Nisin punimet për restaurimin e Muzeut Arkeologjik në Durrës

Në Durrës u zhvillua ceremonia me rastin e fillimit të punimeve për restaurimin e Muzeut Arkeologjik.

Në ceremoni ishin të pranishëm ministrja e Kulturës Elva Margariti, shefi i bashkëpunimit të delegacionit të BE-së në Shqipëri, Hubert Perr, drejtuesja vendore e UNOPS-it, Pamela Lama, këshilltarja për trashëgiminë kulturore e UNOPS Shqipëri, Lejla Hadzic, kryetarja e bashkisë së Durrësit, Emiriana Sako, specialistë të monumenteve, etj.

Kryebashkiakja Sako falënderoi BE për ndihmën e madhe që ka dhënë për Durrësin nëpërmjet programeve të veta EU4Schools dhe EU4Culture Albania.

“Programi EU4culture është një program mjaft i rëndësishëm për qytetin tonë që do të sjellë rivitalizimin dhe futjen në guida ndërkombëtare të disa objekteve të trashëgimisë sonë kulturore”, tha Sako.

Sipas saj, në sajë të këtij programi ka përfunduar restaurimi i kishës së Shën Ndout drejt përfundimit është Torra Veneciane dhe tashmë fillon puna në Muzeun Kombëtar Arkeologjik.

Sako u shpreh se “do të vijojë puna edhe me asete të tjera të qytetit si Muzeu Etnografik ose shtëpia e Aleksandër Moisiut, Hamami dhe kalaja e Ishmit. Ndërhyrjet që do të bëhen në këto site së bashku me ndërhyrjen unike që do të bëhet edhe në Amfiteatrin e Durrësit ku përveç zbulimit të arenës, do të rikonstruktohen dhe të fitojnë funksione të reja rreth 200 objekte përreth, do të sjellë impakt pozitiv në zhvillimin e turizmit gjithëvjetor”.

Këshilltarja për trashëgiminë kulturore e UNOPS Shqipëri, Lejla Hadzic prezantoi për të pranishmit projektin e restaurimit të muzeut.

Muzeu Arkeologjik në Durrës, gjatë muajve janar-gusht të këtij viti është vizituar nga një numër i lartë turistësh vendas e të huaj.

Muzeu Arkeologjik u hap në mars të vitit 1951, nga Vangjel Toçi, i njohur dhe si babai i arkeologjisë durrsake./atsh/ KultPlus.com

Mbyllet Muzeu Arkeologjik në Durrës, do t’i nënshtrohet restaurimit

Muzeu Arkeologjik në Durrës, një objekt i rëndësishëm i ruajtjes së trashëgimisë kulturore të qytetit të lashtë, do të restaurohet.

“Me mbylljen e sezonit turistik, gjatë të cilit Muzeu arkeologjik i Durrësit ishte një nga qendrat më të vizituara dhe aktive, falë programit “EU4Culture” ky muze do t’i nënshtrohet restaurimit dhe muzealizimit, për t’u shndërruar në qendrën model që dëshmon historinë, pasurinë tonë arkeologjike me gjuhën e kohës”, bëri të ditur ministrja e Kulturës, Elva Margariti në rrjetet sociale.

Margariti u shpreh se muzeu do të qëndrojë i mbyllur deri në tetorin e vitit që vjen.

Muzeu Arkeologjik në Durrës, gjatë muajve janar-gusht të këtij viti është vizituar nga një numër i lartë turistësh vendas e të huaj.

Muzeu Arkeologjik u hap në mars të vitit 1951, nga Vangjel Toçi, i njohur dhe si babai i arkeologjisë durrsake. Objektet e para u vendosën në një vilë dykatëshe, duke ekspozuar ato artefakte që ishin zbuluar deri në atë kohë nga nëntoka e zonës së Durrësit.

Por gjatë viteve, godina e Muzeut Arkeologjik ka ndryshuar disa herë vendndodhjen e saj. Sot muzeu ndodhet tek Rruga Taulantia, afër Vollgës. Ka mbi 2 mijë objekte që nga Prehistoria e deri në shek. IV pas Krishtit.

Veprat e shumta monumentale të këtij muzeu janë një dëshmi e gjallë e historisë sonë, të cilat prej vitesh e kanë kthyer ndër muzetë më të vizituar në vend. / KultPlus.com

Veshjet popullore të Beratit ekspozohen në Muzeun Arkeologjik të Durrësit

“Vishu me trashëgimi” titullohet ekspozita e hapur në Muzeun Arkeologjik të Durrësit, një koleksion veshjesh popullore të qytetit të Beratit.

