Veniten shpresat për të gjetur të mbijetuar të tjerë në rrënojat e Bejrutit

Janë duke u venitur shpresat në Bejrut për gjetjen e ndonjë personi tjetër të mbijetuar nën rrënojat e ndërtesave të shembura nga shpërthimi masiv i muajit të kaluar.

Punëtorët e ekipeve të kërkim-shpëtimit filluan të kërkojnë në rrënoja pasi një pajisje me sensor dha sinjal për shenja të mundshme të personave të gjallë, shkruan BBC, transmeton KultPlus.

Megjithatë, punëtorët kilianë e përfunduan ditën e dytë të kërkimeve pa asnjë rezultat.

Bejruti mbajti një minutë heshtje të premten për ta shënuar njëmujorin e shpërthimit, ku mbetën të vrarë rreth 200 persona.

Mijëra persona të tjerë u lënduan nga shpërthimi që u shkaktua prej 2,750 tonëve të nitratit të amonit, që është lëndë shpërthyese.

Pavarësisht se qeveria libaneze dha dorëheqje disa ditë pas shpërthimit, protestuesit nuk u qetësuan dhe u përplasën me policinë për disa net me radhë.

Sipas zyrtarëve libanezë, një muaj pas shpërthimit, shtatë persona ende mbeten të zhdukur. / KultPlus.com

Qeveria e Kosovës dhe Ambasada gjermane ofrojnë strehim për 800 vetë në Parkun Inovativ në Prizren pas tërmetit në Shqipëri

Qeveria e Kosovës dhe Ambasada e Gjermanisë në Kosovë kanë vendosur që ta lëshojnë Parkun e Inovacionit dhe Trajnimit në Prizren si strehim të përkohshëm për të gjithë njerëzit e prekur nga tërmeti tragjik në Shqipëri, shkruan KultPlus.com

Kryeministri i Kosovës në largim, Ramush Haradinaj, këtë lajm e ka bërë të ditur përmes një statusi në Facebook.

Këtu keni statusin e tij të plotë:

“Parku Inovativ Trajnues në Prizren, do të jetë në dispozicion si strehë e përkohshme e të gjithë atyre që kanë pësuar nga tërmeti tragjik që goditi Shqipërinë.

Së bashku me Ambasadën Gjermane në Prishtinë, zyrën e GIZ-it në Kosovë dhe Komunën e Prizrenit, kemi nisur përgatitjet e nevojshme për pranim-strehim, kujdes shëndetësor dhe ushqimor në Parkun Inovativ dhe Trajnues.

Deri në 800 shtretër dhe hapësira akomoduese do të jenë në dispozicion për banorët që kanë pësuar nga kjo tragjedi.

Si Kryeministër në detyrë menjëherë kam vendosur komunikim me institucionet përgjegjëse shtetërore në Shqipëri për të koordinuar hapat e mëtejmë për zbatim të këtij aksioni”. / KultPlus.com

Obsesioni për tragjeditë në ekranet e vogla!

Suksesi i befasishëm i dramave të bazuara në fakte shkatërrimtare, si “Chernobyl” (Çernobili) dhe “When They See Us” (Në sytë e tyre), na flet për publikun që nuk e kërkon gjithmonë eksapizmin, shkruan Rebecca Nicholson. Pjesë të shkrimit të saj, Telegrafi sjell më poshtë.

Para se të përfundonte, seriali “Chernobyl” është votuar në IMDb si më i miri i të gjitha kohëve. Kjo ka nxitur kompaninë “Sky Studios” – që bashkë-prodhoi serinë me HBO-në – që të dyfishojë investimet në përmbajtje origjinale, e të konkurrojnë me lojtarët tjerë, si Netflix.

Netflix ndërkohë po ia del mbanë: seriali me regji nga Ava DuVernay, “When They See Us”, është më i shikuari – që nga premiera më 31 maj.

Të dy ngjarjet e vërteta, që janë të tmerrshme e jo eskapiste, po i tërheqin shikuesit.

Përgjatë katër episodeve brutale, “When They See Us” dramatizon rastin kur disa djem me ngjyrë dhe hispanikë akuzohen gabimisht nën akuzat për përdhunimin e një të bardhe që bënte vrap nëpër Central Park të Nju-Jorkut, e që gjoja u rrah dhe u la e vdekur. Ata që nuk e dinë rastin, tronditen nga dështimi i drejtësisë; ata që e dinë mbajnë mend se adoleshentët u dënuan me nga gjashtë deri 14 vjet dhe se u liruan kur fajtori i vërtetë u rrëfye në vitin 2002.

DuVernay shfaq shkatërrimin që shkakton hetimi i egër dhe paragjykues racist policor. I shohim familjet dhe jetët e shkatërruara, jo vetëm nga padrejtësia, por edhe nga sistemi i korruptuar penal. Kjo nuk është e lehtë për t’u parë. Madje, episodi i fundit që përqendrohet tek Korey Wise, i vetmi nga pesë të pestët që u dërgua në burgjet e të rriturve, është tronditës, i dhunshëm… i tmerrshëm!

Ngjashëm, shikuesit kanë mundur të dinë se çfarë pritet nga pesë episodet e shkëlqyera të serisë “Chernobyl”, që rindërton me profesionalizëm fatkeqësinë më të keqe bërthamore në botë dhe pasojat e saj. Seriali nis me vetëvrasjen e një burri, nën mbikëqyrjen e KGB-së, dhe shpejt kalon te shpërthimi. Nga aty, kalohet te tentimet për të shmangur dështimin, e për të dëshmuar pastaj koston njerëzore të asaj që ndodhi dhe sakrificat që u bënë.

Si tregime të vërteta, “Chernobyl” na paralajmëron për rreziqet e mashtrimeve të qeverisë dhe manipulimin e fakteve, të cilat nuk duken aq të largëta. “When They See Us” përdor pamjet arkivore të Donald Trumpit duke dhënë një intervistë raciste dhe reklamën e tij të tmerrshme ku bën thirrje për kthimin e dënimit me vdekje. Pasojat e të dy dramave i shohim në të sotmen.

Years and Years” (Vite e vite), seria me regji nga Russell T Davies që do të nis së shpejti në HBO, nuk e tregon të vërtetën si seritë e sipërpërmendura, por imagjinon të ardhmen e afërt që mund të ndodhë: luftën bërthamore, katastrofën klimatike, ngritjen e të djathtës ekstreme, krizën masive të refugjatëve… Kjo është ftesë për stres dhe shqetësim; nuk është përvojë e mirë ta shikosh. Por, megjithatë lë gjurmë dhe kërkon vëmendjen tonë. /KultPlus.com