“Berati Bardhë e Zi” është ekspozita më e fundit e hapur në hollin e Pallatit të Kulturës “Margarita Tutulani” në qytetin e Beratit, mbrëmjen e së enjtes. Qyteti i njëmijë e një dritareve vjen i konceptuar në 45 piktura nga fëmijët e shkollave 9-vjeçare të Beratit, përmes gjinive të ndryshme artistike .
Veprat e punuara nga nxënësit pasqyrojnë Beratin, që nga lagjet muzeale e deri tek monumentet e kulturës e rrugicat me kalldrëm të qytetit muze.
“Kjo ekspozitë u hap në një datë të rëndësishme për qytetin tonë, ku fëmijët plemes pikturave të tyre përcollën mesazhe të ndryshme nën tematikën “Berati qyteti im”, tha Jani Kumati, mësues pikture.
“Puna që kam bërë më ka marrë diku te tre orë dhe kam sjell copëza të rrugicave historike të qytetit tim Beratit.”
Interesi për artet vizive veçanërisht tek fëmijët mbetet gjithnjë i lartë. Këtë e vë në dukje edhe mësuesi i pikturës në këtë qytet Jani Kumati, i cili shprehet se kjo vjen si pasojë e dëshirës së të rinjve për të pasur vlera artistike brenda vetes dhe për t’u formësuar artistikisht.
“Ndër vite fëmijët kanë krijuar një bashkërendim midis mësuesit të artit dhe pjesës tjetër dhe kjo vjen sepse ata dëshirojnë të kenë vlera artistike brenda vetes të formësohen nga ana artistike. Pjesa në qytetin tonë sa vjen edhe shtohet në qytetin tonë, dashuria për artin” , shprehet mësuesi.
Ekspozita “Berati Bardhë e Zi” erdhi pikërisht në Ditën Ndërkombëtare të Monumenteve dhe Siteve dhe vijoi me aktivitete të tjera, panaire të ndryshme artizanale dhe mbrëmje muzikore nga grupi popullor i qytetit./vizion/KultPlus.com
Disa ish-të burgosur politikë u rikthyen në ish-burgun e Spaçit për të ndarë historitë e tyre me brezat e rinj.
Takimi u organizua me rastin e ekspozitës “E kaluara e tashme” e mbështetur nga programi EU4CULTURE.
Nëpërmjet skulpturave dhe regjistrimeve të 49 ish-të burgosurve politikë, kjo ekspozitë kujton vuajtjet, por edhe qëndrueshmërinë e popullit shqiptar dhe në këtë mënyrë nxit një diskutim të mirëfilltë për të kaluarën e Shqipërisë.
Ambasadori i BE-së, në vendin tonë, Silvio Gonzato e cilësoi prekës takimin me të mbijetuarit e burgut të Spaçit.
“Takimi me të mbijetuarit e burgut të Spaçit, një prej burgjeve më brutale të regjimit komunist në Shqipëri, ishte vërtet prekës. Të dëgjuarit e historive të tyre më kujtoi se ka mbetur shumë për të bërë në ballafaqimin me të kaluarën. Më vjen mirë që kaq shumë të rinj erdhën në Spaç për të takuar të mbijetuarit. Ata duhet të kuptojnë se nga vijnë dhe çfarë ka kaluar Shqipëria. Njeriu duhet të shërojë plagët e së kaluarës duke adresuar të drejtat e viktimave. Jam krenar që e mbështetëm këtë event, por kjo nuk mjafton. Ish-burgu i Spaçit po përkeqësohet me shpejtësi, ndërkohë që duhet ruajtur në mënyrë që ne të kujtojmë atë që ndodhi këtu dhe të themi: kurrë më”, u shpreh ambasadori i Gonzato./atsh/ KultPlus.com
Së shpejti Galeria e Artit Tiranë (GAT) do të çelë ekspozitën vetjake të piktorit Buron Kaceli, titulluar “Dhoma e pasme”. Në faqen e saj online, GAT shkruan se ekspozita vjen në vazhdë të konceptit kuratorial “Si ishim, si jemi, si ndihemi-Vetëm, Bashkë”.
Veprat që piktori ka përzgjedhur për këtë ekspozitë vijnë si një hulumtim i fenomeneve të vetë qytetit, njerëzve, lagjeve, komunave, bashkëjetesës në realitetin e ri në përgjithësi, që nga karakteristikat urbane e deri tek transformimi psiko-social i tij, bashkërenduar kjo me rivizitimin e trashëgimisë kulturore dhe interpretimeve bashkëkohore.
Galeria e Arteve Tirane synon një program të qëndrueshëm duke krijuar ekspozitat dhe eventet e saj në kohezion me realitetin bashkëkohor të Tiranës.
“Dhoma e pasme” e Buron Kacelit vjen pas disa ekspozitave interesante që patën jehonë në jetën kulturore në Tiranë si, ekspozita e Kukullave Japoneze,“Ningyo & Na ishte Njëherë’, “Introspeksion” i artistit Toni Milaqi dhe së fundmi ekspozita fotografike “Lana-Tirana,Para-Pas Albania” e fotografit Roland Tasho./atsh/KultPlus.com
Në ish-burgun e Spaçit, në Mirditë, do të ngrihet ekspozita “E Kaluara e Tashme”.