Kjo ekspozitë u hap nga Qendra Muzeore e Durrësit dhe Qendra Muzeore e Beratit, me qëllim njohjen dhe promovimin e vlerave tona kombëtare.

Përmes kësaj ekspozite është sjellë pranë publikut durrsak një pjesë e çmuar e trashëgimisë beratase, veshje autentike dhe origjinale, të fotografuara mjeshtërisht nga Ardian Fezollari në mjediset e Muzeut Etnografik të Beratit.

“Vishu me trashëgimi” është një formë e re edukimi, ndërgjegjësimi e sensibilizimi në shërbim të njohjes së vlerave muzeale e trashëgimisë sonë kulturore. Veshjet popullore janë pa dyshim një pasuri e madhe e kombit shqiptar.

Ekspozita do të jetë e hapur deri në datën 11 shkurt, në pritje të vizitorëve nga qyteti i Durrësit. /atsh/ KultPlus.com

Muzeu Arkeologjik i Durrësit bëhet me audioguidë

Muzeu Arkeologjik i Durrësit i shtohet muzeve që ofrojnë shërbimin e audioguidave.

Ministrja e Kulturës, Elva Margariti u shpreh sot se tashmë vizitorët mund të shijojnë jo vetëm objektet arkeologjike që kanë udhëtuar përmes shekujve, por edhe historinë e tyre.

“Audioguida përbëhet nga 44 qëndrime, me një kohëzgjatje prej 35 minutash, si një ftesë e bukur për të gjithë vizitorët”, tha Margariti.

Audioguida në Muzeun Arkeologjik të Durrësit ofrohet në 2 gjuhë.

Sistemi i audioguidave po aplikohet po ashtu edhe në muzetë e tjerë, sitet turistike dhe kulturore, duke pasuruar eksperiencën e vizitorëve të tyre./atsh/KultPlus.com

Formacioni me 16 vajza instrumentiste, koncert në Muzeun Arkeologjik të Durrësit

Orkestra e harqeve “Sigal” u prezantua  para artdashësve durrsakë me një program të pasur veprash nga autorë të njohur, nga periudha e Barokut në atë të shekullit  të 20-të.

Formacioni i themeluar në vitin 2003 përbëhet nga 16 vajza instrumentiste, që drejtohen nga dirigjenti me përvojë Ermir Dizdari.

Pak ditë më parë kjo orkestër fitoi Çmimin e parë në Takimin ndërkombëtar të përvitshëm të harqeve që zhvillohet në qytetin e Elbasanit.

Në koncertin e djeshëm, bashkë me veprat e kompozitorëve të mëdhenj si J.S. Bach, W.A. Mozart, P.I. Tchaykovsky, F. Schubert apo Strauss, shikuesit duatrokitën gjatë interpretimin e orkestrës së harqeve në veprat e autorëve të shekulllit të 20-të “Tango” nga Astor Piazzolla dhe “Valsi nr 2” nga Dmitri Shostakovich.

Koncerti, që u realizua në mjediset e Muzeut Arkeologjik Kombëtar të Durrësit me siglën e Festivalit të 15-të Ndërkombëtar të Muzikës së Dhomës, u ndoq nga një numër i kufizuar artdashësish për shkak të masave të marra për pandeminë COVID-19.

Edicioni jubilar i këtij festivali ka hasur vështirësi në pjesëmarrjen e artistëve të huaj, ndërsa kanë vijuar koncertet e artistëve vendas./ATSH/ KultPlus.com

Kuinteti i frymës “Durrësi”, koncert në Muzeun Arkeologjik

Kuinteti i frymës “Durrësi” u paraqit mbrëmjen e kaluar me një koncert në sallën kryesore të muzeut arkeologjik të qytetit bregdetar.

Koncerti në kuadër të Festivalit të 15-të Ndërkombëtar të Muzikës së Dhomës solli për dëgjuesit një program të pasur me vepra nga nëntë autorë të njohur vendas dhe të huaj.

Jonela Golemi (flaut), Saimir Kalaja (oboe), Sokol Toto (klarinetë), Ilir Kodhima (korno) dhe Pirro Sota (fagot) janë pjesëtarët e kuintetit “Durrësi” që nga viti 2010.

Aktiviteti artistik i secilit prej tyre përbën bashkëpunime në koncerte brenda dhe jashtë vendit.

