Muzetë dhe parqet arkeologjike në të gjitha qytetet e vendit po tërheqin gjithnjë e më shumë një numër të lartë vizitorësh vendas dhe të huaj.
Vitet e fundit Ministria e Kulturës ka ndërmarrë nismën që turistët dhe vizitorët të dielave të vizitojnë falas muzetë dhe parqet arkeologjike në të gjithë vendin.
Ministrja e Kulturës, Elva Margariti ftoi sërish sot vizitorët të vizitojnë muzetë dhe parqet arkeologjike, pa biletë.
“Sot është dita perfekte për t’u kaluar me familjen në mes të natyrës. Është e diela e fundit e muajit dhe hyrja në parqe arkeologjike dhe muze është e lirë”, u shpreh Margariti.
Në Shqipëri ndodhen një sërë sitesh arkeologjike si Butrinti, Apolonia, Oriku, Amantia, etj, ndërsa nga kalatë janë kalaja e Gjirokastrës, kalaja e Lëkurësit, Sarandë, kalaja e Krujës, kalaja e Beratit, Kalaja e Petrelës, Tiranë, Kalaja e Ali Pashës, Tepelenë, kalaja e Rozafës, Shkodër etj.
Ndërsa nga muzetë përmendim Muzeun e Ikonografisë “Onufri” dhe Muzeu Etnografik në Berat, Muzetë Arkeologjikë në Durrës, Tiranë, Korçë, Muzeu i armëve dhe Etnografik në Gjirokastër, Muzeu Etnografik në Sarandë, Muzeu Historik Kombëtar, Tiranë, Muzeu Arkeologjik, Tiranë, Muzeu Historik, Shkodër etj./atsh/KultPlus.com
Shqipëria po prezantohet në një tjetër arenë ndërkombëtare, në Bienalen Ndërkombëtare të Arkitekturës në Venecia, e cila zhvillohet nga 20 maj deri në 26 nëntor.
Ministrja e Kulturës, Elva Margariti ishte e pranishme në ceremoninë e hapjes së bienales, ndërsa theksoi në një postim në rrjetet sociale se, “me përsiatjen e pakohë mbi të ardhmen e arkitekturës dhe arkitektëve si faktor ndryshimi të hapësirës publike dhe ambientit, Era dhe Martini na futën në “Laboratorin e ideve” të bienales”.
“Një ndërthurje mes virtuales dhe të prekshmes, ku ndëraktiviteti i propozuar përmes gjuhës digjitale shoqërohet nga zhurma e hapave mbi zhavorr, si lënda bazë e ndërtimit”, theksoi Margariti.
Projekti që përfaqëson Shqipërinë në edicionin e 18-të të Ekspozitës Ndërkombëtare të Arkitekturës në Bienalen e Venecias është “Përsiatje të pakohë ose: Si mësojmë të jetojmë në realitete të sintetizuara.
Ky projekt është paraqitur nga një grup artistësh të rinj: Era Merkuri (arkitekte dhe drejtuese e ekipit), nga Martin Gjoleka (arkitekt), Ani Marku (arkitekt) dhe Geraldo Prendushi (artist digjital).
Ekspozita e 18-të Ndërkombëtare e Arkitekturës, e cila do të zhvillohet nga 20 maji deri më 26 nëntor 2023 në Giardini, në Arsenale dhe në vende të ndryshme përreth Venecias, titullohet: Laboratori i së Ardhmes./atsh/ KultPlus.com
Ministrja e Kulturës, Elva Margariti priti në një takim ministren për Çështjet Federale dhe Europiane e Landit Hessen, Lucia Putrich.
Gjatë takimit Margariti dhe Putrich diskutuan për bashkëpunimin mes dy vendeve tona në fushën e kulturës.
“Ligji për Kinematografinë, mobiliteti i artistëve, organizimi i ekspozitave të lëvizshme, rezidencave të artistëve, ngritja e Parkut të Artit dhe nisma të tjera të Ministrisë së Kulturës ishin disa nga temat mbi të cilat folëm, duke parë mundësitë e shkëmbimeve në të ardhmen”, tha Margariti në një postim në rrjetet sociale./atsh/ KultPlus.com
Në Berat vijon me ritme të shpejta puna për rikonstruksionin e Muzeut Etnografik, një nga më të vizituarit në qytetin e “një mbi një dritareve”.
Ministrja e Kulturës, Elva Margariti, ministri i Brendshëm Bledi Çuçi, kryetarin e Bashkisë së Beratit Ervin Demo dhe kryetari i qarkut Donald Molishti inspektuam punimet në këtë muze.
“I ngritur në një ndërtesë monument kulture e kategorisë I, muzeu, ku ruhet një koleksion prej 1300 objektesh, po i nënshtrohet restaurimit dhe konservimit, si dhe rikonceptimit muzeor nën një dritë të re”, tha Margariti në një postim në rrjetet sociale.
