Ura e Vashës ndodhet mbi lumin Mat mes Klosit dhe fshatit Guri i Bardhë, 200 metra linear nga rruga e Arbërit.
Ajo u ndërtua në fillim të shekullit të 18-të si vepër bamirësie nga familja Skura. Ura është ndërtuar me gurë e llaç gëlqeror dhe ka hark në krahun e djathtë dhe një dritare shkarkuese. Gjithashtu, ura ka qemer të dyfishtë. Këmbët e urës janë vendosur mbi dy brigje shkëmbore.
Gjatësia e urës është 11 metra, lartësia e saj nga sipërfaqja e ujit është 7 metra, gjerësia 2.8 metra dhe largësia mes dy këmbëve është 7 metra. Sipërfaqja e urës është shtruar me kalldrëm me gurë lumi, llaç gëlqereje dhe rasa guri.
Ura vizitohet nga shumë turistë shqiptarë e të huaj dhe është një nga pasuritë e trashëguara të kësaj treve. E ndodhur pranë Rrugës së Arbrit, kjo urë bart vlera të mëdha historike në një peizazh të mrekullueshëm natyror. Ura e Vashës është një ndër urat më të vjetra të këtij stili të ndërtuar në Shqipëri. Pikërisht në afërsi të Urës së Vashës, është ndërtuar ura më e madhe të Rrugës së Arbrit që lidh dy shpatet e malit.
Rruga e Arbrit ka gjithsej 6 ura, por ajo më e madhja e më e rëndësishmja është Ura e Vashës e cila kalon mbi lumin Mat dhe bashkon fshatin Fshat me Planin e Bardhë, në Bashkinë e Klosit, si për të thënë se historia përsëritet. Një urë që jeton ndër shekuj për të dëshmuar rëndësinë e lidhjes së kësaj treve me qytetërimin dhe sot një urë një ndër më të mëdhatë në vend që do nxit zhvillimin e zonës./atsh/KultPlus.com
E dashur , erdha E dashur erdha! Pse vrenjtesh kot? Ti po më prisje përsëri, mos u çudit, unë jam një zog.
Kur dashuroj bëhem si ajri, e ngre folenë aty ku dua! Do, s’do, të futem në kraharor, të pushtoj si i marri. Po e mbylle derën, unë me forcë do ta hap, do ta coptoj!
Do bësh sikur më ke inat. Ndodhi e vjetër, unë e di! S’jam buzëqumësht, por esnaf, për dashurinë di plot dredhi! Unë do të puth, do të pushtoj në gji, dhe po ma mbylle derën ti.
E dashur, erdha, në prag ke dalë, ke hapur portën dhe qesh nën hundë. Sa përbetohesh me qindra fjalë, më mirë, eja, më puth!
Kur dashuroj bëhem si ajri, e ngre folenë aty ku dua! Do, s’do të futem në kraharor, të pushtoj si i marri. Po e mbylle ti derën, unë me forcë do ta hap, do ta coptoj!
E dashur, erdha, pse vrenjtesh kot, ti po më prisje përsëri. Mos u çudit! Unë jam një zog. Po e mbylle ti derën, unë me forcë do ta hap, do ta coptoj!/KultPlus.com
Aktori Tony Sirico, i njohur për rolin e tij si një grup mafioz në The Sopranos, ka vdekur më 9 korrik 2022, në moshën 79-vjeçare.
Aktori i Hollywood Michael Imperioli, i cili luajti Christopher Moltisanti, kishte drejtuar homazhet në nder të tij.
“Toni ishte si askush tjetër. Ai ishte po aq i ashpër, besnik dhe me zemër të madhe sa kushdo që kam njohur ndonjëherë. Jam krenar të them se kam bërë shumë punën time më të mirë dhe më argëtuese me shokun tim të dashur Tony. Do të më mungojë përgjithmonë. Ai është me të vërtetë i pazëvendësueshëm”, kishte shkruar ai.
Sirico ishte 55 vjeç dhe flinte në një krevat fëmijësh në shtëpinë e nënës së tij në Brooklyn, kur iu caktua roli ikonik që do t’i jepte atij dy çmime Screen Actors Guild, raporton BBC.
Ai luajti gangsterë në më shumë se një duzinë filma të tjerë të mafias, duke përfshirë Goodfellas të Martin Scorsese.
Sirico lindi në Brooklyn, Nju Jork, dhe u arrestua 28 herë, duke kaluar dy periudha në burg. /NOA /KultPlus.com
Gjiri i Gramës, i ndodhur në Gadishullin e Karaburunit, është një nga plazhet më spektakolare të jugut të Shqipërisë, një perlë që tërheq çdo vit mijëra turistë vendas dhe të huaj.
Gjiri Gramës, i fshehur në vijëzimin bregdetar të Karaburunit, është kthyer një ndër destinacionet e preferuara nga turistët vendas dhe të huaj në bregdetin e jugut të Shqipërisë.
Ministrja e Turizmit dhe Mjedisit, Mirela Kumbaro ndau në rrjete sociale pamje nga gjiri, i cili mund të rroket përmes hiking apo varka.
Gjiri i Gramës gjendet në rrëzën e shpatit perëndimor të malit Rrëza e Kanalit, në perëndim të qytezës së Orikumit në rrethin e Vlorës.
Gjiri detar futet disa qindra metra në tokë, ku formon një bregdet shkëmbor me foleza. Aty ka dhe disa shpella nënujore.