Ministri i Ekonomisë, Kulturës dhe Inovacionit Blendi Gonxhja, ndau në rrjete sociale posterin e kësaj ekspozite, që do ngrihet për të qëndruar përgjithmonë në Spaç të Mirditës.
Gonxhja tha se, 49 portretet e ish të burgosurve politik që janë ende në jetë, bashkë me rrëfimet e tyre do të jenë të hapura për publikun që prej datës 13 prill 2024 e në vazhdim.
“Kushdo mund të shoh trupëzimi i 49 portreteve në një skulpturë të vetme e cila kthehet në një monument të kujtesës kolektive, pikëtakim dhe pikënisje e procesit zhvillimor shoqëror. Kjo ekspozitë është një akt artistik-kulturor i cili finalizohet me praninë e publikut, rinisë, institucioneve, dhe të gjithëve si aktorë aktiv të ndërtimit të një shoqërie”, u shpreh ministri.
Historitë dhe vuajtjet në ish-burgun famëkeq të Spaçit në Mirditë, vijnë përmes kësaj ekspozite, me krijimin e skulpturave nga Kristian Zara. Teksa kurator të ekspozitës janë Arnen Sula dhe Kristian Zara.
Projekti është konceptua dhe realizua nga Tek Bunkeri, financuar nga Bashkimi Evropian pjesë e programit EU4CULTURE, zbatuar nga UNOPS në partneritet me Ministrinë e Ekonomisë, Kulturës dhe Inovacionit (2023-2024).
Qëllimi i ekspozitës është të treguarit e kësaj pjese të historisë shqiptare me anë të krijimit të një skulpturë monumentale e cila do të qëndrojë përgjithmonë në Spaç./atsh/KultPlus.com
Në Vjenë, në Bildungsakademie Gaweinstal, u hap ekspozita “Midis Fates dhe Fates“.
Në këtë event që mblodhi personazhe të shquara të artit dhe kulturës dhe jo vetëm, Fate Velaj paraqiti punimet e tij pikturë, fotografi dhe literaturë.
Mbi veprën e autorit, botën e tij midis artit, kulturës, politikës dhe diplomacisë, folën Franz Knittelfelder drejtor i Akademisë, Johannes Berthold, kryetar i Bashkisë, Andreas Minnich, deputet në Parlamentin e Austrisë si dhe ambasadore e Shqipërisë pranë OSCE-UNO, Eglantina Gjermeni./balkanweb/KultPlus.com
Palazzo Reale e Milanos po feston 150 vjetorin e lindjes së impresionizmit me një ekspozitë të veprave të kumbarëve të lëvizjes, artistëve francezë Paul Cezanne dhe Pierre-Auguste Renoir.
Janë ekspozuar në Milano 52 piktura të tyre, që datojnë nga vitet 1870 deri në fillim të shekullit të 20-të.
“Këtë vit është 150 vjetori i ekspozitës historike pariziane, e cila i dha emrin lëvizjes impresioniste dhe e cila u mbajt në prill 1874,” shpjegoi historiani i artit Stefano Zuffi. “Ajo ekspozitë përfshinte vepra të Cezanne dhe Renoir dhe këta dy protagonistë janë identifikuar për një rrugë që i krahason ato paralelisht dhe në lidhje.”
Ekspozita tregon ngjashmëritë novatore të artistëve, si dhe dallimet e tyre.
Cezanne dhe Renoir ishin miq dhe shpesh punonin së bashku, por për kuratoren Cecile Girardeau, secili artist ka një stil të dallueshëm dhe të dallueshëm.
“Nga njëra anë, ne kemi Cezanne që kërkon struktura thelbësore gjeometrike, modele në një natyrë të qetë,” tha ajo. “Për shembull, ai përfaqëson mollët si sfera. Ai jep idenë e një tavoline duke vizatuar një drejtkëndësh që nuk do të jetë domosdoshmërisht i drejtë.”
“Nga ana tjetër, Renoir, i cili është gjithashtu shumë i vëmendshëm ndaj vizatimit, por që i kushton shumë rëndësi renderimit të teksturave dhe në veçanti ai kërkon gjithmonë të japë ndjesinë e lëkurës, të rivendosë perlën e nënës në teksturë”, shpjegoi ajo.
Përveç pikturave, ekspozita përmban edhe rekreacione të punëtorive të artistëve.
Por nuk është gjithçka për Cezanne dhe Renoir – dy piktura të artistit spanjoll Pablo Picasso, i cili u frymëzua nga impresionistët – janë gjithashtu të ekspozuara./euronews/KultPlus.com
Gjashtë skulptura të ndërthurura me një fabul të thellë filozofike, prapa së cilës qëndron termi i luftës, janë paraqitur në ekspozitën e pestë personale të skulptorit Hagji Gjoni, shkruan KultPlus.
