Quhet Ura e Kanionit Huajiang dhe do të jetë ura më e lartë në botë, jo për sa i përket lartësisë së shtyllave, madje as lartësisë së tyre mbi nivelin e detit, por në lidhje me distancën vertikale mbi të cilën do të vendoset kuverta.
”Plot 625 metra, domethënë distanca që do të ndajë sipërfaqen e rrugës nga pika më e ulët e tokës, në këtë rast lumi Beipan”, shkruan focus.it.
Me fjalë të tjera, ajo që e bën atë një përsosmëri inxhinierike është boshllëku poshtë strukturës.
Vepra kineze (43 nga 50 urat e varura “më të larta” në planet ndodhen në Kinë) do ta kalojë me 60 metra mbajtësen aktuale të rekordit, Urën Duge (565 metra), e ndërtuar në vitin 2016 afërsisht 200 kilometra më në veri, përsëri për të kaluar kanionin e thellë nëpër të cilin rrjedh Beipan.
Struktura masive u ndërtua vetëm tre vjet, duke kushtuar afërsisht 283 milionë dollarë, dhe është planifikuar të hapet për trafik deri në qershor të vitit 2025.
Për të kuptuar lartësinë marramendëse që po mbulon tashmë, mund të bëjmë një krahasim me disa nga rrokaqiejtë më të lartë në planet: Qendra Botërore e Tregtisë në Nju Jork, për shembull, mat “vetëm” 541 metra dhe, midis të gjithave, vetëm tre kanë numra më të mëdhenj (Burj Khalifa në Dubai, 830 metra, Merdeka 118 në Kuala Lumpur 680 metra, dhe Kulla e Shangait, 632).
Në përgjithësi, ura e varur është 2 890 metra e gjatë, me një hapësirë kryesore prej 1 420 metrash dhe dy kulla mbështetëse me lartësi 262 metra./KultPlus.com
Himara çel sot sezonin turistik me festivalin dyditor “Magji mbi Jon”.
Në kuadër të çeljes së sezonit do të mbahen edhe një sërë aktivitetesh të ndryshme.
Aktiviteti i parë ishte ai në orën 9:00 ku njeriu i rekordeve botërore dhe të Guinness-it, Agim Agushi, pas shumë sukseseve edhe ndërkombëtare, ishte në Himarë ku edhe fitoi rekordin e 16-të botëror të xhonglimit të topit me kokë duke veshur 14 bluza në një hapësirë vetëm 1 m2.
Në një performancë në qendër të qytetit bregdetar, Agushi ia ka arritur të fitojë certifikatën botërore, duke lënë një shenjë të suksesit të tij edhe në qytetin bregdetar.
“Është rekordi i 16-të, i cili u arrit në Himarë, në një disiplinë e cila është kërkuar nga selia e librit të Guiness në Londër, veshja e 14 fanelave duke xhongluar me top dhe duke qëndruar në një hapësirë 1 m2. Prej sot Himara do të jetë në librin e Guinness. Certifikatën me emrin e Himarës do t’ia sjell kryetarit të bashkisë”, tha Agim Agushi.
Kryetari i bashkisë Himarë shprehet i lumturi që Agim Agushi ka zgjedhur Himarën për këtë rekord, duke e nisur me këmbë të mbarë çeljen e sezonit turistik
“Kënaqësi për mua dhe Himarën. Ky nuk do të jetë rekord i Agimit, por rekordi i Agim Agushit në Himarë”, tha Vangjel Tavo.
Agim Agushi është fitues edhe i rekordeve të tjera Guinness në disiplinat e lira, pasi ka mundur të lërë pas polakun Dariusz Kolodziczyk.
Gjithashtu, kryebashkiaku i Himarës, Vangjel Tavo vizitoi sot edhe panairin e ngritur në zemër të Himarës “Shije, art dhe traditë”.
Panairet e çeljes së sezonit sjellin prodhime vendase, zeje artizanale dhe shumë ngjyra që pasqyrojnë shpirtin e jugut, theksoi Tavo në një postim në rrjetet sociale./atsh/KultPlus.com
Në 26-vjetorin e masakrës së Studimes në komunën e Vushtrrisë, Presidentja e Kosovës, Vjosa Osmani, ka përkujtuar me nderim dhe dhimbje viktimat e asaj që ajo e cilësoi si një nga aktet më mizore të regjimit gjenocidal serb.
Në një deklaratë publike, Presidentja rikujtoi se më 2 maj të vitit 1999, brenda vetëm dy orësh, 116 civilë shqiptarë, përfshirë gra, fëmijë dhe të moshuar u vranë mizorisht vetëm për shkak të përkatësisë së tyre etnike.
“Plagët e asaj dite të kobshme nuk do të shërohen kurrë, por e vërteta për mizoritë e kryera do të mbahet gjallë e do të përcillet brez pas brezi”, u shpreh Osmani.
Ajo nënvizoi gjithashtu se drejtësia për viktimat mbetet një ndër prioritetet kyçe të shtetit të Kosovës, ndërsa martirët e Studimes i cilësoi si “testament i përjetshëm i lirisë sonë”.
“Qoftë i përhershëm kujtimi për martirët e Studimes,” përfundoi ajo.
Masakra e Studimes mbetet një nga krimet më të rënda të luftës në Kosovë, që vazhdon të kërkojë drejtësi ndërkombëtare dhe njohje historike të dhimbjes së popullit shqiptar./KultPlus.com
Un’ jam un’, saksi e vjetër! Lule gjirit që stolisa shkoi stolisi një gji tjetër Un’ e nisa e stolisa me ç’i jep e s’i jep sisa dhe me këngë ylyveri buz’ e gushë ja qëndisa
Nëpër vapëz i dhash’ hije, nëpër hije er’ e shije i dhash’ shije poezie, gjith’ fuqit’ e një magjie gjith ato, që fllad i ëmbël nëpër lule mbar e bije ari i diellit me tallaze, ari i hënës fije-fije dashuria me dollira dhe me thelp lajthije pije…
Po u bë ajo që s’bënej, si, pra, zemra do duroj’, syri lotin ta qëndis, loti syrin ta harroj? Si, pra, zëmra do durojë un’saksia tash të vuaj edhe këngë e gjirit tim të këndoj’ në gji të huaj?