Peizazhi natyror është shumë tërheqës për çdo vizitor. Ky gji është përdorur shumë për mbrojtjen e anijeve nga furtuna në det.
Gjithashtu ai është përdorur gjatë në Antikitet si gurore. Gurorja e Gramës është mjaft e njohur që në lashtësi.
Detarët që strehonin aty anijet, punëtorët që nxirrnin blloqe shkëmborë që përdoreshin për ndërtim në qytetet ilire e më gjerë, kanë gdhendur edhe emrat në faqet shkëmbore e shumë të dhëna të tjera që bëjnë kureshtar vizitorin.
Ndaj dhe shpesh shpella që ndodhet aty emërtohet si “shpella e shkrimeve”. Arkeologët i kanë studiuar dhe kanë shkruar për këto dokumente historike të gdhendura në shkëmb.
Vlerat e këtij monumenti natyror janë shkencore, historike, kulturore e turistike. Por sot ky gji i bukur detar shfrytëzohet si një plazh i vogël e intim. Drejt tij shkohet me rrugë tokësore, por edhe detare. Shfrytëzohet nga aventurierët e ujit dhe të shpellave./atsh/KultPlus.com
“Rock and roll-i” është magji dhe si me një magji, Liam dhe Noel Gallagher, dy vëllezërit legjendarë të grupit Oasis, u rikthyen bashkë në skenë, duke e bërë realitet një nga ribashkimet më të shumëpritura në historinë e muzikës moderne.
“Kjo nuk është një provë. Po ndodh vërtet, Cardiff,” shfaqej në ekranet gjigante të stadiumit Principality, ndërsa tituj gazetash dhe reagime nga rrjetet sociale pasonin njëri-tjetrin, duke rikujtuar lajmin që tronditi botën e muzikës, Oasis janë bashkuar pas 16 vitesh. Plot 5.795 ditë kishin kaluar që nga koncerti i tyre i fundit.
Koncerti nisi me këngën “Hello”, një përshëndetje simbolike ndaj publikut pas një mungese të gjatë. Më pas, “Acquiesce”, një këngë ku të dy vëllezërit ndajnë vokalin, solli një mesazh domethënës për publikun. Sidoqoftë, për 70 mijë fansat e mbledhur në stadium, ajo natë ishte më shumë se një koncert, ishte një udhëtim emocional në të kaluarën, në ëndrrat dhe iluzionet e një brezi të tërë.
Noel, me një këmishë xhinsi dhe një qëndrim të sigurt, dominonte skenën. Liam, si gjithmonë, i qëndrueshëm para mikrofonit, mbetej magnetik. Në një moment, para këngës “Cigarettes & Alcohol”, ai u kërkoi të gjithëve të kthenin shpinën dhe të përqafoheshin. Askush nuk e kuptoi pse, por të gjithë e bënë. Ky është ndikimi i një frontmeni të vërtetë.
Edhe pse kontaktet mes dy vëllezërve ishin të kufizuara, një përqafim i përmbajtur mjaftoi për të treguar se, të paktën për atë natë, tensionet ishin lënë mënjanë. Bashkë me ta në skenë ishin Andy Bell, Gem Archer, Paul “Bonehead” Arthurs dhe Joey Waronker. “Supersonic” ndezi atmosferën, përpara se Liam të largohej për një pushim, dhe Noel të merrte drejtimin me këngë më të qeta si “Talk Tonight”, “Half the World Away” dhe “Little By Little”.
Rikujtojmë se ndarja e grupit ndodhi në vitin 2009 në Paris, pas një sherri të ashpër, ku Liam, sipas raportimeve, thuhet se kishte goditur me kitarë në drejtim të vëllait të tij. Që atëherë, marrëdhënia mes tyre u karakterizua nga heshtja, thumbat dhe armiqësia publike, si dhe një boshllëk i thellë në skenën e rock-ut.
Kjo mungesë e gjatë shkaktoi një etje të jashtëzakonshme mes fansave: për koncertet e para në Britani dhe Irlandë u regjistruan mbi 10 milionë kërkesa nga 158 vende për vetëm 900 mijë bileta, çka solli një rritje të çmendur të çmimeve për shkak të sistemit të çmimeve dinamike.
Tani janë planifikuar 41 koncerte deri në fund të nëntorit, në Amerikën e Veriut dhe të Jugut, Azi dhe Oqeani. Europa pritet të përfshihet në turne gjatë verës 2026.
Cardiff u përfshi nga entuziazmi: 150 mijë persona në dy net, trenat nga Londra të tejmbushur, familje me fëmijë që nuk kishin lindur kur Oasis u ndanë, birra, fanella vintage dhe kapelat klasike nëpër çanta. Liam rikthehet për të kënduar “Stand By Me”, e kthyer në një kor masiv plot emocione. “Live Forever” iu dedikua futbollistit të ndjerë të Liverpool-it, Diego Jota. Pastaj erdhën bis-et e pandalshme: “Don’t Look Back in Anger”, “Wonderwall” dhe “Champagne Supernova” — himne të një brezi të tërë, që tingëllojnë po aq të fuqishme edhe pa “katalizatorët” e dekadës së kaluar.
