Orkestra Frymore e Filharmonisë ka mbajtur koncert në Suharekë në kuadër të programit “Filharmonia në lëvizje”, të premten mbrëma.
Në koncert u interpretuan vepra nga kompozitor të huaj dhe vendor në dirigjimin e Baki Jasharit dhe Lirojna Sylejmanit. Në rolin e solistëve u paraqitën Adelina Paloja – soprano, Denik Preizreni – bariton dhe Shkumbin Bajraktari – klarinetë.
Koncerti u mundësua nga Ministria e Kulturës, Rinisë dhe Sportit e Republikës së Kosovës dhe Komuna e Suharekës.
Orkestra Frymore e Filharmonisë së Kosovës do të mbajë koncertin e radhës këtë të diel (29 maj), përcjell KultPlus.
Sipas njoftimit, koncerti premierë do të mbahet në Qendrën “Bogdani Polis (Katedralja Nënë Tereza) në Prishtinë.
Gjithashtu, koncerti fillon nga ora 20:00.
“Jemi të lumtur të ju njoftojmë se sezoni 2021/22 vazhdon me koncertin premierë të Orkestrës Frymore të Filharmonisë së Kosovës më 29 maj 2022”, thuhet në njoftim.
Programi:
ALEXEY SHOR Uverturë nga baleti “Pallati i kristaltë” Crystal Palace Overture
RAFET RUDI Laudatio funebris për soprano dhe orkestër harqesh for soprano and string orchestra
DMITRI SHOSTAKOVICH Koncert për piano No. 2 në F – dur, Op. 102 Piano Concerto No. 2 in F major, Op. 102
ANTONÍN DVOŘÁK Simfonia Nr. 4 në d – mol, Op. 14 Symphony No. 4 in D minor, Op. 14
ORKESTRA E FILHARMONISË SË KOSOVËS KOSOVO PHILHARMONIC ORCHESTRA
BESA LLUGIQI Soprano ARTEMIDA QARRI – HAXHIAJ Piano
Dirigjent / Conductor ANTOINE MARGUIER/ KultPlus.com
Interpretimi i Orkestrës Frymore së Filharmonisë së Kosovës mbrëmë pushtoi atmosferën vepër pas vepre. Kryeveprat botërore e shqiptare erdhën nën dirigjimin mahnitës të Baki Jasharit, Lirjona Sylejmanit dhe Hajrullah Sylës, të cilët me mjeshtërinë e tyre kontrolluan instrumentet frymore duke sjell kështu një mori melodish të cilat qysh në sekondën e parë të lëshimit, kapluan vëmendjen e gjithsecilit e njëkohësisht dolën përtej limiteve për të prekur atë ajkën e perfeksionit, shkruan KultPlus.
Ky koncert portretizoi një literaturë muzikore që mbrëmë Orkestra Frymore e mirëpriti publikun që ta përjetojë në një mënyrë tejet unike, duke filluar nga veprat e kompozitorëve botërorë si: Johann S.Bach, Georges Bizet, Leonard Bernstein, Frank Erickson, Jan Van Der Roost, John Fannin, Jacob De Haan, Samuel R.Hazo dhe Klaus Badelt, për të vazhduar me magjinë e kompozitorit shqiptar Rexho Mulliqi, “Baresha”, një vepër kjo e cila mbrëmë erdhi e aranzhuar nga dirigjenti Hajrullah Syla ku me meloditë nga klarinisti Shkumbin Bajraktari dhe atyre që vinin nga instrumentet frymore, koncerti jehoi në tinguj jo të zakonshëm por mjaft intensiv dhe tejet goditës.
Pasi që të pranishmit kishin zënë vendin e tyre në një numër të madh në karriget e vendosura në Qendrën ‘Bogdani Polis’, qetësia e tyre e njohur ishte shoqëruesi i pandashëm i tingujve dhe melodive për gjatë gjithë natës. Vallëzimi i notave muzikore erdhi papritmas kur instrumentistët dolën në skenë dhe nisën nxehjen e tyre paraprake. Nuk donte aq shumë që instrumentet të viheshin në funksion të gjatë për të dëshmuar kështu talentin e pronarëve të tyre që me krenari i mbanin ato pranë vetes. Shndritja e instrumenteve dallohej qysh në momentin kur dhe nisin notat e para të veprës “Carmen Suite” nën dirigjimin e Lirjona Sylejmanit.