Ky projekt është një investim që po merr jetë falë financimit të Këshillit të Qarkut, Berat në kuadër të projektit “Turizmi Taktik”, Interreg IPA II, Programi i Bashkëpunimit Ndërkufitar Greqi – Shqipëri 2014 – 2020, që do të nxjerrë edhe më në dritë pasurinë etnografike beratase.
Në Muzeun Etnografik në Berat janë ekspozuar objekte të ndryshme si kostumet popullore, improvizimi i një pazari të vjetër, ndërsa në katin e sipërm ndodhen disa shembuj të dhomave me funksionet përkatëse dhe mënyra e jetesës familjare të zonës së Beratit./KultPlus.com
Punimet për restaurimin e urës së Kurçajt në Krujë, e cila ishte dëmtuar nga tërmeti, kanë përfunduar.
Ministrja e Kulturës, Elva Margariti, e cila mori pjesë në ceremoninë e përfundimit të punimeve, u shpreh se, “e ndërtuar në shek. XVIII si pjesë e rrugës së karvanëve që lidhte Krujën me Tiranën, tashmë Ura e Kurçajt është një pikë lidhjeje me historinë”.
“E dëmtuar nga tëmeti i vitit 2019, falë programit EU4CULTURE dhe UNOPS, kjo urë-monument kulture u restaurua dhe është tashmë një atraksion turistik kulturor, në simbiozë me natyrën e mrekullueshme”, theksoi Margariti.
“Bashkë me përfaqësuesin e BE, Alexis Hupin, UNOPS dhe banorëve të zonës përuruam në mënyrë simbolike përfundimin e punimeve”, u shpreh ajo.
Margariti nënvizoi se, “ura u dëmtua nga tërmeti i vitit 2019 dhe u restaurua në kuadër të programit EU4Culture të financuar nga Bashkimi Evropian dhe zbatuar nga UNOPS në bashkëpunim të ngushtë me Ministrinë e Kulturës”.
Në mungesë të burimeve të sigurta historike, historianët besojnë se Ura e Kurçajt është ndërtuar në shekullin XVIII, kohë kur u ndërtuan shumë ura të reja në të gjithë Shqipërinë për të lidhur qendrat kryesore tregtare.
Ura e Kurçaj ndodhet në lumin Zezë në fshatin Kurçaj dhe ishte pjesë e një rruge të hershme karvanësh midis Krujës dhe Tiranës. Në vitin 1984 ura u shpall monument kulture kombëtar i kategorisë së parë dhe mbahet si dëshmi historike e arritjeve inxhinierike të kohës. Sot, ura është një vend i trashëgimisë historike dhe kulturore që lidh rrugët vendase. Aktualisht, ura nuk është e përshtatshme për asnjë lloj transporti dhe mund të vizitohet vetëm në këmbë. /atsh/ KultPlus.com
Ministrja e Kulturës, Elva Margariti, zhvilloi një takim në qytetin e Elbasanit, ku është diskutuar rreth “Bonusit të Rijetësimit”.
Në takim ishte i pranishëm Damian Gjiknuri, drejtues politik i PS në qark, kryebashkiaku i Elbasanit, Gledian Llatja, deputetë të zonës, por edhe dashamirës të kulturës e trashëgimisë.
Ministrja u takua me banorët e Lagjes Kala për të prezantuar nismën e qeverisë dhe u shpreh se, Elbasani të pret ngrohtë edhe në ditë të ftohta dimri.
“Përmes shqetësimeve të ngritura dhe pyetjeve të banorëve u kuptuan më mirë problematikat, çka na ndihmon të përmirësohemi në punën tone”, tha ministrja Margariti.
Ajo u shprehu e sigurt se, pas përvojës së një viti më parë, në këtë edicion do të ketë edhe më shumë aplikime, por edhe më shumë mbështetje.
Bashkia Elbasan bashkë me Ministrinë e Kulturës do t’i vijë në ndihmë banorëve të Kalasë që të aplikojnë dhe përfitojnë.
Kryetari i Bashkisë Elbasan, Gledian Llatja tha se, qëllimi është që në kala të ngrihen ambiente shërbimi, me financim të përbashkët. Qeveria shqiptare do të bashkëfinancojë projektet e qytetarëve të Elbasanit, jo nëpërmjet kredive, por drejtpërdrejt përmes granteve.
Ndërsa Damian Gjiknuri tha në takim se, ruajtja e shtëpive në Lagjen Kala, sjell ruajtjen e identitetit të Elbasanit.
Thirrja e dytë për ata që duan të restaurojnë dhe rijetësojnë një objekt-monument kulture apo që ndodhet në qendra historike dhe lagje brenda kalave, mbyll aplikimet në 10 mars.