Ky koncert ishte një udhëtim në vitet ‘90, kohët e “Cool Britannia”, kur Londra ishte epiqendra kulturore e botës. Epoka e përplasjes Blur-Oasis, Tony Blair dhe modelit të ri politik, shefëve si Gordon Ramsay që ktheheshin në yje televizivë, letërsisë pop të Nick Hornby dhe Irvine Welsh, dhe artit të Damien Hirst.
Në qendër të koncertit ishin dy albumet e parë dhe më të famshëm të Oasis, Definitely Maybe (1994) dhe (What’s the Story) Morning Glory? (1995), ky i fundit që pritet të ribotohet në një edicion festiv këtë vjeshtë.
Për një natë, përtej Brexit-it, politikës dhe zhgënjimeve të kohëve moderne, yjet e vërteta të rock and roll-it ishin sërish ata Liam dhe Noel Gallagher./KultPlus.com
U bënë njëqind vjet pa ta parë fytyrën pa çuar krahun tim përreth belit tënd pa vështruar fytyrën time në sytë e tu u bënë njëqind vjet që s’i bëj më pyetje dritës së shpirtit tënd pa e prekur ngrohtësinë e barkut tënd.
U bënë njëqind vjet që kur një grua më pret në një qytet. Bashkë vareshim mbi të njëjtën degë, mbi të njëjtën degë ramë, ne u ndamë, mes nesh plot një qindvjeçar në kohë dhe në hapësirë. U bënë njëqind vjet që në gjysmëhije rend mbas teje.
Je dehja ime Nga ty s’u esëllova dot S’mund të esëllohem S’dua fare të esëllohem
Koka që më rëndon Gjunjt’ e gërvishtur Rrobat e ndotura Shkoj drejt dritës që ndriçon dhe shuhet tek lëkundem, bie, sërish në këmbë ngrihem.
*
Përktheu nga frëngjishtja: Edon Qesari /KultPlus.com
Elbasani mirëpriti një ngjarje të veçantë artistike këtë korrik, me koncertin “Virtuozët”, që solli në skenë disa prej instrumentistëve më të talentuar të skenës muzikore shqiptare.
“Virtuozët” po realizohet nën drejtimin artistik të Desart Shëmilit. Koncerti i parë u zhvillua mbrëmë në mjediset historike të Muzeut Etnografik, me pjesëmarrjen e violinistit të njohur Zeqir Sulkuqi dhe interpretimet e artistëve elbasanas. Mbrëmja e dytë vijon sonte te Kulla Hotel “Guri”, ku do të performojë Kuarteti i Harqeve “Mansius”, me një program të përzgjedhur nga repertori klasik ndërkombëtar.
Publiku do të ketë mundësinë të shijojë vepra të njohura nga kompozitorë të mëdhenj, të interpretuara me pasion, dhe frymëzim nga emra të spikatur të muzikës klasike shqiptare.
Koncerti “Virtuozët” vjen si një iniciativë për të afruar artin cilësor me publikun e Elbasanit dhe për të kthyer hapësirat muzeale dhe historike në skena të gjalla të kulturës./atsh/KultPlus.com
Katër aktet e veprës ‘Carmen’ të kompozitorit francez Georges Bizet do të interpretohen në Prishtinë më 22 dhe 24 korrik, nën organizimin e Operës së Kosovës, në ambientet e AMC Hall.
Opera ‘Carmen’, e adoptuar nga novela e Prosper Mérimée, është një nga veprat më ikonike të muzikës klasike dhe realizmit në operë dhe mbetet një nga kryeveprat më të interpretuara në gjithë botën.
Ndërkaq sot Opera e Kosovës ka prezantuar Ofnian Drafanoff si regjisor të operës ‘Carmen në Prishtinë.
Në vijim KultPlus ua sjell njoftimin e Operës së Kosovës:
Opera e Kosovës ka nderin të prezantoj OGNIAN DRAGANOFF si regjisor të operës „Carmen“
Ognian Draganoff është regjisor bullgar me karrierë të gjatë dhe të pasur në teatrin operistik. Ai studioi performancë muzikore dhe regji operistike në Bullgari me Plamen Kartaloff dhe Vanya Bachvarova, duke u diplomuar në Akademinë Shtetërore të Muzikës “Panço Vladigerov” në Sofje, në klasën e Pavel Gerdzhikov. U specializua më tej në Opera du Rhin në Strasburg nën drejtimin e Albert-André Lheureux.
Pas një periudhe si anëtar i Orkestrës së Operës Kombëtare të Sofjes, ai u përkushtua regjisë dhe menaxhimit artistik. Nga viti 1996 deri në 2002 shërbeu si drejtor i përgjithshëm i Operës Kombëtare të Sofjes. Ka qenë gjithashtu drejtor i ftuar dhe rezident në shtëpi operistike në Greqi, Maqedoni dhe Rumani (2008–2012), si dhe drejtor kryesor i Operës në Sarajevë në të njëjtën periudhë.
Nga viti 2013 deri në 2015 drejtoi Operën Shtetërore Ruse në Bullgari, ndërsa prej vitit 2015 është drejtor i Operës Shtetërore të Stara Zagorës. Me mbi 80 produksione operistike në repertorin e tij, Draganoff njihet për vizionin e tij regjisorial dhe për shfaqje që janë prezantuar me sukses në shumë skena të Evropës Perëndimore, veçanërisht në Holandë./KultPlus.com
Perëndim i vagëlluar mi Liqerin pa kufir Po përhapet dal-nga-dale një pluhúrë si një hije. Nëpër Mal e nër Lëndina shkrumb’ i natës që po bije, Duke sbritur që nga qjelli përmi fshat po bëhet fir…
E kudó krahin’ e gjërë më s’po qit as pipëlim: Në katund kërcet një portë…në Liqer heshtë një lopatë… Një shqiponjë-e arratisur fluturon në Mal-të-Thatë… Futet zemra djaloshare mun në fund të shpirtit t’im.