Nën dritat e ngrohta të vendosura pingul mbi skenë, vija melodike e veprës së parë flakëroi tërë sallën brenda një emocioni. Nuk është e mundur që dikush të mos njihte qoftë edhe një copëz të asaj vepre e cila nuk lë vend e as fjalë për ta përshkruar. Të tilla ishin edhe veprat e tjera si: “Uverturë Jubiloso”, “Flashing Ëinds”, “Fanfare Nueve”, “Oregon”, “Piratët e Karaibeve” dhe “Mambo”, të cilat vunë në pah teknikën e posaçme të manovrimit të instrumenteve frymore, interpretimin e secilit instrumentist jo vetëm në instrument por edhe në elementet koreografike, pozicionimi i trupit të tyre në përshtatje me çdo notë muzikore si dhe shpirtin e tyre kreativ që dukshëm dallohej në shprehjet e fytyrave të tyre.
Ndonëse programi i këtij koncerti shpalosej radhë pas radhe, dukshëm vërehej që publikut iu kishte munguar një rrjedhë e tillë artistike dhe ata mezi pranonin që të viheshin ballë për ballë me vepra të fuqishme e të njëpasnjëshme. Në një kontrast të ëmbël me të tjerat, vepra “Arioso” e aranzhuar nga kompozitori Jacob De Haan dhe nën dirigjimin e Hajrullah Sylës, arriti që zemrat e të pranishmëve ti qetësojë pak me melodi jashtëzakonisht të lehta që i ngjasonin pikërisht zanave që shfaqën vetëm në një përrallë. Për disa minuta, “Arioso” solli një qetësi hyjnore dhe përçoi një ndjeshmëri të papërjetuar më parë.
Por, qershia mbi tortë për këtë koncert do të ishte vepra e titulluar “Arabeska” që erdhi nën dirigjimin e Baki Jasharit. Tingujt mistik të muzikës dhe motivet abstrakte e shpërfaqura në këtë vepër shpalosën një sensualizëm delikat me goditje të fuqishme dhe tradicionale të cilat dëshmuan për pikën më të lartë të këtij programi për këtë koncert. Një turne tingujsh mbizotëruan hapësirën jo vetëm të vendit por edhe të çdo trupi dhe mendjeje të pranishme. E veçantë në llojin e saj, “Arabeska” fluturoi mes unikes, perfeksionit dhe rrallësisë.
Ajo se çfarë la më së shumti përshtypje në këtë koncert ishte natyrisht dhe vepra “Baresha”, një vepër shqiptare që erdhi e aranzhuar nga dirigjenti Hajrullah Syla i cili së bashku me klarinistin Shkumbin Bajraktari sollën një version të mrekullueshëm. Kurioziteti në publik sa vinte e shtohej me ç’rast nuk munguan as fotografitë dhe videot të cilat ishin bërë pjesë kyçe mes njerëzish. Me buzëqeshje të shumta dhe admirim në sytë e tyre, të pranishmit mirëpritën veprën brohoritje të shumta.
Pas çdo vepre, duartrokitjet e zjarrta që morën të tri dirigjentët dhe Orkestra Frymore, ishin dëshmi për talentin e rrallë të tyre. Të vendosur në këmbë, duart e të pranishmëve trokitnin ende pa ndalim, gjë kjo që flet për emocionet e paharrueshme që ata i dhuruan për gjatë gjithë këtij koncerti sa intensiv e i rëndë, aq edhe i rrallë e i nevojshëm për çdokënd.
Për të na folur më shumë rreth realizimit të aranzhimit të veprës shqiptare ‘Baresha’, për KultPlus ka folur dirigjenti Hajrullah Syla.
“Koncerti shkoi jashtë mase mirë ngase jemi përgatit me mjaft mund në provat që i kemi pasur. Ky formacion që keni parë nuk është dhe aq i zakonshëm tek ne, andaj kemi filluar një rrugëtim mjaft interesant me pjesën frymore të Filharmonisë që besoj që do të vazhdoj ende, ngase Kosovës i ka munguar një i tillë. Ne e dimë që një i tillë ekziston vetëm në Forcën e Sigurisë të Kosovës, kështu që tash e kemi edhe në Filharmoninë e Kosovës”, thotë Syla.
