‘Sillu në mënyrë që, në vend të mëshirës, të gëzosh respekt’, poezia e Nënë Terezës për gruan

Posted on by Kult Plus

Nga Nënë Tereza

Mos harro se lëkura rrudhet,
e flokët mbulohen me borë;
Ditët bëhen vite…
por më e rëndësishmja
nuk ndryshon kurrë!

Forca jote e bindja jote s’njohin moshë.
Shpirti yt e shtrin pëlhurën e merimangës
që mosha ta endi mbi fytyrë!

Pas çdo pikarritje, ka një pikënisje.
Pas çdo suksese, një zhgënjim.
Përderisa je gjallë, gjallëro!

Në qoftë se të mungon çka bëje më parë,
bëje përsëri,
mos rri duke parë fotografi
të zverdhura nga koha!
Mos e lerë të ndryshket hekuri
që ke brenda vetes.

Sillu në mënyrë që, në vend të mëshirës,
të gëzosh respekt.
Kur të rëndojnë vitet e s’mundesh më të vraposh,
ec shpejt.
Kur s’do të mundesh as të ecësh shpejt,
ec!
E kur as të ecësh s’do të mundesh,
përdore shkopin e shko…
Veç për t’u ndalë,
ti kurrë mos ndalo!/KultPlus.com

Ekspozita e Tasos në COD, piktori Anastas Konstandini paraqet punimet e tij

Posted on by Kult Plus

Piktori i famshëm pogradecar, Anastas Kostandini (Taso) hapi dje ekspozitën e tij personale në Hollin e Kryeministrisë, organizuar nga Qendra për Hapje dhe Dialog (COD), me praninë e kryeministrit Edi Rama.

Ceremoninë e hapi Drejtorja e re e COD, gazetarja e mirënjohur e TCH, Jetona Koçibelli.

“Taso është një artist i cili ndërthur poezinë dhe pikturën për të krijuar një univers të lidhur ngushtë me qytetin e tij të lindjes, Pogradecin. Pikturat e tij përfshijnë një gamë të gjerë peizazhesh, portretesh dhe kompozimesh që përshkruajnë jetën e përditshme dhe natyrën e qytetit, e në këtë ekspozitë ato vijnë të shtresëzuara në dekada krijimtarie, duke na mundësuar të ndjekim evolucionin e gjuhës piktorike të Tasos”, tha Koçibelli.

Vetë Taso, foli me emocione të mëdha, duke e cilësuar këtë ekspozitë vetjake në COD një kulm të lartë të vetin.

“Megjithëse ndodhem larg këtij poli qendror ngjarjesh, dua të mendoj se jeta dhe krijimtaria ime nuk është e panjohur për publikun e artit në Shqipëri, largësia ime fizike nga kryeqyteti nuk ka ndikuar aspak në këmbënguljen, pasionin, dëshirën për të eksperimentuar dhe kureshtjen për të njohur çdo ditë e më shumë”,u shpreh Konstandini.

Kryeministri Edi Rama në fjalën e tij, veçoi vlerat piktorike të Tasos dhe beri thirrje që çdo mendje dhe forcë krijuese t’i bashkohet COD./TopChannel/KultPlus.com

‘E mora shoqëzën përkrah’

Posted on by Kult Plus

Poezi nga Lasgush Poradeci. 

E mora shoqëzën përkrah,
E matmë rugën ca-nga-ca,
Sikur na ndillte larg diçka.

Pa zu dita perëndoj,
Pa zu nata na mbuloj,
Pa zura shoqen ta pushtoj.

Përse buçet liqer i qet!
Liqer, ti ç’thua ndaj bucet!
Ç’far’ pe, liqer, mi zall të shkretë?

E vendin kur e sjell nërmënd
Kur sjell nërmend, ah! atë vend,
As rroj as vdes, po jam pa mend./KultPlus.com

10 vjet “Hardh Fest”, nesër nis Festa e Vjeljes së Rrushit

Posted on by Kult Plus

Me sloganin “Për kokërr t`qefit”, këtë vit shënohet edicioni jubilar i Festës së Vjeljes së Rrushit “Hardh Fest” në Rahovec.

Bëhet e ditur se kjo ngjarje kulturore ka sjellë turistë e emra të njohur nga skena muzikore, ndërsa qëllimi kryesor mbetet promovimi dhe përkrahja e prodhuesve vendor të rrushit.

“Këtë vit, festa fillon më 6 shtator dhe që do të zgjasë deri më 8 shtator, n`Konak të Rahovecit (te Shtëpia e Verës). Ndërsa ceremonia zyrtare e hapjes së festës nis me fillim nga ora 12:00 me adresimet zyrtare”, thuhet në kumtesën për media.

Tutje bëhet e ditur se edhe këtë vit “Hardh Fest” vjen me shumë risi, aktivitete e muzikë në çdo mbrëmje, por më e veçanta do të jetë pjesëmarrja dhe performanca e një prej grupeve më të njohura në botë, Gipsy Kings, që për herë të parë vijnë në Kosovë.

Një surprizë për publikun është edhe performanca e ish-udhëheqësit të grupit Guns N’ Roses, Bumblefoot.