Un’ e nisa i stolisa me ç’i jep e s’i jep sisa, dhe me këngë ylyveri buz’ e gushë ja qëndisa buz’ e gushë ja qëndisa, e ormisa mu në zëmër plasi hëna ziliqare që shikonte me sy vëngër!
Më së fundi i dhash’ lotin, kryepajën time pajë i dhash’ lotët që pikonin ku i shkelte këmbë e saj’ i dhash’ vjershën time valë, dy herë valë tri her’ zjarr që buçet në maj të penës edhe bënet këng e marr’ këng’ e marr’ e mallit tim, që tani e paskëtaj do t’i shtrydh të dy sytë nëpër gjurmëtë e asaj!/KultPlus.com
Donatella Versace feston ditëlindjen e saj të 70-të, për herë të parë larg kompanisë së themeluar nga vëllezërit e saj Santo, mendja administrative, dhe Gianni, gjeniu krijues që la një gjurmë të pashlyeshme në modën e grave duke filluar nga fundi i viteve ’70.
Më 10 prill, u njoftua blerja e markës nga Grupi Prada nga grupi amerikan Capri Holdings për 1,25 miliardë euro.
Në të njëjtën kohë që operacioni u bë zyrtar, i cili u duartrokit edhe nga vetë vëllezërit Santo dhe Donatella, ndërsa e solli kompaninë përsëri në Itali, Patrizio Bertelli, president dhe CEO i Grupit Prada, dhe gruaja e tij Miuccia, thanë se ishin “të lumtur të mirëprisnin Versace në Grupin Prada dhe të fillonin një kapitull të ri për markën”.
Por, në të njëjtën kohë, ata njoftuan largimin e Donatella-s nga roli i saj si drejtoreshë krijuese e shtëpisë së modës.
Asaj iu besua roli i “ambasadores” së shtëpisë së bukurisë.
“Jam absolutisht e kënaqur që Versace po i bashkohet familjes Prada. Unë dhe Gianni gjithmonë kemi pasur admirim të madh për Miuccia-n, Patrizion dhe familjen e tyre. Ndihem e nderuar që e lë markën në duart e një biznesi familjar italian kaq të besueshëm dhe jam e gatshme ta mbështes këtë epokë të re për markën në çdo mënyrë që mundem”, shkroi ajo në faqen e saj në Instagram.
Roli i saj si ”ambasadore” e shtëpisë së modës nuk do ta përfshijë më në mënyrë aktive në vendimet për stilin.
Shkurt, Donatella mbush 70 vjeçe, për herë të parë larg markës Medusa që e drejtoi si stiliste për 28 vjet.
Një rol që ajo e mori pas vrasjes së vëllait të saj Gianni në Miami, në vitin 1997. Donatella, e lindur në vitin 1955, është vajza e katërt e familjes Versace.
Që nga fëmijëria, vëllai i saj, Gianni, e ka identifikuar atë si një muze, duke e përdorur si model për krijimet e tij.
Pasi u diplomua në gjuhë dhe letërsi të huaja në Universitetin e Firences, ajo ndoqi vëllain e tij Gianni, i cili u transferua në Milano dhe filloi ndërtimin e perandorisë Versace.
Marka lindi me një sfilatë të parë mode në Permanente në Milano dhe pati menjëherë sukses.
Gianni është krijuesi, Donatella e do botën e muzikës dhe fillon të merret me personazhe të famshëm. Santo, vëllai i madh, i diplomuar në Ekonomi dhe Tregti, merr përsipër pjesën e menaxhimit.
Donatella merr përsipër drejtimin krijues të linjave ”Versace Young” dhe ”Versus”.
Donatella është përgjegjëse për komunikimin përmes personazheve të famshëm si Elton John, Madonna dhe Sting.
Në vitin 1983 ajo u martua me ish-modelin Paul Beck me të cilin pati dy fëmijë, Allegra dhe Daniel.
Në vitin 1997, Gianni Versace u qëllua dhe u vra nga vrasësi serial Andrew Cunanan. Donatella merr frenat e shtëpisë së modës dhe së bashku me vajzën e saj Allegra mbajnë shumicën e aksioneve të markës.
Por diçka duket se nuk po shkonte mirë dhe në vitin 2004 Donatella, me këshillën e familjes dhe miqve të saj, vendos të shtrohet në një klinikë private në Arizona.
Programi i rehabilitimit për t’u çliruar nga varësia ndaj kokainës (siç deklaroi vetë ajo për Vogue në vitin 2005) zgjati një vit, pastaj ajo u rikthye në qendër të vëmendjes.
Pas blerjes së 20% të aksioneve nga kompania amerikane ”Blackstone”, shtëpia e modës iu rikthye famës.
Donatella vazhdon planin e zgjerimit të markës së saj duke e lidhur veten me kulturën pop, duke marrë si dëshmi personalitetet më me ndikim të momentit.
Me kalimin e viteve, Donatella do të veshë personazhe të famshëm si Rihanna, Beyoncé, Bruno Mars, Lady Gaga, të cilët do t’i kushtojnë asaj edhe këngën “Donatella”.