Buxheti për Bonusin e Rijetësimit është 50% më i madh se një vit më parë. Për mirëmbajtje dhe rijetësim mbështetja do të jetë deri në 1 milion lekë, ndërsa për rijetësim deri në 6 milionë lekë./ KultPlus.com
Ministrja e Kulturës, Elva Margariti, ka organizuar një takim ku është diskutuar problematika e Urës së Matit dhe mënyrat për zgjidhjen e saj.
Në tryezë kanë qenë edhe përfaqësues të shoqatës “Europa Nostra”: Peter Bond, Pedro Ponce de Leon dhe Lida Miraj.
Ministrja Margariti pasi dëgjoi shqetësimet e tyre, së bashku me drejtorin e Institutit Kombëtar të Trashëgimisë Kulturore, Eugen Kallfani dhe dekanin e Fakultetit të Arkitekturës dhe Urbanistikës, Armand Vokshi, bëri me dije të gjitha nismat e ndërmarra deri më tani, që nga ngritja e grupit ndërinstitucional të punës, nën drejtimin e zv.kryeministres Balluku, hartimin e projektit në bashkëpunim me Universitetin Politeknik të Tiranës dhe institucionet e linjës, me financimin e Ministrisë së Kulturës, si dhe planin e masave në vijim.
“I bëmë ftesën “Europa Nostra”-s të jenë pjesë e zgjidhjes së problemeve, përmes pjesëmarrjes konkrete, me ekspertë e mundësi financimi dhe jo vetëm me evidentim të tyre pasi përballemi me to”, shkruan ministrja Margariti në një postim në rrjetet sociale.
Ura e Matit gjendet pranë qytetit të Milotit, në veriperëndim të vendit. Ajo është vepër e inxhinierit projektues Erwin Schnitter dhe e inxhinierit zbatues Gjovalin Gjadri.
Është e gjatë 480 metra, me pesë harqe celiku. U emërtua si Ura e Zogut në nder të mbretit Zog dhe për 50 vjet mbeti e vetmja urë mbi lumin Mat./atsh/ KultPlus.com
“Bonusi i Rijetësimit” është një nga projektet madhore të qeverisë, prej të cilit deri më tani kanë përfituar 40 aplikantë, pronat e të cilëve po u nënshtrohen restaurimit.
Ministrja e Kulturës, Elva Margariti ndau sot në rrjetet sociale historinë e një emigranti nga Gjirokastra, i cili është përfitues i këtij bonusi, falë të cilit ka shndërruar në bujtinë një godinë tejet të amortizuar.
“Pas vitesh në emigracion, Mariglen Ligu u kthye në vendin e lindjes dhe investoi në sektorin e turizmit. Me mbështetjen e Bonusi i Rijetësimit, ia arriti të shpëtojë një ndërtesë, monument kulture, kategoria II, në Gjirokastër, duke e shndërruar në një bujtinë”, shkruan Margariti.
Bonusi i Rijetësimit nuk mbron vetëm trashëgiminë tonë kulturore e historike, por mbështet mbi të gjitha familjet dhe u vjen në ndihmë qytetarëve duke u ofruar përmes restaurimit të banesave kushte më të mira jetese në shtëpitë e tyre.
Ky projekt do të vazhdojë edhe përgjatë vitit 2023, me një fond shtesë prej 50% të atij aktual.
Në institucionet qendrore të artit në vendin tonë gjatë vitit 2022 janë organizuar gjithsej 832 shfaqje nga 569 shfaqje që u realizuan në 2021-shin.
Shifrat u bënë publike në një postim në rrjetet sociale nga ministrja e Kulturës, Elva Margariti, e cila theksoi se, “krahasuar me vitet e kaluara, ky tregues ka pësuar rritje”.
Përgjatë periudhës 2019-2021 numri i shfaqjeve në institucionet e artit ra për shkak të kufizimeve nga pandemia e COVID-19.
‘Viti 2022 ishte viti i ringritjes për artin dhe kulturën. Vetëm nga institucionet qendrore të artit u realizuan 823 shfaqje, me një rritje të ndjeshme me dy vitet e mëparshme”, u shpreh Margariti.
Në institucionet qendrore të artit e të kulturës përfshihen: Teatri Kombëtar, Teatri Kombëtar i Operës, Baletit dhe Ansamblit Popullor, Teatri Kombëtar Eksperimental “Kujtim Spahivogli”, Teatri Metropol, Qendra Kombëtare Kulturore për Fëmijë, etj./KultPlus.com
Ministra e kulturës Elva Margariti dhe ministrja e Mjedisit dhe Turizmit, Mirela Kumbaro Furxhi, kanë prezantuar në një konferencë prioritetet e këtij viti.
Në ‘epiqendër’ të ministrisë së Mjedisit dhe Turizmit do të jetë pastrimi i lumit Vjosa.