Ekspozita me theks të veçantë i është kushtuar shtetit të Ukrainës dhe vendeve të tjera të cilat aktualisht janë në luftë. Me theks të veçantë ekspozita shpreh shpirtin e ndjeshëm të artistit i cili edhe vet e kishte përjetuar luftën e Kosovës, ku me këtë rast ka marr mbi supe trajtimin e një teme të tillë dhe dërgimin e mesazheve nëpër botë brenda natyrës së humanizmit për këtë tematikë e cila rrezikon demokracinë dhe çdo gjë tjetër që përfshihet në të.
Secili punim ne thelb ka tregimin për të rënët. “Figurat e kuajve”- paraprojektohen si tankse, sinonim i armëve të rënda, formulë e shtigjeve garuese apo deshifrim i të fortëve.
“Figura e qiriut”- shpreh kufijtë e dhimbjes dhe të përlotjes, ndërsa “thesi me grurë” përkon me proverbin “çka mbjellë korrë” si metaforë për rreziqet potenciale gjersa të fortët godasin me bomba tokën për të helmuar tokë e ujë, kurse njeriu i thjeshtë ngel me thes në shpinë si hamall.
Përderisa “Saksia” paraqet paqen, aromën, ngjyrat e dashurisë, kthesat dhe dëshirën për të kapërcyer kufijtë gjembor dhe hasmëritë e mëdha që janë bërë nyje barrikaduese e mendimit të lirë në etherin qiellor.
Kjo ekspozitë me mesazhe të thella për botën u shpall e hapur në ambientet e ngrohta të strehës së artit dhe kulturës shqiptare dhe asaj botërore, në KultPlus Caffe Gallery.
Kuratorja e ekspozitës dhe njëkohësisht edhe drejtoresha e mediumit KultPlus në hapje të ngjarjes në fjalë tha se formati minimalist me të cilin skulptori kishte shprehur pasionin e madh për artin e kishte nxjerrë në pah edhe anën profesionale të tij.
“Pikërisht, ky format minimalist e ka nxjerrë në pah anën profesionale të Haxhiut i cili ka sjell versione të ndryshme të cilat po i shohim në këtë ekspozitë. Gjoni dëshmoi se jo gjithmonë formatet e mëdha tregojnë profesiosnalizmin, se pikërisht këto skulptura të formatit të vogël, të punuara me aq delikatesë tregojnë për punën artistike të Gjonit. Unë jam shumë kureshtare të di se si ka për të funksionuar Haxhiu gjatë kohës sa këto skulptura do të jenë në ambientet e KultPlus Caffe Gallery, pasi përgjatë takimeve që i kemi pasur me të deri në realizimin e kësaj ekspozite kam parë nga afër sa shumë ishte i lidhur me punimet e tij”, u shpreh kuratorja Pajaziti.
Drejtoresha Pajaziti më tej u shpreh e lumtur që pikërisht KultPlus Caffe Gallery është hapësira që po prezanton këto punime kaq elegante.
“Ne jemi me fat që KultPlus Caffe Gallery po i prezanton këto skulptura kaq të veçanta, andaj ftojmë edhe ata që nuk kanë arritë të jenë sonte, të vijnë përgjatë javës dhe të shohin nga afër këto skulptura” ka përfunduar Pajaziti.
Kurse Naser Shatrolli, zyrtar nga Ministria e Kulturës, Rinisë dhe Sportit e cila edhe e ka përkrahur ekspozitën, tha se artisti Gjoni është unik në llojin e vet pasi është i lidhur fuqishëm shpirtërisht me skulpturën si variant i artit në përgjithësi.
“Ardiana tha me plotë të drejtë që Gjoni është i lidhur fuqishëm shpirtërisht në kuptimin e përgjithshëm me skulpturën, me gurët, me miniaturat të cilat i zgjedh në të gjitha kontitnente të botës dhe i sjell e kontekstualizon me një ide të caktuar. Kësaj radhe ekspozita i kushtohet Ukrainës ose vendeve ku zhvillohen luftëra dhe ku ajo ndjeshmëria ndaj njeriut ose botës njerëzore është element jetik për vetë universin dhe globin. Me këtë rast e kemi nisur me atë qiriun, grurin, kuajt atë supremacionin e asaj çka quhet e fuqishme e superfuqive kur të provojnë të ndeshen është një ekspozitë që është shumë simbolike por ka brenda vetvetes, brenda strukturës shumë elemente që japin porosi për botën”, ka thënë Shatrolli.
Ai më tutje tha se veprat e Gjonit janë unike pasi është pasioni i madh i tij që bën që artisti të jetë mikroskopik deri në detajizim të skulpturave, për të paraqitur një realitet të përmasave globale me fabula në miniaturë.
“Është krijues që nuk ndihet mirë kur sheh luftëra, sepse edhe vet e ka përjetuar luftën në Kosovë, ndërsa sot po e shohim në Ukrainë dhe vende të tjera me krizë lufte. Është misioni i artistit që këto mesazhe t’i dërgoj kudo dhe unë vërtetë e përgëzoj z. Gjonin, i cili është i përkushtuar jashtë mase në këtë fushë dhe këtu e shihni një dashuri të skajshme nën punën e tij. Është mikroskopik në trajtimin e këtyre veprave këto janë vepra me të vërtetë unike dhe kështu do të ngelen” është shprehur Shatrolli.