Të njohur për promovimin e veprave të shkruara në epoka të ndryshme, këtë herë artistët nga Durrësi dhe Tirana interpretuan pjesë nga Johann Straus (biri), Johann Schrammel, J. Haydn, W. A. Mozart, P. I. Tcaykovski, N. Piovani, T. Greaves, M. Penella, si dhe nga Josif Minga.

Megjithëse në një numër të kufizuar për shkak të pandemisë, shikuesit duartrokitën gjatë interpretimin e ansamblit të frymës “Durrësi”./atsh/ KultPlus.com

Historia dhe magjia e violonçelit bashkohen në një mbrëmje artistike në Muzeun Arkeologjik në Durrës

Falë një bashkëpunimi institucional mes Ministrisë së Kulturës, Drejtorisë Rajonale të Kulturës Kombëtare në Durrës dhe Albanian Society in Development, është mbyllur mbrëmjen e djeshme në Muzeun Arkeologjik në qytetin bregdetar, Muaji i Trashëgimisë Kulturore. Një mbrëmje artistike, ku janë bashkuar historia dhe muzika, ka pasur si qëllim mbrojtjen e trashëgiminisë kulturore, përmes promovimit të vlerave dhe pasurisë të një qyteti si Durrësi.

“Të njohim të shkuarën për të dashur të ardhmen”, ka qenë kjo tema e një bisede profesionistësh, që ka përbërë pjesën e parë të aktivitetit kulturor, “E ardhmja është në origjinë”, e organizuar në përfundim të një sërë aktivitetesh gjatë muajit të trashëgimisë kulturore. Historia mijëra vjeçare e një qyteti antik si Durrësi, personazhe të tij, ngjarjet që kanë lënë gjurmë deri në ditët e sotme, kanë ardhur në një mënyrë tejet të veçantë përballë publikut.

Profesorët e njohur në fushën e arkeologjisë shqiptare Lida Miraj dhe Saimir Shpuza, u vunë përballë pjesëmarrësve, kryesisht të rinj studentë, duke rrëfyer lindjen dhe zhvillimin e qytetit të Durrësit. Emra qytetarësh të rëndësishëm të Durrësit ndër shekuj, ishte një pjesë e bisedës që ka ngjallur interes tek të pranishmit. Pyetjet janë kthyer në një bashkëbisedim, ku janë zbuluar kureshtje, janë sjellë fakte dhe janë bërë të njohur personazhe, ngjarje, rreth një qyteti që i përket agimit të qytetërimit.

E ku tjetër veçse në mjediset e Muzeut Arkeologjik, kjo bisedë profesionistësh do të ngjizej më mirë, ku minutat kanë kaluar pa u ndier, në pjesën e parë të këtij eventi. Por, mbrëmja ka rezervuar të tjera emocione pozitive, që kanë “fluturuar” nga historia tek arti. Koncert-duo. “Zëri njerëzor dhe violonçeli si dëshmitarë”, kështu është titulluar koncerti që është zhvilluar gjatë pjesës së dytë të aktivitetit.

Dy violonçelistët Prof. Pjetër Guralumi dhe Arven Pjetri, kanë interpretuar për publikun, gjatë një koncerti që u mbështet tek elementi i zërit dhe një instrumenti mjaft elitar si violonçeli. Sipas programit , interpretimet ishin përzgjedhur nga kompozitorë me prejardhje ilire dhe arbërore, Niketa i Remesianas (335 – 414), Jan Kukuzeli (1280 – 1370) dhe Gjergj Danush Lapaçaja (1495 – 1570).

Por, në koncert nuk munguan as pjesë nga kryevepra të autorëve të njohur botëror si Antonio Vivaldi (1678 – 1741); Johan Sebastian Bach (1685 – 1750) dhe Luigi Bocherini (1743 – 1805). Duetet e interpretuara nga artistët krijuan momente emocionuese në sallën e Muzeut Arkeologjik, e cila i ngjasoi për disa orë me një oborr mbretëror antikiteti, “pushtuar” nga muzika elitare e tingujve të violonçelit.

Duartokitjet e gjata në drejtim të interpretuesve, të cilët me mjaft mjeshtëri në zgjedhje dhe profesionalizëm në interpretim, mbyllën koncertin me Sinfoninë num 5, koha e parë, “Allegro con brio” nga Ludvig van Bethoven.

Përgatiti: Erjola Azizolli. / KultPlus.com