Nesër koncerti ‘Ramë Lahaj & Friends’, dirigjenti i njohur Allemandi: Jam i impresionuar me punën e Orkestrës së Kosovës

Era Berisha

Festivali Operistik i titulluar ‘Ramë Lahaj International Opera Festival’, një festival i muzikës operistike, këtë vit po shënon edicionin e tij të parë në Kosovë. Festivali i parë në llojin e vet erdhi si pasojë e ëndrrës së kamotshme të tenorit Lahaj, i cili si fëmijë gjeti veten në mesin e një lufte kurse tani po realizon ëndrrën për organizimin e një festivali që përfaqëson artin lirik dhe krijon një ure lidhëse mes artistëve të mrekullueshëm vendor dhe atyre ndërkombëtarë. Pikënisja kryesore e festivalit ‘RLIOF’ është bazuar në situatën e zhvillimit të artit lirik në Kosovë dhe nga dëshira e etja e madhe për të pasur një institucion i cili jo vetëm formon por edhe shfaq mundësinë e performimit të brezit të ri por që në të njëjtën kohë krijon një traditë të artit lirik në Kosovë, shkruan KultPlus.

Sot në një konferencë për media në hotelin ‘Opera’ në Prishtinë, të pranishëm ishin tenori shqiptar Ramë Lahaj, dirigjenti Antonello Allemandi, sopranoja Lana Kos dhe baritoni Simone Piazzola, për të shpalosur më shumë rreth përvojës së tyre për mbajtjen e një koncerti që përfshin një program të larmishëm të veprave diversive italiane të cilat konsiderohen mjaft të thella në stil, e që nesër këta artistë të skenave botërore do të performojnë së bashku në koncertin e titulluar ‘Ramë Lahaj & Friends’, koncert ky që shënon fundin e edicionit të parë të festivalit “Ramë Lahaj International Opera Festival”.

Fillimisht, për të treguar më shumë rreth emocioneve të tij për këtë festival, foli tenori i njohur shqiptar, Ramë Lahaj.

“Për herë të parë po provojmë për të ndërtuar një platformë që është edukative para se gjithash. Koncerti është vetëm një plus, dëshira ka qenë gjithmonë për të shfrytëzuar të gjitha kontaktet dhe mundësitë që janë krijuar dhjetë vitet e karrierës time ku në bashkëpunim me institucionet dhe partnerët tonë që kanë shprehur gatishmërinë për të na mbështetur, të sjellim pedagogë të muzikës në Prishtinë. Po ashtu, besoj se festivali do të zgjerohet edhe jashtë specifikës së këndimit”, thotë Lahaj. 

Sipas tij, është me rëndësi mbështetja e të gjitha institucioneve sepse në një farë forme, të gjithë janë përgjegjës për një platformë edukative dhe ai po shpresoj që të kuptohet se nisma të tilla për themelimin e teatrit të Operës, çdo lloj ndihme është e rëndësishme. 

“Unë jam tejet i kënaqur që në këtë edicion të parë kemi pasur artistë si Jessica Nuccio, Davide Giusti, Korin e Pejës, e shumë artistë të tjerë. Ka qenë një platformë që për pak momente, muzika e atmosfera e mirë të merr me vete. Sigurisht është privilegj dhe kënaqësi që kemi zhvilluar një koncert me gjeneratën e re duke kaluar nëpër vështirësi të dyfishta, andaj është një ndjenjë e papërshkrueshme kur arrin ti ndihmosh e lumturosh sadopak ata fëmijë në punëtori dhe festival”, përfundon ai.

Tutje, për të treguar për provat me Orkestrën e Kosovës dhe ndjenjave të tij për interpretimin e parë në qytetin e Prishtinës, foli dirigjenti i njohur, Antonello Allemandi.

“Është hera e parë këtu në Kosovë dhe zbulova pak atë se çfarë shihja. Ekipi i cili më ka ftuar këtu është shumë miqësor dhe shumë profesional, e sidomos Ramë Lahaj me të cilin kam punuar në të kaluarën në Operë. E njihja prej shumë kohësh dhe jam shumë i kënaqur që më ka ftuar në këtë koncert. Programi është me të vërtetë një program shumë kërkues sepse ka stile shumë të ndryshme italiane të cilat janë shumë të thella në përmbajtje”, thotë Allemandi.

Sipas tij, atmosfera në prova me Orkestrën e Kosovës ka qenë shumë e mirë dhe ai është ndarë shumë i impresionuar me ndryshimet përgjatë tre ditëve të punës ku në fillim Orkestra ishte më simfonike por kjo konsiderohet normale pasi që janë 18 pjesë të ndryshme me të cilat duhet të jesh shumë i shpejt jo vetëm në lëvizje por edhe me mendje, për të performuar më së miri.

“Dita e parë ishte e vështirë por menjëherë në ditën e dytë e vërejta një përmirësim të jashtëzakonshëm në Orkestër dhe sot kemi bërë përsëri prova me këngëtarët, andaj ne kemi punuar shumë mirë dhe shpresoj se publikut do ti pëlqej shumë”, përfundon Allemadni.

Ndërkohë, për të treguar për ndjenjat para një koncerti të cilën ajo e konsideron të jashtëzakonshëm, foli sopranoja nga Kroacia, Lana Kos.

“Me të vërtetë kemi kaluar një kohë të mirë dhe ndjeva një progres të jashtëzakonshëm sot në prova. E koncerti që quhet ‘Ramë Lahaj& Friends’ nuk është i rastësishëm sepse ne me të vërtetë jemi shokë dhe në fakt kjo është një moment shumë emocionues për mua e andaj dua të falënderoj Ramën që më ka ftuar për këtë ngjarje shumë të bukur. Është një nder dhe luks i madh që jam këtu për të interpretuar sepse kemi qenë të heshtur për një kohë të gjatë dhe jemi shumë të uritur për të performuar e të jemi në skenë për të shpërndarë emocione dhe muzikë të bukur me interpretim live”, shpalos Kos.

Po ashtu, baritoni Simone Piazzola foli rreth mënyrës se si ky koncert dëshiron të sjell kulturë dhe se sa është e rëndësishme që emocionet e artistëve të transmetohen tek publiku.

“Është një nder i madh që jam këtu me juve, dua të falënderoj Ramën për ftesën e tij. Jemi njohur në Madrid dhe sigurisht që nisëm përnjëherë komunikimin dhe shpresoj se së shpejti do të mund të jem sërish në skenë me të. Është një nder i vërtetë sepse në këtë moment vërtetë historik dhe në një vështirësi të madhe, jemi këtu para një publiku. Mundësia që të transmetojmë emocionet tona ndaj juve është një gjë unike sepse është e rëndësishme që ti sjellim kulturë të gjithëve”, ka thënë Piazzola.

Ndërsa, drejtoresha artistike e festivalit “Ramë Lahaj International Opera Festival”, Ulpiana Aliaj, ka bërë thirrje qytetarëve që të dalin në koncert.

“Ne jemi të lumtur që nisim me një nivel artistësh dhe ju ftoj të gjithëve të keni vëmendjen e duhur”, ka thënë Aliaj.

Kështu krejt në fund producentja, Besa Luzha tha se kapaciteti i ulëseve është rreth 3 mijë derisa ka bërë thirrje që të jenë të pranishëm të gjithë qytetarët edhe pse tashmë interesimi është mjaft i madh.

Në kuadër të “Ramë Lahaj International Opera Festival”, koncerti ‘Ramë Lahaj & Friends’ do të mbahet nesër në orën 20:30 në sheshin Skënderbeu në Prishtinë.

Kjo ngjarje vjen si bashkëpunim ndërinstitucional në mes të Komunës së Prishtinës, Ministrisë së Kulturës, Rinisë dhe Sportit, Ministrisë së Punëve të Jashtme dhe në bashkëpunim të ngushtë me Filharmoninë e Kosovës./ KultPlus.com 

Kori i Filharmonisë së Kosovës me koncert në ‘Ohrid Summer Festival’

Filharmonia e Kosovës përmes një postimi në rrjetin social Facebook ka bërë të ditur se Kori i Filharmonisë së Kosovës do të jetë pjesë e ‘Ohrid Summer Festival’ me ç’rast nesër kori do të performojë nën dirigjimin e Hajrulla Sylës, përcjellë KultPlus.

Koncerti fillon në orën 21:00 dhe do të mbahet në kishën ‘Shën Sofia’. Ndërsa, biletat mund ti gjeni në linkun e mëposhtëm:

Kori i Filarmonisë së Kosovës është një ansambël profesional me 50 këngëtarë, që vazhdon punën e Korit Profesional të Radio Televizionit të Prishtinës, kor i cili ishte i mirënjohur në vitet 80 ’nën drejtimin e dirigjentit Rafet Rudi. Puna e korit u pushua në vitin 1990 pasi Radio Televizioni i Prishtinës u mor nga regjimi serb, ashtu si të gjitha institucionet e tjera në Kosovë. Në pak më shumë se një dekadë pas rivendosjes në 2003, tani si pjesë e Filarmonisë së Kosovës, Kori është vendosur si një nga korët kryesorë në rajon. Duke u rrotulluar rreth veprave kryesore korale të barokut deri në periudhat romantike, repertori i gjerë i korit shtrihet edhe në muzikën bashkëkohore (A. Pärt, E. Ëhitacre, O. Gjeilo, Ē. Ešenvald, V. Tormis, etj.).

Koncertet në vitet e fundit kanë përfshirë gjithashtu rrëmujat / oratorios nga Mozart, Monteverdi, Bach, Vivaldi, Beethoven dhe Haydn. Kori gjithashtu ka kryer komisione të reja, kryesisht nga kompozitorë kosovarë. Kori i Filarmonisë së Kosovës është shfaqur në disa vende të rëndësishme dhe monumente historike të rëndësishme: St. Louis des Invalides Cathedral (Paris-France, 2019), Ëhite Rock Theatre (Hastings-UK, 2018), Bazilika Papale di San Paolo Fuori Le Mura (Romë- Itali, 2016), Amfiteatri i Durrësit (Durrës-Shqipëri, 2015), The Euphrasian Bazilica (Poreč-Kroaci, 2007) etj. Kori Filarmonik i Kosovës ka bashkëpunuar gjithashtu me dirigjentë të ftuar: Marko Vatovec dhe Damijan Močnik (Slloveni), Marcio da Silva (Brazil / Mbretëri e Bashkuar), Toshio Yanagisaëa (Japoni), etj. Me veprimtarinë e tij Kori ka zhvilluar vazhdimisht traditën e këndimit koral në Kosovë, e pranishme në vend që nga viti 1945.