Në vitin 2017, me rastin e njëzet vjetorit të vdekjes së Gianni-t, Donatella rikthen në pasarelë modelet ikonike Claudia Schiffer, Naomi Campbell, Cindy Crawford, Helena Christensen dhe Carla Bruni, të prezantuara nga Gianni në vitet ’90, të gjitha të mbështjella me fustane prej rrjete metalike, një pëlhurë e dizenjuar nga vetë Gianni./KultPlus.com
Dhoma ishte e varfër, e ndyrë, fshehur mbi një tavernë të përdalë. Nga dritarja dukej sokaku, i ngushtë, i pisët. Nga poshtë vinin zërat e ca punëtorëve që luanin letra dhe gëzonin. Atje, në atë shtrat të vrazhdë, të thjeshtë kisha trupin e erosit, kisha buzët epshare, bojëshegë të dehashpirtit – shegë me një të tillë dehje, sa edhe tani që shkruaj, pas kaq e kaq vitesh në këtë shtëpi të vetmuar, dehem përsëri. / KultPlus.com
Alegoria e famshme “Ferma e Kafshëve” që flet mbi pushtetin, manipulimin e masave, që duket se është kthyer testament politik i autorit Geroge Orwell, Teatri Kombëtar e risjell në skenë pas 5 vitesh.
Vepra satirike mbi pushtetin, propagandën, premtimeve në dukje të duhura që zgjedhësit i çojnë në shtypje, është ky subjekti që autori zgjedh t’i vendosë në gojën e kafshëve, për të fshikulluar realitetet politike.
“‘Ferma e Kafshëve‘ flet Shqip, flet shumë për historinë e një populli që ka kaluar në diktaturë, dhe se sa e brishtë është më pas ajo që vjen pas një sistemi kaq të gjatë“, shprehet regjiorja, Driada Dervishi.
Regjisorja Driada Dervishi, është gjithmonë besnike që veprat e saj t’i shkojnë për shtat realitetit./tvklan/KultPlus.com
Presidentja e Republikës së Kosovës, Vjosa Osmani, ka bërë hapjen e Ambasadës së Republikës së Kosovës në Kuala Lumpur, Malajzi.
“Sot hapëm Ambasadën e Republikës së Kosovës në Kuala Lumpur, Malajzi. Një dritare e re për vendin tonë, me plot mundësi për bashkëpunim edhe më të thellë me Malajzinë”, ka shkruar Osmani.
Ajo u shpreh se kjo është një prani edhe më e fuqishme diplomatike në një nga rajonet më strategjike në Azi.
“Një shtëpi më shumë e Kosovës, ku do të avancohen interesat e qytetarëve tanë, do të fuqizohen aleancat tona dhe do të mbrohet me vendosmëri shenjtëria e sakrificës së popullit të Kosovës për liri e shtet”, ka shtuar ajo./KultPlus.com
Në nisje të sezonit veror Drejtoria e Përgjithshme e Arkivave (DPA) u ndal në një prej perlave joniane, për të sjellë pranë publikut ekspozitën dokumentare dhe fotografike mbi dinamikën e qytetit turistik të Himarës në shekullin e kaluar.
Në bashkëpunim me bashkinë e Himarës, DPA-ja shpalosi përgjatë shëtitores së qytetit një rrëfim në lidhje me bukurinë e përveçme të Rivierës dhe veprimtaritë publike të atyshme, të përqendruara në gjysmën e parë të shek. XX.
Në këtë aktivitet ishte i pranishëm kryebashkiaku Vangjel Tavo, si edhe banorë, turistë dhe të interesuar të shumtë.
Mes materialeve të përzgjedhura për ekspozim, bënin pjesë kërkesa e vitit 1922 për krijimin e bashkisë së Himarës, gjer asokohe nënprefekturë e Vlorës, korrespondenca mes banorëve të zonës dhe autoriteteve shtetërore mbi probleme të përgjithshme, kërkesa për rindërtimin e skelës së portit si dhe kërkesa për krijimin e një flote kombëtare tregtare.
Ekspozita do të qëndrojë e hapur deri të shtunën, datë 3 maj.
Promovimi i pasurisë dokumentare të kombit është një nga pikërëndesat në veprimtarinë e DPA-së./atsh/KultPlus.com
Qendra Kombëtare e Kinematografisë vendosi të miratojë financimin e zhvillimit të projekteve për katër filma të metrazhit të gjatë.
Filmat të cilëve do t’u financohet zhvillimi i projekteve janë:
“Pasuesi i padukshëm”, regjia dhe skenari Robert Budina, prezantuar nga producentja Sabina Kodra, shtëpia kinematografike “Era Film” me vlerë financimi 2,500,000 (dy milionë e pesëqind mijë) lekë;
“Midis tokës dhe qiellit”, regjia Gledis Bica, skenari Gledis Bica dhe Florent Zerellari, prezantuar nga producentja Ajsela Vojka, shtëpia kinematografike “dART Production” me vlerë financimi 1,750,000 (një milion e shtatëqind e pesëdhjetë mijë) lekë;
“Dita e Valentinit”, regjia dhe skenari Evi Gjoni, prezantuar nga producentja Elida Rasha, shtëpia kinematografike “Ska-Ndal”, me vlerë financimi 1,750,000 (një milion e shtatëqind e pesëdhjetë mijë) lekë;
“Lulebore dhe pika gjaku”, regjia dhe skenari Kelmend Karuni, prezantuar nga producenti Florenc Papas, shtëpia kinematografike “Tunnel Film” me vlerë financimi 1,700,000(një milion e shtatëqind mijë) lekë.
Më herët QKK shpalli fituesit e projekteve kinematografike si vepër e parë dhe e dytë, të cilat u fituan nga Erenik Beqiri, Suela Bako dhe Iris Elezi.