Ndërsa ministres së Kulturës iu soll në vëmendje cirku i Tiranës, ajo u shpreh se janë duke u shqyrtuar disa mundësi për një vendndodhje të posaçme për të.
Përgjatë këtij viti do të vazhdojë projekti për javët ndërkombëtare të kulturës, projekti art në hapësira publike dhe rikonstruksioni i disa prej institucioneve të artit si Galeria Kombëtare dhe projekti I rindërtimit të Teatrit Kombëtar. Gjithashtu ndër projektet madhore të mandatit qeverisës përfshihet edhe Qendra Kulturore Kombëtare për Fëmijë, Mozaiku i Tiranës, Piramida e Tiranës dhe Muzeu Hebraik në Vlorë. /Top Channel /KultPlus.com
Duke bërë bilancin e vitit që lamë pas, ministrja e Kulturës Elva Margariti tha se në çdo nismë të marrë është vlerësuar impakti ekonomik që sjell kjo nismë.
“Ekonomia e së bukurës ka qenë kryefjala e çdo nisme dhe këtë e tregon mirë viti 2022”, tha Margariti.
Në 2022 ka pasur 689 mijë vizitorë vendas dhe të huaj në institucionet e trashëgimisë kulturore. Kjo shifër i afrohet asaj të para pandemisë, ku 54 % e këtyre vizitorëve ishin të huaj. Të ardhurat nga këta vizitorë arritën e 239 milionë lekë të cilat kalojnë në pjesën e mirëmbajtjes, duke u kaluar drejtorive apo qendrave që menaxhojnë ato territore.
Në muzetë kombëtare është arritur numri më i lartë i vizitorëve, ku Muzeu Historik Kombëtar mban rekordin.
Ka pasur projekte të ndryshme për mbështetjen e skenës artistike dhe skenës së pavarur. Fondi i teatrit të të rinjve, ka bërë që vëmendja të mos jetë vetëm në Tiranë por mbështetja e buxhetit të Shtetit të jetë e shpërndarë në të gjithë territorin. Këto nisma, tha ministrja, nuk janë nisma me afat 1-vjeçar dhe do të ketë më shumë buxhet sesa 1 vit më parë, duke parë numrin e aplikuesve në projekte të ndryshme.
Ndër projektet e artit, Margariti ka veçuar një projekt dedikuar artizanëve.
Ata do të mbështeten akoma më shumë pasi në shifrat e dala nga turizmi del se ata janë një pit-stop i turistëve të huaj, prandaj do të kenë një fond të dedikuar./ KultPlus.com
Ministrja e Kulturës, Elva Margariti deklaroi sot se ka nisur puna për restaurimin e Kalasë së Lezhës.
Në një postim në rrjetet sociale, Maragriti shprehet se po punohet për fazën e parë të sondazheve që i paraprin zbatimit të projektit, mbi ndërhyrjen emergjente në murin verior në kalanë mesjetare, ku janë evidentuar çarje.
Sondazhet arkeologjike po kryhen në kuadër të projektit “Stabilizimi emergjent i një pjese të murit verior të Kalasë së Lezhës” me zhvillues UNOPS Shqipëri”.
Sondazhet e studimit të terrenit, ku do kryhet ndërhyrja përforcuese dhe stabilizuese në mure kanë përmasa 5×2 m² dhe thellësi maksimale deri në tabanin e shtresave të mundshme kulturore, ndërkohë që sondazhi do të realizohet në formë trench-I dhe me shkallëzime në zbritje.
Margariti thekson se segmenti ku po realizohet ndërhyrja nuk mund të aksesohet me mjete mekanike dhe i gjithë procesi arkeologjik i sondazhit të propozuar po realizohet manualisht.
Drejtoria Rajonale e Trashëgimisë Kulturore Shkodër, po asiston procesin duke dhënë ekspertizën e saj si dhe duke punuar për pastrimin e zonës së propozuar, nga depozitimet e rrënojave.
Kalaja e Lezhës është pa dyshim një nga objektet më të rëndësishme të trashëgimisë sonë kulturore ku bashkohen gjurmët e arkitekturës ilire, romake, bizantine dhe osmane dhe që dëshmon lashtësinë e qytetërimit të kësaj zone.
Ky monument i rrallë që i ka mbijetuar shekujve, do të marrë një vlerë të shtuar falë projektit të ndriçimit, i cili do të nxjerrë në pah trashëgiminë kulturore, historike, arkitekturore.
Kalaja mesjetare e Lezhës është ndërtuar mbi rrënojat e Akrolisit antik në shekullin IX-të, duke marrë kështu karakterin e një qendre qytetare.