Hajrullah Syla- dirigjent Hajrullah Syla është një kompozitor dhe dirigjent kosovar. Ai studioi kompozicion me Mendi Mengjiqin në Universitetin e Prishtinës dhe dirigjent me Bajar Berishën në të njëjtin Universitet. Si kompozitor dhe dirigjent u prezantua në vende të ndryshme si: Kosovë, Shqipëri, Gjermani, Bullgari, Turqi, Belgjikë, SHBA etj. Ai ka drejtuar Orkestra të ndryshme si: Filarmonia e Kosovës, Orkestra Rinore e Kosovës, Orkestra e Dhomës “Rexho Mulliqi” etj Në 2015 ai ishte një fitues i Berlin Auditions 2015 i cili është organizuar nga Spectrum Concerts, i cili u pasua nga një koncert në Berliner Kammermusiksaal në Prill të 2016 ku dy prej punimeve të tij u interpretuan një për klarinetë solo dhe një pjesë për dhomën. ansambël. Ai ka marrë pjesë në klasa master me dirigjentë si: Toshio Yanagisaëa, Rene Gulikers, John Armstrong, Nathalie Marin etj. Gjithashtu ai ishte pjesëmarrës në Konferencën ACDA në SHBA, Konferencën EAS në Lituani dhe është fitues i dy bursave nga Universiteti MM – SHBA. Punimet: Trio në piano, Duo për violinë dhe violonçel, Kuintet Piano, Gjashtëkëndësh me ngjyra për Piano, Kuarteti me tela Nr. 1, vepra të ndryshme korale, Uverturë për orkestrën simfonike, Koncertino për klarinetë, Koncert për violinë dhe orkestër etj. Në 2012, Syla themeloi ansambli vokal “Attacca”, i cili përbëhet nga 16 vokalistë profesionistë. Që nga viti 2012 ai punon si ndihmës dirigjent në Filarmoninë e Kosovës. / KultPlus.com

Me tinguj romantik në qiell të hapur, Orkestra e Filharmonisë së Kosovës pushtoi mbrëmë Prishtinën

Era Berisha

Interpretimi i Orkestrës Harkore të Fakultetit të Arteve, Orkestrës Simfonike të Filharmonisë së Kosovës dhe debutimi i kitaristës Tringa Sadiku, mbrëmë përmes veprave të larmishme të kompozitorëve botërorë erdhi me inkuadrimin e melodive që flakëruan skenën si një ndezje qiriri që ngjasonte me perëndimin e diellit, tingujve që i dhanë frymë të pranishmëve me energjinë e pakrahasueshme dhe harmoninë e krijuar përmes përkëdheljeve të instrumenteve, nën qiellin e hapur, mbizotëruan atmosferën me një përkulje ekstravagante të kaplimit shpirtëror dhe lojën mjeshtërore e marrëzore të performuesve, shkruan KultPlus.

Ky koncert portretizoi një literaturë muzikore që fillimisht mbrëmë Orkestra Harkore e Fakultetit të Arteve shënoi nisjen e këtij koncerti fantastik me veprën e kompozitorit botëror Bela Bartok, ‘Valle Folklorike Rumune’, nën dirigjimin e Edon Ramadanit, për të vazhduar me interpretimin e Orkestrës Simfonike të Filharmonisë së Kosovës, duke filluar nga veprat e kompozitorëve romantik si: Johannes Brams, Antonio Vivaldi dhe Robert Schumann, nën dirigjimin e bullgarit Svilen Simeonov, ku krahas tyre në rolin e solistes ka debutuar kitaristja Tringa Sadiku, duke sjell kështu vepra premierë të cilat ndezën atmosferën si një raketë ndriçuese që digjej nën ajrin e qytetit të Prishtinës.

Sheshi ‘Zahir Pajaziti’, mbrëmë kishte një pamje krejtësisht ndryshe ku në fundin e Amfiteatrit ishte vendosur skena gjigande e cila ishte mbështjellë tërësisht në të zezë, ndërsa përballë saj në një kontrast ngjyrash, qëndronin karriget e bardha që rëndom përshtateshin me gjelbërimin e veçantë të pemëve prapa tyre, e që mbrëmë u mbushën komplet duke kaluar edhe numrin e paramenduar.

Në skenë, të veshur me të zeza e me një qëndrim preciz filluan të dilnin instrumentistët e Orkestrës Harkore të Fakultetit të Arteve ku së bashku me instrumentet e tyre diversive me ngjyrë kafe e të kuqe të errët, filloi interpretimi i tyre dhe pasuan meloditë e qeta e të buta që lëviznin nëpër shkallë të ndryshme të harmonive, me ç’rast krijuan një ndjesi pothuajse të frikshme për arsye se ofruan tinguj të një natyre vetjake ku së bashku me dirigjentin dhe krahët e tij që ngjasonin me krahët e zogjve që po interpretonin një fluturim në qiell dhe manovrimi i instrumenteve harkore që dukeshin si trupa të dytë në skenë krahas studentëve, ata shënuan nisjen e koncertit me një frymë që përthithi atmosferën në një puthje muzikore unike.

Flladi i butë si një dhuratë që shoqëronte të nxehtin e atmosferës, reflektorët e bardhë që binin horizontalisht para shikimit të publikut dhe reflektorët me ngjyrë portokalli që po vinin në pah lojën mjeshtërore e serioze të instrumentistëve, kishin kapluar ambientin në një përqafim të kënaqshëm. Po ashtu, mbrëmë një shkrirje absolute e seriozitetit, energjisë dhe saktësisë në një ndjesi të vetme, Orkestra Simfonike e Filharmonisë së Kosovës, pushtoi skenën me një madhështi dhe precizitet që solli një heshtje të melodive të kthjellura e të këndshme për tu dëgjuar e përhumbur tërësisht në brendësinë e papërsëritshme të tingujve.

Ndërsa, dirigjenti Svilen Simeonov ishte ai që solli çmendurinë e lëvizjeve të kokës dhe trupore të tij para publikut kosovar që me një adhurim në sy po e vështronin lojën e tij dhe së bashku me fletat e repertorit muzikor që nuk po rrinin dot në një vend për shkak të erës, dëshmoi se mprehtësia e tingujve therr vrazhdë zemrën e njeriut të pranishëm, meloditë hyjnore thumbojnë shpirtin e të pranishmëve dhe talenti i tij gëlltit tërësisht ajrin në qytetin e Prishtinës në një guaskë simfonike.

Të gjitha elementet e veçanta të skenografisë tani nuk kishin më asnjë efekt për shkak se ishte radha e debutimit të kitaristes Tringa Sadiku, e cila në rolin e solistes solli një interpretim premierë të kompozitorit Antonio Vivaldi, duke prezantuar talentin e saj që lehtësisht rrjedhte në skenë e që vezullonte me një shkëlqim engjëllor që dhuroi iluzionin se i vetmi yll prezent në qiell që vërehej ishte ai që po pasqyronte kitaristen në skenë, një yll që dhuroi një shpërthim melodish me një përmbajtje tejet të ëmbël e jashtëzakonisht të freskët.

Ky koncerti i parë i Filharmonisë që erdhi pas dy vjetësh në ambient të hapur, u përmbyll me veprën e famshme të kompozitorit Wolfgang Mozart, të titulluar ‘’Rondo Alla Turca’’, një vepër kjo që u interpretua në bashkëpunim me publikun i cili me duartrokitjet, brohoritjet dhe fishkëllimat e tyre, iu bashkëngjitën interpretimit qysh nga sekondat e parë e deri në çastin e fundit, duke krijuar një situatë që përthekoi vetminë totale të gjuhës simfonike duke lënë gjurmë perandorake në kujtesën e të pranishmëve.

Ndërsa, për të treguar rreth pjesëmarrjes së Orkestrës Harkore të Fakultetit të Arteve dhe dirigjimin e veprave të performuara, për KultPlus foli dirigjenti Edon Ramadani.

“Jemi ftuar nga menaxhmenti i Filharmonisë për të ardhur mysafirë në këtë koncert edhe pse kjo në fakt ka qenë vetëm një pjesë e shkurtër nga koncerti jonë paraprak, sepse këtu ishte vetëm Orkestra harkore e Fakultetit të Arteve. Procesi i provave ka qenë i pazakontë sepse vetëm tri javë para koncertit kemi filluar me prova fizike e që në kushte normale do të duhej dy herë prova në javë gjatë gjithë vitit universitar”, thotë Ramadani.

Sipas tij, shtatë pikat e performuara të valleve rumune folklorike të Bartokut ishin mjaft dinamike e dallonin shumë me njëra-tjetrën duke dëshmuar talentin e tyre për një ardhmëri të ndritur. Andaj, koncerti për të ishte tejet i mirë e Filharmonia e Kosovës tingëlloi mjaft bukur sonte sidomos pas një kohe shumë të gjatë të performancave në ambient të mbyllur.

“Ne e shijuam këtë skenë gjigande me ndriçim dhe me zërim kurse natyrisht ka kaluar kohë e gjatë kur kemi pasur një numër të madh të publikut si kjo natë dhe më në fund po i kthehemi normalitetit”, ka thënë Ramadani.

Kurse, për të treguar përshtypjet e tij të performimit në Prishtinë, për KultPlus foli dirigjenti Svilen Simeonov.

“Unë po ndjehem shumë i lumtur që më në fund kemi gjetur një mënyrë për të krijuar një proces të provave të jashtëzakonshme sepse veprat që i performuam janë shumë të vështira për shkak të dinamikës dhe energjisë së tyre. Po ashtu, ishte shumë nxehtë, gjatë gjithë kohës por reagimi i publiku më bëri mjaft të lumtur”, thotë Simeonov.

Sipas tij, i gjithë programi ka ardhur për herë të parë në Prishtinë me vetëm një javë prova për një publik që nuk ka pasur rastin ti dëgjoj më parë këto vepra specifike.

Gjithashtu, kitaristja Tringa Sadiku e cila mbrëmë debutoi në rolin e solistes, për KultPlus foli rreth përshtypjeve të saj për koncertin.

“Koncerti ka qenë një ndjenjë përtej asaj që e përjetojmë në përditësi. Puna me Filharmoninë dhe dirigjentin bullgar kanë qenë të mrekullueshme dhe ndihem shumë me fat që kisha mundësinë të jem pjesë e këtij eventi madhështor”, ka thënë Sadiku.

Po ashtu, drejtori i Filharmonisë së Kosovës, Baki Jashari është shprehur mjaft i lumtur që më në fund i janë kthyer normalitetit duke e cilësuar koncertin si koncerti i parë postpandemik.

“Përshtypja është e veçantë sepse ky koncert ka ndodhur ende në një fazë të pasigurtë të lirimit të masave ku kemi shfrytëzuar rastin e parë të mundshëm, gati ta quajmë edhe koncerti i parë postpandemik, por pjesëmarrja e madhe e qytetarëve dhe reagimi i tyre na ka bërë të ndihemi mirë”, thotë Jashari.

Sipas tij, koncerti ka qenë një impakt shumë domethënës në relacion me një muzikë jo të masave por një muzikë e zgjedhur klasike që në botë ka një publik të limituar në krahasim me zhanret e tjera të muzikës.

“Ishte një rikthim, një moment ku e ndjeva në publik një harresë të pandemisë sikur të gjithë dëshironin ti iknin asaj, duke iu rikthyer ndjenjave të tyre në botën reale me duartrokitje e brohoritje dhe jo ajo botë e izolimit që na përcolli për më shumë se një vit”, përfundon Jashari për KultPlus.

Filharmonia e Kosovës e solli këtë koncert përmbyllës të sezonit 2020/2021 në bashkëpunim me Komunën e Prishtinës. / KultPlus.com

Komuna e Prishtinës nënshkruan marrëveshje bashkëpunimi me Filharmoninë e Kosovës, koncerte edhe në hapësirat publike

Komuna e Prishtinës ka nënshkruar marrëveshje me Filharmoninë e Kosovës për bashkëpunim në promovimin dhe mbështetjen institucionale për realizimin e aktivitetit koncertal të Filharmonisë, përfshirë edhe aktivitete hapësirat në publike, shkruan KultPlus.