Sipas tij, për formacione të tilla zakonisht veprat janë nga kolonat zanore të filmave por në këtë rast edhe pse programi ka përmbajtje të veprave të tilla, është kujdesur që të jenë edhe vepra serioze të kompozitorëve të cilët kanë shkruar për formacione tjera por që janë adaptuar për orkestrën frymore.
“Aranzhimi për ‘Baresha’ është bërë në një periudhë shumë të shkurtër sepse e kemi pa të nevojshme që të ketë diçka shqip dhe ideja për atë vepër ka qenë që të sillet në këtë formacion e të ketë një muzikë të cilën publiku shumë e dëshiron. Vepra tregon me të vërtetë vlera të larta muzikore dhe interpretimi i klarinistit Shkumbini, ishte po ashtu tejet e mirë”, përfundon Syla.
Po ashtu, dirigjentja Lirjona Sylejmani për KultPlus shpalosi përshtypjet e saj pas një koncerti të tillë.
“Për mua ka qenë një kënaqësi shumë e madhe e sidomos duke marrë parasysh formacionin me instrumente frymore. Në fakt, kanë qenë ditë shumë të ngarkuara me prova intensive të cilat në fund sigurisht që ia ka vlejtur ngase të tre ne, dirigjentët, e shijuam jashtë mase performancën e sotme”, thotë Sylejmani.
Ndërsa klarinisti Shkumbin Bajraktari tregoi për veprën “Baresha” dhe interpretimin e saj në një aranzhim të ri.
“Është një ndjenjë e veçantë dhe po ndjehem shumë i privilegjuar që më është dhënë mundësia që të performoj në Filharmoninë e Kosovës. ‘Baresha’ ka qenë dhe vazhdon të jetë ikonë e jona dhe tash është shndërruar në njëfarë simfonie. Përndryshe, kjo vepër ka qenë e shkruar për orkestër harqesh por dirigjenti Hajrullah Syla e ka adaptuar dhe riaranzhuar për klarinetë dhe orkestër frymore”, thotë Bajraktari.
Sipas tij, tash e tri javë është dhënë maksimumi që kjo vepër të adaptohet më së miri.
“Vepra ‘Baresha’ neve na flet të gjithëve në shpirt por kësaj here unë me të vërtetë e dhashë maksimumin tim dhe besoj që ia kam arritur e që kjo nuk do të jetë hera e fundit që do ta luajmë”, thotë ai.
Gjithashtu, muzikologia Rreze Kryeziu për KultPlus foli rreth përshtypjeve të saj për këtë program me vepra kaq të famshme.
“Ky koncert ishte shumë i nevojshëm duke nisë edhe nga vetë përzgjedhja e programit, program ky tejet atraktiv dhe jo pak sfidues edhe për instrumentistët ku duke marrë parasysh që kishim orkestrën frymore, nevojitet goxha kondicion sidomos për një program të tillë. Sa i përket pjesës së interpretimit, kolegët kanë bërë një punë të shkëlqyer që po vazhdon të dëshmohet në vazhdimësi. Ajo se çfarë është më karakteristike dhe më e rëndësishme për ne, është kur arrijmë të evidentojmë një numër kaq të madh të interpretuesve”, thotë ajo.
Sipas saj, pjesa që la më së shumti përshtypje ishte inkuadrimi i kompozitorëve shqiptarë me veprën “Baresha”, një nga veprat antologjike që erdhi nga orkestra frymore dhe solisti Shkumbin Bajraktari i cili konsiderohet se ka realizuar një interpretim të shkëlqyeshëm.
Orkestra Frymore e Filharmonisë së Kosovës zhvilloi këtë koncert premierë në kuadër të sezonit 2021/2022, në Qendrën ‘Bogdani Polis’ (Katedralja “Nënë Tereza”) në Prishtinë. / KultPlus.com
Mbrëmë në sallën e Kuqe të Pallatit të Rinisë dhe Sportit në Prishtinë u mbajt koncerti i parë i përbashkët mes Orkestrës Frymore të Filharmonisë së Kosovës dhe Orkestrës Frymore të Forcës së Sigurisë së Kosovës.
