Etiketë: Plazhi

‘Rana e hedhun’, magjia e natyrës që frymëzon turistët

Posted on by Kult Plus

 Në bregdetin e bukur të Shqipërisë, midis ujit kristaltë të Detit Adriatik dhe mrekullive të natyrës, qëndron një ndër atraksionet më tërheqëse dhe të mahnitshme: “Rana e hedhun”.

Ky monument natyror është një pikë për të gjithë ata që dëshirojnë të eksplorojnë bukurinë dhe pasurinë e kësaj zone të mrekullueshme.

Shëngjini, vendi ku ndodhet “Rana e hedhurn”, është një ndër destinacionet më të preferuara nga vizitorët  dhe turistët.

Siç edhe emri vetë tërheq vëmendjen, “Rana e hedhun” është një shfaqje e natyrës që tregon mënyrën unike se si uji i detit formon një pasqyrë të shkëlqyeshme në formën e një rane të ndezur, që duket sikur po hedh një cep të këmbës së saj në ujë. Ky fenomen i rrallë është rezultati i ndikimeve të ndryshme gjeologjike dhe hidrodinamike që kanë krijuar një hapësirë ku uji bie me forcë, duke krijuar një efekt vizual të mrekullueshëm.

Çdo vit, mijëra turistë vizitojnë këtë vend të jashtëzakonshëm për të ndier magjinë e natyrës dhe për të kapur fotografi të rralla që do t’i mbeten kujtimeve të tyre për gjithë jetën.

Kjo zonë nuk është vetëm një atraksion për të shijuar pamjen, por është gjithashtu një vend ku mund të kryeni aktivitete të ndryshme të argëtuese. “Rana e hedhun” është një destinacion i përshtatshëm për aventurat e ujit dhe zhytja. Në fakt, vizitorët mund të marrin pjesë në ekskursione të organizuara me anije të vogla, ku mund të eksplorojnë bregdetin, të shijojnë pamjet e pafund të horizontit detar dhe të mbërrijnë përballë “Ranës së hedhun”.

“Rana e hedhun” ka ndikim të madh edhe në ekonominë e zonës. Ky vend është bërë një burim i rëndësishëm të ardhurash për vendasit, të cilët krijojnë biznese të ndryshme të lidhura me turizmin, si restorante, dyqane suvenirësh, dhe shërbime udhëtimi.

Në një botë të ngarkuar me teknologji dhe zhurmë, “Rana e hedhun” është një shfaqje mgjaike dhe e papërsëritshme e natyrës që na bën të ndalemi, të mësojmë dhe të ndjehemi të lidhur me botën që na rrethon. Ky monument natyror, jo vetëm që frymëzon turistët të shohin bukurinë dhe fuqinë e natyrës, por gjithashtu na bën të reflektojmë mbi rëndësinë e ruajtjes dhe mbrojtjes së mjedisit tonë të çmuar./atsh/KultPlus.com

Flukse pushuesish në plazhin e Tales (VIDEO)

Posted on by Kult Plus

Plazhi i Tales, vetëm 7 km larg rrugës nacionale Tiranë – Lezhë, frekuentohet jo vetëm nga pushuesit vendas, por edhe nga ata nga Kosova, të cilët e kanë zbuluar si destinacion të ri, familjar dhe të qetë, për këtë sezon veror.

Kryeministri Edi Rama publikoi sot në rrjetet opinione të pushuesve që kanë zgjedhur këtë verë bregdetin e Tales, me hapësirat e bollshme, ujin e pastër, rërën cilësore dhe shërbimet e shtuara.

“Këto kanë nxitur flukse të larta turistësh në këtë sezon veror që vlerësohet maksimalisht edhe prej bizneseve të sektorit”, tha Rama.

Pastërtia e ujit dhe rërës, hapësirat e bollshme publike dhe çmimet e favorshme janë arsyet pse pushuesit po e kërkojnë plazhin e Tales gjithnjë e më shumë.