Lajmin e ka bërë të ditur drejtori në drejtorinë për kulturë në Prishtinë, Adrian Berisha, i cili ka treguar se koncerti i parë do të mbahet më 27 qershor në Amfiteatrin e qytetit.

Më poshtë gjeni postimin e tij të plotë:

Po e ndaj sot me ju edhe nje super lajm

Kemi arrit marreveshje bashkepunimi me Filharmonine e Kosoves ku do te bashkepunojme ne promovim dhe mbeshtetje institucionale ne realizimin e aktivitetit koncertal te Filharmonise ne qytetin tone – perfshire organizimin e nje pjese te aktiviteteve ne hapesirat publike.

Koncerti i pare ne kuader te ketij bashkepunimi vjen nga Orkestra e Filharmonise se Kosoves me date 27 qershor ne Amfiteatrin e Qytetit ne Sheshin “Zahir Pajaziti”.

Linku i eventit:

https://www.facebook.com/events/2949793552014899/?ti=ls

Nuk ndodhe shpesh qe Filharmonia me performu ne shesh, andaj hajdeni me perjetu nje atmosfere ndryshe.

Faleminderit shume per bashkepunimin Baki Jashari dhe Dardan Selimaj./ KultPlus.com

Orkestra Harkore e Filharmonisë së Kosovës me koncert në Tetovë

Veprat e kompozitorëve botërorë dhe shqiptar si: Benjamin Britten, Jean Sibelius, Karl Jenkins, Valton Beqiri si dhe Drinor Zymberi do të gjallërohen nën dirigjimin e Agona Cupit, me rastin e realizimit të koncertit nga Orkestra Harmonike së Filharmonisë së Kosovës, shkruan KultPlus.

Koncerti realizohet në kuadër të sezonit 2020/2021 dhe do të mbahet të premten duke filluar nga ora 19:00 në Qendrën e Kulturës “Ilo Anteski Smok‘’ në Tetovë, Maqedoni e Veriut.

Koncerti organizohet me mbështetjen e Ministrisë së Kulturës, Rinisë dhe Sportit të Republikës së Kosovës, Komunën e Tetovës dhe KTV-së. / KultPlus.com



Orkestra Harkore e Filharmonisë së Kosovës u rikthye me koncert, Çupi: Ne morëm frymë përsëri

Era Berisha

Interpretimi i Orkestrës Harkore së Filharmonisë së Kosovës, mbrëmë erdhi përmes veprave të ndryshme nga kompozitorë botërorë e shqiptar dhe me inkuadrimin e melodive bujare të cilat konsiderohen një mbingarkesë e veçantë, mbizotëruan pa mëshirë atmosferën në një ylber emocionesh të cilat dolën nga kontrolli qysh në piklën e parë të lëshuar butësisht nga performimi e deri tek rrokullisja izoluese e vetmisë hyjnore së tingujve që goditnin vazhdimisht atmosferën, shkruan KultPlus. 

Ky koncert portretizoi një literaturë muzikore që mbrëmë Orkestra Harkore e solli në një mënyrë tejet të veçantë, duke filluar nga veprat e kompozitorëve botërorë si: Benjamin Britten, Jean Sibelius dhe Karl Jenkins, për ta përmbyllur këtë natë magjike me kompozitorin shqiptar Drinor Zymberi që solli veprën premierë të titulluar ‘Folk Suite’, një vepër kjo që shënoi fundin e një koncerti i cili vazhdimisht frymoi në një ndezje të brishtë nga instrumentet diversive të cilat tashmë krijojnë përshtypjen se janë një ekspozitë e gjallë e melodive unike dhe tingujve përrallor. 

Pasi të pranishmit kishin zënë vendin e tyre në një numër specifik të karrigeve dhe njëkohësisht ishin bërë pjesë e pandashme e qetësisë së përkryer që përcillte çdo anë të atmosferës, pasoi edhe pëshpëritja e ëmbël e cila shprehej përmes instrumenteve harkore të cilat mbrëmë shndrisnin nga performimi i instrumentistëve të cilët dëshmuan se talenti i tyre shkrihet tërësisht në një kulminacion që merrte flakë dhe së bashku me dritat e kuqe në sfond, u krijua përshtypja se pavarësisht se sa herë dëgjojmë një koncert nga Filharmonia e Kosovës, emocioni që dhurohet pamëshirshëm nga instrumentistët, nuk është i krahasueshëm me asnjë ndjenjë, për arsye se secili koncert sjell një magjepsje që bredh e zhveshur dhe fut publikun në një përhumbje hipnotizuese. 

Kësaj here, ajo se çka dallohej nga performanca e instrumentistëve ishte manovrimi i instrumenteve të posaçme harkore, jo nën interpretimin e harkut por të duarve të tyre, që sollën një hijeshi trazovaçe e cila e gëlltit plotësisht atmosferën me një thithje të vetme dhe pushton publikun me detajet e veçanta të cilat veçse janë pjesë e domosdoshme e performimit si: mbështetja e këmbëve në një pozitë të caktuar ndaj këmbës së karriges që shërben për të mbajtur instrumentin në vend dhe lëvizja e duarve së bashku me instrumentin, duke formuar kështu një imazh ku violina kishte kapluar shpirtin e performuesit dhe në vend të tij po frymonte e vetme, në një vetmi që ngjasonte me rrëfimin e fshehtësive të futura thellë brenda njeriut, të cilat do të mund të dilnin në pah vetëm nën dritën e hënës.  

E ndonëse, hëna e as ndriçimi i saj nuk ishin të pranishme fizikisht, në vend të saj aty pari dëgjoheshin cicërimet e zogjve që u bënë pjesë e interpretimit të veprave mahnitëse, duke sjell një egërsi të melodive që po i shoqëronte tingujt e Orkestrës Harkore që dirigjoheshin nga Agona Çupi, e cila dirigjonte jo vetëm veprat por edhe frymëmarrjen e instrumenteve e që nëse do të ekzistonte një emër për këtë emocion do të ishte: qetësia e vetmuar. Ky emocion që mbështjellë shikimin, trupin dhe lëviz të rrahurat e zemrës në një fluturim qetësie, erdhi pikërisht mbrëmë nga talenti unik i këtyre performuesve. 

Harmonia hyjnore e tyre erdhi në fund, me ç’rast u dallua edhe pa përmbajtja e duartrokitjeve dhe brohoritjeve të cilat dëgjoheshin sikur një trubullimë e valëve dinake por që nuk mungonin as për një sekondë të vetëm, duke vënë një kontrast dukshëm të ëmbël nga ajo se çfarë kishim dëgjuar deri më tani. 

Kurse, për të folur më shumë rreth natës së mbrëmshme dhe performancës së saj, për KultPlus foli vetë dirigjentja Agona Çupi. 

“Pjesëmarrja në koncert erdhi si ftesë nga bordi menaxhues i Filharmonisë së Kosovës ku programin e koncertit e kemi përpiluar së bashku dhe me orkestrën kemi krijuar një raport tejet të mirë duke bërë që gjërat të ecnin mirë sepse procesi i provave ka nisur qysh të hënën dhe së bashku me orkestrën kemi kaluar shumë mirë ku gjithçka ishte brenda suazave normale dhe performancës live”, thotë Çupi. 

Sipas saj, nata ishte me shumë emocion. Për të, Filharmonia e Kosovës gjithmonë ka qenë një vend ku ajo ka dashur të performojë e të jetë pjesë e një koncerti.

“Është një ëndërr e realizuar, sigurisht pas një pauze të gjatë me pandeminë dhe pa publik, ndjenja sonte ishte shumë e bukur sepse ishte njëra nga përjetimet më të bukura dhe u ndjeva sikur u rikthyem dhe morëm frymë përsëri”, thotë Çupi për KultPlus. 

Për Çupin, kjo natë do të ngelet si njëra nga ato netët e veçanta shkaku se publiku ishte prezent dhe mjaft i ngrohtë, instrumentistët ishin mbështetës duke e përkrahur atë dhe prandaj nuk ishte e vështirë puna me ta.  

“Unë u ndjeva shumë e mirëpritur dhe realisht uroj që në të ardhmen të përsëriten netë të tilla”, potencon Çupi. 

Ndërsa, ajo në fund thotë se si dirigjente duhet të jetë neutrale sa i përket preferencave të saj, por fakti që vepra e Drinor Zymberit ishte premierë, i dha asaj një emocion të veçantë. 

“Nuk është hera  e parë që i bëj premierë atij sepse stili i tij më përshtatet dhe prandaj do e veçoja sepse më dha një emocion të veçantë dhe përgjegjësi të veçantë shkaku se u performua për herë të parë”, përfundon Çupi për KultPlus. 

Orkestra Harkore e Filharmonisë së Kosovës zhvilloi këtë koncert në kuadër të sezonit 2020/2021, në Atelienë e Pallatit të Rinisë dhe Sportit në Prishtinë. / KultPlus.com

Filharmonia e Kosovës udhëton në Berat me koncertin e Kuintetit të Tunxhit

Filharmonia e Kosovës nesër do të vazhdoj me koncertin e Kuintetit të Tunxhit që do të mbahet në parkun e bulevardit “Republika” në Berat, me ç’rast do të performohen vepra nga kompozitorë si: Rossini, Ewazen, Mozart, Rizvanolli, Beqiri, Rota dhe Kompanek, shkruan KultPlus.

Koncerti vjen në kuadër të edicionit të gjashtë të ‘International Albanian Brass Festival’, dhe pritet të filloj në orën 18:00.

Ky koncert zhvillohet në kuadër të sezonit 2020/2021 dhe mbështetet nga Ministria e Kulturës e Republikës së Shqipërisë dhe Ministria e Kulturës, Rinisë dhe Sportit e Republikës së Kosovës.

KultPlus ju sjell njoftimin e tyre të plotë:

Kuinteti i Tunxhit përbëhet nga instrumentistë profesionistë njëherësh gjenerata e parë e tunxhit në Kosovë. Ansambli ka një repertor mjaft të gjerë. Stili muzikor është një kombinim i periudhave të ndryshme muzikore duke mos përjashtuar edhe veprat dhe këngët e ndryshme te ditëve të sotme. Ansambli rëndësi të veçantë i kushton interpretimit të muzikës shqiptare, duke mos përjashtuar edhe muzikën xhaz dhe atë të popullarizuar. Anëtarët e ansamblit përveç se njihen si promotor i muzikës në hapësira publike përbëjnë edhe Kuintetin e Tunxhit brenda Forcës së Sigurisë së Kosovës. Kunteti i Tunxhit është prezantuar në festivale të ndryshme të cilat janë bartëse të kultivimit dhe zhvillimit të muzikës serioze në Kosovë dhe Shqipëri si: Kosova Kamerfest, International Albanian Brass Festival, Netët e Prishtinës, Festivali HAPU, Kosova Brass Festival etj.