Publiku që kishte mbushur plot sallën, pati mundësinë të dëgjojë një program një orësh ku u interpretuan premierat e tetë veprave të mëdha botërore. Nën drejtimin e dirigjentëve Baki Jashari, Lirjona Sylejmani dhe Hajrullah Syla u interpretuan veprat e Frank Erickson, Nikolai Rimsky-Korsakov, Joaquin Rodrigo, Jacob De Haan, Jan Van Der Roost, Samuel R.Hazo, Klaus Badelt, dhe Leonard Bernstein, shkruan KultPlus.
E se ky koncert ishte i niveleve të larta botërore, e dëshmuan edhe duartrokitjet e shumta të publikut dhe buzëqeshjet në fytyrat e të gjithë të pranishmëve në publik.
Pas koncertit, drejtori i Filharmonisë, Baki Jashari, foli për KultPlus për këtë këtë bashkëpunim të parë në mes të dy orkestrave frymore.
‘Ky ishte bashkëpunimi i parë në mes të dy të institucioneve, pjesës frymore të Orkestrës së Filharmonisë dhe orkestrës frymore e cila është si e tillë e formuar brenda togut ceremonial të Forcave të Sigurisë së Kosovës ku unë atje jam edhe dirigjent edhe përgjegjës. Vitin e kaluar FSK e ka impelemntu një projekt të kompletimit të Orkestrës frymore e cila deri në vitin e kaluar ka qenë më shumë një orkestër shumë e vogël – një ansambël, kurse tani janë mbi 50 performues. Kështu që natyrisht se kjo ka krijuar një orkestër të mirëfilltë. Dhe unë si drejtor i Filharmonisë së Kosovës, duke punuar atje e kam parë të arsyeshme meqë janë krijuar kushtet profesionale që ta bëjmë një projekt të përbashkët që rezultoi me këtë Koncertin e parë të rëndësishëm, domethënës por jo edhe i fundit.”-thotë Jashari.
Jashari më tutje flet edhe për sfidat që kanë kaluar deri në realizimin e këtin bashkëpunimi.
“Ka qenë një një punë gati një mujore, ku ka qenë shumë sfidë të bashkohen dy botëra në një projekt të përbashkët, ku është dashur të gjendet tingëllima e përbashkët, të akordohen grupet mes vete.”-shton Jashari
Dirigjentja Lirjona Sylejmani ndan emocionet e saj me KultPlus menjëherë pas koncertit që sipas saj ka qenë i mirëpritur nga të gjithë.
“Gjatë performancës jemi kënaqur që të gjithë duke përfshirë instrumentistët, dirigjentët e madje edhe publiku të cilët na kanë prit shumë mirë. Ky bashkëpunim ka qenë i mirëpritur nga të gjithë ne muzikantët e siç u pa edhe nga publiku.”- thotë dirigjentja Sylejmani, e cila shton se pavarësisht lodhjes gjatë provave, ishte një performancë që ia ka vlejtur.
Kurse, Avni Krasniqi, i cili pati mundësinë që në këtë koncert të luajë solo, e sheh këtë bashkëpunim si një nismë shumë e mirë për bashkimin e dy orkestrave frymore të dy institucioneve më të rëndësishme muzikore në vend.
“Për mua ka qenë një nder dhe kënaqësi e jashtëzakonshme që që pata rastin të luaj solo në këtë orkestër që përbëhet nga instrumentistët më të mirë frymorë që i kemi në vendin tonë’- deklaron Krasniqi për KultPlus.
E krejt në fund, për KultPlus foli edhe dirigjenti Hajrullah Syla i cili thotë se koncerti i djeshëm ishte i një niveli shumë të lartë.
‘Performanca e orkestrës frymore sonte ishte e nivelit shumë të lartë, duhet pasur parasysh që në periudhën e fundit në Kosovë nuk ka pasur një orkestër frymore dhe kjo është koncerti i parë që bëhet në bashkëpunim me Forcën e Sigurisë së Kosovës dhe Orkestrës Frymore të Filharmonisë.” – shtoi Syla./KultPlus.com