Shatrolli më tej e falënderoi edhe drejtoreshën e KultPlus, Ardianë Pajazitin për mundësinë dhe hapësirën që i jep në vazhdimësi artit dhe artistëve.
Ndërsa vetë skulptori Hagji Gjoni u shpreh falënderues për pjesëmarrjen e të gjithë artdashësve, duke i ftuar që ekspozitën ta shijonin nga afër secili në mënyrën e tij.
“Unë desha të ju falënderoj për pjesëmarrjen që keni gjetur kohë të vini në hapjen e këtij eventi. Shpresoj që puimet e mija do të ju pëlqejnë dhe ju ftoj që t’i shijoni nga afër” u shpreh artisti Gjoni.
Krejt në fund pjesëmarrësit patën mundësi që ta përgëzonin artistin për punën tij aq unike dhe të shijonin secili nga afër domethënien e veprave artistike.
Ekspozita do të qëndroj e hapur për një javë në KultPlus Caffe Gallery. /KultPlus.com
Galeria FAB është gati për t’i hapur dyert artdashësve të cilët do të ndjekin ekspozitën e artistes së re Artemisa Çullhaj. Ekpozita është kuruar nga Najada Hamza dhe do të qëndrojë e hapur nga 15 shkurti deri më 27 shkurt, pranë Fakultetit të Arteve të Bukura.
Artemisa dhe “Gjilpëra” siç titullohet ekspozita, i kanë fillesat në atelierin e tekstilit. FAB shkruan në faqen e saj online se, premisa estetike dhe intelektuale e artistes, puna ndër vite bërë me pasion dhe vullnet të epërm, ndërtoi një profil artistik me fjalor dhe identitet personal krijues, bazuar në një shtresëzim historik e kulturor, të vjetër e të thellë sa jeta. Sipas galerisë, veprat tek “Gjilpëra” shfaqin lëndën në një format tejet elegant, ku dashuria dhe koha bëhën një, e zgjasin sa një përjetësi.
Dalja përtej formatit dhe mediumit të veprave të përzgjedhura, duke mbivendosur në telajo të buta prerë në format e trupit njerëzor pikturat e mjeshtrave të mëdhenj, është një akt bashkëkohor i cili shton një element të ri të ndërveprimit fizik me veprën e artit. Vepra që lënë dyert e muzeumeve për t’u veshur e marrë identitete të reja në lëvizje, imazhe të njohura që përtej pasarelave janë copëza arti që përcjellin mesazhin e vlerës së qëndrueshme./atsh/KultPlus.com
Në Fier është çelur ekspozita me piktura dhe skulptura e grupimit artistik “Muri” e cila do të qëndrojë e hapur për 10 ditë.
Grupimi artistik “Muri”, përbërë nga 13 artistë të arteve pamore çeli ekspozitën e pestë në Galerinë e Artit “Vilson Kilica” të qytetit të Fierit. Artistët sollën punimet e tyre në pikturë, skulpturë, karikaturë apo teknikë mikse.
Në të marrin pjesë Adrian Devolli, Mustafa Arapi, Violeta Kongo, Mira Kuçuku, Llambrini Dëna, Fatmir Tufina, Agron Polovina, Arben Meksi, Fatmir Minga, Leon Çika, Luan Boriçi, Idriz Balani dhe Marjana Goxhabelliu.
“Është një urë bashkëpunimi dhe prezantimi të punimeve më të fundit të këtij grupimi. Ai përbëhet nga disa nga personalitetet më të rëndësishëm të artit shqiptar si. Pikturë, skulpturë, karikaturë apo teknikë mikse ajo përveç vlerave të padiskutueshmë estetike është një mundësi për të kuptuar zhvillimet më të fundit të artit vendas. Si e tillë ajo është një mundësi për gjithë publikun artëdashës të qytetit tonë për tu lidhur e komunikuar me kolegët e tyre”, tha Arben Meksi.
Ky është edicioni i 5-të i “Muri”-t dhe ekspozita do të qëndrojë e hapur deri më 20 shkurt në qytetin e Fierit./Shqiptarja.com/KultPlus.com
Mbrëmë me një ceremoni solemne u hap Ekspozita Ndërkombëtare “Gara e Artit Global – KOSOVA ART ‘8”, me kurator Muhamet Ahmeti-Metis, në Galerinë e Fakultetit të Arteve të Universitetit të Prishtinës “Hasan Prishtina”, ku mbi 40 artistë nga 15 shtete të botës, prezantuan krijime të tyre artistike.
Me një fjalë rasti kuratori Muhamet Ahmeti-Metis, i falënderoi artistët nga vendet e largëta që konkurruan me veprat e tyre në këtë edicion. Po ashtu ai foli për rëndësinë e saj dhe bashkëpunimin me artistët ndërkombëtarë dhe vendorë të cilët po krijojnë njohje dhe ura bashkëpunimi.