Sakaq gjatë tri ditëve të festivalit, karakteristikë dhe pjesa më e bukur mbetet festa e vjeljes së rrushit./KultPlus.com

Nënë Tereza: Gëzimi i thellë i zemrës është si një magnet që tregon rrugën e jetës

Posted on by Kult Plus

Fraza dhe citime të famshme të Nënë Terezës 

  • 1. Dashuria fillon në shtëpi, dhe nuk është se sa bëjmë ne … është sa dashuri vendosim në çdo veprim
  • 2. Gëzimi i thellë i zemrës është si një magnet që tregon rrugën e jetës
  • 3. Vuajtjet tona janë përkëdheljet e mira të Zotit, duke na thirrur që t’i drejtohemi Atij dhe të na bëjnë të pranojmë që nuk jemi ne që kontrollojmë jetën tonë, por është Zoti që kontrollon dhe ne mund t’i besojmë plotësisht
  • 4. Unë nuk kërkoj ar për sukses, kërkoj lumturi
  • 5. Falja është një vendim, jo ​​një ndjenjë, sepse kur falim nuk e ndiejmë më ofendimin, nuk ndiejmë më inat. Fal, duke falur do ta kesh shpirtin tënd në paqe dhe ai që të ofendoi do ta ketë atë
  • 6. Nëse i gjykoni njerëzit, nuk keni kohë t’i doni
  • 7. Ne e dimë shumë mirë se ajo që po bëjmë është veç një pikë në oqean. Por nëse ajo pikë nuk do të ishte atje, oqeanit do t’i mungonte diçka
  • 8. Ju kurrë nuk do të jeni aq të zënë sa të mos mendoni për të tjerët
  • 9. Dashuria, për të qenë autentike, duhet të na kushtojë
  • 10. Jetoni thjesht që të tjerët të jetojnë thjesht
  • 11. Nuk mund të ndaloj së punuari. Unë do të kem gjithë përjetësinë për të pushuar
  • 12. Ka gjëra që do të dëshironit të dëgjonit dhe nuk do t’i dëgjoni kurrë nga personi që dëshironi t’i dëgjoni prej tyre. Por mos u bëj aq i shurdhër sa të mos i dëgjosh nga ai që i thotë nga zemra e tij
  • 13. Ne nuk duhet të lejojmë që dikush të largohet nga prania jonë pa u ndjerë më mirë dhe më të lumtur
  • 14. Revolucioni i dashurisë fillon me një buzëqeshje. Buzëqeshni pesë herë në ditë dikujt me të cilin vërtet nuk doni të buzëqeshni. Ju duhet ta bëni atë për paqe
  • 15. Për të bërë një llambë është gjithmonë e ndezur, ne nuk duhet të ndalemi së vendosuri vaj mbi të
  • 16. Mos i jepni vetëm të tepërtat, jepni zemrën tuaj
  • 17. Paqja fillon me një buzëqeshje
  • 18. Çdo punë e dashurisë, e kryer me gjithë zemër, gjithmonë do t’i sjellë njerëzit më pranë Zotit
  • 19. Gëzimi është forcë
  • 20. Në dashuri është vendi ku gjendet paqja
  • 21. Jepni derisa të dhemb dhe kur ju dhemb jepni edhe më shumë
  • 22. Nuk mund ta ndryshoj botën vetëm, por mund të hedh një gur nëpër ujë për të krijuar shumë valëzime
  • 23. Dhënia e dashurisë për dikë nuk është kurrë një garanci se ai do të të dojë edhe ty; Por mos prisni që ata t’ju duan, thjesht shpresoni që dashuria të rritet në zemrën e tjetrit. Dhe nëse nuk rritet, jini të lumtur sepse u rrit në tuajat
  • 24. Gëzimi është një rrjet dashurie në të cilin mund të kapen shpirtrat
  • 25. Uria për dashuri është shumë më e vështirë të eleminohet sesa uria për bukë
  • 26. Nëse nuk mund të ushqeni njëqind njerëz, ushqeni vetëm një
  • 27. Fryti i heshtjes është lutja. Fryti i lutjes është besimi. Fryti i besimit është dashuria. Fryti i dashurisë është shërbimi. Fryti i shërbimit është paqja
  • 28. Nëse nuk kemi paqe në botë, është për shkak se kemi harruar që i përkasim njëri-tjetrit, se ai burrë, ajo grua, ajo krijesë është vëllai ose motra ime.
  • 29. Ajo që kërkon vite për t’u ndërtuar mund të shkatërrohet brenda natës; le të ndërtojmë gjithsesi.
  • 30. Shumë herë mjafton një fjalë, një vështrim, një gjest për të mbushur zemrën e atij që duam
  • 31. Paratë mund të blejnë vetëm gjëra materiale, të tilla si ushqim, veshje dhe strehim. Por duhet diçka më shumë. Ka të këqija që nuk shërohen me para, por vetëm me dashuri
  • 32. Ka shumë njerëz të gatshëm të bëjnë gjëra të mëdha, por ka shumë pak njerëz të gatshëm të bëjnë gjëra të vogla.
  • 33. Dashuri derisa të dhemb. Nëse dhemb është një shenjë e mirë
  • 34. Nëse jeni i përulur, asgjë nuk mund t’ju dëmtojë, as lavdërimi, as turpi, sepse ju e dini se çfarë jeni
  • 35. Unë mund të bëj gjëra që ju nuk mund t’i bëni, ju mund të bëni gjëra që unë nuk mund t’i bëj; së bashku mund të bëjmë gjëra të mëdha
  • 36. Mungesa e dashurisë është varfëria më e madhe
  • 37. Ekzaminimi ynë i ndërgjegjes është pasqyra në të cilën ne shohim arritjet dhe vështirësitë tona. Kjo është arsyeja pse ne duhet ta përballojmë atë me sinqeritet dhe dashuri
  • 38. Shkenca më e madhe në botë, në qiell dhe në tokë; eshte dashuri
  • 39. Dashuria është virtyti më i mirë i një personi
  • 40. Jini besnikë ndaj gjërave të vogla, pasi në to qëndron forca
  • 41. Ekziston një gjë shumë e bukur: ndarja e gëzimit të dashurisë
  • 42. Puna pa dashuri është skllavëri
  • 43. Dashuria nuk mund të mbetet në vetvete. Nuk ka kuptim. Dashuria duhet të marrë masa. Ky aktivitet do të na çojë në shërbim
  • 44. Le të takohemi gjithnjë me buzëqeshje, buzëqeshja është fillimi i dashurisë
  • 45. Ne nuk kemi nevojë për armë dhe bomba për të sjellë paqe, ne kemi nevojë për dashuri dhe dhembshuri
  • 46. ​​Ajo që ka rëndësi është sasia e dashurisë që ne i kushtojmë punës që bëjmë
  • 47. Që dashuria të jetë e vërtetë, duhet të na kushtojë. Duhet të na dëmtojë. Duhet të na zbrazë nga vetja
  • 48. Dashuria është një frut që piqet në të gjitha stinët dhe është brenda mundësive të të gjitha duarve.
  • 49. Disa njerëz vijnë në jetën tonë si bekime. Disa vijnë në jetën tonë si mësime
  • 50. Pemët, lulet, bimët rriten në heshtje. Yjet, dielli, hëna lëvizin në heshtje. Heshtja na jep një perspektivë të re
  • 51. Disiplina është ura midis qëllimeve dhe arritjeve
  • 52. Fjalët e mira mund të jenë të shkurtra dhe të lehta për tu thënë, por jehonat e tyre janë vërtet të pafundme.
  • 53. Unë jam vetëm një laps i vogël në dorën e shkrimeve të Zotit
  • 54. Përhap dashurinë kudo që të shkosh
  • 55. Ne mësojmë përmes përulësisë, të pranojmë poshtërimet me gëzim
  • 56. Ne nuk mund të bëjmë gjithnjë gjëra të mëdha, por gjithmonë mund të japim diçka nga vetja
  • 57. Ndonjëherë mendojmë se ajo që bëjmë nuk ia vlen. Por gjithmonë është dikush që do ta vlerësojë atë.
  • 58. Si mund të ketë shumë fëmijë? Kjo është si të thuash se ka shumë lule
  • 59. Dashuria është një fryt sezonal në të gjitha kohërat dhe brenda mundësive të të gjitha duarve
  • 60. Ne kurrë nuk do të dimë të gjitha të mirat që mund të bëjë një buzëqeshje e thjeshtë/Warbletoncouncil/KultPlus.com