Për më shumë informacion mund të klikoni në: [email protected]. / KultPlus.com

Kori i Filharmonisë së Kosovës mbrëmë kaloi pragun e perfeksionit, inkuadroi mënyra të veçanta të interpretimit

Era Berisha

Veprimtaria kultivuese dhe e vazhdueshme e këndimit koral apo vokal nga Kori i Filharmonisë së Kosovës, mbrëmë erdhi përmes një sërë veprash të kompozitorëve të ndryshëm, duke filluar nga repertori botëror e deri tek repertori shqiptar, ku me inkuadrimin e vokalit nga secili anëtar dhe elementeve koreografike atraktive, ata thyen çdo barrierë të mundshme e cila pasoi në një tërheqje të duartrokitjeve dhe brohoritjeve të cilat përgjatë natës shkatërruan definimin e limiteve, shkruan KultPlus.

Ky koncert portretizoi literaturën muzikore korale duke filluar nga periudha e renesancës e deri tek periudha bashkëkohore që mbrëmë Kori i Filharmonisë interpretoi në një mënyrë të mahnitshme që nga veprat e kompozitorëve botërorë si: Bennett, Rheinberger, Gorecki, Rabe, Gueavara, Van der Roost, whitacare, Spevacek-Avery, Gjeilo, Lawry, Gerlitz dhe Hernandez, për të vazhduar me kompozitorët shqiptar si: Hajrullah Syla që solli veprën premierë të titulluar ‘Dimër’, Kreshnik Aliçkaj që solli një version ndryshe të veprës ‘Siparantum’ si dhe natyrisht vetë dirigjenti Memli Kelmendi me veprën ‘Sa bukur na ka dal nusja’.

Pasi që të pranishmit zunë vendet e tyre duke mbushur komplet karriget në një numër specifik, pasoi qetësia e cila tanimë ishte pothuajse vepër artistike e bashkangjitur e Korit së Filharmonisë, që mbrëmë në Atelienë e Pallatit të Rinisë dhe Sportit, solli një hijeshi të pakrahasueshme ndaj të pranishmëve duke i përqafuar dhe rrethuar komplet ata me vokalin e tyre hyjnor që jehonën dhe ushtimat e tyre kaluan pragun e perfeksionit.

Kësaj radhe, melodia dhe tingujt nuk po vinin nga instrumentet, ndonëse përfshirja e tyre ishte prezente me pianon nën manovrimin e Agron Shujakut, kontrabasi dhe violina  nën manovrimin e Visar Kuçit së bashku me interpretimin në violinë të  Festim Fanaj, pastaj tamburini nën manovrimin e Diellza Sylejmanit, kastanjeta nën manovrimin e Donjetë Krasniqi, viola nën manovrimin e Arianit Shehu, violonçela nën manovrimin e Antonio Gashi, si dhe fiz-harmonika e interpretuar nga Elton Balla.

Por ajo që mbizotëroi gjatë gjithë kohës ishin vokalet madhështore të sopranove si; Shkurtë Hykaj, Selvije Marteti, Arta Jashari, Kaltrinë Miftari si dhe tenori Safet Berisha, e po ashtu edhe elementet si lëvizjet koreografike, atraksionet e ndryshme të cilat i dhanë publikut një qasje tjetër duke i mbështjellë ata në hipnotizimin e bukur të tingujve që lirshmërinë e tyre e sollën në një frymë të vetme.

Kështu, krejt në fund ky koncert që frymonte nga kontrolli dhe ritmi diversiv i dirigjentit Memli Kelmendi, i cili inkuadroi mënyra të veçanta të interpretimit duke futur tërë Korin nën komandën dhe fuqinë e tij që herë ishte në një nivel skajshmërie të çmendurisë e herë të tjera në një qetësi pothuajse absolute.

Këto dy anë tërësisht të kundërta nga njëra-tjetra ishin dëshmi që Kori i Filharmonisë së Kosovës posedon një talent unik dhe mënyra se si ata këndojnë në një zë të vetëm dhe se si ata lëvizin jo vetëm vokalin por edhe duart, këmbët dhe komplet trupin e tyre në një harmoni të vetme, e fusin shikuesin dhe dëgjuesin në një shtangim shpirtëror duke fiksuar kështu thellësisht atmosferën dhe gjendjen emocionale të publikut dhe jo vetëm. Në një moment kulminacioni vokal afër përfundimi të një vepre edhe një fëmijë nga publiku që po këndonte së bashku me ta e i cili vazhdoi një notë më tepër, futi publikun dhe Korin në një emocion humoristik që solli buzëqeshjen e secilit.

Ndërsa për të na folur më shumë rreth realizimit të këtij koncerti i cili ka qenë i planifikuar për muajin mars, në një prononcim për KultPlus, ka folur drejtori i Filarmonisë së Kosovës, Baki Jashari.

“Ky koncert ka qenë i planifikuar shumë më herët por për shkak të situatës pandemike, koncerti është detyruar që disa herë të shtyhet. Pavarësisht kësaj, programi veçse është përpunuar edhe më mirë dhe është arritur një nivel mjaft i lartë profesional i Korit”, tregon Jashari.

Sipas tij, ky program është posaçërisht i zgjedhur nga dirigjenti Memli Kelmendi, ku tutje ka treguar për përvojën interesante për Korin dhe për mënyrën e punës së veçantë të dirigjentit

“Ky program ishte në tërësi premierë që erdhi nga propozimi i vetë dirigjentit duke zgjedhur vepra mjaft komplekse për interpretimin e Korit të Filharmonisë së Kosovës duke e ditur që Kori ka mundësi më të mëdha se koret amatore për shkak të punës tonë të përditshme dhe besoj nga reagimet e publikut që vërtetë ishte një koncert i suksesshëm”, thotë Jashari.

Kurse, për të folur më shumë rreth provave dhe se si kjo premierë la përshtypje tek ai, për KultPlus foli edhe dirigjenti Memli Kelmendi.

“Disa muaj më parë e morra ftesën nga drejtori i Filharmonisë së Kosovës për të ardhur me një program premierë me plan që koncerti të jetë në dy qytete, pra në Prishtinë dhe në Pejë. Unë i falënderohem shumë Drejtorit dhe institucionit dhe gjithë Korit të Filharmonisë së Kosovës për punën dhe përkushtimin maksimal për të ardhur deri në këtë realizim”, thotë Kelmendi.

Sipas tij, procesi i provave nuk ka qenë i lehtë sepse është dashur të punojnë në prova ndaras që nuk i përket punës së Korit, por ata kanë punuar në bazë të rregullave të pandemisë duke e ngadalësuar shumë procesin e punës.

Për Kelmendin, prezenca dhe interesimi i madh i publikut e bëri atë të ndjehet i kënaqur dhe i gëzuar që sheh një numër të audiencës në sallë sepse sipas tij vërehet që njerëzit i kishte marrë malli për të parë diçka të bukur.

Tutje ai ka treguar që në rolin e dirigjentit ai është munduar të nxjerrë diçka tjetër prej Korit, me ato lëvizje koreografike dhe lirshmërinë e tyre, prandaj kjo ka tingëlluar jashtëzakonisht bukur duke i dhënë një ngjyrë dhe frymë tjetër kësaj çasje pikërisht në këtë kohë kaq të vështirë.

“Unë e përjetova shumë bukur sepse është hera e parë që performoj me Korin e Filharmonisë së Kosovës, është një emocion krejtësisht ndryshe sepse jam shumë mirënjohës ndaj tyre, e po ashtu iu përulem dhe falënderohem ndaj secilit anëtar të Korit dhe shumë të tjerë që kanë dhënë kontribut në realizimin e këtij koncertit”, përfundon Kelmendi.

Ky koncert premierë i Korit të Filharmonisë së Kosovës është realizuar në kuadër të sezonit 2020/2021. Ndërsa, repriza e këtij koncerti do të shfaqet të enjten në Pejë në kishën katolike ‘Shën Katarina’. / KultPlus.com

Filharmonia e Kosovës solli koncertin ‘Frymë’, Jashari: Pandemia na ka ndalë frymën, ne dhuruam frymë përmes instrumenteve frymore

Era Berisha

Kulminacioni i kryeveprave madhështore nga kompozitorët botërorë dhe shqiptarë u jetësuan sonte nga talenti i mahnitshëm i instrumentistëve që frymuan së bashku në një frymëmarrje të vetme nën shoqërinë e melodive dhe tingujve, të cilat u ndezën nën vrazhdësinë e ëmbël të instrumenteve duke përmbledhur kështu një gamë perfekte të zgjedhur për koncertin e titulluar ‘Frymë’, që shtëpinë e gjeti në Atelienë e Pallatit të Rinisë dhe Sportit, shkruan KultPlus.

Koncerti ‘Frymë’, që portretizoi literaturën muzikore të shkruar për ansamble të instrumenteve frymore të drunjta dhe të tunxhit nga periudha e klasicizmit deri tek muzika bashkëkohore, sot ka shpalosur talentin e mirënjohur të kuintetit frymor dhe kuintetit të tunxhit së Filharmonisë së Kosovës, në instrumentet e posaçme diversive qysh nga instrumentet e drunjta frymore si: flauta, obo, klarinetë, fagot dhe korno e deri tek instrumentet metalike si: trumbeta, tromboni dhe tuba që rezultuan në një ndërlidhje ku secila vepër ekzistoi në një frymë ndryshe nga tjetra.

Pasi që të pranishmit zunë vendet e tyre duke mbushur komplet karriget në një numër specifik, pasoi një qetësi ku dëgjoheshin vetëm hapat e shkundura e të lehta të kuintetit frymor të cilët nisën edhe ringjalljen e tyre e cila pasoi në një flakërim të instrumenteve të drunjtë frymore që në skenë u shndërruan në ‘trupa’ të dyta të instrumentistëve.

Atmosfera e ngrohtë në një mot të tillë që po shoqërohej me pikat e shiut të cilat binin në dritare, u gjallërua komplet me veprat e kompozitorëve më të famshëm të botës duke filluar nga: Mozart, Rossini, Donizetti, Chretien, Thuille, Rota, Kompanek dhe Ewazen, për të vazhduar me kompozitorët shqiptarë si: Esat Rizvanolli që ka përpunuar këngën ”N’mjedis t’ballit”, Valton Beqiri i cili këtë natë solli premierën e veprës ‘Hamsa’, të shkruar enkas për kuintetin e tunxhit dhe Meriton Ferizi i cili ka ripërpunuar posaçërisht veprën që sonte u performua nga kuinteti frymor me numrin më të madh të instrumenteve, e e cila është pagëzuar me titullin ‘Pak a shum ship’, që jehonën e tre këngëve shqipe folklorike , e la të tërësisht të zbathur nëpër shpirtin e çdo njërit.

Ky gërshetim mes 11 instrumentistëve që janë të ndarë në kuntetin frymor dhe kuintetin e tunxhit kanë ngërthyer temat më të popullarizuara nga muzika botërore e deri tek ajo me motive folklorike shqiptare, duke na prezantuar me një miks jo të zakonshëm për Filharmoninë e Kosovës por duke krijuar një urë artistike nëpërmjet së cilës shpaloset llojllojshmëria e tingujve të pakrahasueshëm.

Kështu, krejt në fund koncerti i Ansamblit frymor të Filharmonisë së Kosovës, përmbylli këtë natë magjike me performancën e kuintetit të tunxhit nëpërmjet veprës ‘Killer Tango’ nga Kompanek, e cila me hijeshinë e saj madhështore depërtoi deri në shtresën e fundit të njeriut, deri në atë pikën ku vërehet kocka, duke çarë kështu komplet ndjenjat e mbyllura brenda në një rrotullim emocionesh mahnitëse.