Projektet që janë shpallur fitues sipas QKK janë: “After dark” regjia Erenik Beqiri, skenari Erenik Beqiri e Marija Apvecka, prezantuar nga producenti Dritan Huqi, shtëpia kinematografike “On Film Production” me vlerë totale 19,000,000 lekë; “Të gjithë vdesim lakuriq” regjia Iris Elezi, skenari Iris Elezi dhe Thomas Logoreci, prezantuar nga producenti Enea Gramo, shtëpia diskografike “Art Film” me vlerë totale 18,500,000 lekë; “Ne të treja” regjia Suela Bako, skenari Suela Bako dhe Doruntina Basha, prezantuar nga producentja Sabina Kodra shtëpia diskografike “Era Film” me vlerë totale 18,500,000 lekë./atsh/KultPlus.com
Fqinja ime më dhuron një trëndafil sa herë kthehem nga rruga. E lodhja pa pandehur më shtrohet petale të kuqe në duar Intrigat në kërcej të prerë shtrembër. Ndërskamjet në gjemba të harruar.
E unë as vetë s’e di Si s’më kujtohet më gjithë ajo rrugë e gjatë e lodhshme E ngjitur pas këpucëve tërë pluhur.
Fqinja ime më tregon kopështin sa herë më shikon nëpër shkallë Këtë vit mëllagat janë më të mira e zambakët e bardhë nuk kanë të mbaruar. Pastaj pret një trëndafil të kuq si ai që më dhuroi sot në mëngjes teksa i jepja pakon e Amazonit që i kish ardhur për të birin.
Fqinja ime e mirë buzëqesh sa herë unë i thërras në emër Në sy i lulëzon harresa në duar i vyshken ditët që kanë filluar vallëzimin së prapthi ndërsa ajo pret një trëndafil të kuq Si ai që më dhuroi një orë më parë e unë i them sërish Për të pestën herë vetëm sot O Zot sa aromë fëmijërie! E fqinja ime e urtë mbushet frymë Mbyll sytë ngre supet si fëmija në ditën e parë të shkollës që mezi pret të zbulojë botën e madhe që asaj tashmë i lulëzon në duar në një trëndafil të kuq Të njëjtin që e harron sa herë i kthej shpinën.
Kisha e Shën Marisë, në Sinjë të Beratit, është Monument Kulture i Kategorisë I, prej vitit 2015.
Arkitektura e saj nuk shquhet për volume të konsiderueshme, por është një ndërtim mjaft i thjeshtë me gurë të përmasave mesatarë të lidhur midis tyre me llaç gëlqereje.
Struktura e mureve është e ndërtuar vetëm në tre krahë të planimetrisë së kishës; përkatësisht në fasadën perëndimore e cila është edhe fasada kryesore ballore, në atë veriore me shtrirje shumë të vogël dhe në fasadën jugore ku nga gjurmët kuptohet se fillimisht është përdorur si hyrje për në kishë nëpërmjet shtegut që formon shkëmbi natyror pranë.
Ana lindore kufizohet direkt me pjesën e shkëmbit natyror. Duke pasur vetëm një fasadë ballore edhe hapësirat e dritës ndodhen në këtë anë: tri dritare gjatësore prej druri me hapje horizontale nga brenda me arkitra druri sipër.
Specialistët e mirëmbajtjes së DRTK Berat kanë ndërhyrë duke bërë zbërthimin e kangjellave metalike që ishin vendosur në dritare. Në vend të tyre u vendosën kapakët tradicionalë prej druri. Kapakët u trajtuan me vaj lini për mbrojtje ndaj kushteve atmosferike dhe për të ruajtur pamjen natyrale të drurit.
Ndërhyrja e kryer ka si qëllim ruajtjen e autenticitetit dhe kthimin e elementëve orgjinalë të objektit Monument Kulture.
Hyrja kryesore e kishës së Sinjës ndodhet në anën lindore njëflegërshe me hapje nga brenda po prej druri, duke u paraprirë nga një derë prej hekuri. Në anën jugore ndodhet një portë dyflegërshe e bllokuar nga brenda me një mur dhe jofunksionale. Nga konfigurimi i terrenit pranë kuptohet se fillimisht kjo ka qenë hyrja kryesore për në kishë, duke kaluar nëpër shtegun e ngushtë pranë shkëmbit.
Hapësira e brendshme e kishës është e vogël dhe e përshtatur me terrenin shkëmbor./ KultPlus.com
Në kuadër të projektit të EU4Culture për trajnimet e udhërrëfyesve turistikë po përgatitet turi “Triada e Arbrit”.
Ky tur ekskluziv, ku janë të ftuar operatorët turistikë, guidat dhe profesionistët e turizmit përfshin kishën historike të “Shna’ Ndout” tek Kepi i Rodonit, kishën mesjetare të “Kuvendit të Manastirit” në Rubik dhe Urën të Kuçajt në Krujë.
Projekti mbështetet përmes programit EU4Culture, financuar nga Bashkimi Evropian dhe zbatuar nga UNOPS në partneritet me Ministrinë e Ekonomisë, Kulturës dhe Inovacionit.
“Triada e Arbrit” do të zhvillohet më 15 maj në këto tre destinacione magjepsëse të lidhura në një itinerar të harmonizuar që ofron përvojë të plotë kulturore dhe natyrore. Pjesëmarrësit do të marrin një paketë të plotë informative që përfshin jo vetëm të dhënat historike dhe kulturore për këto destinacione, por edhe udhëzime metodologjike se si të prezantohen këto informacione në mënyrën më tërheqëse për turistët./ KultPlus.com
Mbrëmë në Galerinë e arteve në Gjilan, para artdashësve, ku ishte i pranishëm edhe kryetari i kësaj komune Alban Hyseni, u hap ekspozita „Solidariteti si Rezistencë“ e piktorit Mentor Berisha. U ekspozuan punimet e ciklit të fundit të frymëzuar nga Falja e Gjaqeve, në shenjë të përvjetorit të 35-të të Aksionit për Pajtimin e Gjaqeve gjatë vitit 1990 në Kosovë. Ky cikël pikturash shpalos rolin e këtij aksioni dhe të tubimeve masive si subjekte politike dhe rezistuese gjatë një prej periudhave më të ndjeshme dhe transformuese në historinë e Kosovës.