Ndërsa, zyrtari për kulturë në Ministrinë e Kulturës, Rinisë dhe Sporteve, Naser Shatrolli, ceku se “Në filozofinë e kësaj ekspozite piktorët vendës dhe ata ndërkombëtarë kanë paraqitur përkatësinë e tyre krijuese, që përkon me mendësi të caktuara të shoqërive prej nga vijnë ata”.
Po ashtu gjatë kësaj ceremonie juria profesionale me kryetar Safet Spahiu nga Maqedonia e Veriut, Saimir Strati nga Shqipëria dhe Adriana Sedaj nga Kosova, ndanë edhe çmimet për veprat e këtyre artistëve:
Majlinda Kelmendit i u nda çmimi i parë “Gara e Artit Global – KOSOVA ART ‘8”, Çmimi Special iu nda Adem Rusionvcit dhe Fehmi Hoxhës nga Kosova, Orhan Cebrailoglun nga Turqia dhe Nehat Beqirin nga Maqedonia e Veriut.
Ekspozita Ndërkombëtare “Gara e Artit Global – KOSOVA ART, është mundësuar nga Ministria e Kulturës, Rinisë dhe Sporteve të Kosovës. Kjo ekspozitë do të qëndrojë e hapur deri më 20 janar 2024./KultPlus.com
Stacion-Qendra për Art Bashkëkohor Prishtinë prezanton këtë të mërkurë, ekspozitën e parë personale të Enxhi Mehmetit “Dream Baby Dream”, e cila format njerëzore në raste të caktuara i shkrin edhe në identitete të reja fantastike.
‘Dream Baby Dream’ është pjesë e programit vjetor të ekspozitave të Stacion – Qendra për Art Bashkëkohor Prishtinë për vitin 2023 dhe modulit final të çmimit ‘Artists of Tomorrow’ i projektuar për të ofruar një ekspozitë solo për fituesit e Çmimit.
Enxhi Mehmeti është fituesja e çmimit Artists of Tomorrow 2021, e përzgjedhur nga juria e përbërë nga Anne Barlow, Qëndresë Deda, Minna Henriksson, Adam Kleinman dhe Nebojša Milikić, të cilët gjetën në veprën e Enxhis një prani të fuqishme në shprehjet e tyre njerëzore dhe jo.
Në veprën e saj, Enxhi Mehmeti ngjall ngjarjet fantastike rreth saj, të cilat ajo i pëlqen t’i bëjë të dukshme për të tjerët përmes teknikave të ndryshme artistike, duke kërkuar me fjalët e saj “durim dhe dashuri”.
Veprat e saj zotërojnë njëfarë intimitet dhe brishtësi që përcjellin një prani të fuqishme në shprehjet e tyre të formave njerëzore dhe jo njerëzore, të cilat në raste të caktuara shkrihen në identitete të reja, fantastike që veprojnë si tregimtarë.
Enxhi Mehmet e lindur në vitin 1999 në Kassel të Gjermanisë është studente në Hochschule für Gestaltung Offenbach am Main. Punimet e saj janë prezantuar në ekspozita të ndryshme, duke përfshirë shfaqjet në grup si “PRESENCE” në Cuchifritos Gallery + Project Space në Nju Jork dhe “The Patriot” në O’Flaherty’ në Nju Jork.
‘Dream Baby Dream’ me Enxhi Mehmetin mbështetet edhe nga Ministria e Kulturës, Rinisë dhe Sportit të Republikës së Kosovës dhe Komuna e Prishtinës./RTK/KultPlus.com
Në Galerinë FAB është çelur ekspozita “Udhët V”, ku marrin pjesë 22 pedagogë të Fakultetit të Arteve të Bukura me punimet e tyre.
Ky është edicioni i 5-të i kësaj ekspozite, të kthyer tashmë në një traditë të çdo fundviti. Ekspozita e çelur në 11 dhjetor do të qëndrojë e hapur për publikun artdashës deri më 20 dhjetor.
Kjo ekspozitë u drejtohet veçanërisht studentëve të artit, të cilët duhet t’i njohin pedagogët, jo vetëm si staf pedagogjik por edhe në cilësinë e krijuesit.
Një pjesë e punëve të ekspozuara janë të reja, të sapokrijuara. Ekspozita është konceptuar e ndarë në 2 pjesë: njëra në muajin dhjetor dhe tjetra në janar 2024. Pjesëmarrës në të janë Artan Buca, Artan Peqini, Ardian Kapo, Ardian Pepa, Anisa Paturi, Blerina Pagaria, Dea Tili, Dritan Nasi, Ergys Kristiko, Ermal Baboçi, Florian Haxhiyseni, Genc Përmeti, Gentjan Tabaku, Genti Spirollari, Mariglen Buzali, Orestia Kapidani, Orlis Vathi, Parid Dule, Rosita Habazaj, Valbona Karaboja, Viktor Ferraj, Xhovana Preçetaj./atsh/KultPlus.com
Me rastin e 79-vjetorit të çlirimit të Tiranës, Drejtoria e Përgjithshme e Arkivave (DPA) në bashkëpunim me bashkinë e Tiranës dhe me Muzeun Historik Kombëtar (MHK), paraqiti ekspozitën “Tirana në llogore”.