Duartrokitjet e shumta, jo vetëm pas secilës vepër të interpretuar por edhe në fund të koncertit nuk munguan për asnjë sekondë të vetme, kurse në anën tjetër buzëqeshjet të cilat dalloheshin nga sytë e më të moshuarve e deri tek të rinjtë, ishin skulptura arti të vendosura përgjatë gjithë kësaj nate artistike.

Ndërsa për të na folur më shumë rreth realizimit të koncertit në një kohë të tillë, në një prononcim për KultPlus, ka folur drejtori i Filarmonisë së Kosovës, Baki Jashari.

“Duke u bazuar në situatën pandemike, Filharmonia e Kosovës është detyruar ta ndërrojë komplet agjendën e saj. Publiku e njeh Filharmoninë në dy segmente: 1.orkestrën e madhe simfonike dhe 2. korin, si dhe kombinimet të cilat kanë arritur deri në mbi 120 performues në skenë, por kjo tashmë nuk është e mundur ku edhe kori që është njësia e dytë e Filharmonisë, muajve të fundit është prezantuar në ansamble pra në grupe më të vogla pikërisht për shkak të situatës”, tregon Jashari.

Sipas tij, domethënia e emrit të koncertit ‘Frymë’, vjen pikërisht nga pandemia e cila na e ka ndalur frymën dhe pikërisht është ky virus i cili sulmon frymëmarrjen, prandaj ata kanë dashur që publikut ti dhurojnë frymë përmes instrumenteve frymore.

Premiera e koncertit është cilësuar si një koncert jo i zakonshëm për Filharmoninë e Kosovës, ku për Jasharin ishte një kombinim mjaft interesant i veprave që u prezantuan, ku secila nga to është premierë në zhanre të ndryshme duke përfshirë kompozitorë të ndryshëm.

“Ishte një laramani programore, një risi për publikun pra diçka që nuk është parë më herët, sepse siç dihet Filharmonia e Kosovës në plan programin e saj sezonal apo vjetor vazhdimisht me koncerte që kanë qenë një herë në muaj është prezantuar me kapacitetin e saj të plotë si orkestër simfonike dhe natyrisht kjo praktikë është tashmë prezente në të gjithë botën”, shpreh Jashari.

Tutje, ai ka folur edhe për masat e reja në këtë situatë pandemike ku gjithmonë ekziston rreziku.

“Kësaj radhe, në kemi qenë shumë strikt në zbatimin e rregullave dhe nuk kemi lejuar asnjë karrige më shumë sesa nevojitet, duke shfrytëzuar vetëm hapësirën e lejuar deri në më pak se 80 persona duke llogaritur 11 instrumentistët në skenë. Gjithashtu, ne kemi qenë nën kuotën e lejuar edhe pse kemi pas shumë kërkesa, e kemi mbyllur atëherë kur numri ka arrirë në 70”, shpalos Jashari.

Ndërsa, arsyeja se pse Filharmonia e Kosovës ka mbajtur tre koncertet e fundit në Atelienë në Pallatin e Rinisë dhe Sportit, e që gradualisht po zhvendosen nga Salla e Kuqe në Atelie, por që përsëri mbetet problem madhor jo vetëm për Filharmoninë dhe publikun por edhe për mbarë kulturën muzikore kosovare në Prishtinë, e tregon edhe vetë drejtori.

“Është e sata herë që po e mbajmë në Atelie, sepse akustika për muzikën klasike është shumë më e mirë sesa në Sallën e Kuqe dhe ka qenë shokuese kur 1 muaj më parë kemi zbuluar se vendosja e binave e ka dëmtuar aspektin akustik. Por kjo nuk është një sallë koncertale dhe publiku natyrisht që ka vështirësi në shikueshmëri dhe përjetim, mirëpo ne kemi vendosur që bina të mos vendoset, sepse dukshëm ka tingëlluar më mirë”, përfundon Jashari.

Po ashtu, për të folur më shumë rreth provave dhe se si kjo periudhë ndikon tek instrumentistët, në një prononcim për KultPlus, i pranishëm ishte anëtari i kuintetit të tunxhit, Avni Krasniqi.

“Ideja për të realizuar erdhi bashkërisht me drejtorin e institucionit të Filharmonsië, e që është jo vetëm nevojë e kohës por edhe nevojë permanente për të pasur formacione të tilla që funksionojnë në kuadër të Filharmonsië së Kosovë, sepse siç e dimë jemi në një periudhë pandemie, prandaj puna normale na është pamundësuar për shkak të masave, sepse siç dihet Filharmonia ka një numër të konsiderueshëm të instrumentistëve ndërsa hapësira është shumë e vogël”, tregon Krasniqi.

Sipas tij, provat kanë shkuar shumë mirë e të cilat kanë zgjatur rreth një muaj dhe kanë pasur një program të ri është përzgjedhur për këtë koncert. Po ashtu, ata janë munduar që të zgjedhin veprat më të bukura duke bërë një përzierje të veprave të huaja dhe shqiptare.

Tutje ai ka folur rreth situatës pandemike e cila po ndikon tek secili instrumentist dhe jo vetëm.

“Si instrumentistë, për fatin e keq pandemia ka ndikuar tek secili nga ne por në këtë rast e kemi pasur një lehtësim sepse ansambli ynë është në një numër të vogël me 5 anëtarë dhe kemi pasur mundësi që të zhvillojmë provat, por që në përgjithësi ka ndikuar negativisht tek të gjithë muzicientët dhe artet tjera”, shpreh Krasniqi.

Përshtypjet e tij mbi këtë natë që u shijua jashtëzakonisht nga të pranishmit, ishin shumë të mira, jo vetëm për frymën e Filharmonisë por edhe për institucionet dhe skenën muzikore

“Ka qenë një mbrëmje shumë e rëndësishme për ne dhe tani u shndërrua në një natë të mrekullueshme edhe pse sonte kemi qenë dy ansamble por ne kemi luajtur si dy ansamble, duke u munduar që secili të përcjellë emocionin nga programi i tyre i cili ka integruar dy ansamble në një tërësi të mahnitshme”, përfundon Krasniqi.

Filharmonia e Kosovës ka prezantuar këtë koncert në kuadër të sezonit 2020/2021./ KultPlus.com

“Frymë”, koncerti i Filharmonisë së Kosovës që do të ju shpie në një rrugëtim të gjatë

Në një situatë më të mirë se ajo e ditëve të fundit për shkak të masave të pandemisë, Filharmonia e Kosovës po sjell koncertin e radhës në kuadër të sezonit 2020/2021, shkruan KultPlus.

“Frymë” titullohet koncerti e që është portret muzikor i literaturës së shkruar për ansamble të instrumenteve frymore të drunjta dhe të tunxhit.

Instrumentistët e Filharmonisë së Kosovës, do të ju shpien në një rrugëtim nga periudha e klasicizmit deri tek muzika bashkëkohore.

Koncerti organizohet më 22 prill, prej orës 18:00 në Atelienë e Pallatit të Rinisë dhe Sportit në Prishtinë. / KultPlus.com

Skena Juvenis e Filharmonisë së Kosovës mban koncert me 3 violinistë të rinj

Filharmonia e Kosovës me platformën e saj vjetore “Skena Juvenis” ku promovohen aktorë të rinj të skenës muzikore formale, realizoi me shume sukses nje koncert në formacionin harkor të mbeshtetur nga koncert-mjeshtri i njohur i Filharmonisë, Visar Kuçi.

Në sallën e mbuluar në të kaltër, për të shënuar kështu Ditën Botërore të Autizmit, u realizua një program që mbulon periudhën barokiene dhe moderne të mesit të shekullit XX me dy vepra shumë të njohura dhe të rëndësishme të repertorit për formacion harkor, A.Vivaldi – 4 Stinët dhe B.Bartok – Valle Rumune.

Koncerti paraqet vazhdimësinë e fryteve profesionale në profilin e performuesve të muzikës klasike me brezin më të ri të harkorëve në vend.

Solistët e rinj, Rron Bakalli, Pleurat Doli dhe Drenusha Lota, si pjesë e violinisteve të brezit të ri, janë pjesëtarë aktivë të valës së tretë të ekosistemit muzikor pas vitit 1999 – studentë të profesoreshës dhe violinistes së nderuar, Sihana Badivuku.

Filharmonia si shtëpi e të gjithë instrumentistëve profesionistë kosovarë në këtë koncert nxori në pah 3 instrumentistë që kontributin e tyre në kryeqytet e sjellin nga një bazament i fuqishëm që rrënjët i ka në shkollën e shkëlqyer të muzikës në Gjakovë @Prenk Jakova, në një nga qytetet kontributdhënëse për edukimin e shumë brezave të muzikantëve profesionistë.

Koncertet e tilla pasqyrojnë kapacitetin e Filharmonisë për të mëvetësuar dhe integruar në një ngjarje kulturore veçoritë dhe pasuritë e larmishme të kulturës sonë muzikore.

Filharmonia e Kosovës, si një ndër institucionet më të rëndësishme të muzikës në Kosovë, si katalizator i zhvllimit të kulturës muzikore, si agregator historik i aktorëve muzikorë nga të gjitha profilet muzikore në Kosovë, zë vend të rëndësishëm në ekosistemin muzikor në Kosovë dhe është forcë e veçantë e rezistencës kulturore që nga fillet e saja të mesit të shekullit XX.

Filharmonia është urë lidhëse mes strukturave rajonale dhe ndërkombëtare të muzikës klasike, e cila në nivel të diplomacisë muzikore ka promovuar aktivisht ngritjen profesionale të kulturës muzikore në Kosovë për më shumë se 45 vite./KultPlus.com

Filharmonia e Kosovës do mbaj koncert në Prishtinë

Orkestra harkore e Filharmonisë së Kosovës do të mbaj koncert këtë të premte në Sallën e Kuqe në Prishtinë, shkruan KultPlus.

Në njoftimin e bërë ndër të tjera tregohet se koncerti do të filloj në orën 19:00 dhe se rezervimet janë të detyrueshme për shkak të situatës me pandeminë.

Më poshtë mund të lexoni njoftimin e tyre të plotë:

Filharmonia e Kosovës ka kënaqësinë të prezantojë koncertin e radhës në kuadër të sezonit 2020/2021. Orkestra harkore e Filharmonisë së Kosovës do të mbajë koncert më 2 prill 2021 (E premte) prej orës 19:00 në Sallën e Kuqe të Pallatit të Rinisë dhe Sportit në Prishtinë. Për të rezervuar ulësen tuaj shkruani e-mail në [email protected] me titull / Rezervim 02.04.2021 – Emri dhe mbiemri. Përmes një emaili ju mund të rezervoni vetëm dy ulëse. Përshkak të parandalimit të përhapjes së virusit Covid-19 bartja e maskës është e detyrueshme./ KultPlus.com

Filharmonia e Kosovës udhëton në Shkup me koncertin e Orkestrës Harkore

Filharmonia e Kosovës këtë të shtunë do të vazhdoj më koncertin e Orkestrës Harkore që do mbahet në sallën e koncerteve të Filharmonisë në Shkup, shkruan KultPlus.

Koncerti i cili do të filloj në orën 19:00 do të ketë një numër të kufizuar të pjesëmarrësve, prandaj dhe rezervimi paraprak është i detyrueshëm.