Ajo është rindërtuar disa herë duke filluar që nga Shek. III-të para Krishtit nga Mbretëria Ilire, Bizantinët pas djegies nga inkursionet sllave të vitit 592, nga Dukagjinët vendas pasi u dogj aksidentalisht në vitin 1398, Venedikasit gjatë viteve 1440-1451 duke marrë edhe formën që ka sot.
U dogj dy here në vitet 1478 dhe 1503 nga vetë qytetarët lezhjanë pasi u rrezikua nga osmanët të cilët e përdornin si bazë për të sulmuar vendasit që ishin zhvendosur në Ishullin e Lezhës. Te rrezikuar nga sulmet e mundshme Veneciane nëpërmjet lumit Drin dhe sulmet e kryengritësve Shqiptarë, sulltan Sulejman Selim Bajazit Han (Sulejmani i Madhërishëm) urdhëroi rindërtimin e kalasë në vitet 1521-1522.
Muret e kësaj periudhe janë të mbivendosura mbi ato veneciane dhe kësaj periudhe i përket edhe restaurimi i Xhamisë Sulejmanie dhe muret turke që ndajnë oborrin e brendshëm me atë të jashtëm brenda hapësirës së Kalasë.
Kjo kala dominon deri në bregun e detit dhe mbyll pothuajse gjithë rrugët për në brendësi. Ana Komnena e quajti kështjellën e Elissonit, “një kështjellë në ajër, syri i djathtë i Durrësit”.
Sot në kalanë e Lezhës mund të shihet, përveç peizazhit të bukur e relaksues, edhe teknikat dhe fazat e ndryshme të ndërtimit mijëravjeçar të vendosura sipër njëra-tjetrës, si dhe një sipërfaqe rreth 1.5 ha me ambiente çlodhëse./atsh/ KultPlus.com
Numri i vizitorëve në muzetë kombëtarë në të gjithë vendin ka shënuar një rritje domethënëse, duke arritur në mbi 260 mijë vizitorë gjatë 2022.
Ministrja e Kulturës, Elva Margariti ndau statistikat e vitit të kaluar duke theksuar se, “muzetë kombëtarë gjithnjë kanë tërhequr vëmendjen e vizitorëve vendës e të huaj, si tregimtarë të së shkuarës”.
Sipas saj, statistikat për vitin 2022 tregojnë për një interes në rritje.
Nga janari deri në dhjetor të 2022 muzetë u vizituan nga 267 599 vizitorë. Ndërsa për të njëjtën periudhë në vitin 2021 u regjistruan 132 223 vizitorë dhe në 2020 u vizituan nga 49 288.
Muzetë kombëtarë janë ndër atraksionet më të preferuara për vizitorët e huaj, pasi shfaqin interes për të parë nga afër objektet dhe për të mësuar më shumë rreth historisë së Shqipërisë. / KultPlus.com
Ministrja e Kulturës, Elva Margariti, promovoi sot, dy botime të Institutit Kombëtar të Trashëgimisë Kulturore.
Bëhet fjalë për numrin e parë të “Revistës Arkeologjike”, një botim që hedh dritë mbi punën e një prej sektorëve më të rëndësishëm në ruajtjen e trashëgimisë kulturore, që është Shërbimi Arkeologjik. Si dhe revistën “Monumentet”, në numrin e saj të 61-të, që është një dritare jo vetëm për njerëzit e fushës, që shkëmbejnë arritjet më të fundit me njëri-tjetrin, por edhe për studentët dhe një publik më të gjerë me interesa të posaçme për monumentet.
“Revista Arkeologjike” është rezultat i punës së Shërbimit Arkeologjik, falë punës së të cilit arrihet zbulimi dhe shpëtimi i shumë gjetjeve arkeologjike në të gjithë territorin e Shqipërisë dhe është e rëndësishme që ky aktivitet, zbulimet, dokumentimet, përfundimet të shkojnë edhe te publiku, jo vetëm ai i specializuar.
“Sa i përket “Monumenteve”, kjo revistë ka qenë një guidë në fushën e vet, falë drejtimit të prof. dr. Pirro Thomo dhe bashkëpunimit me emra të nderuar të trashëgimisë kulturore”, u shpreh ministrja.
“Mirënjohja për të gjithë bashkëpunëtorët e kësaj reviste, le të jetë një ftesë për më shumë pjesëmarrje në prezantimin e një pune të përbashkët në ruajtje të pasurisë sonë”, deklaroi Margariti gjatë eventit të mbajtur në sallën “Tefta Tashko Koço” të Ministrisë së Kulturës./atsh/ KultPlus.com
Bashkë me pianon e re “Steinway & Sons”, Teatri Kombëtar i Operës dhe Baletit tashmë ka në përdorim edhe dy piano të vjetra, në kushte optimale pune.
Ministrja e Kulturës, Elva Margariti njoftoi në rrjetet sociale se brenda kontratës së blerjes së pianos së re, u përfshi edhe restaurimi i Grand Piano Steinway & Sons, prodhim i 1989-ës dhe Grand Piano Yamaha, prodhim i 1988-ës në Japoni.