Në këtë aktivitet të zhvilluar në mjediset e MHK-së, qenë të pranishëm nënkryetari i bashkisë së Tiranës, Ardi Seferi, drejtuesi i Trajnimeve dhe i Inspektimeve në DPA, dr. Endrit Musaj, përfaqësues të pushtetit vendor lokal, studiues, mësues, qytetarë dhe nxënës të shkollave publike të kryeqytetit.
Publiku pati mundësinë të shihte nga afër dokumente dhe fotografi të Arkivit Qendror Shtetëror (AQSH), mbi Tiranën nën thundrën e pushtuesve nazi-fashistë, mbi qëndresën për liri, mbi rolin e britanikëve në Shqipëri dhe mbi pasojat e pushtimit.
Mes dokumenteve të përzgjedhura për ekspozim ishin foto të Durrësit në nisje të pushtimit fashist, më 7 prill 1939; informacion mbi ditët e para të pushtimit, si edhe mbi dërgimin e kurorës shqiptare drejt mbretit Viktor Emanuel III; foto nga ceremonia e dorëzimit të flamurit shqiptar pranë trupave italiane; letër që dëshmon dëmtimin e Muzeut Arkeologjik nga pala italiane gjatë pushtimit (Leon Rey drejtuar Presidentit të Akademisë së Arteve të Bukura në Paris); kujtimet e Mehdi Frashërit për periudhën para dhe pas pushtimit italian; informacion nga Legata Italiane mbi kërkesën e palëve britanike dhe franceze që Shqipëria të bëhej pjesë e një pakti ballkanik; informacion për vizitën e konsullit gjerman pranë misionit ushtarak gjerman në Tiranë (1940) dhe formimi i qeverisë Mitrovica (bisedime parlamentare 04.11.43) etj.
Ky aktivitet u zhvillua në kuadër të organizimeve të parashikuara për kremtimin e përvjetorit të çlirimit të Tiranës. Ekspozita e përgatitur nga DPA-ja do të qëndrojë e hapur për të interesuarit deri në javën e ardhshme./atsh/KultPlus.com
Në kuadër të 110-vjetorit të marrëdhënieve diplomatike të pandërprera midis Rumanisë dhe Shqipërisë, Qendra Rumune e Informimit në Korçë, në bashkëpunim me Muzeun e Historisë Brashov, Ambasadën e Rumanisë në Shqipëri dhe Konsullatën Honorifike të Historisë në Korçë çeli ekspozitën “Histori të vitit ‘89, novela grafike”.
Në ceremoninë e mbajtur me këtë rast, ishte i pranishëm ambasadori rumun Octavian Serban, kryebashkiaku i Korçës, Sotiraq Filo, artdashës e personalitete të tjera.
Novela grafike është konsideruar si një art i ri përmes të cilit është sjellë një moment i rëndësishëm historik, sic është rënia e regjimit komunist në Rumani. Sipas kuratorit, kjo ekpozitë përmban punime të cilat e rrëfejnë ngjarjen nga sytë e artistëve dhe jo sipas versionit zyrtar. Megjithëse ngjarjet kanë ndodhur në vitin 1989, ka ende arkiva të mbyllura sa i përket kësaj kthese historike.Që pas shpalljes së Shtetit Shqiptar, marrëdhëniet me Rumaninë nuk janë ndërprerë kurrë. Edhe gjatë viteve të pushtimit italian, në Korçë ekzitonte një konsullatë mbretërore e Rumanisë./ atsh / KultPlus.com
Vedat Kokona në 110 vjetorin e lindjes, është ekspozita që u cel në nderim të shkrimtarit, përkthyesit dhe leksikologut shqiptar, në Bibliotekën Kombëtare.
I njohur edhe për fjalorët e tij dygjuhësh anglisht-shqip dhe frëngjisht-shqip dhe për kontributin e tij në leksikologjinë dhe leksikografinë shqiptare.
Vedat Kokona u lind më 8 gusht 1913, në Izmir, nga një familje qytetare gjirokastrite. Më 1920 kthehet në Tiranë, ku kreu shkollën fillore dhe më pas vijoi mësimet në Liceun e Korçës. Studimet e larta i bën në Paris për drejtësi, ku ndenji deri në fillim të 1939-s.
Në shkurt 1944, së bashku me Mitrush Kutelin, Nexhat Hakiun dhe Sterjo Spassen, themeloi dhe kryesoi redaksinë e së përdyjavshmes Revista letrare, jetëshkurtër, por me ndikim në jetën kulturore, e cila më pas do të damkosej si fashiste.
Nga 1949 deri më 1965 punoi si përkthyes në Shtëpinë Botuese Shtetërore “Naim Frashëri”. Nga 1965 e deri sa doli në pension dha frëngjishten në Universitetin e Tiranës.
