“Pianodrom 10” sjell 28 artistë prestigjiozë shqiptarë e të huaj

Festivali ndërkombëtar “Pianodrom” rikthehet këtë nëntor, me emra prestigjiozë artistësh shqiptarë e të huaj. Pianodrom, në edicionin e tij të 10-të sjell artistë, si i mirënjohuri Elvin Hoxha Ganiyev, i cili do të interpretojë në violinë sonata botërore e shqiptare, në Hollin e Teatrit Kombëtar të Operas e Baletit.

Një tjetër shqiptare e talentuar, pjesë e Pianodrom 10, do të jetë pianistja Rejsi Prosi Graz.

Pianodrom vjen për publikun me aktivitete të shtrira në disa data për të mbledhur sa më shume dashamirës të muzikës dhe për të qenë edhe pjesë e atmosferës së festave të Nëntorit.

Pianodrom vlerësohet si pol i kulturës dhe festivali më i madh në Shqipëri i modernizimit të kompozicionit shqiptar.

Në “Pianodrom 10” do të performojnë 14 artistë shqiptarë dhe 14 të huaj, të cilët do të luajnë 30 vepra shqiptare dhe 21 të repertorit botëror.

Kështu, në kuadër të festivalit, veç interpretimeve të Ganiyev, do të ketë koncerte me pjesëmarrjen e kuartetit AMAI Vjena, Kosti Detit, Klejda Tares, si dhe yjeve të interpretimit nga profesorati i Universitetit të Arteve në datat 26-27 nëntor dhe 12-22 dhjetor në Teatrin Kombëtar të Operas dhe Baletit dhe në datat 5-16 dhjetor në Universitetin e Arteve.

Ky event mbështetet nga Bashkia Tiranë, Ambasada greke, TKOB dhe Universiteti i Arteve.

Presidenti i festivalit është kompozitori i njohur Aleksandër Peçi.

Kompozitori është autori më i ekzekutuar jashtë Shqipërisë në këto 30 vite, me çmime të shumta. Si themelues i “Pianodrom” me 106 produksione për 9 vjet dhe një nga themeluesit e shoqatës “New Music”, është promotor i zhvillimeve moderne në kompozicionin shqiptar. Si profesor ka nxjerrë nga emrat më të rëndësishëm në brezin e ri të kompozitorëve. / KultPlus.com

Tre artistë shqiptarë nga Konservatori i Vjenës në ‘Pianodrom’

Laureati i mbi 40 çmimeve ndërkombëtare muzikore, Kosti Deti dhe dy artiste të talentuara të violinës e pianos, Janela Nini dhe Kristi Hifzi do të performojnë nesër në Tiranë, në sallën “Tonin Harapi”, në një koncert në prag të Krishtlindjeve që sjell atmosferën vjeneze në kryeqytetin shqiptar.

Koncerti i cili duhej të mbahej më 14 dhjetor u anulua në Vjenë për shkak të masave të reja kufizuese të pandemisë dhe vjen të martën e 21 dhjetorit në Tiranë, si pjesë e formatit “Pianodrom” që sjell Vjenën në Tiranë në prag  të Krishtlindjeve e Vitit të Ri.

Koncerti është riskeduluar për t’u shfaqur në Vjenë më 8 mars, por publiku shqiptar do të ketë mundësinë ta ndjekë atë në Tiranë.

Kosti Deti është laureat i Artë i mbi 40 çmimeve ndërkombëtare, 10 nga të cilat i ka vetëm në vitin 2021. Kompozitori Aleksandër Peçi e përshkruan si artist që magjeps, që hipnotizon publikun. Bashkë me të, performojnë edhe dy artiste nga konservatori i Vjenës, dy nimfa të violinës e pianos, Janela Nini dhe Kristi Hifzi.

Koncerti pritet të sjellë super atmosferë me super instrumentistë në prag të Krishtlindjeve ku publiku mund të shohë sesi artistët shqiptarë janë maturuar në vitet e tyre të studimit dhe performancave jashtë vendit./atsh/KultPlus.com

“Pianodrom”, 5 ‘eksploratorët’ sjellin polifoninë me tinguj avangardë

5 artistë, muzikantë të talentuar sollën mbrëmjen e djeshme për publikun krijimet e tyre, si “eksplorim” në polifoninë shqiptare me tingujt e pianos. Koncerti u mbajt për artdashësit në sallën “Tonin Harapi” të liceut artistik “Jordan Misja”, në kuadër të edicionit të nëntë të Festivalit “Pianodrom”.

Ky koncert përkoi me 25 nëntorin e përfshirjes së isopolifonisë shqiptare në UNESCO, si pjesë e trashëgimisë kulturore botërore. Sipas kompozitorit Aleksandër Peçi, i cili ka kuruar koncertin, janë 5 “arkitektë” që kanë nisur një projekt të ri.