Vdes këngëtari i njohur shqiptar, Agim Quku

Posted on by Kult Plus

Është ndarë nga jeta në moshën 85-vjeçare bass-baritoni, Agim Quku. Quku interpretoi me nivel dhe cilësi të lartë artistike mbi 15 role në opera si “Berberi i Seviljes”, “Goca e Kaçanikut”, “Toka jonë”, “Vjosa”, “Carmen”, “La Traviata”, ku shquhej jo vetëm për zërin e tij, por edhe për lojën e shkëlqyer skenike.

Quku gjithashtu ka luajtur ne filmin muzikor shqiptar ‘Karnavalet’.

Quku ishte autor i një numri të madh shkrimesh, rreth 400 artikuj kritikë dhe analiza për shfaqje dhe artistë të veçantë, të botuara në kohë të ndryshme. Pjesëmarrës në 10 festivale të këngës në RTSH, ai është nderuar 4 herë me çmime të dyta dhe të treta, si dhe pjesëmarrës në koncertet e majit./Tema/KultPlus.com

Maja e Kunores në Pllanë, një prej vendeve ende të paeksploruara të Lezhës

Posted on by Kult Plus

Maja e Kunores në Pllanë të Lezhës është një prej vendeve ende të paeksploruara.

Një grup të rinjsh janë angazhuar për të hapur shtegun, vendosur sinjalistikën dhe eksploruar atë që fshihet poshtë këtij mali. Udhëtimi vendoset përgjatë një traseje rruge automobilistike të hapur rreth 110 vite më parë nga ushtria austro-hungareze.

Fatjon Vathaj është udhërrëfyes turistik, ka dëgjuar diçka për këtë pikë, por nuk e ka parë ende. Ai thotë se edhe vetë fshati Pllanë është emblematik dhe interesant për t’u njohur me historitë e tij.

Të rinjtë kontribuan për hapjen e shtegut dhe promovimin e këtij fshati që ka shumë për të treguar. Ata fillimisht eksploruan mundësitë dhe janë rikthyer për të vepruar dhe bërë të aksesueshëm këtë shteg.

Gjurmët e rrugës duken ende. Ushtria austro-hungareze ishte vendosur në një pozicion strategjik për të dominuar lëvizjet drejt veriut dhe verilindjes. Në majën e Kunores, siç njihet nga vendasit, shihen ende gjurmët e ndërtesave, të pozicioneve ku kanë qenë vendosur artileria, ndërsa në brendësi një luginë të tërheq për mënyren sesi ndryshon. Poshtë ndodhen tunele të gjata e të larta.

Të rinjtë ishin nisur thjesht me idenë për një ditë ndryshe dhe për të dhënë një kontribut, pa e menduar se ajo që do të shihnin do të ishte diçka impresionuese.

Brenda tuneleve duket sikur koha ka ndaluar para 110 vitesh. Tunelet e stërzgjatur, ku kanë filluar të formohen stalaktitet kanë disa dritare ku mund të dalësh në të gjitha anët.

Të paktë janë ata që i kanë parë së fundmi këto tunele dhe peizazhin e bukur nga maja e Kunores. Edhe banorët e zonës e kanë nostalgji kur rikthehen sërish në këtë majë mali dhe kur rishohin tunelet.

Pjetër Prendi është një prej tyre. Ai ishte pjesë e grupit për të realizuar këtë shteg, por që edhe vetë u surprizua nga madhështia e këtyre tuneleve.

Tunelet e ndërtuara nga ushtria austro-hungareze janë shumë pak të njohura për publikun e gjerë. Ato pritet të zbulohen më shumë nga kureshtarët dhe ata që janë të apasionuar pas ngjitjes dhe shtigjeve malore./KultPlus.com

Anya Taylor Joy: Roli im i ëndrrave është Elsa te “Frozen”

Posted on by Kult Plus

Anya Taylor Joy u pyet në një intervistë të fundit për rolin që ëndërron t’i ofrohet në një moment gjatë karrierës së saj. Siç u përgjigj ajo, bëhet fjalë për rolin e Elsës në filmin e animuar, ‘Frozen’.