Tërë fisi, tërë jeta, ra… u dergj… e zuri gjumi… Zotëroj më katër anë errësira… Po tashi: Dyke nisur udhëtimin mes-për-mes nër Shqipëri, Drini plak e i përrallshëm po mburon prej Shëndaumi…/KultPlus.com
Parku Natyror i Porto Palermos është një nga zonat më të bukura të bregdetit shqiptar, mes ujërave të kristalta të Jonit.
Plazhet e kristalta dhe natyra e paprekur plotësojnë një ofertë të përkryer për të gjithë vizitorët, qofshin vendas apo të huaj. Shumë shpejt ky vend special, i cili është kthyer në një skenë të përkryer për evente kulturore dhe artistike, do të mikpresë edicionin e pestë të Porto Palermo Festival, ideuar nga violinisti i mirënjohur Olen Cesari.
Festivali sjell çdo vit artistë virtuozë si dhe vizitorë nga e gjithë bota, për të ndjekur festivalin e njëkohësisht për të zbuluar këtë vend duke ndjerë frymën e historisë në çdo cep, shkruan atsh.
Festivali zhvillohet në kalanë e ndërtuar nga Ali Pashë Tepelena në fillim të shekullit të 19-të, si dhuratë për gruan e tij, Vasiliqinë. Arkitektura e veçantë e kalasë tregon për mjeshtërinë e ndërtimit dhe inteligjencës strategjike. Nga kullat e larta dhe muret mbrojtëse syri sheh një horizont të pafund, ku deti dhe qielli bashkohen në një pamje mahnitëse./KultPlus.com
Ministria e Kulturës, Rinisë dhe Sportit ka publikuar rezultatet preliminare për OJQ, në thirrjen publike për përkrahje të projekteve në Art, Kulturë dhe Trashëgimi Kulturore.
Një makinë elektrike nga prodhuesi amerikan “Lucid” ka thyer rekordin për udhëtimin më të gjatë me një karikim të vetëm, duke udhëtuar nga qyteti zviceran i Saint Moritz-it përmes Austrisë në qytetin jugor gjerman të Mynihut.
Kompania tha sot se automjeti përshkroi gjithsej 1,205 kilometra, duke tejkaluar Rekordin Botëror të mëparshëm të Guinness-it prej 1,045 kilometrash – të arritur nga një Mercedes në Japoni në qershor.
Modeli “Lucid Air Grand Touring” vendosi rekordin e ri fundjavën e kaluar.
“Ky rekord i autonomisë përfaqëson një moment të rëndësishëm. Është një tjetër demonstrim i qartë i avantazhit teknologjik që përcakton “Lucid”, tha nënkryetari i lartë Eric Bach, duke argumentuar se teknologjia e kompanisë lejon që një automjet “Lucid” të udhëtojë më tej me më pak energji sesa çdo automjet tjetër.
“Kompania me qendër në Silicon Valley është pak e njohur në Evropë, me rreth 500 automjete elektrike të regjistruara në Gjermani”, sipas shifrave zyrtare në muajin prill.
Modeli “Air Grand Touring” është i shtrenjtë, me një vlerë rreth 130,000 euro (152,000 dollarë).
Ekspertët e industrisë gjermane reaguan me kujdes ndaj shifrës rekord.
Ferdinand Dudenhoffer nga Qendra për Kërkime Automobilistike theksoi se autonomia e automjeteve të reja elektrike është përmirësuar ndjeshëm gjatë tre ose katër viteve të fundit dhe nuk është më shumë larg autonomisë së një automjeti me naftë.
Përveç kësaj, kohët e karikimit po bëhen gjithnjë e më të shkurtra. Si rezultat, aspekti i autonomisë po bëhet më pak i rëndësishëm për të bindur klientin për të blerë mjetin./KultPlus.com
Ministri për Ekonominë, Kulturën dhe Inovacionin, Blendi Gonxhja, zhvilloi sot një takim me Kryepeshkopin e Kishës Orthodhokse Autoqefale të Shqipërisë, Fortlumturinë e Tij, Joanin, me të cilin pati një bashkëbisedim të frytshëm mbi çështje me rëndësi të veçantë për misionin shpirtëror dhe rolin shoqëror të Kishës.
Në qendër të bisedës ishte rëndësia e aseteve dhe pavarësisë ekonomike në funksion të fuqizimit të kapaciteteve misionare, si dhe roli që mund të luajnë këto kapacitete në shërbim të komunitetit dhe trashëgimisë.
Ministri Gonxhja vlerësoi kontributin e deritanishëm të Kishës Orthodhokse në fushën kulturore, humane dhe sociale, duke shprehur angazhimin e Ministrisë për thellimin e bashkëpunimit në këto drejtime.