“Muzika botërore nuk është marrë me polifoninë shqiptare, por edhe vetë muzika shqiptare më shumë ka gërmuar materialin melodiko-pentatonik në sipërfaqe, pa hyrë thellë në galeritë e ngrehinës polifonike”, shprehet Peçi.

“Jam absolutisht krenar, se “Pianodrom” është festivali më avangard në muzikën e kompozicionin shqiptar”, tha Peçi.

Veprat e luajtura në skenën e “Tonin Harapit” janë 8 kompozicione moderne, “Albphonia 2”, “Muzikë kabaistike”, “Ves”, “Toc- Alb- atta”, “Fragment nga Sonata n. 2 Argjiro”, “PolifonISO”, “Vajzë e valëve”, “Baticë-zbaticë dallgësh polifonike” në interpretimin e një ekipi fantastik: Merita Tërshana, Laura Lila, Paola Budani, Mimoza Kosturi.

Sopiqoti: Muzikë kontemporane bazuar mbi “Mbeçë more shokë mbeçë”

“Albphonia 2” titullohet vepra e kompozitorit Kris Sopiqoti, e cila hapi koncertin e cila u luajt në piano nga Paola Budani. Kompozitori Sopiqoti u shpreh pas koncertit se “AlbPhonia 2” është shkruar posaçërisht për këtë ngjarje artistike, bazuar mbi këngën “Mbeç more shokë, mbeçë”.

“Kënga në vetvete është një lamento e kënduar, kështu që duke u bazuar në melosin dhe ‘gjendjen emocionale’ të këngës, u shkrua një vepër për piano, e sjellë në kohën tonë me teknikat dhe mendimin muzikor kontemporan, por duke u ndjerë që është polifoni dhe muzikë shqiptare”, u shpreh kompozitori.

Sopiqoti shpjegon se “Albphonia 2” mban këtë titull pasi është vepra e dytë nga albumi “Albphonia”, i cili është një album me vepra solo për të zbuluar skajet dhe teknikat e instrumenteve të ndryshëm por gjithmonë bazuar në muzikën tonë, duke vënë në dukje se emri formohet nga dy fjalë Alb (Albania) dhe Phonia (tingull).

“Falënderoj profesor Peçin që mendon vazhdimisht për muzikën kontemporane shqiptare dhe si nismëtar i këtij koncerti”, u shpreh kompozitori Kris Sopiqoti.

Kompozitori shton se muzika kontemporane duhet të luhet dhe të shkruhet më shumë, ndërkohë që është e pëlqyeshme dhe e domosdoshme për edukimin e publikut artdashës.

Kris Sopiqoti ka mbaruar Universitetin e Arteve në klasën e mjeshtrit Aleksandër Peçi për kompozicion dhe tashmë është pedagog i jashtëm në këtë universitet. Ai ka qenë pjesë e programit Erasmus në konservatorin “Giusepe Tartini” të Triestes në Itali, në klasën e Fabio Nider, ku u vlerësua me 30/30 Lode.

Kompozitori ka marrë pjesë në mjaft koncerte, ashtu sikundër kompozimet e tij janë luajtur edhe në sallën e Universitetit të Arteve, ndërsa vepra e tij “AlbPhonia” për klarinetë solo u luajt nga Xhovani Dimo në klarinetë në Kolumbi dhe Ansambli i Dhomës Sirius premierë në Australi, e performuar nga Ian Sykes në vitin 2019. Kjo vepër është luajtur edhe nga Jerome Comte i Ansamblit Kontemporan të Parisit

Kompozitori Kris Sopiqoti po ashtu bashkëpunon me Ansamblin Kontemporan “Enydra ensemble“ të Venecias./atsh/KultPlus.com

Sot interpretohet premiera shqiptare e veprës së Librun Jupollit në festivalin pianistik PIANODROM

Sot interpretohet premiera shqiptare e veprës së Librun Jupullit, “Micro-suite en blanc et noir” në festivalin pianistik PIANODROM në Tiranë.

Vepra për piano solo është shkruar enkas për garën e kompozitorëve të rinj në Conservatoire Frédéric Chopin në Paris më 2015 ku vepra mori vendin e dytë (pa vend të parë) me premierë në Konsevratorin “Chopin” nga pianistja koreane Soyeon Kwon.

Faleminderit Aleksandër Peçi për ftesën në festival dhe faleminderit për Z.Kristina Petrollari Ina Piano për interpretimin e veprës.

Në pamundësi të jem prezent në koncert, ju dëshiroj koncert të suksesshëm të gjithë ekipit të festivalit dhe kolegëve tjerë!“, ka shkruar kompozitori Jupolli në rrjetet sociale. / KultPlus.com