Aktorja 28-vjeçare theksoi se do të donte të bënte një muzikal pasi është “e varur nga puna e palodhur” . Ndërkohë, ajo shprehu dëshirën e saj për të luajtur mbretëreshën e ‘Frozen’, në rast të një versioni ‘live-action’ të filmit.

“Mendoj se Frozen do të ishte shumë i lezetshëm”, u përgjigj Taylor Joy kur u pyet për rolin e saj të ëndrrave, ndërsa deklaroi gjithashtu se është një fanse e Disney.

“Do të ishte shumë argëtuese të gjuash akull nga dora jote. Gjithashtu, do të ishit të preferuar në çdo festë për ditëlindjen e fëmijëve. Të gjithë vëllezërit e motrat e mia kanë fëmijë tani, kështu që unë do të doja që ata të mund të thoshin ‘tezja ime është Elsa’. Kjo do të ishte perfekte”, shtoi Anya Taylor Joy./KultPlus.com

Freddie Mercury la gjurmë të mëdha në historinë e muzikës botërore

Posted on by Kult Plus

Freddie Mercury do të mbahet mend për gjurmët e mëdha që la në historinë e muzikës botërore, për vokalin e tij të fuqishëm dhe për energjinë e tij të mrekullueshme që shpaloste në skenë, derisa sot janë bërë 76 vjet nga lindja e tij, shkruan KultPlus.

Suksesi i jashtëzakonshëm dhe i papritur i “Bohemian Rapsody”, filmi mbi historinë e grupit ”Queen”, që me një buxhet prej 52 milionë dollarësh ka arritur të fitojë një miliard dollarë duke fituar katër Oscar, përfshirë atë për aktorin më të mirë në rolin kryesor (Rami Malek), është demonstrimi më i bujshëm i asaj që grupi përfaqëson në historinë e rock-ut dhe deri tani në imagjinatën kolektive.

Dhe nëse kjo histori fillon të ngatërrohet me mitin, kjo ndodh sepse Freddie Mercury ishte një nga personazhet më shpërthyes, më transgresivë dhe më të guximshëm që është parë ndonjëherë në skenë.

Fatkeqësisht, Fredi, i cili vdiq më 24 nëntor 1991 në Londër, është gjithashtu një nga viktimat më të famshme të SIDA-s, të cilin e vrau në moshën 45-vjeçare, në rezidencën e tij në Londër, kur HIV pozitiv ishte ende një dënim me vdekje.

Siç e kujtojnë shumë tani falë filmit, emri i tij i vërtetë ishte Farrock Bulsara.

Ai u lind në Zanzibar dhe kishte prejardhje parsiane dhe indiane.

Me grupin e tij, së bashku me Brian May, John Deacon dhe Roger Taylor, ai kishte gjetur sintezën e personalitetit të tij si një roker i dashuruar pas operës, por i cili, i rritur në vitet ’60 dhe i formuar në vitet ’70, adhuronte  Jimi Hendrix, Elvis Presley, Led Zeppelin,  Black Sabbath, Liza Minnelli, David Bowie dhe rock Glam i Marc Bolan.

Ai ishte padyshim një njeri me kuriozitet të madh muzikor që i pëlqente të përziente zhanre, i aftë për njohuri të shkëlqyera si “Bohemian Rapsody” dhe pjesë të këndshme si “Barcelona Barcelona”.

Një dashamirës i hiperbolës, me një sens humori provokues, ai vazhdon të nderohet nga një audiencë transversale dhe që ka lënë pas një seri mbresëlënëse hitesh nga “We Are The Champions” te “Radio Ga Ga”, nga “Love of My Life” te “Under Pressure”, nga “Somebody To Love” te “Love of My Life”, “Crazy Little Thing Called Love” apo “We Will Rock You” .

Ai ishte një interpretues që përdorte teatralitetin si armë dhe shpesh pasqyronte një ndjenjë çlirimtare që shkonte së bashku me aftësitë e tij të jashtëzakonshme vokale dhe talentin e tij si pianist.

Freddie Mercury ishte thjesht i paimitueshëm. / KultPlus.com

Kënga e parë nga albumi i ri i Lady Gaga do të publikohet në tetor

Posted on by Kult Plus

Lady Gaga është rikthyer me albumin e saj të ri dhe kënga e parë nga këngët e saj të reja pritet të publikohet në tetor.

Në postimin e saj në Instagram ajo ka shpërndarë një foto të orarit të saj të shkruar në një faqe të hotelit ku po qëndron. Për muajin tetor, nën premierën e filmit në kinema, këngëtarja vuri në dukje ” Tetor XX: Kënga e parë LG7 “.

Lady Gaga publikoi së fundmi ‘Die With a Smile’ një bashkëpunim surprizë me Bruno Mars i cili nuk do të përfshihet në albumin e ri sipas përfaqësuesit të saj.

Edhe pse nuk ka shumë informacione për albumin e saj të ri, këngëtarja prej disa muajsh është duke punuar shumë për të, pasi ka shpërndarë disa foto në rrjetet sociale nga studio.

“Kam shkruar kaq shumë këngë dhe kam prodhuar kaq shumë këngë,” tha ylli në premierën e Chromatica Ball Film dhe shtoi për albumin e ri. “Është ndryshe nga çdo gjë që kam bërë më parë.”

“Ka diçka vërtet të bukur kur dihet se do të të duan pavarësisht se çfarë bën”,  shtoi ajo./KultPlus.com

Këngët e pavdekshme të Freddie Mercury (VIDEO)

Posted on by Kult Plus

Suksesi i jashtëzakonshëm dhe i papritur i “Bohemian Rapsody”, filmi mbi historinë e grupit ”Queen”, që me një buxhet prej 52 milionë dollarësh ka arritur të fitojë një miliard dollarë duke fituar katër Oscar, përfshirë atë për aktorin më të mirë në rolin kryesor (Rami Malek), është demonstrimi më i bujshëm i asaj që grupi përfaqëson në historinë e rock-ut dhe deri tani në imagjinatën kolektive, transmeton KultPlus.