“Pas ndërrimit të kokave të çekiçit dhe krahëve, i fllanxhave, zëvendësimit të tasteve dhe lustrimit të tastierës, zëvendësimit të telave të dëmtuar, riparimit të sistemit të pedaleve dhe elementeve të brendshëm të pianos, pastrimit dhe akordimit, pianot duken si të reja”, informon ministrja.
Steinway është një kompani gjermano-amerikane e prodhimit të pianove, e themeluar në 1853, në Manhattan nga gjermani Heinrich Engelhard Steinweg. Pianot Steinway&Sons njihen botërisht për tingullin dhe mjeshtërinë e ndërtimit. Sipas pjesës më të madhe të muzikologëve, tingulli i prodhuar nga një Stainway s’ka të krahasuar. / KultPlus.com
E pranishme në ceremoninë e vendosjes së gurthemelit të teatrit te ri kombëtar, ministrja e Kulturës, Elva Margariti tha se Tiranës sot i shtohet një pikë referimi, i shtohet një hallkë e një zinxhiri të madh investimesh. “Teatri Kombëtar është hallka e një dinjiteti të munguar, jo vetëm të artistëve por i të gjithë komunitetit të banorëve dhe komunitetit artistik. Tirana është kryeqytet vibrant dhe s’ka gjë më të bukur se të celebronim një vit të tërë bashkë si Vitin Europian të Rinisë”, u shpreh Margariti.
Duke iu drejtuar artistëve të pranishëm në ceremoni, Margariti u shpreh se “ua kemi borxh sakrificën, duke iu kthyer dinjitetin e munguar”.
“Ju sot, jeni të parët që nderoheni, por duke parë edhe drejt fëmijëve tanë, që edhe ata të jenë krenarë që të jenë pjesë e kësaj Shqipërie”, tha ministrja e Kulturës.
Më pas, Margariti krahasoi buxhetin e qeverisë Rama për Kulturën, me qeverinë e vitit 2013, kur u investuan afro 1 milion dollarë, ndërsa këtë vit buxheti është 20 milionë dollarë. Sipas ministres, kjo qeveri nuk e shikon kulturën si një stoli, por si kryefjalë të një zhvillimi.
Ndërsa duke iu referuar arkitektit të teatrit të ri, ministrja Margariti tha se në të gjithë botën bëhet garë për të pasur firmën e këtyre arkitektëve në qytetet e tyre, për t’u kthyer në simbole të zhvillimit./atsh/ KultPlus.com
Ministrja e Kulturës, Elva Margariti mori pjesë sot në takimin e Këshillit Koordinues të Diasporës, që zhvilloi punimet në Tiranë.
Duke e vlerësuar këtë takim si të një rëndësie të veçantë, Margariti tha se, “në Këshillin Koordinues të Diasporës, ndarë në një tryezë diskutimi çdo hap të hedhur nga Qeveria Shqiptare për të mbajtur fort lidhjet mes shqiptarëve, kudo që janë shpërndarë nëpër botë dhe Shqipërisë”, teksa shtoi se, “një nga këto fije lidhëse është padyshim kultura”.
“Nuk mjafton të shkojmë ku ndodhen shqiptarët, por t’i ftojmë ata këtu”, tha ministrja.
Margariti vuri në dukje se, nisma të tilla ftuese kemi ndërmarrë përgjatë gjithë vitit 2022.
“Mjaft të përmendim Bonusin e Rijetësimit që inkurajon shqiptarët të investojnë në shtëpitë e tyre në qendra historike e arkeologjisë apo Javët Kulturore Ndërkombëtare, gjatë të cilave erdhën artistë të shkëlqyer, që rivendosën lidhjet me vendin e origjinës”, tha Margariti. /atsh /KultPlus.com
Universiteti i Arteve është një tjetër institucion i arsimit të lartë ku ndërhyrjet për rijetëzimin e ambienteve vijojnë.
Aktualisht në këtë godinë po kryhet rikonstruksioni i plotë i sallës së koncerteve, për t’i kthyer gjithë shkëlqimin e humbur ndër vite.
Kryeministri Edi Rama i shoqëruar nga Ministrja e Kulturës Elva Margariti, ishin në këtë kantier të hapur, ku prej disa kohësh punohet për ta kthyer sallën e koncerteve në dispozicion të studentëve, pedagogëve si dhe komuniteteve të tjera.
“Këtu në fakt është gjithë godina që është monument kulture i kategorisë së dytë, që do të thotë se ka vlerë për fasadën, por ne e kemi trajtuar të gjithën si monument i kategorisë së parë që do të thotë kemi ruajtur pjesën më të madhe, rreth 90% të elementëve të dekorit. Gjithashtu në holl do të rikuperojmë dhe hapësira që nuk kanë ekzistuar. Do të kemi 455 spektatorë në sallën e re, që do të jetë një nga sallat që më në fund i kthehet komunitetit”, u shpreh ministrja e Kulturës.