“Numri i pjesëmarrësve që mund të marrin pjesë në koncert është i kufizuar. Për të rezervuar vendin tuaj, shkruani në [email protected] me titullin/Rezervim 03.03.2021 – Emri / Mbiemri. Përmes një e-maili ju mund të rezervoni maksimumi dy vende.”, thuhet në njoftimin e bërë nga ana e Filharmonisë.

Më poshtë mund të lexoni njoftimin e tyre të plotë:

Jemi të lumtur të ju njoftojmë se sezoni 2020/2021 vazhdon me koncertin e Orkestrës Harkore të Filhamonike të Kosovës në 6 Mars 2021 prej orës 19:00 në Filharmoninë e Maqedonisë – Salla e koncerteve në Shkup. Numri i pjesëmarrësve që mund të marrin pjesë në koncert është i kufizuar. Për të rezervuar vendin tuaj, shkruani në [email protected] me titullin / Rezervim 03.03.2021 – Emri / Mbiemri. Përmes një e-maili ju mund të rezervoni maksimumi dy vende. Për shkak të masave për të parandaluar përhapjen e Covid-19, mbajtja e maskës është e detyrueshme.
Ju falënderojmë për mirëkuptimin!/ KultPlus.com

Jashari merr mandatin e katërt në Filharmoninë e Kosovës, premton ndërtimin e objektit të Filharmonisë së Kosovës

Suada Qorraj

Për tre mandate udhëhoqi institucionin më të lartë të muzikës klasike, Filharmoninë e Kosovës, kurse ditën e djeshme, pas një procesi të gjatë përzgjedhjeje, Baki Jashari mori në duar drejtimin e këtij institucioni për të katërtën herë me radhë, shkruan KultPlus.

Por, historia e këtij institucioni dhe puna e ndërtuar ndër vite nuk kufizohet vetëm në mandate e numra, e shkuara, por dhe e ardhmja mbajnë në vete shumë më tepër se kaq. Rrugëtimin e Filharmonisë ndër vite e ka shpalosur në një intervistë për KultPlus drejtori i këtij institucioni, Baki Jashari.

“Në këto 15 vite, që nga viti 2006 kur unë për herë të parë kam ardhur në krye të këtij institucioni, ka ndryshuar shumëçka. Nëse krahasohet me kushtet në të cilat ka filluar puna atëherë, ky ndryshim ka ndodhur në disa sfera, duke filluar nga rritja e kapaciteteve interpretuese të dy njësive të Filharmonisë, ku një dekadë më parë numri i instrumentistëve ka qenë i vogël. Përgjatë këtyre viteve është avancuar edhe profilizimi programor i Filharmonisë”, ka thënë Jashari.

Ai kujton dhe kohën kur njësitë interpretuese të Filhamronisë, orkestra dhe kori, në fillet e punës së këtij institucioni duhej të kompletoheshin me një numër të madh të instrumentistëve, që kapnin pothuajse gjysmën e orkestrës, nga Shqipëria dhe Maqedonia. Por, sipas tij kjo gjë tashmë ka ndryshuar dhe Filharmonia sot është në një situatë më të avancuar.

“Publiku me kalimin e viteve është rritur vazhdimisht, madje në vitin 2019 për ne ka qenë një befasi,  ku publiku që ka përcjellë koncertin tonë të mbajtur në sheshin Skënderbeu ishte me në numër tejet të madh, prej 2 mijë e 500 personave” pohoi tutje Jashari, teksa kujtonte vitet e tij të mëparshme në krye të këtij institucioni.

Ndonëse kanë kaluar njëzet vite që nga themelimi i saj, Filharmonia e Kosovës ka hasur në pengesa e ngecje, të cilat i kanë pamundësuar funksionimin adekuat që duhet të gëzoj një institucion i tillë. Ky institucion ende nuk ka një objekt në të cilën mund të mbajë prova e të prezantojë koncerte. Por, krahas kësaj, shqetësuese mbetet edhe infrastruktura ligjore, ngase ky institucion ende funksionon me ligjin e vitit 2006 që është i ndërtuar mbi rregulloren e UNMIK-ut.

“Ajo që ka mbete ngecje është mungesa e infrastrukturës ligjore, por dhe objektit. Që nga viti 2009, kur dhe ka filluar si projekt, nuk është ndërtuar objekti i Operas dhe Baletit të Kosovës, dhe ky projekt vazhdon të mbetet një projekt vetëm në letër. Njëkohësisht edhe kur flasim për strukturën ligjore, vlen të ceket se ne ende funksionojmë me ligjin e vitit 2006, edhe pse në vitin e kaluar ligji i ri kishte kaluar të gjitha fazat përgatitore, zhvillimet politike në vend ndikuan në pezullimin e këtij procesi dhe sollën infrastrukturën ligjore në pikën zero”, tregon Baki Jashari për KultPlus.

Tutje drejtori i Filharmonisë së Kosovës ka thënë se bashkëpunimin me Fakultetin e Arteve për këtë institucion është me rëndësi të veçantë, sidomos për plotësimin e kuadrove si me instrumentistë ashtu edhe me koristë. Krahas kësaj, qenësore përgjatë këtyre viteve ka qenë edhe bashkëpunimi me festivale ndërkombëtare muzikore,  sepse, sipas tij, një bashkëpunim i tillë ka sjellë para publikut programe, dirigjentë, solistë me renome ndërkombëtare.

Për Jasharin, një ndër sukseset më të mëdha të Filharmonisë është struktura e publikut, por dhe përfaqësimit që bëhet në orkestër, sepse dominohet nga moshat e reja, që nëse krahasohet me vendet e tjera, atëherë mund të konsiderohet si një ndër pikat më pozitive të këtij institucioni.

“Edhe pse muzika që luhet në Filharmoni nuk është muzikë e estradës, muzikë e masave të gjera, prapë ka gjetur mbështetje të madhe dhe interesim të madh të publikut,  dhe unë e konsideroj këtë një sukses të madh të Filharmonisë,  sepse ne nuk jemi institucion për vetveten tonë, ne jemi institucion publik që duhet tu ofroj qytetarëve artin e vërtetë”, deklaroi tutje Jashari.

I pyetur se çka do të ndryshoj në mandatin e tij të katërt në institucionin më të lartë të muzikës klasike në vend, Jashari pohoi se do të avancohen përmbajtjet programore, do të bëhet kompletimi i stafit, që ndonëse ka pasur progres ka ende shumë punë për tu bërë. Tutje ai ka shtuar se në mandatin e tij të katërt do të punoj për të rregulluar edhe statusin e koristëve,  sepse, sipas tij nuk përkon më të drejtat e tyre të përfaqësimit.

“Bashkërisht me menaxhmentin do ti bëjmë lëvizjet e duhura që gjatë këtij mandati të punohet sa më shumë që është e mundur në ndërtimin e objektit vetanak të Filharmonisë së Kosovës, pavarësisht se si do të quhet, objekt i teatrit, apo objekt i operës së baletit, ne duhet ta dimë që Filharmonia është institucion i pavarur, e ka ligjin e vet, e ka një infrastrukturë ligjore dhe duhet ti ketë edhe kushtet e punës që sot nuk i ka”, deklaroi ai teksa tregonte për punën që pritet të bëjë në tre vitet e ardhshme.

Baki Jashari deklaroi për KultPlus se Filharmonia tash e njëzet vjet funksionon në një objekt me qera, i cili po ashtu nuk posedon kushtet adekuate të punës, sepse rritja e kapaciteteve ka pamundësuar punën me dy turne.

Krejt në fund, Jashari ka folur edhe për rizgjedhjen e tij si drejtor i Filharmonisë,  duke potencuar se ai ka konkurruar si çdo kandidat tjetër, me të vetmen përparësi, përvojën shumëvjeçare në këtë institucion.

“Rizgjedhja ime në këtë mandat shënon edhe mandatin tim të fundit,  sepse në kuptimin e viteve unë jam afër pensionimit”, ka përfunduar kështu intervistën Baki Jashari./ KultPlus.com

Ansambli Vokal i Filharmonisë së Kosovës me koncert në Maqedoninë e Veriut

Ansambli Vokal i Filharmonisë së Kosovës këtë të mërkurë vjen me një koncert në Sallën Kamertale të Filharmonisë së Maqedonisë së Veriut, shkruan KultPlus.

Koncerti është pjesë e vazhdimit të sezonit 2020/2021.

Nën dirigjimin e Hajrullah Sylës, gjatë këtij koncerti në skenë do të ngjitet Ansambli Vokal i Filharmonisë së Kosovës me vepra nga: A. Scarlatti, E. Whitacre, H. Syla, J. Runestad, J. Busto, J. Douma, J. Elberdin, M. Mengjiqi, N. Cline, N. Brenner x M. Garbus, O. Gjeilo, S. Leek.

Koncerti mbahet nesër, më datë 24 shkurt duke filluar nga ora 19:00. / KultPlus.com

Filharmonia e Kosovës do mbajë koncert në Maqedoninë e Veriut

Filharmonia e Kosovës sezonin për këtë viti do ta vazhdoj në Maqedoninë e Veriut, me ansamblin vokal të filharmonisë, shkruan KultPlus.

Kjo është bërë e ditur nëpërmjet një postimi në Facebook, nga faqja zyrtare e filharmonisë së Kosovës ku shkruhet se ky koncert do të mbahet me 24 shkurt të këtij viti në sallën Kamerale të Filharmonisë së Maqedonisë së Veriut.

Më poshtë mund të lexoni statusin e tyre të plotë:

*Sezoni 2020/2021 vazhdon me koncertin e Ansambli Vokal i Filharmonisë së Kosovës më 24.02.2021 në Sallën Kamerale të Filharmonisë së Maqedonisë së Veriut. Për të rezervuar ulësen tuaj shkruani e-mail në [email protected] me titull / Rezervim 24.02.2021 – Emri dhe mbiemri. Përmes një emaili ju mund të rezervoni më së shumti dy ulëse. Përshkak të parandalimit të përhapjes së virusit Covid-19 bartja e maskës është e detyrueshme./ KultPlus.com

Filharmonia e Kosovës e jashtëzakonshme mbrëmë, shpalosi rrugëtimin e Kosovës ndër shekuj

Xhemile Hysenaj

Mbrëmë, në nder të 13 vjetorit të Pavarësisë së Kosovës, Salla e Kuqe në Prishtinë mirëpriti Filharmoninë e Kosovës për një koncert madhështor dedikuar historisë e rrugëtimit të popullit të Kosovës ndër vite, shkruan KultPlus.

Para një publiku modest, për herë të parë u interpretua një nga veprat më të mëdha të kompozitorit Valton Beqiri bashkë me atë të Vinçenc Gjinit, “Simfonia in K: Kosova vatra atërore’, një kompozim ky që ngërtheu brenda vetes ‘Rrugëtimin’ gjashtë shekullor të historisë së shqiptarëve.

‘Rrugëtimi’ i Valton Beqirit erdhi para publikut në gjashtë etapa: Nga Kastrioti, Rilindja, Qëndresa, Malli, Liria e deri tek Jeta. Etapa këto që në secilin instrument kishin zënë vend e shpaloseshin me brishtësi përmes tingujve duke depërtuar kështu në secilën skutë e tek secili person që ishte i pranishëm. Secila etapë pasonte me duartrokitje e brohoritje të shumta që veçse i dëshmonin emocionet e mëdha që kishin kapluar publikun.