“I shpreha gatishmërinë e MEKI dhe vlerësimin për kontributet e derisotshme, duke nisur punën menjëherë për projektet në vijim. Mes vrapit të përditshëm ishte një ndalesë shpirtërore me shumë vlerë”, theksoi ministri. /KultPlus.com
Çdo fëmijë dhe i ri, nga mosha 5 deri në 17 vjeç do të mund të bëhet pjesë e një kampi unik veror, ku do të mësojnë si funksionon një set filmi, si zhvillohen provat për rolet dhe si realizohet një film artistik.
Kampi organizohet nga “Catalyst Story Institute” në Kinostudio dhe ofron mundësinë për të konkurruar në përzgjedhjen e aktorëve për një film të shkurtër amerikan që do të xhirohet këtë vit në Shqipëri.
Grup-moshat që do të përfshihen në këtë kamp veror janë: 5-8 vjeç, 9-12 vjeç dhe 13-17 vjeç.
Kjo do të jetë një përvojë e vyer për fëmijët të cilët do të mund të punojnë me regjisorë dhe producentë profesionistë nga Shtetet e Bashkuara të Amerikës dhe Shqipëria./KultPlus.com
A zverdhe fusha, e nder grunore Po velojne korrcat porsi zogj; Kendojne katundcat me malcore Pa u kujtue si dielli i dogj Vec n’at are, porsi nji e tretun Zi nder petka e ne fetyre terr Korre nji cuce pa shoqe,vetun Me hije t’vet qe mbrapa e merr Tjetra here tri vet e treta Korrshe o bij me motra n’shend Si vjet vetun tiu korr t’gjeta Pa nji moter, pa gazmend./KultPlus.com
Aktiviteti i përvitshëm veror “Open Cinema”, këtë sezon do të nisë nga qyteti i Gramshit.
Aktiviteti do të vazhdojë për tri net rresht, 10, 11 dhe 12 korrik. Filma, muzikë, artistë dhe kineastë të ftuar do të jenë pjesë e edicionit të nëntë të “Open Cinema”.
Mbrëmja e parë do të çelet me praninë e regjisorit të mirënjohur Esat Musliu, si dhe të aktorit të dashur për publikun Ndriçim Xhepa. “Open Cinema” do të sjellë filma të njohur për publikun. Nën sloganin “Kinemaja shëtitëse nëpër Shqipëri”, aktiviteti vazhdon të jetë urë mes brezave dhe një homazh i gjallë për trashëgiminë filmike.
Mbrëmjet e kinemasë shëtitëse do të shoqërohen me muzikë live, përpara çdo projeksioni nga një grup artistësh të njohur si Irma dhe Eranda Libohova, Maya Aliçkaj, Megi Laska, Liljana Kondakçi etj. Ndërsa violinistja virtuoze Aiola Leska do të sjellë kolonat zanore më të ndjera nga kinematografia shqiptare dhe ajo ndërkombëtare.
Fëmijët do të kenë gjithashtu hapësirën e tyre në këtë aktivitet, me animacionet shqiptare klasike dhe bashkëkohore që do të projektohen në ekranin e madh./atsh/KultPlus.com
Kryetari i Komunës së Ulqinit, Genci Nimanbegu, Drejtori i Përgjithshëm i Radio Televizionit të Malit të Zi, Boris Raoniq, Drejtori i Radio Televizionit të Kosovës, Hysen Hundozi, dhe Drejtoresha për Marrëdhënie me Jashtë dhe Projektet në Radio Televizionin e Shqipërisë, Ervjola Osmanaj, firmosën memorandumin e bashkëpunimit në fushën e medias dhe informimit publik.
Hapja e zyrës së përbashkët në Ulqin, ndërmjet mediave shtetërore të Malit të Zi, Shqipërisë dhe Kosovës, hap një kapitull të ri dhe përfaqëson një model bashkëpunimi rajonal në fushën e medias dhe informimit publik. Prezantimi i Ulqinit me vlerat e tij turistike, kulturore dhe natyrore do të jetë i pranishëm dhe më afër kryeqyteteve si Podgorica, Prishtina dhe Tirana./ KultPlus.com
“Identiteti” është tema e sivjetme e Festivalit të Arteve dhe Kulturës Tradicionale “EtnoFest” e që mbahet për të pesëmbëdhjetin vit me radhë në fshatin Kukaj.
Fillon më 10 korrik e do të zgjasë deri më 20 po të këtij muaji, dhe ky festival ka ngërthyer shumë ngjarje kultureore që do të prezantohen përgjatë këtyre ditëve.
Një prej projekteve kulturore që do të shfaqet në këtë edicion është edhe shfaqja “Engjëjt”, shfaqje me tekst të Odise Plakut e regji të Naser Shatrollit.
Kjo shfaqje do të prezantohet më 18 korrik, prej orës 20:00 si projekt mysfair nga Tirana, e që tashmë është vlerësyar me dy çmime në festivalin “Flasim shqip” në Tiranë: Regjia më e mirë dhe aktorja më e mirë si dhe çmimin “Grand Prix” shfaqja më e mirë në Festivalin Ndërkombëtar MONOAKT.
Drama flet për gratë kosovare dhe për fëmijët e pagjetur të Kosovës – më aktuale se aktualiteti! Dhe kjo shfaqje ka veçantinë e saj edhe për një ndërlidhje tjetër, pasi që protagonistët që realizuan këtë shfaqje vijnë nga tri vende të ndryshme. Tekstshkruesi Odise Plaku vjen nga Tirana, regjisori Naser Shatrolli nga Prishtina dhe aktorja e kësaj shfaqjeje Vefi Redhi vjen nga Athina.