Vedat Kokona përktheu shumë klasikë të letërsisë së përbotshme, si Pier Kornejin, Zhan Rasinin, Shekspirin dhe Tolstoin, Gorkin, Xhon Gollsuorthin, Dikensin, Aleksandr Bekun, Rabindranat Tagoran dhe Ernest Heminguejin./topchanel/KultPlus.com
Adrian Devolli çel ekspozitën “Gjurmë”, në Galerinë e Fakultetit të Arteve të Bukura, (FAB) e cila përmbledh një pjesë të punëve më të mira të artistit, në pikturë, grafika, skulpturë dhe qeramikë.
Artisti Devolli e konsideron domosdoshmëri ekspozitën e cila shërben për të si një refleksion mbi gjendjen në të cilën gjendet dhe atë drejt së cilës shkon.
Titulli “Gjurmë” ka lidhje me gjurmën që le çdo artist në art, një “guralec” në strukturën e madhe të artit. Emocionet e Adrian Devollit gjejnë një teknikë të veçantë për t’u shpalosur në kuadër apo skulpturë.
“Gjurmë” do të qëndrojë e hapur për publikun e FAB-it deri më 23 shtator.
Ardian Devolli ka studiuar në Akademinë e Arteve, ku u diplomua në vitin 1979. Ai është njëkohësisht studiues i Artit Bizantin dhe themelues i grupit artistik “Mur”./atsh/KultaPlus.com
Ekspozita “Bamirësia, Humaniteti, Solidariteti”për humanizimin e popullit të Kosovës gjatë viteve të 90-ta, është hapur në Bibliotekën Kombëtare të Kosovës, në kuadër të ditëve të Nënë Terezës, në ditën e shenjtërimit të saj, shkruan KultPlus.
Në këtë ekspozitë janë ekspozuar libra e artikuj të gazetave ‘Rilindja’ dhe ‘Bujku’ në koleksionet e Bibliotekës Kombëtare të Kosovës për bamirësinë, humanitetin dhe solidaritetin në Kosovën e viteve ’90-ta.
Kjo ekspozitë prezanton mbi 50 monografi dhe mbi 1.500 artikuj të gazetave të asaj kohe, të cilët tregojnë hollësisht për solidaritetin që treguan qytetarët e Kosovës gjatë kohës së rezistencës të viteve të ‘90-ta./KultPlus.com
Diku u shfaqë në formë skulpture. Në disa punime tjera, figura e Nënës Terezë, u pikturuaa.
Ani se zhanret e artit në këto 32 vepra janë të ndryshme, ato u ekspozuan të dielën në katedralen e kryeqytetit me një qëllim – me paratë e mbledhura nga shitja e tyre do t’u ndihmohet grave të margjinalizuara, në ditët që i takojnë humanistes.
Vlera e këtyre punimeve nis nga 200 euro e shkon deri në 18 mijë, njofton Klan Kosova./KultPlus.com
Drejtoria e Përgjithshme e Arkivave (DPA) solli sot në Krujë ekspozitën “Rikthim në traditë, veshjet popullore të shqiptarëve”.
Përmes kësaj ekspozite shpaloset larmia e kostumeve popullore të trevave nga mbarë trojet shqiptare, për ta njohur dhe për ta promovuar trashëgiminë kulturore kombëtare.
Ekspozita zgjoi kuriozitetin e vizitorëve të huaj, që këto ditë gushti kanë zgjedhur të vizitojnë Krujën si dhe të qytetarëve të shumtë. Ata patën mundësinë të vrojtonin imazhe që shpalosnin larmishmërinë dhe veçantitë e kostumeve popullore të mbarë trevave shqiptare.
Materialet e përzgjedhura nga DPA-ja i ofruan vizitorëve një fushëpamje të gjerë të tematikës. Mes këtyre materialeve gjendeshin imazhe të figurave të rëndësishme historike nën petkun e veshjes popullore (prijës fisnorë, njerëz të letrave, mbrojtës të trojeve amtare); kostumeve popullore të trevave në Shqipërinë e veriut, të Shqipërisë së mesme; Shqipërisë së jugut, kostumeve popullore të trevave të shqiptarëve jashtë trojeve dhe kostumeve popullore nën petkun fëmijëror (kostume të vajzave)./atsh/KultPlus.com
Me mbështetjen e paçmuar të ekipit të konservimit nga Instituti i Konservimit në Universitetin e Arteve të Aplikuara në Vjenë, krahas specialistëve të UNOPS Albania, po kryen punimet më të imëta në Muzeun Etnografik të Krujës.
Ekipet po punojnë për pastrimin përfundimtar, ruajtjen e objekteve dhe vendosjen e ekraneve.
Ekspertët e UNOPS Albania shpehen se, çdo ditë që kalon na afron me momentin kur do të shohim transformimin e jashtëzakonshëm të Muzeut Etnografik të Krujës.
Sipas tyre, së shpejti, në Muzeun Etnografik të Krujës ekspozita të rikonceptuara do t’i zbulohen publikut nga Shqipëria dhe e gjithë bota.