Mercury ndërroi jetë me 24 nëntor 1991, vetëm 45 vjeçar, dhe morri shumë sekrete me vete në varrin e tij. Dikur punoi si fotomodel, ishte shok i mirë i David Bowie, ndërsa këngën “Bohemian Rhapsody” nisi ta shkruante kur ishte student.

KultPlus iu sjellë disa prej këngëve të Mercuryt, të cilat konsiderohen si të pavdekshme:

Foto e rrallë – Nëna Terezë me Mbretëreshën Elizabeta II

Posted on by Kult Plus

Mbretëresha Elizabeta II përshëndet Nënë Terezën gjatë takimit të saj më 24 nëntor 1983. Anjezë Gonxhe Bojaxhiu, e njohur më mirë si Nënë Tereza e kaloi jetën duke u kujdesur për të varfërit dhe të sëmurit.

E shenjtëruar në vitin 2016 si Shën Tereza e Kalkutës, ajo tani është zgjedhur si bashkëpatroneze e Kryedioqezës së Kalkutës. Dhembshuria dhe puna e saj e ndihmës për ata që vuajnë nga lebra, të sëmurët përfundimisht dhe të dëbuarit e shoqërisë e bënë atë një ikonë globale të bamirësisë së krishterë.

Një gërmim nëpër arkivat e HT hedh dritë mbi personalitetin e saj. (Virendra Prabhakar / HT FOTO)

“Karnevalet e Korçës” shfaqja më e mirë në “KoKo Fest”, “Club Albania” nga Kosova vlerësohet me tri çmime

Posted on by KultPlus

Ka përfunduar edicioni i 11-të i Festivalit “KoKO Fest” në Korçë, ku edhe janë ndarë çmimet për më të mirët e këtij edicioni.

Për shfaqjen më të mirë është vlerësuar shfaqja “Karnevalet e Korçës” me regji të Erion Isai,  kurse për regjinë më të mirë është vlerësuar Fatos Berisha për shfaqjen “Club Albania”, shfaqje për të cilën janë vlerësuar me çmime edhe Armond Morina me çmimin për aktorin më të mirë të festivalit, dhe Ard Islami me çmimin për aktorin me rol joprotagonist.

KultPlus ju sjell më poshtë listën e çmimeve të ndara në këtë edicion.

Shfaqja më e mirë – “Karnavalet e Korçës”

Regjia më e mirë – Fatos Berisha

Çmimi i karrierës – Leka Bungo

Aktorja protagoniste më e mirë – Zamira Kita

Aktori protagonist më i mirë – Armond Morina

Aktorja joprotagoniste më e mirë – Paola Kodra

Aktori joprotagonist më i mirë – Ard Islami

Aktori i ri më i mirë – Urim Aliaj

Aktorja e re më e mirë – Ilda Pepi./ KultPlus.com

Presidentja Osmani takohet me ministren e Jashtme të Finlandës: Valtonen e falënderova për mbështetjen e shtetit të saj për Kosovën

Posted on by Kult Plus

Presidentja e Republikës së Kosovës, Vjosa Osmani, është takuar me ministren e Jashtme të Finlandës, Elina Valtonen.

Osmani ka shkruar se Valtonen e ka falënderuar për mbështetjen e shtetit të saj për Kosovën në secilën etapë, përfshirë procesin e shtetformimit.

“Në takim me ministren e Jashtme të Finlandës, Elina Valtonen, e falënderova për mbështetjen e shtetit të saj për Kosovën në çdo etapë, përfshirë procesin e shtetformimit, shtetëndërtimit dhe anëtarësimit në organizata ndërkombëtare”, ka shkruar Osmani.

Tutje, ajo u shpreh se do të vazhdojnë për forcimin e raporteve ndërshtetërore./KultPlus.com

Rama: Borsh, ku sezoni vazhdon edhe në shtator

Posted on by Kult Plus

Borshi është një ndër plazhet më të preferuara nga pushuesit vendas dhe të huaj.

Kryeministri Edi Rama ndau sot pamje nga Borshi, ku theksoi kreu i qeverisë sezoni vazhdon edhe në shtator.

Borshi është një nga zonat turistike më të bukura të Rivierës Shqiptare.

Në Borsh ndërthuret një mrekulli e bukurive natyrore, plazhi, historia dhe legjenda.

Borshi është vetëm 17 km larg Himarës dhe ka vijën bregdetare më të gjatë të Jonit.

Edhe ky sezon pati numër të lartë turistësh që vizituan Shqipërinë nga jugu në veri. Shifrat flasin për 1 milionë e 251.467 pasagjerë gjatë gushti ose 368.456 (41%) më shumë se sa gushti i shkuar vetëm nga Rinasi.

Risia e këtij viti janë afro 4 mijë pasagjerë nga Japonia, rreth 4 mijë të tjerë nga Zelanda e Re, pothuajse 20 mijë nga Australia dhe 35 mijë nga Kanadaja./atsh/KultPlus.com

Kori i Filharmonisë së Kosovës do të prezantohet në Festivalin MareMeum në Vlorë

Posted on by KultPlus

Nën drejtimin e maestro Rafet Rudit dhe me pjesëmarrjen e violinistes së njohur Sihana Badivuku, Kori i Filharmonisë së Kosovës do të prezantohet sonte me koncert në Teatrin “Petro Marko”prej orës 19:00, prezantim që do të bëhet në kuadër të mbrëmjes së tretë të festivalit “MareMeum,” i cili organizohet nën drejtimin artistik të Aulon Naçit.

Ky koncert organizohet me rastin e Ditës së Shenjtërimit të Nënë Terezës./ KultPlus.com

7 fakte interesante të Freddie Mercury

Posted on by Kult Plus

Më poshtë mund të lexoni disa fakte për këngëtarin Freddie Mercury, shkruan KultPlus.