Filharmonia e Kosovës dikur tubonte mbi 2000 artdashës në Sheshin e Prishtinës, ndërkaq mbrëmë si pasojë e gjendjes pandemike, në Sallën e Kuqe u shfrytëzua vetëm 40% e hapësirës. E gjithë trupa e Filharmonisë ishte në distancën e caktuar dhe me maska të vendosura.

Për Baki Jasharin, e gjithë kjo situatë është tejet e dhimbshme. Në një prononcim për KultPlus, ai flet me nostalgji e emocione të mëdha tek kujton koncertin e 26 qershorit, i organizuar për nder të figurës së Skënderbeut.

“Filharmonia kishte mbledhur diku rreth 2500 persona dhe ka qenë e mahnitshme qetësia absolute që ka mbretëruar gjatë atij koncerti”, ka theksuar Jashari.

Ai, ndër të tjera, ka deklaruar për KultPlus, se agjenda e Filharmonisë për këtë vit është shumë më modeste se viteve të tjera. Ndërkaq në anën tjetër ishte ndarë shumë i kënaqur me performancën e cila kishte ardhur me një presion tepër të madh pasi pandemia Covid19 kishte ndryshuar e vështirësuar pothuajse secilin proces të këtij institucioni.

“Ne kemi pasur obligim nga Ministria e Kulturës, Rinisë dhe Sportit sikurse edhe institucionet tjera kulturore të organizojmë koncert për përvjetorin e pavarësisë duke respektuar masat anticovid. Nuk kemi mundur t’i zhvillojmë provat e kompletuara me këtë staf pasi hapësira është shumë e vogël dhe ne duhej t’i respektonim vazhdimisht masat anticovid, kam kontaktuar gjatë gjithë kohës me IKSHPK-në për t’u koordinuar. Dhe është akoma e dhimbshme që ne nuk kemi Sallë koncertale, jemi mjerisht në këtë Sallë të Kuqe me hapësirë kaq të vogël”, ka deklaruar tutje Jashari për KultPlus.

E gjithë ky organizim kishte një domethënie të madhe për kompozitorin Valton Beqiri, për të cilin lavdatat e duartrokitjet nuk kishin të ndalur. Ai për KultPlus tha se shpreson që ky koncert të jetë prapë pjesë e repertorit dhe pse jo të shfaqet edhe në vende tjera.

“Realisht koncertet e tilla që përkojnë me një ansambël kaq të madh, është mëkat që realizohen me një numër të limituar të shikuesve, por megjithatë veprat vazhdojnë e përçojnë mesazhin e tyre”, ka potencuar Beqiri për KultPlus.

Një koncert ky që emocionoi të gjithë, përfundoi me brohoritje e duartrokitje të pafundme, për pothuajse një orë bëri që e gjithë kjo situate e tmerrshme që ka kapluar botën të harrohej e publiku të lundronte qetazi në secilën notë. / KultPlus.com

Anila Aliu, rrugëtimi i pianistes nga Kosova drejt skenave më prestigjioze në botë

Xhemile Hysenaj

Talenti i saj në njërin nga artet më të bukura, atë të muzikës, u hetua qysh kur ishte fëmijë. Ishte vetëm 8 vjeçe kur për herë të parë filloi të merrej me piano. Bëhet fjalë për Anila Aliun, vajza nga Gjilani që edhe pse në një moshë të re, ka arritur të jetë pjesëmarrëse edhe në skena të njohura ndërkombëtare. Në një intervistë për KultPlus, Aliu ka shpalosur më detajisht për rrugëtimin e saj i cili edhe pse mjaft i suksesshëm, për të është vetëm fillimi i një karriere me potencial të madh.

Ishte gara ‘Pianisti i Ri’ ajo e cila Anila Aliut i hapi dyert për të parën herë drejt skenave ndërkombëtare. ‘Nuk ka rëndësi se ku jetojmë, arritja e suksesit bëhet vetëm me vendosshmëri, punë, vullnet, diciplinë e sakrifica të shumëta. Por janë vullneti dhe dashuria e madhe dy gjerat kryesore, të cilat arrijnë të mposhtin çdo pengesë që e hasim gjatë rrugëtimit në ndërtimin e çfarëdo karriere’, thekson Aliu për KultPlus.

Gara internacione në Itali, 2010

Anila tregon se nevoja për ndihmë dhe përkrahje ka qenë dhe vazhdon të jetë e domosdoshme në karrierën e saj prej pianisteje, pasi siç shprehet ajo, ky është një profesion tejet i kushtueshëm.

‘Ne e dijmë se në çfarë kushte ështe shteti jonë dhe përballja me sfidat e ndryshme është gjithmonë e pranishme, duke filluar nga mungesa e një salle koncentrale, mungesa e pianove, vendeve e hapësriave. Mirëpo, krahas të gjitha këtyre vështirësive, përkrahja e familjes, shoqërisë, shkollës së Muzikës në Gjilan dhe disa institucioneve përkatëse, nuk më ka munguar’, deklaron tutje Aliu.

Anila Aliu është fituese e shumë çmimeve të para, absolute dhe e çmimeve speciale në gara, masterklase e akademi të ndryshme, si në Kosovë po ashtu edhe vende tjera si në Shqipëri, Maqedoni, Itali, Gjermani, Luksemburg, Lituani, Francë e Amerikë. Ndër çmimet më të rëndësishme që ajo ka fituar ka qenë ‘Solist-interpret me Orkestrën e Filharmonisë së Kosovën’, çmimi në pjesëmarrjen në garat ndërkombëtare në Kaunas të Lituanisë, ku Kosova rangohet së bashku me Rusinë dhe Estoninë si tri shtetet finaliste. Çmimi ‘Solist me Orkestrën Ballkanike’ në Itali, ‘Pjesëmarrje në Masterklase pianistike në Luksembug’, ‘Çmimi Special’ në Chopin Piano Fest’, ‘Çmimi Special’ në San Dona di Pave’ në Venecia të Italisë si dhe ‘Çmimi i parë’ dhe ftesa për performancë në ‘Carneige Hall’ në New York.

Ndërkaq, ndër koncertet më të rëndësishme ku Anila Aliu ka marrë pjesë, kanë qenë Koncerti me Filharmoninë e Kosovës në vitin 2012, koncertet me Orkestrën Ballkanike të realizuara në Forli dhe Santa Sofia të Italisë në vitin 2017, Koncerti Solistik për një grup artistësh nga Singapori në vitin 2018, Koncerti Recital në Prishtinë poashtu në vitin 2018, Koncerti Recital në Bonn të Gjermanië në vitin 2019, performancat në shtëpinë e kompozitorëve gjerman si Beethoven dhe Robert Schumann si dhe koncertet në Aachen dhe Königswinter të Gjermanisë në vitin 2020.

Koncerti me Filharmoninë e Kosovës

‘Muzika është diçka që ka jetuar gjithmonë në mua, diçka pa të cilën nuk mund të jetoj. Performimi në skenë, komunikimi përmes muzikës duke shprehur ndjenjat që i përjetoj vetëm me anë të notave, është diçka tejet e veçantë që më bën jashtëzakonisht të lumtur. Ndjej se qysh fëmijë kam qenë e destinuar për të ndjekur rrugën e pianistes. Pas çdo performance mezi prisja atë të radhës dhe kështu e kuptova që nuk jetoja dot pa këtë art’, potencon Aliu.

Dihet se muzika klasike në vendin tonë, pati zhvillim të vonshëm krahas shteteve tjera. Mirëpo, sipas Anilës, falë festivaleve dhe artistëve të ndryshëm që përfaqësojnë Kosovën brenda dhe jashtë vendit, muzika klasike ka filluar të zë një vend të veçantë edhe tek ne. ‘Muzika klasike është një tregues i madh i zhvillimit të kulturës së një shteti dhe dëshirë e imja është që të kem një rol në ngritjen e saj kudo në botë’, vazhdon tutje Aliu.

Anila është shumë entuziaste si karakter dhe ajo çfarë spikatet më shumë në personalitetin e saj është dashuria e pafundme për të mësuar dhe për t’i bërë ballë të gjitha sfidave që vijnë me këtë profesion. Ajo tregon për KultPlus se ndjen kënaqësi të madhe jo vetëm tek rezultati dhe çmimet që fiton por edhe tek vetë procesi që e shpie deri atje. Falë pasionit dhe ambicieve të mëdha që ajo ka, puna e saj në piano nuk është ndalur asnjëherë. Edhe pas sukseseve të mëdha, Anila, taman si një artiste e vërtetë, nuk është kurrë plotësisht e kënaqur, ajo kërkon gjithmonë diçka më shumë nga vetja.

Ndër qëllimet e saj kryesore, siç tregon ajo, është që të arrij ta prezantojë Kosovën në Evropë dhe më gjerë. Ajo me një këmbëngulje të madhe aspiron në ngirjten e vetëdijësimit për rolin e muzikës klasike në vendin tonë. ‘Një ndër qëllimet e mija është edhe ngritja në skenat prestigjioze botërore e kjo dalëngadalë po realikzohet. Së fundi kam arritur që të koncertoj në një ndër sallat më të rëndëishme të muzikës klasike, në atë të ‘Carnegie Hall’ në New York’, potencon Aliu për KultPlus.

Ndër performancat më të rëndëishme për Anilën, mbeten ajo me Filharmoninë e Kosovës në vitin 2012, koncert ky i realizuar kur ajo ishte vetëm 11 vjeçe dhe Koncerti Recital në Bonn të Gjermanisë në vitin 2012, një koncert ky që rezultoi me një suksees të jashtëzakonshëm dhe kritika prej më të mirave nga gazetat e portalet e njohura gjermane. Pas këtij koncerti, Aliu u ftua edhe për shumë peformanca të tjera në shtetin gjerman, performanca këto që pritet të organizohen në një të ardhme të afërt.

‘Prindërit e mi kanë qenë ata që kanë pasur ndikimin më të madh tek unë. Ama më mësuan të përkushtohem e tëra në karrierën time si pianiste: me kohë, talent dhe mbi të gjitha me dashuri. Mirënjohëse jam edhe ndaj të gjithë profesorëve të mi, si ata kosovarë poashtu edhe ata evropianë të cilët më rritën dhe formësuan profesionalisht. Në veçanti mësuesi im Visar Osmani me të cilin punova për tetë vite radhazi dhe me profesoreshën time në klasën e të cilës po studioj aktualisht, Valbona Pula Petrovci’, përfundon Anila, e cila nuk harron kurrë njerëzit që ndikuan dhe e përkrahën atë në zhvillimin e saj si pianiste. / KultPlus.com

Pas Shkupit, koncerti për Nexhmije Pagarushën u prezantua edhe në Prishtinë

Suada Qorraj

Katedralja ‘Nënë Terezë’ në kryeqytet sonte kishte marrë një hijeshi ndryshe. Kori i Filharmonisë së Kosovës kishte pushtuar hapësirën, për të dhuruar një shfaqje frymëmarrëse. Koncerti i fundvitit ‘Në kujtim të Nexhmije Pagarushës’, i dha jetë e plotë ngjyra hapësirës së kësaj katedraleje, shkruan KultPlus.

