniqi, tha për KultPlus se përkundër vështirësive që kanë hasur, thotë se ndihet i kënaqur me ecurinë e festivalit.

“Vështirësia e parë në organizimin e këtij koncerti është buxheti modest, edhe pse ka shumë vështirësi, si të dytën mund ta rangoj sallën pasi që ka qenë shumë sfidues fakti që në sallë nuk ka pasur nxemje dhe është dashur te gjesh mënyra alternative që ta ngrohesh sallën”, tregoi trumpetisti Krasniqi, i cili tutje tregoi se e sheh si shumë të suksesshëm bashkëpunimin që erdhi mbrëmë midis Kosovës dhe Amerikës, dhe që mbrëmja dhe i gjithë koncerti i ka i ka arritur pritshmëritë e tij, kurse veçantia e kësaj mbrëmje sipas tij qëndron në faktin se janë ngjitur në skenë të gjithë instrumentistët e tunxhit në vend, lidhur me këtë ai tregoi se ndihet i lumtur që Kosova ka arritur t’i plotësoj nevojat e orkestrës, pasi që vetëm para pesë viteve instrumentistët e tunxhit duhej të importoheshin nga jashtë.

“Tashmë dihet që instrumentistët e tunxhit janë shumë të rinj, disa që interpretuan sonte ishin studentë, disa kanë mbaruar studimet kurse sonte së bashku me ta interpretuan dhe pedagogë të tunxhit dhe kjo mendoj që është veçantia e kësaj mbrëmje, sidomos puna me profesorin Gregory Jones, i cili ka ardhur enkas për ta përgatitur këtë program dhe mendoj se me këtë koncert festivali e ka përfunduar në mënyrën më të mirë të mundshme”, tha për fund organizatori i këtij festivali Avni Krasniqi.

Ky festival i cili ka filluar në fund të muajit të kaluar, ka arritur të sjellë instrumentistë të njohur nga Kosova, Shqipëria, Gjermania, Republika Çeke dhe Amerika, në mesin e tyre është dhe trumpetistin me renome botërore, gjermanin OttoSauter i cili javën e kaluar interpretoi me Piccolo Trumpetë, i shoqëruar nga kuarteti i harqeve i udhëhequr nga violinisti kosovar Visar Kuçi.

Poashtu edhe këtë vit, festivali u ka kushtuar rëndësi të veçantë studentëve dhe nxënësve të tunxhit në vend, pasi që gjatë gjithë kohës janë mbajtur masterklase për studentët me pjesëmarrës të festivalit./ KultPlus.com

Koncerti i dytë i “Kosova Brass”, jehoi në tingujt e kornistit Ilir Kodhima

Festivali “Kosova Brass” hapi mbrëmjen e dytë koncertale me kronistin e shquar nga Shqipëria, Ilir Kodhima dhe i shoqëruar nga pianisti kosovar, Adem Hasani, e më pas edhe me zërin magjepsës të sopranos Eriona Dragoica, shkruan KultPlus.

Gili Hoxhaj

Në sallën e ftohtë të Amfiteatrit të Bibliotekës Universitare, tingujt e Ilir Kodhima e të Adem Hasanit, krijonin një distancë të publikut ndaj të ftohtit.
Ilir Kodhima, kornisti i parë në Teatrin e Operës dhe Baletit në Tiranë, mbrëmë erdhi në këtë festival, për të dhënë një komunikim të veçantë artistik, përmes instrumentit të tij frymor. Tingujt e instrumentit të tij, vetëm se rëndonin mbi bukurinë e melodisë që përcillej me përkushtim të rrallë nga pianisti Adem Hasani.

Kornisti Ilir Kodhima, ardhjet në Prishtinë i ka mjaft të shpeshta, ndërsa shtoi se këtu ndihet si në shtëpi falë bashkëpunimit dhe miqësisë me artistët e Kosovës.
“Përkundër sallës së ftohtë, unë isha gjithë djersë nga emocionet dhe nga loja së bashku me Ademin dhe Erionën. Unë vi për të satën herë në Prishtinë, që nga viti 98’. Gjithmonë këtu ndihem si në shtëpinë time. Ndihem shumë mirë këtu dhe me pedagogët dhe instrumentistët e Filharmonisë, me të cilët gati se jemi rritur bashkë edhe ku jemi njohur edhe gjatë Akademisë dhe gjatë bashkëpunimeve që kemi pasur me njëri-tjetrin”, tha kronisti Kodhima për KultPlus.