Bohemiian Rapsody- Një histori e shekullit rreth traumave të Freddie-t

Freddie e shkruajti këtë këngë në 1975 dhe në atë kohë “Bohemiian Rapsody” u konsiderua kënga më e gjatë e regjistruar ndonjëherë. Kënga zuri vend në albumin e katërt të grupit, A Night at the Opera. Mediat e huaja shkruanin në atë kohë që kënga në të vërtetë fliste për traumat që këngëtari kishte përjetuar në fëmijëri.

Festat deri në mëngjes me Princeshën Diana

Thuhej se princeshë Diana takohej me Freddien dhe ekipin e tij gjatë kohës kur kishte probleme martesore me princin Charles. Duke parë atë të trishtuar, Freddie i kishte thënë Dianës: “Eja e dashur, dil dhe argëtohu pak”. Pasi ishte e pamundur që Diana të vizitonte klubet e natës, Freddie ishte ai që i kishte sugjeruar që princesha të maskohej si burrë dhe të dilte në klubet për personat gay. Diana e pranoi idenë me entuziazëm, dhe u gëzua veçanërisht me “lirinë” që fitoi ngase mund të argëtohej si çdo person i zakonshëm.

Pse nuk donte të dihej varri i tij?

Në testamentin e tij, Freddie në vullnetin e tij të fundit e detyroi ish-të fejuarën e tij Mary Austin që të kujdesej për hirin dhe kurrë të mos tregonte publikisht atë që kishte bërë me urnë. Në fillim të këtij viti, një pllakë u zbulua në Varrezat e ëest London: “Në kujtim të Farok Balsar. Unë gjithmonë do të jem me ju me dashurinë time. M”. Ende, askush nuk ka konfirmuar zyrtarisht se urna e muzikantit legjendar ndodhet poshtë pllakës.

Freddie nuk ka asnjë përmendore në Londër

Ndikimi i tij vihet ende në diskutim në publikun britanik. Konservatorët mohojnë rëndësinë e tij, kryesisht për shkak të zgjedhjeve private dhe mënyrës së jetesës. Edhe pse adhuruesit e tij janë përpjekur të ngrenë një monument në Londër për vite me radhë, kjo ende nuk ka ndodhur. Busti i tij përkujtimor ndodhet në Zvicër, në qytetin Montreux, i cili është bërë një vend pelegrinazhi për tifozët e Freddie dhe grupin Queen.

Koncerti për Guinness

Gjysmë viti pas vdekjes së Freddie, grupi organizoi një koncert në stadiumin Wembley të Londrës. Të gjitha të ardhurat shkuan për bamirësi për një organizatë në luftën kundër AIDS, Fondi “Mercury Phoenix”. Koncerti është në Librin e Rekordeve Guinness dhe konsiderohet të jetë koncerti më i madh bamirës rock ndonjëherë.

Ai ishte tejet i turpshëm

Edhe pse ai ishte i njohur për performancën e tij të egër dhe “skandaloze”, shumë njerëz që e njihnin Merkurin personalisht thonë që ai ishte shumë i turpshëm, kjo është një nga arsyet që ai rrallë paraqitej në intervista.

Para se të bëhej yll rocku, punonte në aeroport

Shumë kohë para se të bëhej një nga këngëtarët më ikonikë në historinë e muzikës, Freddie nxirrte jetesën duke punuar në aeroportin Heathroë të Londrës. / KultPlus.com

Me kitaristen spanjolle Anabel Montesinos do të nisë Mitrovica Guitar Days

Posted on by KultPlus

Mitrovica Guitar Days 6 do të nisë nesër, dhe në këtë edicion që do të zgjasë deri më 11 shtator do të prezantohen performanca të kitaristëve të klasit botëror, masterklase dhe evente të tjera.

Edicioni i gjashtë i këtij festivali do të nisë me kitaristen spanjolle Anabel Montesinos, për të përfshirë në këtë program edhe kitaristë të tjerë me nivel ndërkombëtarë dhe rajoni.

KultPlus ju sjell programin e plotë të festivalit./ KultPlus.com

Diskutim me Fatoş Üstek në Reporting House

Posted on by KultPlus

Fatoş Üstek, që jeton në Angli, do të prezantohet me një diskutim mbi librin e saj të fundit: “Arti i institucionit të së nesërmes: Rishpikja e modelit”.

Kjo ngjarje është e hapur dhe do të moderohet nga Gazmend Ejupi, kurator i Reporting House/Shtëpisë së Raportimit.

Bashkëbisedimi me Fatoş Üstek do të mbahet më 6 shtator, prej orës 10:00 në Reporting House/ KultPlus.com

Nënë Tereza në koleksionet e Bibliotekës Kombëtare, hapet ekspozita

Posted on by Kult Plus

Në Ditën e Shenjtërimit të Nënë Terezës, Biblioteka Kombëtare e Shqipërisë, çeli një ekspozitë në nderim të simbolit shqiptar dhe botëror të solidaritetit njerëzor.

Kjo ekspozitë “homazh”, kushtuar “Nobelistes së Paqes”, vjen përmes koleksioneve që zotëron BKSH-ja, të cilat kanë në fokus jetën frymëzuese dhe veprimtarinë shembullore të Nënë Terezës.

Nga lutjet dhe poezitë e shkruara prej vetë shenjtores te poezitë që ajo u frymëzoi poetëve shqiptarë, nga albumet mbresëlënëse të artistëve te monografitë studimore, intervistat, jetëshkrimet e deri dhe bibliografitë për të, kjo ekspozitë sjell në trajtë simbolike marrëdhënien e privilegjuar që vetë Shqipëria dhe shqiptarët, për të cilët lutjet ajo nuk i rreshti kurrë, kanë ngjizur tashmë me Nënën e tyre të Shenjtë, plot krenari e përkushtim.