“Plazhi i Tales nga viti në vit është duke rritur imazhin te pushuesit vendas e të huaj. Mirëmbajtja, pastrimi, çmimet konkurruese dhe qetësia mbi të gjitha janë arsyet që ky plazh frekuentohet në masë”, tha përfaqësuesi i një biznesi që operon në zonë.

“Kemi shumë turistë nga Zvicra, Gjermania, Kosova ka shumë”, tha përfaqësuesi i një biznesi që operon në zonë.

“Për familjarët është i shkëlqyer si për detin, si për rërën, si për qetësinë që ofron, për shërbimet”, tha një pushuese.

Plazhi i Tales shtrihet në një vijë bregdetare rreth 7 kilometra, me një gjerësi rëre që shkon nga 100 në 150 metër.

Ky plazh shtrihet nga cepi i lagunave Kune-Vain deri në fillim të deltës së lumit Mat dhe vlerësohet si një plazh familjar për qetësinë që ofron.

Nga një zonë e virgjër, gati-gati e panjohur për shumëkënd, vitet e fundit plazhi i Tales ka filluar të frekuentohet dendur nga pushues edhe përtej Shqipërisë.

Në jug të zonës gjendet plazhi Tale 2, ende i pazbuluar nga shumica e turistëve. Ngjyra e rërës është e zezë dhe kjo tregon për vlerat kuruese të saj dhe faktin e mosshfrytëzimit.

Akoma më në jug, delta e lumit Mat prezanton një ambient natyror mjaft të këndshëm dhe atraktiv dhe të përshtatshëm për sportet e aventurës./atsh/KultPlus.com

Sipas një studimi, shëtitjet në plazh përmirësojnë shëndetin mendor

Posted on by Kult Plus

Një studim i kryer së fundmi tregon se kalimi i kohës në hapësira blu është i dobishëm për mirëqenien mendore. Ashtu si hapësirat e gjelbra, hapësirat blu paraqesin përfitime për shëndetin fizik dhe mendor.

Studimi tregon se të kalosh kohë pranë detit ndikon drejtpërdrejt në lumturinë e një individi. Studiuesit e Institutit të Shëndetit Global në Barcelonë kanë zbuluar se edhe vetëm një shëtitje e shkurtër në plazh mund të forcojë shëndetin mendor dhe të ndihmojë në trajtimin e depresionit, shkruhet në artikullin e përkthyer nga Tv Klan.

Autorja e studimit, Cristina Vert u shpreh: “Studimi ynë vlerëson efektet e menjëhershme të një shëtitje të shkurtër përgjatë një hapësire blu. Ekspozimi i vazhdueshëm dhe afatgjatë ndaj këtyre hapësirave mund të ketë efekte pozitive në shëndetin kardiovaskular. Përfitimet psikologjike të aktivitetit fizik ndryshojnë në varësi të llojit të mjedisit ku kryhet. Vëzhgimi ynë tregon se hapësirat blu ndihmojnë në largimin e depresionit’”.

Ndërsa koordinatori i kërkimit, Mark Nieuëenhuijsen shtoi: “Ne pamë një përmirësim të ndjeshëm në mirëqenien dhe gjendjen shpirtërore të pjesëmarrësve menjëherë pasi ata shkuan për një shëtitje në hapësirën blu, krahasuar me ecjen në një mjedis urban”. /KultPlus.com

Durrësi bëhet gati për të pritur pushuesit

Posted on by Kult Plus

Plazhi i Durrësit po bëhet gati për të pritur pushuesit, që pritet ta “pushtojnë” sapo të hiqen masat ndaj pandemisë.

Punonjës dhe makineri të rënda janë duke punuar përgjatë gjithë vijës bregdetare.

“Kemi disa ditë që po merremi me heqjen e leshterikut, jemi në përfundim të punës. Besoj se ditët e hënë përfundojmë komplet dhe plazhi pas dezinfektimit të ditës së hënë është gati për të pritur pushuesit”, ka thënë Alfred Dhuli, drejtori i Shërbimit komunal, për “TV Klan”.