“Në qendër të këtyre punimeve qëndron figura e një kolektivi aktiv e me përmasa masive, i cili bëhet dëshmitar dhe bartës i vullnetit për ndryshim. Solidariteti qytetar, në veprat e Berishës, shfaqet përmes ngjyrave, shtresimeve dhe motivit të karvanëve në lëvizje, ku pjesëmarrësit udhëhiqen nga dëshira e thellë për falje dhe vetëdijesim, duke u bërë pjesë e një lëvizjeje popullore që sfidon rendin e vjetër të izolimit dhe gjakmarrjes”, theksonte kuratori i kësa ekspozite Alban Beqiraj, në katalogun e saj. Beqiraj kishte veçuar se “Përmes një qasjeje ekspresioniste, piktori Berisha përdor teknikën spachtel dhe stilin alla prima, për të krijuar tekstura të trasha që ngjajnë me skulptura të ngritura mbi sipërfaqen e kanavacës – një proces që u jep veprave thellësi emocionale dhe plastike”.
Ekspozita përpos dhjetra pikturave u përcollë edhe me efekte dramatike të dritave, të muzikës dhe të instalacionit duke krijuar një hapësirë të rrallë ku vizitori kthehej në kujtesën e atyre ngjarjeve me plot emocion.” Dritat dhe ngjyrat e shtresuara përçojnë tensionin e çastit, dinamizmin e aksionit dhe gjallërinë e përbashkët që ngjizet në to. Kjo ekspozitë nuk është vetëm një kujtesë vizuale për të kaluarën, por edhe një formë alternative e eksplorimit dhe reflektimit mbi të”, përmbyllej fjala e kuratorit Beqiraj. Drejtori i DKRS-së Kushtrim Zeqiri, falënderoi autorin Mentor Berisha që kishte zgjedhur Gjilanin për ta hapur këtë ekspozitë, kurse drejtori i Galetisë së arteve Din Azizi, shpalli të hapur ekspozitën./ KultPlus.com
Shtetet e Bashkuara nuk do të ndërmjetësojnë më negociatat për paqe midis Ukrainës dhe Rusisë pasi Vladimir Putin refuzoi të pranojë një armëpushim.
Departamenti i Shtetit tha se po ndryshon “metodologjinë e kontributit tonë” në bisedime dhe se nuk do të “udhëtojë nëpër botë menjëherë” për takime.
Kjo vjen pasi SHBA nënshkroi një marrëveshje për mineralet me Ukrainën me kushte më të favorshme sesa ishte menduar fillimisht. Po ashtu, raportohet se Donald Trump miratoi dërgesën e parë të armëve nga administrata e tij drejt Kievit.
Departamenti i Shtetit deklaroi se tani Kievi dhe Moska duhet të paraqesin propozime “konkrete” për përfundimin e luftës dhe të takohen drejtpërdrejt për të zgjidhur konfliktin.
“Zoti Trump është bërë gjithnjë e më i frustruar me zotin Putin. Informacionet nga shërbimet e inteligjencës amerikane gjatë natës sugjerojnë gjithashtu se Putini është tani në një pozitë të dobësuar dhe ka ndryshuar qëllimet e luftës për të konsoliduar fitimet që ka arritur”, raporton The Telegraph./ KultPlus.com
Të mërkurën Heritage Space (CHwB Kosova), Fondacionet për Shoqëri të Hapur – Ballkani Perëndimor dhe Instituti i Historisë “Ali Hadri” – Prishtinë, kanë mirëpritur Elidor Mëhillin me ligjeratën publike “Diktatura,qyteti, arkivi: një udhërrëfyes”, moderuar nga Mrika Limani-Myrtaj.
Ngjarja u mbajt në Bibliotekën Kombëtare të mërkuren, më datën 30 prill, në ora 19:00.
Autori dhe historiani Elidor Mëhilli (City University of New York/Columbia University) foli për historinë e vonë të Shqipërisë si një itinerar i vendeve të kujtesës dhe të harresës. Duke u mbështetur në mbi pesëmbëdhjetë vjet hulumtime arkivore, kumtesa erdhi në formën e një udhërrëfyesi vizual, i ilustruar me fotografi personale të shkrepura gjatë viteve dhe të ekspozuara së fundmi në Institutin Harriman të Columbia University në New York. Rrëfimi u ndal në pesë stacione: godina-burg e Arkivit të Shtetit në Tiranë si problem i kujtesës; varret e përdhosura të shenjtëve gjatë fushatës antifetare të vitit 1967; Pallati i Kulturës si depo librash të ndaluar në 1975; Vila Nr. 31 e diktatorit si vend i letrarizimit historik dhe përpunimit të një kulti patriarkal në vitin 1980; dhe, së fundmi, një fotografi anonime e një piedestali të zbrazët në vitin 1993. Kundër tendencës për të ekzotizuar historinë e Shqipërisë për një audiencë perëndimore, leksioni është ftesë e hapur për të diskutuar qasjet tona ndaj së kaluarës pas dhunës.
Autor i nderuar me çmime, Elidor Mëhilli është profesor i asociuar i historisë, politikave publike dhe të drejtave të njeriut në City University of New York dhe profesor i ftuar në Columbia University. Doktoraturën e ka mbaruar në Princeton University dhe ka qenë studiues i ftuar në Columbia University, The University of Pennsylvania, The Zentrum für Zeithistorische Forschung në Potsdam, Gjermani, Birkbeck College në Londër, Mbretëri të Bashkuar, dhe në Hoover Institution në Stanford University. Puna e Elidorit fokusohet në diktaturat, regjimet autoritare dhe dimensionet diplomatike, ekonomike, politike dhe kulturore të Luftës së Ftohtë. Libri i tij, Nga Stalini te Mao: Shqipëria dhe bota socialiste ka fituar tre çmime.