Ekspozita do të qëndrojë e hapur për publikun në Hollin kryesor të BKSH-së./atsh/KultPlus.com

Rudolf Marku për librin e Dan Bozhlanit: Nuk është libër për lexuesit e lehtë

Posted on by KultPlus

Rudolf Marku

Librin, që në fillimin e vet, e bën të qartë se është një libër modern, një libër që thyen kanonet klasike të narracionit e të karaktereve . Kjo ka ardhur, mendoj unë, se libri juaj është më tepër i natyrës eseistike, një diskutim letrar për rolin e librit (‘të shkronjave’) në këtë botën tonë; është diskursi për rolin e rëndësishëm shpirtëror, intelektual, diell-ndriçues, të shkrimësisë; në këtë vështrim, libri juaj është një himn për librin e vertetë, përmes rrëfimit të kalvarit që i duhet të përshkojë autori për të arritur plotshmërine e vetvetës përmes shkrimësisë.

Kjo nënkupton dhe të kundërten e kësaj, është një polemikë për ta ndërgjegjësuar shkrimtarët, por dhe vetë lexuesit, për rendësinë e letërsisë së realizuarë, letersisë së vertetë.

Libri në fakt kthehet kështu në një him për vetë Librin, për letersinë e vertetë, duke e bërë të qartë përgjegjshmërinë e vështërsive të procesit krijues për të arritur letersinë e vertetë.

Libri juaj është një libër origjinal, a one-off book, i shkruar me një kapricio të guximshme, për të krijuar një vepër të pangjashme me librat e tjerë. Ky guxim është për t’u lavdëruar, me gjithë riskun që mbart në vetvete.

Libri kërkon që të lexohet nga një lexues i kujdesshëm dhe i mirëorjentuar në lexime. Nuk është libër për lexuesit e lehtë.

Ju uroj suksese juve dhe librit. Shkronjat e këtij libri duhet të jenë të kënaqura nga autori që i ka trajtuar ato me përgjegjësine e krijesave të gjakut të vet dhë të ADN-së së vet. Rudolf Marku/ KultPlus.com

PriFest prezanton jurinë e kategorisë kryesore garuese

Posted on by KultPlus

Prezantohet juria e filmave artistik të metrazhit të gjatë nga Ballkani, kategori kjo kryesore garuese në PriFest. Juria përbëhet nga filmbërës dhe profesionistë të nivelit të lartë të industrisë së filmit nga shtetet evropiane.

Dhe ata jane:

PAUL WILMSHURST

Paul Wilmshurst është regjisor dhe skenarist britanik, i cili ka punuar në industrinë e filmit dhe televizionit për më shumë se 40 vjet. Projektet e tij; ‘Day of the Jackal’, ‘Belgravia: The Next Chapter’, ‘The Last Kingdom’, ’Doctor Who’, ‘Strike Back’, ‘Jamestown’, ‘Indian Summers’, ‘Da Vinci’s Demons’, ‘Combat Kids’, ‘Runaway’, ‘Mob Law’ dhe ‘Hiroshima’ – i cili ka fituar një Çmim Ndërkombëtar Emmy dhe një BAFTA në vitin 2006. Ai shkroi dhe dhe ishte regjisor i ‘Forgiven’ – i cili u shfaq në Channel 4 në gusht 2007 – dhe fitoi një Çmim të Shoqatës Mbretërore të Televizionit për montazhin më të mirë të dramës, u nominua për një Çmim Broadcast për Dramën më të Mirë TV të Vetme dhe fitoi një Çmim Ndërkombëtar Emmy për Aktoren më të Mirë. ‘Combat Kids’ gjithashtu u nominua për një BAFTA për Dramën më të Mirë për Fëmijë. Përpara se të fokusohej në dramën e nivelit të lartë, ai kaloi shumë vite si regjisor I filmit dokumnetar , duke eksploruar histori të detyrimeve, obsesioneve, identitetit, krimit dhe politikës. Ai ka udhëtuar gjerësisht gjatë jetës së tij dhe është tërhequr nga projekte psikologjikisht komplekse dhe logjistikisht sfiduese.

EMMA CLARKE

Ka qenë Drejtoreshë Ekzekutive për 14 vite, fillimisht në Fine Line Features, ku ka ngritur dhe drejtuar zyrën e tyre në Londër për 4 vite. Më pas ishte një nga themelueset e UK Film Council (tani BFI) nga viti 2000 deri në vitin 2010. Ka mbikëqyrur personalisht zhvillimin dhe prodhimin e mbi 50 filmave artistikë dhe dokumentarë, shumë prej të cilëve kanë fituar çmime të shumta, duke përfshirë Bafta, Çmimin e Jurisë në Cannes, Ariun e Argjendtë në Berlin etj. Ka qenë e përkushtuar në gjetjen dhe zhvillimin e talenteve të rinj, veçanërisht shkrimtare/regjisore femra. Ka punuar me Andrea Arnold, Kevin Macdonald, Shane Meadows, Sally Potter, Sarah Gavron, John Crowley, Saul Dibb dhe Paul Greengrass dhe shumë të tjerë. Ka punuar për New Line Cinema duke drejtuar zyrën e tyre të filmit artistik në Londër. Ka dizajnuar dhe drejtuar një program master për shkrim skenarësh në Universitetin e Manchesterit për 6 vite, i cili ka qenë shumë i suksesshëm dhe ka çuar shumë nga studentë në industri si shkrimtarë dhe ekzekutivë. Nga viti 2021 deri në 2022 ishte Drejtoreshë e Dramës në Filmwave, Londër. Tani drejton kompaninë Stellar Productions ku zhvillohen projekte filmike dhe televizive me cilësi të lartë.

JEAN-BAPTISTE BAILLY-MAITRE

Jean-Baptiste Bailly-Maitre është producent që ka kaluar shumë vite duke punuar në projekte ndërkombëtare. Ai ka ekspertizë të gjerë në subvencionet për filmin në Francë dhe Evropë dhe është anëtar i komisionit të CNC-së për Aide au Cinéma du Monde. Ai ka qenë përgjegjës për financimin dhe menaxhimin e Alpha Violet për më shumë se 10 vjet dhe zhvillon prodhimin e projekteve të reja.