Muzeu Etnografik i Krujës ndodhet brenda kalasë së Krujës. Ky muzeum është ngritur në shtëpinë e familjes së Toptanëve, e cila është një ndërtesë e tipit “çardak” e vitit 1764.
Banesa është monument kulture i Kategorisë I. Në mjediset e brendshme, si edhe objektet e paraqitura në mjediset e jashtme, jepet një pamje e plotë i zejeve të ushtruara në Krujë dhe në të gjithë Shqipërinë, si edhe i mënyrës së jetesës duke filluar që 300 vjet përpara. / atsh / KultPlus.com
Ekspozita që i dedikohet Jay-Z-së është hapur këtë javë në Bibliotekën Publike të Brooklynit.
The Book of Hov – siç mban emrin ekspozita – do të jetë e përkohshme dhe është e vendosur në degën kryesore të bibliotekës.
Kjo përfshihet që përfshin “mijëra objektesh të arkivuara, përfshirë edhe incizimet origjinale të masterëve, fotove që nuk janë parë më herët, veshjeve ikonike skenike, çmimeve prestigjioze, dhe vlerësimeve, si dhe videove e artifakteve nga çdo cep i jetës profesionale të Jay-Z-së”./KlanKosova/KultPlus.com
Në galerinë FAB është çelur ekspozita e Atelierit të Multimedias me titull “8 h, 59 m, 27 s”.
Ekspozita mban vepra të 26 studentëve të Fakultetit të Arteve të Bukura, punimet e të cilëve janë kuruar nga prof. Vladimir Myrtezai, Lek. Altin Lika, Edison Çeraj dhe Florian Haxhihyseni.
Kjo është ekspozita e radhës e Atelierit të Multimedias, si përherë me punë të zgjedhura të vitit të fundit akademik. Studentët kanë prekur pothuajse çdo medium si video, instalacion, fotografi, pikturë, animacion dhe performancë. Punimet janë rezultat i i temave të dhëna nga pedagogët përgjatë dy semestrave, pa harruar edhe ndonjë punim nga puna e pavarur e studentëve.
Për sa i takon titullit të veçantë, ai i përket punës së një studenteje. Kuratorëve, ky titull iu duk bartës i një simbioze që bën bashkë disa elemente: kohën, numrat, pritjen, orën dhe trysninë e saj.
“Këto janë parë si sfida të cilat kërkojnë vazhdimisht marrjen e një pozicioni apo qëndrimi nga ana jonë, aq më tepër kur edhe zhvillimet e artit sot priren dukshëm të hedhin dritë mbi sfidat e ndryshme nëpër të cilat na duhet të kalojmë dhe t’i tejkalojmë. Sfidat mund të sfidohen”, u shpreh një prej kuratorëve të ekspozitës, Edison Çeraj./atsh/KultPlus.com
Artan Peqini ka çelur ekspozitën e tij të dytë vetjake me piktura të titulluar “Përtej kufirit e portave-Pasdite e përjetshme”, me kuratore Najada Hamza.
Pikturat do të qëndrojnë të ekspozuara në galerinë FAB deri më 21 maj.
Artisti sjell atmosferën e pasditeve në kodrat e Apolonisë, ku njerëzit e ditëve të sotme përballen me paraardhësit e tyre, njerëzit e antikitetit, të cilët paraqiten si koka skulpturash të pikturuara.
Udhëtimi në kohë që sjell Artan Peqini, është si një mundësi që i jepet publikut të kohëve moderne për të kuptuar më mirë realitetin përreth.
Artisti thotë se, kjo ekspozitë ka në qendër fabulën e një udhëtimi të përhershëm, përtej portave e kufijve.
Individët e paraqitur në tablotë e Peqinit janë të paidentifikueshëm, duke lënë hapur mundësinë për t’u transformuar secili nga ne, në personazhet e pikturave të tij.
Ata vijnë pa fokus në portrete dhe me ngjyra që i afrohen terrakotës, me të cilën artisti ka punuar pjesën më të madhe të karrierës së tij.
Artan Peqini është pedagog i skulpturës e dekan i Fakultetit të Arteve të Bukura. Megjithëse i njohur më shumë për punën me skulpturën, vitet e fundit, artisti ja ka kushtuar pikturës./atsh/KultPlus.com
Ministri i Kulturës, Rinisë dhe Sportit, Hajrulla Çeku, ka vizituar ekspozitën ‘Ç’nuk dija që e kisha ditë…’ e artistes Lala Meredith-Vula, shkruan KultPlus.
Ministri Çeku ka thënë se fotografitë në sfondin monokrom paraqesin shtetin e Kosovës, Shqipërisë dhe Maqedonisë në katër dekadat e fundit.
“Fotografitë në sfondin monokrom që krah për krah shfaqin Kosovën, Shqipërinë dhe Maqedoninë nëpër katër dekadat e fundit dhe mullari i sanës në hyrje të galerisë, janë pjesë të ekspozitës “ç’nuk dija që e kisha ditë…” të artistes e fotografes Lala Meredith-Vula, kuruar nga Edi Muka, në Galerinë e Ministrisë së Kulturës”, ka thënë ai përmes një postimi në Twitter./KultPlus.com