Ilir Kodhima, po ashtu tregoi për KultPlus se mbrëmë përpjekjet e tyre i kishin përqendruar në prezantimin e një programi pak më ndryshe për publikun, duke përfshirë edh elemente të muzikës xhaz nga interpretimi i veprës së Miljenko Prohaska.

“Në një sallë kaq të ftohtë s’kisha luajtur asnjëherë. Është pak e vështirë për neve që nxjerrim tingujt nga muskujt por jemi munduar që sonte të sjellim një program pak më ndryshe, pasi që në muzikë klasike njerëzit zakonisht rrinë serioz dhe vetëm duke vështruar, duke e respektuar kështu artistin. Kurse ne sonte jemi munduar që të ndjekim një program që edhe ne të kënaqemi dhe të jemi më të lirshëm në skenë duke pasur bashkëbisedim midis muzikës dhe publikut. Mendoj çdo gjë ishte në vendin e duhur dhe pjesa e fundit ishte një pjesë kroate e luajtur ndoshta për herë të parë në Kosovë, pra një pjesë e re të cilën jemi munduar ta fusim në muzikën klasike me akorde të muzikës xhaz. Është një pjesët që korno është adaptuar aq mirë në muzikën xhaz sepse kjo është e vështirë pasi që korno është instrument shumë klasik”, tregoi tutje kornisti Kodhima.

Pianisti Adem Hasani, e përcillte lojën e kornistit Kodhima me shumë emocion muzikor, e lojë të bindshme artistike. Ai tha për KultPlus se ndihej shumë i kënaqur nga bashkëpunimi me dy artistët nga Shqipëria.
“Fillimisht do të doja të falënderoj organizatorët e këtij festivali që përmes këtij festivali na mundësoi të njoftohemi dhe të luajmë bashkë me kornistin Kodhima, kjo ka qenë një kënaqësi shumë e madhe për mua. Kjo vepra e fundit që ishte si tip xhazi, si impresionizëm, ishte një vepër shumë interesante që e luajtëm bashkë me kronistin Ilirin. Mua më pëlqeu kjo mbrëmje, edhe publiku ishte i këndshëm, ishim mes miqve, familjarëve. Ka qenë kënaqësi bashkëpunimi me Erionën dhe me Ilirin”, ka thënë pianisti Hasani.

Më pas në skenë u ngjit edhe sopranoja Eriona Gjyzeli, e cila u largua nga skena vetëm pasi mahniti të pranishmit me këngën e vjetër shkodrane “Pranvera filloi me ardhë ”.
“Për mua është hera e parë që marr pjesë në Festivalin e Tunxhit. Isha e ftuar nga kronisti, Ilir Kodhima. Kur Iliri ma paraqiti idenë e bashkëpunimit që unë të jem mysafire e këtij koncerti. Sigurisht nuk hezitova që t’i them një “po” të madhe. Prishtina është shtëpia ime e dytë për katër vite kështu që ndihem shumë mirë pasi që e njoh ambientin- publikun, ky është profesion që kudo që shkon merr vetëm përkëdhelje, duartrokitje dhe kënaqësi. Në realizimin e këtij koncerti kemi qenë shumë spontan, pra nuk kemi harxhuar shumë kohë me njëri-tjetrin, ka mjaftuar vetëm dita e djeshme për të krijuar një lidhje sa i përket materialeve, por kur midis muzikantëve dhe artistëve ekziston tërheqja kimike, çdo gjë shkon shumë mirë, ndoshta kjo është edhe arsyeja që nuk ka lindur nevoja që të punojmë shumë gjatë para koncertit”, theksoi sopranoja Eriona Gjyzeli për KultPlus.

Festivali “Kosova Brass” i cili këtë vit po e sjellë edicionin e dytë të tij, nesër do të sjellë trombonistin nga Prishtina, Betim Krasniqi dhe në piano do të interpretoj pianisti nga Prishtina, Misbah Kaçamaku./ KultPlus.com