Salla e koncerteve është pajisur me teknologji të fjalës së fundit ku një nga risitë është gropa skenike e lëvizshme.
Gjithashtu salla është plotësuar me çdo element të munguar më parë dhe në përfundim të projektit, do të ofrojë kushte e standarde shumë të larta si për artistët, ashtu dhe për spektatorët./atsh/ KultPlus.com
Pas konkurrimit të hapur dhe me Vendim të Këshillit të Ministrave, regjisori Altin Basha është drejtori i ri i Teatrit Kombëtar.
Ministrja e Kulturës, Elva Margariti, postoi sot, në rrjetet sociale një foto ku shfaqet ajo me drejtorin e ri të TK, Altin Basha. Ministrja ka falenderuar paraardhësin e Bashës, Hervin Çulin, i cili drejtoi Teatrin Kombëtar për dy mandate dhe më pas uroi drejtorin e ri.
“I uroj suksese Bashës në këtë mision, që do ta udhëheqë Teatrin Kombëtar drejt hapësirave të reja, të denja për artistët dhe spektatorin”, shkruan ministrja e Kulturës, Margariti.
Këshilli i Ministrave vendosi në mbledhjen e djeshme për emërimin në detyrë të drejtorit të Teatrit Kombëtar.
Basha mbante deri para pak ditësh postin e drejtorit të Teatrit Eksperimental “Kujtim Spahivogli”. Këtë detyrë e mori vetëm një vit më parë./ KultPlus.com
Në kuadrin e Bienales së ardhshme Ndërkombëtare të Arkitekturës në Venecia, Ministria e Kulturës shpalli thirrjen për paraqitjen e projektit për pavijonin shqiptar në Bienalen e Arkitekturës që do të jetë e hapur për publikun nga 22 maj – 26 nëntor 2023.
Tema e kësaj bienaleje do të jetë “Laboratori i së ardhmes”. Ajo është përzgjedhur nga kuratorja e edicionit të 18-të, Lesley Lokko.
“Në Evropë flitet për pakicat dhe diversitetin, por e vërteta është se pakicat perëndimore janë shumica globale, diversiteti është norma jonë. Ka një vend në këtë planet ku të gjitha këto çështje të drejtësisë, racës, shpresës dhe frikës bashkohen dhe ndërthuren. Afrika. Antropologjikisht ne jemi të gjithë afrikanë. Dhe ajo që ndodh në Afrikë, na ndodh të gjithëve”, është shprehur kuratorja e Bienales.
Ministria e Kulturës hapi thirrjen për projektide të frymëzuara nga një vëzhgim i kujdesshëm i arkitekturës bashkëkohore dhe i shoqërisë shqiptare, sidomos aty ku kjo bën ndryshimin, si dhe mjetet vizuale përmes të cilave ato do t’i komunikohen publikut të gjerë dhe profesionistëve.
Ministria e Kulturës inkurajoi të gjithë kandidatët të bashkëpunojnë me kuratorë vendas dhe/ose të huaj që kanë përvoja respektive në organizime dhe pjesëmarrje në evente të ngjashme.
Përzgjedhja e kandidatëve do të kalojë në dy faza: faza e parë është ajo e përzgjedhjes së projektideve më të mira dhe faza e dytë është ajo e paraqitjes së projekteve të plota të pavijonit shqiptar. Projekti dhe ekipi fitues do të shpallet brenda datës 16 janar 2023. / KultPlus.com
Ministrja e Kulturës, Elva Margariti e shoqëruar nga kryetari i bashkisë së Elbasanit, Gledian Llatja mori pjesë sot në një takim me punonjës të bibliotekës së Elbasanit dhe të rinj, në kuadër të Tetorit të Librit.
Në takimin e zhvilluar në një nga bibliotekat më të pasura, sidomos me fonde albanologjike e balkanologjike, “Qemal Baholli”, u diskutua për librin si dhe problematikat e të rinjve dhe qytetit të Elbasanit, në përgjithësi.
Ministria e Kulturës dhe Biblioteka Kombëtare dhuroi 133 tituj librash për Bibliotekën Publike duke e pasuruar me vepra të autorëve tanë klasikë, nobelistë e klasikë të huaj, si dhe botime origjinale të para Luftës II Botërore.
Tetori është një muaj, i cili e lidh lexuesin më shumë me librin dhe nevojën që ata kanë për t’u mbështetur te leximi. / KultPlus.com
Mbrëmë në Teatrin Kombëtar të Operas dhe Baletit është dhënë për herë të parë ‘Messa Da Requiem’ e kompozitorit Giuseppe Veri e që erdhni nën dirigjimin e dirigjentit Jacopo Sipari, shkruan KultPlus.