VIRGINIE LACOMBE

Virginie Lacombe ka prodhuar filmin The Other Son (2012) të drejtuar nga Lorraine Lévy, dokumentarin Faith Connections (2013) nga Pan Nalin, dhe komedinë Blockbuster (2018) të July Hygreck, shpërndarë nga NETFLIX. Ajo ka bashkëprodhuar Mobile Homes të Vladimir de Fontenay (Cannes Director’s Fortnight 2017), Port Authority (Cannes – Un Certain Regard 2019), Martin Scorsese ka qene Producent Ekzekutiv, Last Film Show nga Pan Nalin (nominim për OSCAR 2023), dhe Tommy Guns nga Carlos Conceição (2 çmime në Festivalin e Filmit në Locarno). Ajo po zhvillon disa projekte të tjera, përfshirë The Wind Also Sings nga Handi Ghandour, She’s Not Gone nga Micky Levy dhe Borough Park nga Michale Boganim.

GEORG GEORGI

Georg Georgi është një profesionist i shumëanshëm nga Jena, Gjermani Lindore, një vend që nuk ekziston më, me ekspertizë në vallëzim, modë dhe media. Ai ka bashkëthemeluar Berlin Models dhe M4 Models dhe ka krijuar formate të rëndësishme shfaqjesh. Aktualisht, ai ndan kohën e tij ndërmjet zhvillimit të një rezidence artistike në Portugali dhe Berlin, ndërsa këshillon projekte ndërkombëtare filmi dhe merr pjesë në festivale filmi.

Edicioni 16-të i PriFest mbahet prej 10-15 shtator 2024 në Kino Armata./ KultPlus.com

Sot shënohet Dita Ndërkombëtare e Bamirësisë

Posted on by Kult Plus

5 shtatori shënon Ditën Ndërkombëtare të Bamirësisë, të shpallur si e tillë nga Organizata e Kombeve të Bashkuara, për nder të Gonxhe Bojaxhiut – Nënës Terezë e cila vdiq më 05.09.1997, përcjell KultPlus.

Gjatë gjithë jetës së saj, Nëna Terezë kishte princip të jetës ndihmën e njerëzve në nevojë dhe atyre që janë të sëmurë.

Mirëpo, edhe pse arriti shumë dhe madje fitoi edhe çmimin Nobel për Paqe, nuk i harroi asnjëherë rrënjët e saja shqiptare.

Sot janë bërë 27 vjet nga dita kur ajo vdiq, derisa figura e Nënës Terezë nuk do të vdesë asnjëherë. /KultPlus.com

Dy ngjarjet më të bukura që i ka përjetuar Nënë Tereza, dëshmi e dashurisë së vërtetë

Posted on by Kult Plus

Shën Nënë Tereza është thesar i papërsëritshëm, si në mësim e porosi ashtu edhe në veprimtarinë e saj të dashurisë, bamirësisë dhe humanizmit. Për të shpjeguar konceptin e dashurisë së vërtetë, atë dashuri e cila arrin deri në fund, derisa sa dhemb, Shën Nënë Tereza tregon dy ngjarje të bukura dhe unike që i ka përjetuar në jetën e saj, si dëshmi, provë e gjallë si realizohet ajo.

Ngjarja e parë

Unë nuk do ta harroj kurrë, se si dy të rinj para shumë kohësh erdhën në shtëpinë tonë dhe më dhanë një shumë të madhe parash. Unë i pyeta: ‘Ku i keni marrë të gjitha këto para?’. Ata thanë: ‘Ne jemi martuar para dy ditësh. Para se të martohemi, kishim vendosur, që mos të blejmë rroba martese. Ne nuk bëmë dasmë. Paratë e dasmës jua japim Juve.’ Dhe unë e di saktësisht, se ç’do të thotë në vendin tonë, në një familje hindu, të mos blesh rroba martese dhe të mos bësh dasmë. Prandaj i pyeta përsëri: ‘Po, përse? Përse vepruat kështu?’ Ata thanë: ‘Ne e duami njëri-tjetrin aq shumë, sa që gëzimin e dashurisë duam ta ndajmë me njerëzit, të cilëve ju u shërbeni.’ Si e përjetojmë ne gëzimin e dashurisë? Si e përjetojmë ne këtë? Tek japim, derisa dhemb.

Ngjarje e dytë

Para se unë të shkoja në Etiopi, në Kalkutë erdhën disa fëmijë të vegjël tek unë. Ata kishin dëgjuar, se unë do të shkoja atje. Ata kishin ardhur, sepse kishin dëgjuar nga motrat, që fëmijët në Etiopi vuanin shumë. Ata vinin, dhe secili prej tyre jepte diçka, disa edhe ato pak para që kishin. Një djalosh i vogël erdhi tek un dhe më tha: ‘Unë nuk kam asgjë, nuk kam para, thjeshtë nuk kam asgjë. Por, e kam këtë copë çokollate. Dhe ti merre me vete dhe jepua fëmijëve në Etiopi!’ 
Ky djalosh i vogël dashuronte me shumë dashuri, sepse ai mbase për herë të parë në jetën e vet, mbante një copë çokollate në dorë. Dhe e dha atë. E dha plot gëzim, për ta ndarë me të tjerët, për ta zbutur sadopak dhimbjen e dikujt tjetri në Etiopinë e largët. Kjo do të thotë gëzim i dashurisë: të japësh, derisa të dhemb. I dhembte Krishtit, që na donte neve, sepse ai vdiq në kryq, për të na mësuar neve se si duhet të duami. Kjo është rruga, se si duhet të duami edhe ne: derisa të dhemb.

(Pjesë nga libri: Leo Maasburg, Nënë Tereza. Histori Magjepsëse, Shtëpia Përkujtimore e Nënë Terezës, Shkup 2010, f. 88-89.)/KultPlus.com