Për programin e EtnoFest mund të vizitoni edhe linkun e këtij festivali që e gjeni më poshtë. / KultPlus.com
Akropoli do të qëndrojë i mbyllur të martën, për shkak të temperaturave shumë të larta që kanë përfshirë Greqinë.
Ministria e Kulturës në Greqi njoftoi se monumenti i njohur në Athinë do të mbyllet nga ora 13:00 deri në 17:00, sipas kohës lokale.
Temperatura deri në 42 gradë Celsius priten të martën në disa pjesë të Greqisë, ndërsa për disa rajone është shpallur alarmi i nivelit katër për zjarre – që nënkupton rrezik shumë të lartë.
Zjarre tashmë kanë shpërthyer edhe në vende të tjera të Evropës, si Franca dhe rajoni i Katalonjës në Spanjë, pak javë pasi këto zona u përballën me një valë të të nxehtit që shkaktoi edhe viktima.
Mbyllja e Akropolit të martën – kur në qytet priten temperatura deri në 38 gradë Celsius – nuk ndodh për herë të parë.
I nxehti ekstrem e ka detyruar mbylljen e këtij atraksioni të njohur edhe në qershor, edhe në korrikun e kaluar.
Autoritetet thanë se mbyllja bëhet për “sigurinë e punëtorëve dhe vizitorëve” në këtë vend, i cili vizitohet nga dhjetëra mijëra njerëz çdo ditë.
Gjatë vitit 2024, atë e vizituan gjithsej 4.5 milionë njerëz.
Ministria e Punës e Greqisë ka vendosur tashmë edhe një ndalesë të detyrueshme të punës për pesë orë për punëtorët që punojnë jashtë, në zonat ku temperaturat pritet të jenë të larta.
Vala aktuale e të nxehtit do të vazhdojë deri të mërkurën, me temperatura që do të arrijnë deri në 40-42 gradë Celsius në jug të vendit. Pastaj, nga e enjtja, temperaturat pritet të bien gradualisht.
Një valë e fortë nxehtësie goditi pjesën perëndimore dhe jugore të Evropës në fillim të kësaj vere, duke shkaktuar evakuime masive dhe shkatërrime të shtëpive dhe bizneseve.
Sipas Panelit Ndërqeveritar të OKB-së për Ndryshimet Klimatike, valët e të nxehtit janë duke u shtuar për shkak të ndryshimeve klimatike të shkaktuara nga njerëzit.
Ai paralajmëron se moti i nxehtë do të bëhet më i shpeshtë dhe më intensiv në të ardhmen, ndërsa temperatura globale vazhdon të rritet./REL
Në kuadër të projektit “Mirdita Junik” që funksionon si një urë bashkëpunimi Ndërkufitar mes Shqipërisë e Kosovës, organizohet edhe edicioni i dytë i festivalit “Kah Drita”.
Festivali “Kah Drita” është një festë dyditore që mbahet në Junik të Kosovës duke bashkuar muzikën, artin dhe kulturën në një përjetim të veçantë, ndërthurur mes bukurisë përrallore të bjeshkëve të Junikut dhe kulturës autentike të Dukagjinit.
Kjo festë, ku bukuria natyrore dhe trashëgimia, arti e kultura shkrihen në një harmoni të plotë mbahet në datat 19-20 korrik 2025, me performanca të paharrueshme të figurave më autentike të muzikës shqip.
Edicioni i dytë i festivalit do të hapet nga Agona Shporta e Ilir Bajri, më 19 korrik, në ora 18:00 në Junik, me një performancë të larmishme kulturash e tingujsh. Kjo performancë, duke përfshirë edhe këngë të folklorit shqiptar shënjon një udhëtim të veçantë muzikor të artistëve.
Nga ora 19:00, në Kullën e Isufajve, tingulli do të përjetësohet në vargje poezish. Në skenë do të ringjallen edhe njëherë poezitë e Din Mehmetit, me interpretim nga Alban Krasniqit.
Përpos Kullës së Isufajve edhe Amfiteatri i Moronicës do të gëzojë shpërfaqjen kulturore dhe muzikore me bendin “BLLA BLLA BLLA” , grupi rok shqiptaro-maqedonas nga Shkupi, me performancë nga ora 21:00.
Në po të njëjtën datë dhe vend në orën 22:00 do të jemi nën tingujt më të veçantë të muzikës shqipe nga Dren Abazi dhe Zig Zag Orchestra. Dren Abazi me orkestër do të vjen bashkë me origjinalitetin dhe energjinë, me multikulturalitin që bart arti i tyre muzikor, i servuar edhe në skena të ndryshme në gjithë botën.
Kurse me datë 20 korrik, në kuadër të laramanisë kulturore, do të performojë grupi “Rilindja” në ora 19:00 në Kullën e Isufajve, duke sjellë këngë që burojnë nga zemra dhe rrënjët kulturore.