Drejtoria e mirëmbajtjes thotë se i ka kapacitetet për të menaxhuar të gjithë vijën bregdetare nga Përroi i Agait deri tek Ura e Dajlanit, që është gati gjashtë kilometra e gjatë.

“Më 1 Qershor hapet sezoni dhe ne jemi thuajse gati e kemi infrastrukturën gati për të përballuar çdo lloj fluksi njerëzish. Ne i kemi marrë mjetet fondet, jemi në gatishmëri”, ka thënë kjo drejtori.

Në Durrës këtë vit plazhet private do të kenë vetëm hotelet, sipas numrit të dhomave që disponojnë. Ndërsa pjesa tjetër do t’i kthehet publikut, i cili do të duhet të respektojë distancën në vendosjen e çadrave.

Kryeministri i Shqipërisë, Edi Rama, kishte bërë të ditur se në fund të majit do të hapen kufijtë për kosovarët. Në anën tjetër, institucionet e Kosovës ende s’kanë bërë të ditur se kur mund të hapen kufijtë tokësorë. /KultPlus.com

Shëtitore e re për turistët në plazhin e kristaltë të Jalit

Posted on by Kult Plus

Plazhi i Jalit, rreth pesë kilometra larg nga rruga kombëtare Vlorë-Sarandë, në dalje të fshatit Vuno, është një prej destinacioneve të preferuara turistike për shumë shqiptarë dhe të huaj gjatë sezonit të verës.

Uji i detit Jon në këtë plazh jo shumë larg Dhërmiut, me ngjyrat e papërsëritshme të ujit, si bluja e thellë, jeshilja smerald, portokallia e ndezur në perëndim, janë një spektakël i vërtetë në këtë peizazh tipik mesdhetar.

I strukur thellë, mes kodrinave me ullinj e me shtëpitë e bukura të Vunoit mbi kokë, gjelbërimit të përhershëm të shkurreve, i rrethuar me shkëmbinj të lartë, që krijojnë gjire të vegjël e të mahnitshëm, plazhi i Jalit frekuentohet më shumë sidomos nga të rinjtë.

Falë një investimi të Bankës për Zhvillim të Këshillit të Europës (CEB) dhe të realizuar nga Fondi Shqiptar i Zhvillimit, këtë sezon turistik plazhi i Jalit do të ketë edhe shëtitoren e re, ku pushuesit vendas e të huaj do të kenë mundësi të shijojnë spektaklin e perëndimit të diellit në shëtitjet e pasdites.

Kryetari i bashkisë së Himarës, Jorgo Goro, tha për ATSH-në se “kjo shëtitore do të përfundojë para muajit qershor të këtij viti, në mënyrë që të vihet në dispozicion të pushuesve”.

“Ky investim së bashku me projektin për kthimin si fshatra historikë të Dhërmiut dhe Vunoit, si dhe shëtitoren e Dhërmiut, kap shifrën e rreth 7-8 milionë euro”, theksoi Goro, shkruan atsh.

Sipas tij, këto investime do të bëjnë që plazhet e jugut të tërheqin sa më shumë turistë pranë tyre.

Plazhi i Jalit është nga vendet më të bukura dhe të veçanta për ujin, rërën, klimën dhe jodin e detit. Një parajsë natyrore e vizatuar si nga dora e njeriut, plazhi i Jalit, është një nga atraksionet kryesore të të gjithë krahinës, falë peizazhit mahnitës, plazheve të pastra me rërë të bardhë dhe ujërave të kristalta.

Famën dhe emrin plazhi i Jalit e krijoi që kur u zgjodh nga elita ushtarake gjatë viteve 70-të, për t’u ndërtuar qendra e pushimeve për ushtarakët, e cila vazhdon të funksionojë edhe sot si e tillë.

Bukuria e gjirit do t’iu bëjë për vete që lart në kodër, vend i cili i bën të gjithë të ndalojnë për të shkrepur fotografi. Kjo është edhe arsyeja se pse në internet fotot më popullore të Jalit, janë pikërisht ato të gjirit nga maja e kodrës./ KultPlus.com