Mrika Limani Myrtaj është Bashkëpunëtore shkencore në Institutin e Historisë “Ali Hadri” – Prishtinë. Interesimet e saja kërkimore përfshijnë dhunën masive, lëvizjet sociale radikale dhe proceset emancipatore gjatë shekullit të 20-të. Ajo është autore e disa artikujve shkencorë dhe dy monografive me titujt Perspectives on Ideology and Violence during the Second World War in Kosova [Perspektiva mbi ideologjinë dhe dhunën gjatë Luftës së Dytë Botërore në Kosovë] (2021) dhe Përkohësia e lëvizjeve kundërshtuese në Kosovë 1941-1999 (2024).
Ky projekt është pjesë e platformës #HeritageSpace, e implementuar nga CHwB Kosova dhe financuar nga Qeveria Suedeze.
Galeria Qahili feston ditëlindjen e 12-të të saj, me ekspozitë, punëtori, muzikë e koktej me 6 maj duke filluar nga ora 17:00.
Shënimi i 12-vjetorit bëhet më 6 maj 2025, duke filluar nga ora 17:00. Në këtë hapen dyert për një ekspozitë festive që sjell në vëmendje koleksionin e Galerisë Qahili, një udhëtim i dymbëdhjetë viteve me art, ngjyra, emocione dhe krijimtari. Ngjarja do të përcillet me muzikë, punëtori dhe koktej.
Këtë vit, tema është “Toka” – një reflektim poetik për marrëdhënien tonë me natyrën, frymën krijuese dhe hapësirën e artit. Përmes vargjeve që shoqërojnë ekspozitën, theksohet lidhja mes trupit, shpirtit dhe tokës – një vallëzim i erës mbi kujtime, ngjyra dhe përjetime.
Për 12 vite, Galeria Qahili ka qenë një hapësirë për artistët, një shtëpi për artin bashkëkohor dhe një hapësirë që ka gjallëruar jetën kulturore të qytetit./ KultPlus.com
Qendra Kombëtare e Librit dhe Leximit shpalli thirrjen për aplikime për Fondin e Krijimtarisë Letrare për Fëmijë 2025.
Aplikimet priten deri më datën 20 maj 2025, ora 16:00.
“Letërsia shqipe për fëmijë, është pjesë e trashëgimisë sonë letrare në edukimin e brezave. Mbështetja e autorëve që e pasurojnë këtë letërsi, është pjesë e rëndësishme e punës sonë, drejt vazhdimësisë dhe vlerave”, shkroi QKLL në faqen e saj në rrjetet sociale.
QKLL njoftoi se, thirrja u drejtohet autorëve mbi moshën 18 vjeç, në gjininë e prozës dhe poezisë për fëmijë. Shuma e financimit për mbështetjen e procesit krijues të veprës, do t’i paguhet drejtpërdrejt botuesit, i cili duhet të kryejë aplikimin duke qenë i pajisur me licencë përkatëse, nëpërmjet përfaqësuesit ligjor.
Aplikimet do të dorëzohen në formë të printuar, dorazi ose në rrugë postare, në zyrën e Protokollit të Qendrës Kombëtare të Librit dhe Leximit brenda datës 20.05.2025, ora 16:00, si dhe në adresën elektronike: [email protected] dhe atë postare./ KultPlus.com
Në Arts Festival Summit në Edinburgh, asambleja e përgjithshme e EFA-s, ka miratuar anëtarësimin e festivalit ReMusica duke e njohur zyrtarisht si anëtar të ri që nga sot.
“Jemi jashtëzakonisht krenarë që i bashkohemi zyrtarisht Asociacionit të Festivaleve Evropiane, një familje festivalesh që ndajnë besimin tonë në fuqinë e kulturës për të bashkuar, transformuar dhe frymëzuar. Mezi presim të kontribuojmë përvojën, energjinë dhe idetë tona me festivalet Evropiane, ne EFA”, thuhet në njoftim.
Festivali ReMusica është festival ndërkombëtar i muzikës dhe një nga ngjarjet kyçe kulturore në Kosovë, me fokus si në muzikë ashtu edhe në edukim. Objektivi i tij kryesor është promovimi i muzikës bashkëkohore, duke përfshirë veprat e shekullit të 20-të, muzikës së vjetër, klasike dhe muzikën akusmatike, me artistë të klasit botëror dhe vendas. I themeluar në pranverën e vitit 2002, si aktivitet i “Qendrës për Muzikë të Re”, me mbështetjen e Vanessa Redgrave dhe Philip Glass pas luftës në Kosovë, sot festivali mban koleksionin më të madh të regjistrimeve audio të kompozitorëve vendas nga njëzet vitet e fundit.
ReMusica është më shumë se një festival. Është një katalizator për edukim, me master klase, punetori, dhe programe të përkushtuara për të rinj, fëmijë. Është gjithashtu qendër për diplomacinë publike, duke nxitur në mënyrë aktive shkëmbimin kulturor dhe dialogun duke bashkëpunuar me festivale dhe institucione evropiane.
Edicioni XXIV (24) i Festivalit ReMusica do të mbahet nga data 27 deri me 30 Tetor 2025! / KultPlus.com
Qendra Kombëtare e Librit dhe Leximit ka ndarë sot vlerësimet për fituesit e Fondit të Krijimtarisë Letrare për të Rinj për vitin 2025.
Juria, e kryesuar nga shkrimtari Ylljet Alicka dhe me anëtarë pedagogen e letërsisë, Dhurata Shehri dhe gazetaren e kulturës, Arta Marku vlerësuan mes 18 dorëshkrimeve veprat: “Pallati i dëshpërimit” (roman), “Testosteron” (vëllim me tregime), “Shpikja e skandalit në idil”, (vëllim me poezi).