Në këtë llojllojshmëri muzike dhe kulture festivali “Kah Drita” do të mbajë dy netët më të magjishme në Junik. “Kah Drita” niset prej motos “T’andrrum prej zanave t’veshuna me t’bardha që knonin maleve n’tingujt e lahut’s e ladronin nëpër fusha”, për të arritur kështu te drita e vërtetë e kulturës, te rrënjët, te zanat me lahuta, te artisët me kryeveprat e tyre./ KultPlus.com
Zeqirja Rexhepi tash e shumë vite është aktiv në komunitetin artistik, i cili shumë shpesh është prezantuar me ekspozita personale e kolektive për audiencën kanadeze, por një gjë e tillë i ka munguar për vendlindjen e tij, pasi që bashkë me familjen e tij ishte dëbuar nga forcat serbe, në vitin 1999, dhe prej atëherë artin e tij e ka zhvilluar përtej oqeanit.
Por ëndrra e tij po merr formë, pikërisht më 15 korrik do të prezantohet me ekspozitë retropsektive, i cili nëpërmjet kësaj ekspozitë po shënon edhe 45 vjetorin e krijimtarisë e 70-të vjetorin e lindjes.
Me kurator Avni Xh Behluli, ekspozita “Zeqa” do të hapet në Galerinë e Arteve në Gjilan dhe do të rri e hapur deri më 28 korrik të këtij viti. Hapja e ekspozitës do të bëhet në ora 19:30./ KultPlus.com
Më 8 korrik të vitit 2008 qyteti i Beratit iu bashkëngjit listës së trashëgimisë botërore të UNESCO-s.
Berati, për shkak të objekteve muzeale me vlera të mëdha kombëtare, ishte shpallur qytet-muze që në vitin 1961. Kalaja e Beratit, ura me 7 harqe e Goricës, katedralja “Fjetja e Shën Mërisë”, Muzeu Onufri, Epitafi i Gllavenicës, Kodiku i Purpurt i Beratit etj, përbëjnë pasurinë historike të qytetit 2400-vjeçar.
Pas hyrjes në UNESCO (Organizatës për Edukim, Shkencë dhe Kulturë të Kombeve të Bashkuara), ku vendi ynë aderon që prej vitit 1958, qyteti i “një mbi një dritareve” do të promovonte vlerat monumentale dhe do të përfaqësohej ndërkombëtarisht së bashku me qytetin e Gjirokastrës, si një sit i vetëm për shkak të ngjashmërisë arkitektonike dhe historike.
Berati, sipas UNESCO-s është dëshmitar i bashkëjetesës së komuniteteve të ndryshme fetare dhe kulturore përgjatë shekujve. Në kriterin e tretë të arsyes së nënshkrimit të Beratit në UNESCO shprehimisht thuhet se; Berati dhe Gjirokastra janë një dëshmi e shquar e diversitetit të shoqërive urbane në Ballkan, dhe të jetëgjatësisë së mënyrave të jetës të cilat sot pothuajse janë zhdukur.
Kriteri i katërt thotë se dy qytetet e Beratit dhe Gjirokastrës janë dëshmi e jashtëzakonshme për llojet e ndryshme të monumenteve dhe banesave popullore urbane gjatë periudhës Klasike Osmane, në vazhdimësi me kulturat mesjetare që e paraprinë atë. Ky është një vlerësim mjaft i rëndësishëm për qytetin e Beratit i cili renditet kështu midis 600 vendeve të botës që janë në UNESCO si rrjedhojë e trashëgimisë së tyre universale./ KultPlus.com
Në amfiteatrin e Fakultetit të Edukimit të UP-së u zhvillua ceremonia e hapjes së edicionit të 24-të të Universitetit Ndërkombëtar Veror të Prishtinës.
Gjatë dy javëve në vijim, pjesëmarrësit do të ndjekin kurse që variojnë nga lidershipi i brezit Z e teknologjitë financiare, te inteligjenca artificiale, arkeologjia, efektet speciale filmike dhe drejtësia tranzicionale.
Rektori i Universitetit të Prishtinës, prof. Arben Hajrullahu, në fjalën e tij para të pranishmëve, shprehu mirënjohjen për profesorët dhe studentët vendorë e ndërkombëtarë që i janë bashkuar këtij edicioni për të ligjëruar dhe mësuar. Ai theksoi se Universiteti Ndërkombëtar Veror përfaqëson ambasadorin kryesor të ndërkombëtarizimit të UP-së, duke qenë jo vetëm një platformë akademike, por edhe një hapësirë për ndërtimin e miqësive të reja dhe shkëmbimeve kulturore e shoqërore.
Duke uruar mirëseardhjen e mysafirëve nga bota akademike ndërkombëtare, rektori Hajrullahu ndau me ta një këshillë miqësore: që gjatë vizitës në Prizren të ndalen te shatërvani dhe të pinë ujë aty, sepse, sipas legjendës, kush e bën këtë, rikthehet patjetër në Kosovë.
Ai gjithashtu inkurajoi profesorët dhe studentët ndërkombëtarë që t’i përqafojnë shijet dhe tingujt e kulturës vendase: të shijojnë flinë tradicionale, të përjetojnë meloditë karakteristike të çiftelisë dhe të zbulojnë simbolin antik të Prishtinës, „Hyjnesha në Fron”.
Në ceremoni foli edhe zëvendësministrja në detyrë e Punëve të Jashtme, Liza Gashi, ndërsa për nder të të ftuarve, prof. Dukagjin Muhaxheri nga Fakulteti i Arteve interpretoi disa melodi me saksofon.