Kjo mbrëmje filloi nën tingujt e këngës më të bukur shqipe, ‘Bareshës’ së Nexhmije Pagarushës. E kompozuar nga kompozitori i famshëm e i mirënjohur shqiptar Rexho Mulliqi, tingujt e kësaj kënge, nën interpretimin e jashtëzakonshëm të Filharmonisë së Kosovës, përcollën emocione të forta tek publiku i kësaj nate.

Gjersa publiku ishte nën emocione të forta pas këtij interpretimi, në sallën e koncertit filluan që një nga një të këndonin edhe sopranot e mirënjohura shqiptare. ‘Një ditë e bukur maji’, mori një hijeshi krejtësisht ndryshe nën interpretimin e sopranos Dea Hamdiu.

Instrumentistët kishin vendosur maskat, por kjo nuk i pengonte që të luanin aq mjeshtërisht në instrumentet e tyre. Pandemia mbase kishte kufizuar numrin e pjesëmarrësve, por jo edhe madhështoren që përçoi secili interpretim e secila këngë.

Dirigjenti Gridi Kraja, këtë koncert e ka konsideruar mjaft të rëndësishëm ngase i kushtohej një personaliteti të jashtëzakonshëm për muzikën shqiptare. Ai ka shtuar se përgatitja për këtë koncert ka kërkuar një punë të madhe pas që shumica nga partiturat muzikore mungonin.

“Ishte një proces i rëndësishëm do të thoja, megjithëse ishte protokollar, koncerti i kushtuar Nexhmije Pagarushës një personaliteti të jashtëzakonshëm të Kosovës dhe gjithë shqiptarëve. Kryesisht u bazuam në materiale që ishin të dashur për Nexhmie Pagarushën ndaj materiali ishte disi më i lartë, sepse materialet duheshin sjellë pak a shumë si dikur. Shumica e notave dhe partiturave muzikore mungojnë, dha na u desht të i riprodhonim dhe u realizua me sukses”, deklaroi Kraja për KultPlus.

Kurse për sopranon Selvije Mareti, ky koncert vinte si një kujtim për bylbylin e këngës shqipe, Nexhmije Pagarushën e cila ka ndërruar jetë gjatë këtij viti. Sipas saj puna e tyre dhe interpretimet që i sollën sonte ishin vetëm mënyra e tyre për të nderuar Pagarushën.

“Ne të gjithë e dojmë se Nexhmije Pagarusha veç këtë vit në shkurt ka ndru jetë, por si kujtim të këngëve të saj të cilat i ka pasur të gjitha perla ne e kemi nderu sado pak në atë mënyrën tonë për me i dhanë një shkëlqim apo gjithçka që ka frymëzu shqip në koncertin e Shkupit dhe në koncertin e ditës së sotme. Por, duke pasur parasysh se shkaqet e pandemisë e kanë bërë të veten më vjen keq që ky koncert kaq i bukur që po shihet paska pasur edhe publiku etje për këtë lloj këngë artistike, po shpresojmë se solistët e filharmonisë së Kosovës do ta vazhdojnë këtë rrugëtim me perlat e Nexhmije Pagurëshs”, pohoi ajo.

Kjo mbrëmje pati edhe shumë këngë të tjera, të cilat ndër vite kanë pasuruar muzikën shqiptare. ‘Një ditë e bukur maji’, ‘Kroi i fshatit tonë’, ‘Dashnor tu bana’, ‘E kujtoj at’ takim’, ‘Margjelo’, ‘Kenke nur i bukurisë’, ‘Perendeshë e bukurisë’ dhe ‘Agimet shqiptare’, jehuan në katër muret e sallës së katedrales së kryeqytetit.

Por kjo mbrëmje nuk mbaroi këtu sepse fundi ishte po aq i magjishëm sa edhe fillimi. Sopranot Dea Hamdiu, Ardita Ukaj, Elikonë Hysaj, Shkurtë Hykaj, Ilvije Dragusha, Klatrina Miftari, Diellza Sylejmani, Selvije Mareti dhe Adelina Paloja, u rikthyen dhe një herë përball publikut për të sjellë në jetë këngën ‘Valsi i Lumturisë’, një ndër hitet e këngëtares të brezit të artë Vaçe Zelës.

Duartrokitjet nuk munguan, madje të pranishmit u ngritën dhe në këmbë pas këtij interpretimi kaq të fuqishëm, nën zërat e bukur të sopranove. Pas përfundimit të koncertit, në sallë artistët dhe mysafirët u panë duke diskutuar mes vete ku shkëmbyen vlerësimet e tyre.

Në këtë koncert të pranishëm ishin edhe kryeministri në detyrë i Republikës së Kosovës, Avdullah Hoti si dhe ministrja në detyrë e Kulturës, Rinisë dhe Sportit, Vlora Dumoshi.

Kujtojmë se me 19 dhjetor të këtij viti po i njëjti koncert është mbajtur në  Sallën e Filharmonisë Maqedonase në Shkup / KultPlus.com

Filharmonia e Kosovës në koncertin e fundvitit kujton Nexhmije Pagarushën

Koncerti i fundvitit nga Filharmonia e Kosovës do të jetë dedikuar bilbilit kosovar që e bëri tok shpirtin me muzikën, Nexhmije Pagarushën, shkruan KultPlus.

“Në kujtim të Nexhit” është emri i koncertit të së shtunës më 19 dhjetor, përgjatë së cilës përmes artit do të lartësohet Pagarusha. Mirëpo, për shkak të hapësirës së duhur të interpretimit, Filharmonia e Kosovës do të detyrohet që koncertin në Sallën e Filharmonisë Maqedonase në Shkup, duke filluar nga ora 17:00.

Përgjatë koncertit i cili do të mbahet me numër të kufizuar të pjesëmarrësve, do të interpretohen vepra nga Rexho Mulliqi, Çesk Zadeja, Avni Mula, Lorenc Antoni, Palok Kurti, Kristo Kono, Rauf Dhomi, nën orkestrimin e Valton Beqirit, Kreshnik Aliçkajt dhe Gridi Krajës.

Në anën tjetër, me zërat e tyre të pranishëm nën dirigjimin e Gridi Krajës do të jenë solistet Adelina Paloja – soprano, Ardita Ukaj – soprano, Arta Jashari – soprano,
Besë Krasniqi – mexosoprano, Dea Hamdiu – alto, Diellza Sylejmani – alto,
Elikonë Hysaj – mexosoprano, Ilvije Dragusha – Murtezaj – soprano,
Kaltrina Miftari – soprano, Selvije Marteti – Xhemshiti – soprano, Shkurtë Hykaj – soprano.

Ky koncert organizohet nën mbështetjen e Ministrisë së Kulturës, Rinisë dhe Sportit. / KultPlus.com

Interpretimi i Filharmonisë së Kosovës përmendet pranë 10 kompozitorëve më të mirë anglezë

Radioja digjitale e muzikës, Classic Fm ka renditur 10 kompozitorët më të mirë anglez, shkruan KultPlus.

Në mesin e tyre është edhe kompozitori i shekullit të 20-të, John Tavener. Mirëpo, e veçanta e përzgjedhjes së tij ndërlidhet me veprën të cilën kjo medie ia ka përmendur si ndër të mirat.

“Song for Athene” është vepra të cilën në vitin 2011 e kanë sjellur magjishëm kori i Filharmonisë së Kosovës nën dirigjimin e Rafet Rudit.

Kjo vepër është interpretuar në funeralin e princeshës së Uellsit, Diana.  / KultPlus.com

Filharmonia e Kosovës me koncertin e korit i bashkangjitet thirrjes kundër dhunës ndaj grave

Filharmonia e Kosovës koncertin e korit do të ja dedikoj thirrjes kundër dhunës ndaj grave dhe vajzave, shkruan KultPlus.

Lajmi është bërë i ditur nëpërmjet një postimi në faqen zyrtare të Filharmonisë ku tregohet se numri i pjesëmarrësve në këtë koncert tashëm është plotësuar, mirëpo publiku do të ketë mundësinë që të përcjellë këtë koncert edhe online.

Gjithashtu ata kanë bërë të ditur se në bashkëpunim me Un Women gjatë këtij koncerti do të ketë edhe surpriza.

Koncerti do të mbahet me datën 6 dhjetor, në pallatin e rinisë me fillim nga ora 16:00

Më poshtë mund të lexoni statusin e plotë:

Dhuna ndaj grave dhe vajzave në kohën e pandemisë është rritur. Edhe këtë vit Filharmonia e Kosovës, koncertin e fillim dhjetorit ia dedikon thirrjes kundër dhunës ndaj grave dhe vajzave me koncertin e Korit të Filharmonisë së Kosovës, i cili organizohet me mbështetjen e Ministrisë së Kulturës, Rinisë dhe Sportit si dhe përkrahjen e UN Women. Numri i lejuar i pjesëmarrësve për këtë koncert është i limituar dhe është plotësuar prej kohësh mirëpo së shpejti koncerti do transmetohet edhe ‘online’ si dhe në bashkëpunim me UN Women do sjellin edhe një surprizë për ju.

Ju faleminderit për mirëkuptim!/ KultPlus.com

Veprat simfonike të klasikëve shqiptar, sonte interpretohen në Gjakovë

Orkestra e Filharmonisë së Kosovës sonte mban koncert në Teatrin e Qytetit “Hadi Shehu” në Gjakovë, shkruan KultPlus.

Koncerti që do të filloj prej orës 19:00 do të udhëhiqet nga mjeshtri Gridi Kraja nga Tirana.

Publiku do  të ketë rastin të dëgjoj veprat simfonike të klasikëve shqiptar, mes tjerash poemën simfonike “Skënderbeu” nga Çesk Zadeja, ‘’Vallen Shqiptare nr.2’’ nga Thoma Gaqi, ‘’Baresha’’ nga Rexho Mulliqi dhe unverturën “Goca e Kaçanikut” nga Rauf Dhomi.

Koncerti do të mbahet në pajtueshmëri me masat anti-covid dhe pjesëmarrësit duhet të shkojnë 30 minuta përpara fillimit të koncertit./KultPlus.com

Filharmonia pritet të startoj me koncerte nga muaji tetor

Filharmonia e Kosovës ka rifilluar provat me grupet e vogla të njësive të saj, të orkestrës dhe të korit.

Nëpërmjet një postimi në Facebook, Filharmonia e Kosovës ka bërë të ditur se do të filloj mbajtjen e koncerteve në muajin tetor, por me një numër të kufizuar të pjesëmarrësve.

Më poshtë gjeni njoftimin e tyre të plotë:

Të nderuar zonja dhe zotërinj,

Jemi të lumtur që nga 28 shtatori, Filharmonia e Kosovës ka rifilluar provat me grupe të vogla të dy njësive të saj, orkestrës dhe korit. Pas shkëputjes prej më shumë se gjashtë muajsh, që kur vendi u fut në izolim për shkak të pandemisë dhe ballafaqimit me përhapjen e virusit Covid-19, urojmë që të jetë një fillim i mbarë për sezonin të cilin tashmë kemi filluar ta planifikojmë. Filharmonia do t’i kthehet koncerteve me numër të kufizuar të pjesëmarrësve gjatë tetorit. Shihemi së shpejti!/ KultPlus.com

Të nderuar zonja dhe zotërinj, Jemi të lumtur që nga 28 shtatori, Filharmonia e Kosovës ka rifilluar provat me grupe…

Gepostet von Kosovo Philharmonic am Dienstag, 29. September 2020