Fituesit e Fondit të Krijimtarisë Letrare për të Rinj për vitin 2025 janë:
Ena Bulku për romanin “Pallati i dëshpërimit”, nga shtëpia botuese “Ombra GVG” me motivacionin: “Një roman që eksploron në mënyrë fine fatin e individit, botën e tij të brendshme duke përzier erudicionin, poezinë dhe meditimin mbi kohën dhe kujtesën”.
Arbër Selmani për vëllimin me tregime “Testosteron”, nga shtëpia botuese “Albas” me motivacionin: “Proza që shkëlqejnë me intuitë dhe stil në zbulimin e të vërtetave të artit”.
Elvin Nuri për vëllimin poetik “Shpikja e skandalit në idil”, nag shtëpia botuese “Berk”, me motivacionin: “Poezi e vetmisë urbane, që figurën e bën zgjedhje jo dekorative”.
Ndërkohë, me propozimin e jurisë do të mbështeten për botim edhe tre të rinj të tjerë, të cilët janë:
Liza Brozi me dorëshkrimin “Vdekja e kukullës” nga shtëpia botuese “Albas”.
Antonio Çikollari me dorëshkrimin “Pesë vdekje” nga shtëpia botuese “Albas”.
Xhensila Dautllari me dorëshkrimin “Anahera: E fshehta në godinën e pestë” nga shtëpia botuese “Toena”./ KultPlus.com
Biletat më të lira të festivalit Sunny Hill mbyllen sot. Menjëherë pas kësaj, do të filloj zbulimi i emrave të artistëve më të mëdhenj të muzikës botërore që do të jenë pjesë e këtij edicioni.
Ka ardhur momenti i fundit për të siguruar biletat “Believer” për Sunny Hill Festival 2025! Vetëm deri në ora 20:00 do të keni mundësinë për të blerë biletën me çmimin me të lirë ndonjëherë, e që u siguron mundësinë për të qenë pjese e festivalit me të madh të muzikës në rajon.
Menjëherë pas mbylljes së biletave të llojit “Believer”, do të nis zbulimi i emrave të parë të artistëve të mëdhenj ndërkombëtarë që do të ndezin skenat e këtij edicioni spektakolar.
Këtë vit, Sunny Hill Festival po premton një listë artistësh që do ta bëjnë këtë edicion absolutisht të paharrueshëm dhe atraktiv për adhuruesit e muzikës nga gjitha vendet e Evropës. Këtë vit, numri i njerëzve që do të marrin pjesë në Sunny Hill Festival nga vendet e ndryshme të botës pritet të rritet edhe më tej. Vitin e kaluar, Sunny Hill Festival ka shërbyer mbi 100,000 njerëz në gjithë edicionin e festivalit.
Sunny Hill Festival mbahet nga 1 deri më 3 gusht në Bërnicë dhe pritet të ofrojë një atmosferë elektrizuese, performanca të paharrueshme, dhe një miks të fuqishëm të ikonave globale me talentet më të mirë të skenës vendore.
Prishtinë, Kosovë – Një nismë e re e titulluar Iniciativa e Barabar (shkon) në komunitet, e cila është lansuar zyrtarisht këtë muaj, synon të shfrytëzojë fuqinë e artit dhe kulturës për të promovuar përfshirjen, kohezionin dhe pjesëmarrjen demokratike në mbarë Kosovën.
Financuar nga Bashkimi Evropian dhe udhëhequr nga Integra në partneritet me Qendrën për Veprime Afirmative Sociale (CASA), projekti dyvjeçar do të mbështesë organizatat e shoqërisë civile (OSHC) me bazë në komunitet, gratë artiste dhe aktiviste dhe punonjësit lokal të kulturës për të udhëhequr përgjigjet kreative ndaj disa prej sfidave sociale më urgjente të Kosovës.
“Duke krijuar hapësirë për zërat e nismave me bazë në komunitet, veçanërisht grave dhe komuniteteve e nënpërfaqësuara, ndërtojmë një platformë për dialog, kreativitet dhe ndryshim civil”.
Në qendër të nismës është Rrjeti Barabar në Komunitet (BGN), një kornizë e re bashkëpunimi që do të bashkojë së paku 15 OSHC-të me bazë në komunitet dhe 10 artiste nga e gjithë Kosova. Nëpërmjet trajnimeve të përshtatura, nën-granteve dhe ngjarjeve bashkëpunuese, anëtarët e BGN do të zbatojnë nismat lokale dhe do të kontribuojnë në zhvillimin e politikave kombëtare, veçanërisht në fushat që lidhen me përfshirjen sociale, pjesëmarrjen kulturore, drejtësinë tranzicionale dhe barazinë gjinore.
Projekti BIG bazohet në mësimet e nxjerra nga Qendra Barabar në Prishtinë, një hab kulturor ndëretnik i nisur në vitin 2023. Ky projekt e zgjeron këtë model përtej kryeqytetit dhe në komunitetet lokale, duke ofruar mbështetje për ata që tashmë janë duke punuar në vijën e parë të përfshirjes dhe angazhimit qytetar.
“Arti dhe kultura nuk janë vetëm shprehje, ato janë mjete për shërim, fuqizim dhe ndryshim politikash”
Materialet informuese publike, duke përfshirë një broshurë dhe njoftime e ardhshme për aktivitetet e radhës, janë në dispozicion në faqet e internetit dhe kanalet e mediave sociale të partnerëve të projektit./ KultPlus.com
Presidenti amerikan Donald Trump e ka pranuar se tarifat e tij mund të çojnë në çmime më të larta dhe ulje të disponueshmërisë së disa produkteve në SHBA.
“Fëmijët amerikanë ndoshta mund të kenë dy kukulla në vend të 30”, tha Trump, duke këmbëngulur se Kina do të vuante më shumë se SHBA nga lufta tregtare.