Minstrja e Kulturës në Shqipëri, Elva Margariti, tha se kjo ishte një mbrëmje emocionuese shpirtërore që bëri bashkë artistë të Shqipërisë, Kosovës e ndërkombëtarë.
Në vijim gjeni postimin e saj:
Një mbrëmje emocionuese, shpirtërore, që bëri bashkë artistë të Shqipërisë, Kosovës e ndërkombëtarë!
“MESSA DA REQUIEM” nga Giuseppe Verdi, dirigjuar nga Jacopo Sipari di Pescasseroli, në krye të Orkestrës Simfonike të TKOB dhe Orkestrës Simfonike të RTSH-së, me solistë: Eva Golemi, Ivana Hoxha, Raffael Abete, Vittorio de Campo.
Një punë e mrekullueshme nga dirigjentët e korit Dritan Lumshie e Baki Jashari, që udhëhoqën korin eTKOB dhe korin e Filarmonisë së Kosovës./ KultPlus.com
Në Durrës u zhvillua ceremonia me rastin e fillimit të punimeve për restaurimin e Muzeut Arkeologjik.
Në ceremoni ishin të pranishëm ministrja e Kulturës Elva Margariti, shefi i bashkëpunimit të delegacionit të BE-së në Shqipëri, Hubert Perr, drejtuesja vendore e UNOPS-it, Pamela Lama, këshilltarja për trashëgiminë kulturore e UNOPS Shqipëri, Lejla Hadzic, kryetarja e bashkisë së Durrësit, Emiriana Sako, specialistë të monumenteve, etj.
Kryebashkiakja Sako falënderoi BE për ndihmën e madhe që ka dhënë për Durrësin nëpërmjet programeve të veta EU4Schools dhe EU4Culture Albania.
“Programi EU4culture është një program mjaft i rëndësishëm për qytetin tonë që do të sjellë rivitalizimin dhe futjen në guida ndërkombëtare të disa objekteve të trashëgimisë sonë kulturore”, tha Sako.
Sipas saj, në sajë të këtij programi ka përfunduar restaurimi i kishës së Shën Ndout drejt përfundimit është Torra Veneciane dhe tashmë fillon puna në Muzeun Kombëtar Arkeologjik.
Sako u shpreh se “do të vijojë puna edhe me asete të tjera të qytetit si Muzeu Etnografik ose shtëpia e Aleksandër Moisiut, Hamami dhe kalaja e Ishmit. Ndërhyrjet që do të bëhen në këto site së bashku me ndërhyrjen unike që do të bëhet edhe në Amfiteatrin e Durrësit ku përveç zbulimit të arenës, do të rikonstruktohen dhe të fitojnë funksione të reja rreth 200 objekte përreth, do të sjellë impakt pozitiv në zhvillimin e turizmit gjithëvjetor”.
Këshilltarja për trashëgiminë kulturore e UNOPS Shqipëri, Lejla Hadzic prezantoi për të pranishmit projektin e restaurimit të muzeut.
Muzeu Arkeologjik në Durrës, gjatë muajve janar-gusht të këtij viti është vizituar nga një numër i lartë turistësh vendas e të huaj.
Muzeu Arkeologjik u hap në mars të vitit 1951, nga Vangjel Toçi, i njohur dhe si babai i arkeologjisë durrsake./atsh/ KultPlus.com
Kulla veneciane, në zemër të Durrësit shumë shpejt do të hapet për vizitorët.
Lajmin e bëri të ditur ministrja e Kulturës, Elva Margariti e cila pa sot nga afër ecurinë e punimeve në këtë monument simbolik të qytetit të Durrësit.
“Restaurimi i objektit është në fazat përfundimtare dhe do të nisë procesi i plotësimi i tij me pajisjet që do t’i shtojnë kësaj qendre edhe aspektin multimedial, që do të shërbejnë për informimin dhe orientimin e vizitorëve në gjithë qytetin e Durrësit”, shprehet ministrja.
Kulla Veneciane me përfundimin e restaurimit do të shndërrohet në një qendër informacioni dhe interpretimi të historisë së qytetit.
Falë programit EU4Culture, kulla do të “flasë” përmes programeve teknologjike multimediale.
Me një buxhet total prej 40 milionë euro, EU4Culture shtrihet në të gjithë territorin e prekur nga tërmeti i 26 nëntorit të vitit 2019 me ndërhyrje të planifikuara në një sërë objektesh të Trashëgimisë Kulturore. Përveç restaurimit, do të investohet në rijetëzimin e siteve të përzgjedhura të trashëgimisë kulturore, duke përfshirë përmirësimin e shërbimeve dhe kushteve të vendndodhjes. / KultPlus.com