Profesorët ndërkombëtarë të edicionit të 24-rt të Universitetit Veror të Prishtinës vijnë nga Japonia, Polonia, Spanja, Franca, Greqia, Turqia, Britania e Madhe, Gjermania dhe Italia. Po ashtu, mbi 130 studentë të huaj marrin pjesë, duke përfaqësuar vende të ndryshme të Evropës dhe kontinente të tjera./ KultPlus.com
Muzika, duke qenë një ndër shtyllat kryesore të zhvillimit të kulturës dhe artit në përgjithësi, arrin të lë gjurmë me elementet determinuese të saj. Një zhvillim i tillë i muzikës si art e kulturë vjen me festivalin “International Opera Festival” organizuar tash e pesë vjet nga tenori Rame Lahaj.
Edicioni i pestë i “Rame Lahaj International Opera Festival” vjen me moton “Ëndrra pa kufi, Opera pa mure”, duke përçuar kështu jo vetëm një moto por edhe përpjekjen për të promovuar frymën muzikore të Kosovës.
Ky festival i organizuar nga data 23 korrik deri më 2 gusht, për plot 10 ditë do të promovojë aktivitete muzikore e të larmishme për pjesëmarrësit dhe dashamirët e artit të muzikës. Për herë të parë Kosova gëzon festivalin edhe në komuna tjera përpos Prishtinës, si në Pejë e Mitrovicë. Festivali kurorëzohet me mbrëmjen e Gala Night më 2 gusht, mbrëmje që do të prezantohet prej orës 20:30, në sheshin Sënderbeu në Prishtinë.
Gala Night “Rame Lahaj &Friends” ka rezervuar për pjesëmarrësit një mbrëmje të paharrueshme me performancën madhështore të Nino Machaidze, një prej artisteve dhe sopranove që ka interpretuar në skenat më të mëdha botërore. Performanca e muzikës së lartë klasike do të na sjell edhe figura të tjera të shquara si Dario Russo një bas italian i specializuar në repertorin bel canto, Rame Lahaj dhe dirigjenti Roberto Rizzi Brignoli, i cili edhe do të dirigjojë mbrëmjen e festës së artit.
Motoja “Rame Lahaj & Friends” i thërret jo vetem idesë së promovimit të kulturës klasike por edhe më gjerë, bashkimit të kulturave të ndryshme si një e vetme. Andaj Gala Night përpos rëndësisë muzikore, bart edhe rëndësinë e bashkëpunimit ndërkombëtar.
Tri netët e para të festivalit, më 23 korrik në hapsirën e jashtme të Bibliotekës Kombëtare në Prishtinë, 24 korrik në American Retail Park Interex, Pejë dhe 25 korrik në Pikën kryesore Interex, Mitrovicë, do të vijnë me homazh për figurën madhështore të muzikës e kulturës shqipe, Nexhmije Pagarushës.
Përpos shpalosjes së vlerave muzikore shqipe, shohim se Lahaj synon të shpalos edhe kujtesën kolekive, ruajtjen dhe trashëgiminë e të kaluarës dhe personazhet kryesore që e përfaqësojnë. Arti i Pagarushës rikthehet edhe një herë i gjallë në skenë me pjesëmarrjen e artistëve të njohur brenda dhe jashtë vendit: Gala El Hadidi, Edona Reshitaj, Arbëreshë e Adhurim Grezda.
Kurse 27 korriku vjen me natën Educating the audience for the future, një natë kushtuar audiencës dhe publikut me ç’rast edhe shpërfaqet rëndësia edukative që ka festivali, ku pos të tjerave ofrohet edhe mundësia e aplikimit në Masterklasë Këndimi me mjeshtrin Ramon Vargas. Mundësi kjo që i hap rrugët për studiuesit e muzikës, nga datat 24 korrik deri më 29 korrik, si nata e New Generation, Univertiteti i Arteve në Prishtinë.
Më 28 korrik në orën 20:30 mbahet Opera Night në hapësiren e jashtme të Bibliotekës Kombëtare të Kosovës, dhe udhëhiqet nga një prej sopranove më të sukseshme të Kosovës në skenat ndërkombëtare, Marigona Qerkezi, e cila do të sjellë në skenën shqiptare kryevepra botërore nga Bellini, Verdi, Puccini, pjesë nga kompozitorë shqiptarë dhe tingujt satirikë të Bernstein-it dhe Gershëin-it.
Skena shqiptare e Kosovës dominohet nga yjet e skenës botërore edhe më 30 korrik. Në hapësirën e jashtme të Bibliotekës Kombëtare në Prishtinë, në 20:30, në skenë ngjitet edhe Anita Rachvelishvili.
Anita Rachvelishvili si artiste e shkëlqyer e Sony Classical përfshin albumet e shumëvlerësuara Anita ( 2018) dhe Elegie ( 2021), gjithmonë duke na dëshmuar aftësinë dhe ambiciet e rralla të zërit të saj. Ajo na paraqet prezencën e saj magjepsëse me zërin e saj për herë të parë në Kosovë e shoqëruar gjithashtu nga Ansambli i Festivalit Rame Lahaj.
Festivali i Rame Lahaj , si pjesë e ngjarjeve më të rëndësishme të muzikës, vjen edhe një herë me tërë madhështinë e tij në një përvjetor jubilar , duke kryqëzuar figurat ndërkombëtare nën rëndësinë muzikore dhe duke lënë gjurmë në organizimet kulturore në Kosovë dhe më gjerë./ KultPlus.com