Bëhet e ditur se presidenti amerikan po përpiqet të sigurojë publikun se tarifat e tij nuk do të shkaktojnë recesion, pasi një raport i ri i qeverisë tregoi se ekonomia amerikane u tkurr në tre muajt e parë të këtij viti, përcjell Telegrafi.
Trump fajësoi menjëherë paraardhësin e tij, Joe Biden, ndërsa i tha administratës së tij se Kina “ka një problem të madh sepse fabrikat e saj nuk po funksionojnë”, duke shtuar se SHBA-së nuk i duhen shumë nga ato që importojnë nga Kina.
“E dini, dikush tha po sikur raftet të jenë bosh. Ndoshta fëmijët do të kenë dy kukulla në vend të 30. Ndoshta ato dy kukulla do të kushtojnë dy dollarë më shumë sesa zakonisht”, tha Trump.
Ndryshe, përpara fjalimit të Trumpit, Departamenti i Tregtisë raportoi se ekonomia amerikane u tkurr me një normë vjetore prej 0.3% në tremujorin e parë.
Rënia u nxit nga një rritje e importeve pasi kompanitë u përpoqën të merrnin mallra përpara se të hynin në fuqi tarifat gjithëpërfshirëse./ KultPlus.com
Shqipëria ka shënuar një përmirësim të ndjeshëm në Indeksin Global të Lirisë së Shtypit për vitin 2025, sipas raportit të publikuar nga organizata Reporterët pa Kufij (RSF).
Vendi renditet i 80-ti në botë, nga 180 shtete të vlerësuara, duke u ngjitur me 19 pozicione krahasuar me vitin 2024.
Në nivel rajonal, Shqipëria pozicionohet e treta për lirinë e medias, pas Malit të Zi dhe Maqedonisë së Veriut, duke lënë pas një vend të Bashkimit Evropian si Greqia.
Sipas raportit, një lajm pozitiv është se në Shqipëri nuk është raportuar asnjë rast i gazetarëve të vrarë apo të burgosur gjatë vitit të fundit.
Megjithatë, RSF evidenton se sfidat mbeten të pranishme, veçanërisht në lidhje me konfliktin e interesit dhe pavarësinë ekonomike të mediave. “Në Shqipëri, liria e shtypit dhe pavarësia e medias kërcënohen nga lidhjet e ngushta midis botës së biznesit dhe politikës. Gazetarët përballen me frikësime nga politikanët dhe krimi i organizuar”, thekson raporti.
Sipas të dhënave të raportit, Shqipëria ka performuar mirë në indikatorë si siguria, aspektet ligjore dhe ato sociale, ndërsa ka rezultuar dobët në treguesit politikë dhe ekonomikë, çka pasqyron ndikimin e fortë të politikës dhe interesave biznesore në funksionimin e mediave.
Për krahasim, Kosova dhe Serbia janë renditur më poshtë në indeksin rajonal, përkatësisht në vendin e 99-të dhe të 96-të në botë.
Pjesë nga raporti
“Gazetarët përballen me presion politik, veçanërisht gjatë zgjedhjeve. Politikanët kufizojnë pavarësinë editoriale duke politizuar rregullatorët e medias dhe duke emëruar ata që janë përgjegjës për median publike. Gazetarët kritikë ndaj autoriteteve shpesh i nënshtrohen sulmeve të dizajnuara për t’i diskredituar ata si nga qeveria ashtu edhe nga opozita, dhe ata kanë vështirësi në marrjen e informacionit shtetëror, qasja në të cilin mund të jetë edhe më e kufizuar nga një centralizim i kohëve të fundit i komunikimeve qeveritare”.
Korniza ligjore
“Edhe pse kushtetuta e Shqipërisë dhe angazhimet ligjore ndërkombëtare garantojnë lirinë e shtypit, mbrojtja e konfidencialitetit të burimeve është e pamjaftueshme. Si rezultat i vendimeve gjyqësore kontraverse, mediave iu ndalua të mbulonin çështje të ndjeshme me interes publik”.
Konteksti sociokulturor
“Gazetarët që hetojnë krimin dhe korrupsionin janë veçanërisht objektiva të kërcënimeve. Gazetaret gra, të cilat përbëjnë shumicën e profesionit, përballen me ngacmime online dhe në disa raste me diskriminim gjinor brenda organizatave të lajmeve, megjithëse ka pasur përparim në këtë fushë. Autocensura është e përhapur, por megjithatë mediat kanë krijuar një platformë për vetërregullim etik, të parin e këtij lloji në Shqipëri”, thuhet në raport.
Rajoni dhe bota
Në rajonin e Ballkanit, raporti vëren një rënie të përgjithshme të lirisë së shtypit. Mali i Zi mban vendin më të lartë në rajon, në pozicionin e 37-të, i ndjekur nga Maqedonia e Veriut, Bosnja dhe Hercegovina, dhe Serbia. Kosova ka shënuar gjithashtu rënie në renditje, duke u pozicionuar në vendin e 99-të.
Në përfundim, RSF nënvizon se presioni ekonomik, i lidhur me përqendrimin e pronësisë, varësinë nga reklamuesit dhe mungesën e mbështetjes publike transparente, është një nga faktorët kryesorë që po e minojnë lirinë e medias. “Pa pavarësi ekonomike nuk mund të ketë shtyp të lirë”, thuhet në raport.
Në nivel global, raporti për vitin 2025 kryesohet nga Norvegjia, e ndjekur nga Estonia, Holanda, Suedia dhe Finlanda. Ndër vendet që kanë pësuar rënie të lehtë janë Shtetet e Bashkuara, që kanë zbritur nga vendi i 55-të në të 57-in, dhe Italia, nga vendi i 46-të në të 49-in.
Eritrea mbyll listën e renditjes botërore, ndërsa Kina dhe Koreja e Veriut pozicionohen menjëherë më sipër, duke përbërë tre vendet me lirinë më të kufizuar të medias./ KultPlus.com
